Hokohoko Atu ʻa e “Kofuʻaki Kimoutolu ʻa e Angaʻitangata Foʻoú” Hili ʻa e Papitaisó

1. Ko e hā ʻa e meʻa tefito ʻokú ne fakafuo hotau angaʻitangatá?

TATAU ai pē pe kuo tau papitaiso ʻi ha ngaahi ʻaho siʻi pē pe ʻi ha laui hongofuluʻi taʻu, ko kitautolu kotoa ʻoku tau loto ke maʻu ʻa e faʻahinga angaʻitangata ʻoku fakahōifua kia Sihová. Ke hoko ki he faʻahinga tokotaha ko iá, ʻoku fiemaʻu ke tau mapuleʻi ʻetau fakakaukaú. Ko e hā hono ʻuhingá? Koeʻuhí ko e meʻa tefito ʻokú ne fakafuo hotau angaʻitangatá ko ʻetau fakakaukaú. Kapau ʻoku tau fakakaukau maʻu pē ki he meʻa ʻoku fakamānako ki heʻetau ngaahi holi fakakakanó, te tau leaʻaki mo fai ʻa e ngaahi meʻa ʻoku kovi. (ʻEf. 4:17-19) ʻI he tafaʻaki ʻe tahá, kapau ʻoku tau fakafonu hotau ʻatamaí ʻaki ʻa e ngaahi fakakaukau lelei, ʻoku ngalingali ange te tau lea mo tōʻonga ʻi ha founga ʻoku fakahōifua ki heʻetau Tamaí, ʻa Sihova.​—Kal. 5:16.

2. Ko e hā ʻa e ongo fehuʻi te tau lāulea ki ai ʻi he kupu ko ení?

² Hangē ko ia naʻe lave ki ai ʻi he kupu ki muʻá, heʻikai lava ke tau taʻofi fakaʻaufuli ʻa e ngaahi fakakaukau koví mei heʻenau hū ki hotau ʻatamaí. Ka ʻoku lava ke tau fili ke ʻoua ʻe tōʻonga ʻo fakatatau ki he ngaahi fakakaukau ko iá. Ki muʻa ke tau papitaisó, ʻoku fiemaʻu ke tuku ʻetau lea mo tōʻonga ʻi he founga ʻoku fehiʻa ai ʻa Sihová. Ko e fuofua sitepu mahuʻinga taha ia ʻi hono huʻi atu ʻa e angaʻitangata motuʻá. Kae kehe, ke fakahōifua kakato kia Sihová, kuo pau foki ke tau talangofua ki he fekau: “Mou kofuʻaki kimoutolu ʻa e angaʻitangata foʻoú.” (Kol. 3:10) ʻI he kupu ko ení, te tau tali ʻa e ongo fehuʻi ko ení: Ko e hā “ʻa e angaʻitangata foʻoú”? ʻE lava fēfē ke tau kofuʻaki ʻa e angaʻitangata foʻoú pea ʻoua ʻe toe vete?

KO E HĀ “ʻA E ANGAʻITANGATA FOʻOÚ”?

3. Fakatatau ki he Kalētia 5:22, 23, ko e hā ʻa e “angaʻitangata foʻoú,” pea ʻoku anga-fēfē hono kofuʻaki ia ʻe ha taha?

³ Ko e “angaʻitangata foʻoú” ko e fakakaukau ia mo e tōʻonga ʻi ha founga ʻoku tapua mai ai ʻa e ʻulungaanga ʻo Sihová. Ko ha tokotaha ʻokú ne kofuʻaki ʻa e angaʻitangata foʻoú ʻaki ʻene fakahāhā ʻa e fua ʻo e laumālie ʻo e ʻOtuá, ʻo fakaʻatā ʻa e laumālie māʻoniʻoní ke ne tākiekina ʻene fakakaukaú, ongoʻí mo e tōʻongá. (Lau ʻa e Kalētia 5:22, 23.) Ko e fakatātaá, ʻokú ne ʻofa kia Sihova mo ʻEne kakaí. (Māt. 22:36-39) Ko ha tokotaha pehē ʻokú ne tauhi maʻu ʻene fiefiá ʻi he fekuki mo e ʻahiʻahí. (Sēm. 1:2-4) Ko ha tokotaha fakamelino ia. (Māt. 5:9) ʻOkú ne anga-kātaki mo anga-lelei ʻi he fakafeangai ki he niʻihi kehé. (Kol. 3:13) ʻOkú ne ʻofa ʻi he meʻa ʻoku leleí pea fai ia. (Luke 6:35) ʻOkú ne fakamoʻoniʻi ʻi heʻene ngaahi tōʻongá ʻokú ne maʻu ʻa e tui mālohi ki heʻene Tamai fakahēvaní. (Sēm. 2:18) ʻOkú ne anga-malū ʻi hano fakaʻitaʻi pea fakahāhā ʻa e mapuleʻi-kitá ʻi hono fakataueleʻi iá.​—1 Kol. 9:25, 27; Tai. 3:2.

4. Ke kofuʻaki ʻa e angaʻitangata foʻoú, ʻe lava ke tau fakatupulekina taha taha ʻa e ngaahi ʻulungaanga ʻoku lave ki ai ʻa e Kalētia 5:22, 23? Fakamatalaʻi.

⁴ Ke kofuʻaki ʻa e angaʻitangata foʻoú, ʻoku fiemaʻu ke tau fakatupulekina ʻa e ngaahi ʻulungaanga kotoa ʻoku lave ki ai ʻa e Kalētia 5:22, 23 pea mo e ngaahi veesi kehe ʻi he Tohi Tapú.b Ko e ngaahi ʻulungaanga ko ení ʻoku ʻikai ke tau fakahāhā ia ʻo hangē ko e taimi ʻoku tau ʻai vala aí ʻoku tau tui taha taha hotau valá. Ko hono moʻoní, ko e ngaahi tafaʻaki ʻo e ngaahi ʻulungaanga ko ení ʻe lava ke hā mai ia ʻi he ngaahi ʻulungaanga kehé. Ko e fakatātaá, kapau ʻokú ke ʻofa moʻoni ʻi ho kaungāʻapí, te ke anga-kātaki mo anga-lelei kiate ia. Pea ke failelei loto-moʻoní, kuo pau ke ke anga-malū mo mapuleʻi-kita.

ʻE LAVA FĒFĒ KE TAU KOFUʻAKI ʻA E ANGAʻITANGATA FOʻOÚ?

5. ʻOku ʻuhinga ki he hā ʻa hono ‘maʻu ʻa e fakakaukau ʻa Kalaisí,’ pea ko e hā ʻoku totonu ai ke tau ako ki he moʻui ʻa Sīsuú? (1 Kolinitō 2:16)

⁵ Lau ʻa e 1 Kolinitō 2:16. Ke kofuʻaki ʻa e angaʻitangata foʻoú ʻoku fiemaʻu ke tau “maʻu ʻe kitautolu ʻa e fakakaukau ʻa Kalaisí.” ʻI hono fakalea ʻe tahá, kuo pau ke tau ako ʻa e founga fakakaukau ʻa Sīsuú pea faʻifaʻitaki leva kiate ia. ʻOku fakahāhā haohaoa ʻe Sīsū ʻa e fua ʻo e laumālie ʻo e ʻOtuá. Hangē ko ha sioʻata maʻa ʻāsinisini, ʻokú ne tapua tofu pē mai ʻa e ngaahi ʻulungaanga ʻo Sihová. (Hep. 1:3) Ko e lahi ange ʻetau fakakaukau ʻo hangē ko Sīsuú, ko e lahi ange ia ʻetau tōʻonga ʻo hangē ko iá pea te tau lavameʻa ange ai ʻi hono tapua atu hono ʻulungāngá.​—Fil. 2:5.

6. Ko e hā ʻa e ngaahi moʻoniʻi meʻa ʻoku totonu ke tau manatuʻi ʻi heʻetau feinga ke kofuʻaki ʻa e angaʻitangata foʻoú?

⁶ ʻOku malava moʻoni ke tau muimui ʻi he faʻifaʻitakiʻanga ʻa Sīsuú? Te tau fakakaukau nai: ‘ʻOku haohaoa ʻa Sīsū. Heʻikai ʻaupito lava ke u hangē ko iá!’ Kapau ʻokú ke ongoʻi pehē, manatuʻi ʻa e ngaahi moʻoniʻi meʻa ko ení. ʻUluakí, naʻe ngaohi koe ke ke hangē ko Sihova mo Sīsuú. Ko ia ʻe lava ke ke fili ke faʻifaʻitaki kiate kinaua, pea te ke lavameʻa ʻi ha tuʻunga. (Sēn. 1:26) Uá, ko e laumālie māʻoniʻoni ʻo e ʻOtuá ko e ivi mālohi taha ia ʻi he ʻunivēsí. ʻI he tokoni ʻa e laumālie māʻoniʻoní te ke fakahoko ai ʻa e ngaahi meʻa heʻikai ʻaupito lava ke ke fai ia ʻi he mālohi pē ʻoʻoú. Tolú, ʻoku ʻikai ʻamanekina mai ʻe Sihova ke ke fakahāhā haohaoa ʻi he taimí ni ʻa e fua ʻo e laumālie māʻoniʻoní. Ko hono moʻoní, kuo vaheʻi ʻe heʻetau Tamai ʻofá ha taʻu ʻe 1,000 maʻá e faʻahinga ʻoku nau ʻamanaki ke moʻui ʻi he māmaní ke nau hoko ai ʻo haohaoa. (Fkh. 20:1-3) Ko e meʻa ʻoku fiemaʻu ʻe Sihova meiate kitautolu ʻi he taimi ní ke tau fai hotau lelei tahá pea falala kiate ia ki ha tokoni.

7. Ko e hā te tau lāulea ki ai ʻi he taimi ní?

⁷ ʻE lava fēfē ke tau faʻifaʻitaki kia Sīsū? Te tau sivisiviʻi nounou ʻa e tafaʻaki ʻe fā ʻo e fua ʻo e laumālie ʻo e ʻOtuá. ʻI he tuʻunga taki taha, te tau vakai ki he meʻa ʻe lava ke tau ako mei he founga naʻe fakahāhā ai ʻe Sīsū ʻa e ngaahi ʻulungaanga ko iá. ʻI heʻetau fai iá, te tau lāulea ki he ngaahi fehuʻi ʻe niʻihi ʻe lava ke ne tokoniʻi kitautolu ke sivisiviʻi ʻa e fakalakalaka ʻetau kofuʻaki ʻa e angaʻitangata foʻoú.

8. Naʻe anga-fēfē hono fakahāhā ʻe Sīsū ʻa e ʻofá?

⁸ Ko e ʻofa loloto ʻa Sīsū kia Sihová naʻá ne ueʻi ia ke fai ʻa e ngaahi feilaulau maʻa ʻene Tamaí pea maʻatautolu. (Sione 14:31; 15:13) Naʻe fakamoʻoniʻi ʻe Sīsū ʻa e lahi ʻo ʻene ʻofa ki he kakaí ʻi he founga naʻá ne moʻui ai ʻi he māmaní. ʻI he ʻaho taki taha, naʻá ne anga-ʻofa mo manavaʻofa, naʻa mo e ʻi he taimi naʻe fakafepakiʻi ai ia ʻe ha niʻihi. Ko e founga tefito naʻá ne fakahāhā ai ʻene ʻofa ki he kakaí ko ʻene akoʻi kinautolu fekauʻaki mo e Puleʻanga ʻo e ʻOtuá. (Luke 4:43, 44) Naʻe toe fakamoʻoniʻi foki ʻe Sīsū ʻene ʻofa feilaulauʻi-kita ki he ʻOtuá mo e tangatá ʻaki ʻene loto-lelei ke faingataʻaʻia ʻi ha mate fakamamahi ʻi he nima ʻo e kau angahalá. Ko ia naʻá ne fakaava mai ai ʻa e hala ke tau maʻu kotoa ai ʻa e moʻui taʻengatá.

9. ʻE lava fēfē ke tau faʻifaʻitaki kia Sīsū ʻi hono fakahāhā ʻa e ʻofá?

⁹ Naʻa tau fakatapui kitautolu kia Sihova pea papitaiso koeʻuhi ko ʻetau ʻofa ki heʻetau Tamai fakahēvaní. Ko ia ai, hangē ko Sīsuú, ʻoku totonu ke tau fakahāhā ʻa e ʻofa kia Sihová ʻi he anga ʻo ʻetau fakafeangai ki he kakaí. Naʻe tohi ʻe he ʻapositolo ko Sioné: “Ko e tokotaha ʻoku ʻikai te ne ʻofa ki hono tokouá, ʻa ia kuó ne mamata ki aí, heʻikai lava ke ne ʻofa ki he ʻOtuá, ʻa ia kuo ʻikai ke ne mamata ki aí.” (1 Sio. 4:20) ʻE lava ke tau ʻeke hifo kiate kitautolu: ‘ʻOku ou fakatupulekina ha ʻofa loloto ki he kakaí? ʻOku ou fakafeangai manavaʻofa ki he niʻihi kehé, naʻa mo e taimi ʻoku nau anga-kovi mai aí? ʻOku ueʻi au ʻe he ʻofá ke ngāueʻaki hoku taimí mo e koloá ke tokoniʻi ʻa e niʻihi kehé ke nau ako fekauʻaki mo Sihova? ʻOku ou loto-lelei ke fai eni naʻa mo e ʻi he taimi ʻoku ʻikai houngaʻia ai ʻa e kakai tokolahi tahá ʻi heʻeku ngāué pe ʻi he taimi ʻoku nau fakafepakiʻi ai aú? ʻE lava ke u kumi ki ha ngaahi founga ke kau lahi ange ai ʻi he ngāue ngaohi ākongá?’​—ʻEf. 5:15, 16.

10. Naʻe anga-fēfē hoko ʻa Sīsū ko ha tokotaha fakamelinó?

¹⁰ Ko Sīsū ko ha tangata naʻe fakamelino. ʻI he fakafeangai kovi ʻa e kakaí kiate iá, naʻe ʻikai ke ne fetongi ʻa e koví ʻaki ʻa e kovi. Ka naʻá ne fai ʻa e meʻa lahi ange ai. Naʻá ne tamuʻomuʻa ke fakamelino pea fakalototoʻaʻi ʻa e niʻihi kehé ke nau fakaleleiʻi ʻenau fakakikihí. Ko e fakatātaá, naʻá ne akoʻi kinautolu kuo pau ke nau fakamelino mo honau tokouá kapau ʻoku nau loto ke tali ʻe Sihova ʻenau lotú. (Māt. 5:9, 23, 24) Pea naʻá ne toutou tokoniʻi ʻa e kau ʻapositoló ke fakaleleiʻi ʻenau fakakikihi pe ko hai ʻiate kinautolu naʻe lahi tahá.​—Luke 9:46-48; 22:24-27.

11. ʻE lava fēfē ke tau hoko ko ha tokotaha fakamelino?

¹¹ Ke hoko ko ha tokotaha fakamelino, ʻoku fiemaʻu ke tau fai ʻa e meʻa lahi ange ʻi he fakaʻehiʻehi pē mei hono fakatupunga ha fepaki. ʻOku fiemaʻu ke tau tamuʻomuʻa ke fakamelino mo e niʻihi kehé pea fakalototoʻaʻi hotau fanga tokouá mo e fanga tuofāfiné ke nau fakaleleiʻi ʻenau fetōkehekeheʻakí. (Fil. 4:2, 3; Sēm. 3:17, 18) ʻE lava ke tau ʻeke hifo kiate kitautolu ʻa e ngaahi fehuʻi ko ení; ‘Ko e hā ʻoku ou loto-lelei ke feilaulauʻi ke fakamelino ai mo e niʻihi kehé? ʻI hono fakalotomamahiʻi au ʻe ha tokoua pe ko ha tuofefine, ʻoku ou tukulotoʻi ʻa e ʻitá? ʻOku ou tatali ki he tokotaha ʻe tahá ke tomuʻa haʻu ʻo fakamelino pe ʻoku ou tamuʻomuʻa, neongo kapau ko e tokotaha ʻe tahá naʻá ne fakatupunga nai ʻa e palopalemá? ʻOku ou fakalototoʻaʻi ʻa e faʻahinga ʻoku ʻi ai haʻanau fetōkehekeheʻaki ke nau fakamelino ʻi heʻene feʻungamālié?’

12. Naʻe anga-fēfē hono fakahāhā ʻe Sīsū ʻa e anga-leleí?

¹² Naʻe anga-lelei ʻa Sīsū. (Māt. 11:28-30) Naʻá ne fakahāhā ʻa e anga-leleí ʻaki ʻene anga-fakaalaala mo ʻulutukua, naʻa mo e ʻi he ngaahi tuʻunga faingataʻá. Ko e fakatātaá, ʻi he kōlenga kiate ia ha fefine Finisia ke ne fakamoʻui ʻene tamá, naʻe ʻikai ke ne tali ʻa e ʻuluaki kole ʻa e fefiné, ka ʻi heʻene fakahāhā ʻa e tui lahí, naʻá ne anga-lelei ʻo fakamoʻui ʻene tamá. (Māt. 15:22-28) Neongo naʻe anga-lelei ʻa Sīsū, naʻe ʻikai ke ne fakavaivai. ʻI he taimi ʻe niʻihi naʻá ne fakahāhā ʻa e anga-leleí ʻaki ʻa e lea hangatonu ki he faʻahinga naʻá ne ʻofa aí. Ko e fakatātaá, ʻi he taimi naʻe feinga ai ʻa Pita ke fakalotosiʻiʻi ʻa Sīsū mei hono fai ʻa e finangalo ʻo Sihová, naʻe valokiʻi ia ʻe Sīsū ʻi he ʻao ʻo e kau ākonga kehé. (Mk. 8:32, 33) Naʻá ne fai ení, ʻo ʻikai koeʻuhí ke fakamaaʻi ʻa Pita, ka ke akoʻi ia pea ʻoatu ai ha fakatokanga ki he kau ākonga kehé ke ʻoua te nau hoko ʻo ʻafungi. ʻOku ʻikai ha veiveiua naʻe kiʻi ongoʻi fakamāʻia ʻa Pita, ka naʻá ne maʻu ʻaonga mei he akonakí.

13. ʻE lava fēfē ke tau hoko ʻo anga-lelei loto-moʻoni?

¹³ ʻI he taimi ʻe niʻihi, ko e hoko ʻo anga-lelei loto-moʻoni ki he faʻahinga ʻokú ke ʻofa aí, ʻe fiemaʻu nai ke ke lea hangatonu kiate kinautolu. ʻI hoʻo fai peheé, faʻifaʻitaki kia Sīsū ʻaki hono fakatefito hoʻo akonakí ʻi he ngaahi tefitoʻi moʻoni mei he Folofola ʻa e ʻOtuá. Hoko ʻo anga-fakaalaala. Hoko ʻo tui ʻoku nau loto ke fai ʻa e meʻa totonú, ʻo falala ko e faʻahinga ʻoku ʻofa kia Sihová mo ʻofa ʻiate koé te nau tali lelei hoʻo akonaki anga-ʻofá. ʻEke hifo kiate koe ʻa e ngaahi fehuʻi ko ení: ‘ʻOku ou maʻu ʻa e loto-toʻa ke lea ʻi hono fai ʻe ha taha ʻoku ou ʻofa ai ha meʻa ʻoku hala? Kapau ʻoku fiemaʻu ke u ʻoatu ha akonaki, ʻoku ou lea anga-lelei, pe ʻoku ou lea anga-fefeka? Ko e hā ʻa e fakaueʻiloto ki heʻeku ʻoatu ʻa e akonakí? ʻOku ou ʻoatu ia ko ʻeku ʻita ʻi he tokotahá pe ʻoku ou fai ia koeʻuhí ko ha lelei pē maʻana?’

14. Naʻe anga-fēfē hono fakahāhā ʻe Sīsū ʻa e leleí?

¹⁴ Ko Sīsū ʻoku ʻikai ngata pē ʻene ʻiloʻi ʻa e meʻa ʻoku leleí ka ʻokú ne toe fai ia. ʻOku ʻofa ʻa Sīsū ʻi heʻene Tamaí, ko ia ʻokú ne fai maʻu pē ʻa e meʻa totonú ʻi he fakaueʻiloto totonu. Ko e leleí ko ha ʻulungaanga longomoʻui ia. ʻOku lava ke tau fakahāhā ia ʻi heʻetau fai ʻa e ngaahi ngāue ʻaonga maʻá e niʻihi kehé. ʻOku ʻikai feʻunga pē hono ʻiloʻi ʻa e meʻa ʻoku totonu ke faí; kuo pau ke tau fai ʻa e meʻa ʻoku totonú ʻi he fakaueʻiloto totonu. ʻE ʻeke nai ʻe ha taha, ‘ʻOku malava ke fai ʻa e meʻa totonú ʻi ha fakaueʻiloto hala?’ ʻIo, ʻe malava. Ko e fakatātaá, naʻe lea ʻa Sīsū fekauʻaki mo e faʻahinga naʻa nau foaki ha meʻaʻofa ki he masivá ka naʻa nau fakapapauʻi ke ʻiloʻi ʻe he niʻihi kehé ʻenau foakí. Ko e ngaahi ngāue naʻe hā ngali lelei ko iá naʻe ʻikai hano mahuʻinga kia Sihova.​—Māt. 6:1-4.

15. ʻE lava fēfē ke tau fakahāhā loto-moʻoni ʻa e leleí?

¹⁵ Kapau te tau fai ʻa e meʻa ʻoku totonú ʻi he ngaahi fakaueʻiloto taʻesiokita ko ʻetau toki fakahāhā loto-moʻoni ia ʻa e leleí. Ko ia te ke ʻeke hifo nai kiate koe: ‘ʻOku ou ʻiloʻi ʻa e meʻa totonu ke faí pea fakapapauʻi ke fai ia? Ko e hā ʻa e fakaueʻiloto ki heʻeku fai ʻa e ngaahi meʻa leleí?’

ʻE LAVA FĒFĒ KE TAU TAUHI HOTAU ANGAʻITANGATA FOʻOÚ KE ʻI HA TUʻUNGA LELEI?

16. Ko e hā ʻoku totonu ke tau fai ʻi he ʻaho taki taha, pea ko e hā hono ʻuhingá?

¹⁶ Fakatauange ke ʻoua te tau pehē ko e ngāue ki hono kofuʻaki ʻa e angaʻitangata foʻoú ʻoku ngata pē ʻi he papitaisó. ʻOku fiemaʻu ke tau tauhi hotau “kofu foʻoú” ke ʻi ha tuʻunga fakaʻofoʻofa. ʻE lava ke tau fai eni ʻaki ʻetau kumi ʻi he ʻaho taki taha ki ha ngaahi founga ke fakahāhā ai ʻa e fua ʻo e laumālie ʻo e ʻOtuá. Ko e hā hono ʻuhingá? Koeʻuhí ko Sihová ko ha ʻOtua ngāue, pea ko hono laumālié ko ha ivi ngāue. (Sēn. 1:2) Ko ia ko e tafaʻaki kotoa ʻo e fua ʻo e laumālié ʻoku papau ʻa e lava ke ne ueʻi kitautolu ke tau fai ha ngāue. Ko e fakatātaá, naʻe hiki ʻe he ākonga ko Sēmisí: “[ʻOku] mate ʻa e tuí ʻi he ʻikai ha ngāué.” (Sēm. 2:26) ʻOku lava ke leaʻaki ʻa e meʻa tatau ki he kotoa ʻo e fua ʻo e laumālie ʻo e ʻOtuá. ʻI he taimi taki taha ʻoku tau fakahāhā ai ʻa e fua ʻo e laumālié, ʻoku tau fakamoʻoniʻi ai ʻoku ngāue ʻiate kitautolu ʻa e laumālie ʻo e ʻOtuá.

17. ʻOku totonu ke fēfē ʻetau fakafeangai ʻi he taimi ʻoku tau tōnounou ai ʻi hono fakahāhā ʻa e fua ʻo e laumālié?

¹⁷ Naʻa mo e kau Kalisitiane kuo nau papitaiso ʻi he laui taʻu lahi ʻoku nau faʻa tōnounou ʻi hono fakahāhā ʻa e fua ʻo e laumālié ʻi he taimi ʻe niʻihi. Neongo ia, ko e meʻa mahuʻingá ke ʻoua ʻe foʻi. Fakakaukau ki he fakatātā ko ení. Kapau ʻe mahae ho foʻi kofu manakó, te ke liʻaki ia ʻi he taimi pē ko iá? ʻIkai. ʻOku ngalingali te ke monomono fakalelei ia ʻo ka malava. Pea te ke toe tokanga ange hili iá. ʻI he tuʻunga meimei tatau, kapau ʻe ʻi ai ha taimi ʻoku tau tōnounou ʻi hono fakahāhā ʻa e anga-leleí, anga-kātakí pe anga-ʻofá ki ha taha, ʻoua ʻe hoko ʻo loto-siʻi. Ko ha kole fakamolemole loto-moʻoni ʻe lava ke ne monomono ʻa e maumaú, hangē ko e laú, pea tokoniʻi koe ke fou atu ʻi he hala ke fakaleleiʻi ho vahaʻangatae mo e tokotahá. Fakapapauʻi ke toe tokanga ange ʻi he kahaʻú.

18. Ko e hā ʻoku totonu ke tau fakapapauʻí?

¹⁸ He fakamālō ē ko kitautolu ʻi hono maʻu ʻa e faʻifaʻitakiʻanga ʻa Sīsuú! Ko e lahi ange ʻetau faʻifaʻitaki ki heʻene fakakaukaú mo e tōʻongá, ko e faingofua ange ia ke tau tōʻonga ʻo hangē ko iá. Ko e lahi ange ʻetau tōʻonga ʻo hangē ko Sīsuú, ko e lelei ange ia ʻetau kofuʻaki ʻa e angaʻitangata foʻoú. ʻI he ako ko ení, naʻa tau vakai ai ki he tafaʻaki pē ʻe fā ʻo e fua ʻo e laumālie ʻo e ʻOtuá. Fēfē ke ke vaheʻi ha taimi ke sivisiviʻi ai ʻa e ngaahi tafaʻaki kehe ʻo e fua ʻo e laumālié pea fakakaukauloto ki he anga hoʻo fakahāhā ʻa e ngaahi ʻulungaanga ko iá? Te ke maʻu ha lisi ʻo e ngaahi kupu fekauʻaki mo e kaveinga ko ení ʻi he Tataki Fakaefekumi Maʻá e Kau Fakamoʻoni ʻa Sihová ʻi he kaveinga “Moʻui Faka-Kalisitiane” pea ʻi he “Fua ʻo e Laumālié.” ʻOku lava ke ke fakapapauʻi kapau te ke fai hoʻo tafaʻakí, ʻe tokoniʻi koe ʻe Sihova ke kofuʻaki ʻa e angaʻitangata foʻoú pea ʻoua ʻe toe vete ia.