Fehuʻi mei he Kau Lautohí
Ko hai ʻe fokotuʻu mai ki he māmaní, pea ko e faʻahinga toetuʻu fēfē te nau hokosiá?
Fakakaukau ki he anga hono tali ʻe he Tohi Tapú ʻa e fehuʻi ko ení.
ʻOku tala mai ʻi he Ngāue 24:15 ʻe ʻi ai “ʻa e toetuʻu fakatouʻosi ʻa e māʻoniʻoní mo e taʻemāʻoniʻoní.” Ko e māʻoniʻoní ko e faʻahinga ia naʻa nau talangofua ki he ʻOtuá ki muʻa ke nau maté, ko ia ko honau hingoá ʻoku hiki ʻi he tohi ʻo e moʻuí. (Mal. 3:16) Ko e taʻemāʻoniʻoní ʻoku kau ai ʻa e faʻahinga naʻa nau mate ʻo ʻikai maʻu ha faingamālie feʻunga ke ako fekauʻaki mo Sihova, ko ia ko honau hingoá ʻoku ʻikai hiki ia ʻi he tohi ʻo e moʻuí.
ʻI he Sione 5:28, 29 ʻoku lave ai ki he ongo kulupu tatau ʻoku lave ki ai ʻi he Ngāue 24:15. ʻOku pehē ʻe Sīsū ko e “faʻahinga naʻa nau fai ʻa e ngaahi meʻa leleí” te nau hū atu “ki ha toetuʻu ki he moʻui, pea ko e faʻahinga naʻa nau fai ʻa e ngaahi meʻa ʻoku fulikivanú ki ha toetuʻu ki he fakamaau.” Ko e māʻoniʻoní naʻa nau fai ʻa e ngaahi meʻa lelei ki muʻa ke nau maté. Te nau hū atu ki ha toetuʻu ʻo e moʻui koeʻuhí ko honau hingoá ʻoku kei hiki pē ʻi he tohi ʻo e moʻuí. Kae kehe, ko e taʻemāʻoniʻoní naʻa nau fai ʻa e ngaahi meʻa fulikivanu ki muʻa ke nau maté. Te nau hū atu ki ha toetuʻu ki he fakamaau. Ko honau hingoá ʻoku teʻeki ai ke hiki ia ʻi he tohi ʻo e moʻuí, pea te nau hokosia ha vahaʻa taimi ʻo e fakamaau pe siviʻi. ʻI he lolotonga ʻo e taimi ko iá, te nau maʻu ha faingamālie ke ako fekauʻaki mo Sihova pea hiki honau hingoá ʻi he tohi ʻo e moʻuí.
ʻI he Fakahā 20:12, 13 ʻoku fakamatalaʻi ai ko e kotoa ʻo e faʻahinga ʻe toetuʻú ʻe fiemaʻu ke nau talangofua ki he “ngaahi meʻa ko ia naʻe hiki ʻi he ngaahi takainga tohí,” ʻa ia ko e ngaahi lao foʻou ʻe ngāueʻaki ʻi he māmani foʻoú. Ko e faʻahinga heʻikai ke nau talangofuá ʻe toʻo atu.—ʻAi. 65:20.
ʻI he Taniela 12:2 ʻoku tomuʻa tala ai ko e niʻihi ʻo e faʻahinga ʻoku nau mohe ʻi he maté te nau ʻā hake “ki he moʻui taʻengata pea ko e niʻihi ki he luma mo e fehiʻanekinaʻi taʻengata.” ʻOku lave ʻa e veesi ko ení ki he ikuʻanga fakaʻosi ʻo ʻenau toetuʻú—ko e “moʻui taʻengata” pe “fehiʻanekinaʻi taʻengata.” Ko ia ʻi he ngataʻanga ʻo e taʻu ʻe 1,000, ʻe ʻi ai ʻa e niʻihi te nau maʻu ʻa e moʻui taʻengatá pea ko e toengá ʻe fakaʻauha taʻengata.—Fkh. 20:15; 21:3, 4.
Fakakaukau ki ha talanoa fakatātā. Ko e tuʻunga ʻo e ongo kulupu ʻe toetuʻú ʻe lava ke fakahoa ia ki ha kau muli ʻoku nau loto ke nofo ʻi ha fonua ʻe taha. Ko e māʻoniʻoní ʻoku nau hangē ko e faʻahinga ʻoku nau maʻu ha visa ngāue pe ko ha visa nofo fonua ʻokú ne maʻu ai ha totonu mo ha tauʻatāina. ʻI hono kehé, ko e taʻemāʻoniʻoní ʻoku nau hangē ko e kau muli ʻoku nau maʻu nai ha visa fakataimi pe visa ʻeveʻeva. Ko e kau muli ko iá kuo pau ke nau fakamoʻoniʻi ʻoku nau taau ki muʻa ke fakaʻatā ke nau nofo ai pē ʻi he fonua foʻoú. ʻI he tuʻunga meimei tatau, ko e faʻahinga taʻemāʻoniʻoni ʻe toetuʻú ʻe fiemaʻu ke nau talangofua ki he ngaahi lao ʻa Sihová pea fakamoʻoniʻi ʻoku nau māʻoniʻoni koeʻuhi ke nau nofo ai pē ʻi he Palataisí. Pea tatau ai pē pe ko e hā ʻa e visa ʻoku tomuʻa maʻu ʻe he kau mulí ʻi heʻenau hū ki ha fonua ʻe taha, ko e niʻihi ʻe faai atu pē ʻo nau nofo fonua lolotonga ia ko e niʻihi ʻe lava pē ke tīpotaʻi kinautolu. Ko e olá ʻe makatuʻunga ia ʻi honau ʻulungaanga mo e tōʻonga ʻi he fonua foʻoú. Ko ia ai, ʻoku pehē pē, ko e ikuʻanga fakaʻosi ʻo e faʻahinga kotoa ʻe toetuʻú ʻe makatuʻunga ia ʻi heʻenau faitōnunga mo ʻenau tōʻonga ʻi he māmani foʻoú.
Ko Sihova ʻoku ʻikai ko e ʻOtua pē ia ʻo e manavaʻofa ka ko e ʻOtua foki ʻo e fakamaau totonu mo e faitotonu. (Teu. 32:4; Saame 33:5) Te ne fakahāhā ʻene ʻofá ʻaki hono fokotuʻu mai fakatouʻosi ʻa e māʻoniʻoní mo e taʻemāʻoniʻoní. ʻI he taimi tatau te ne tauhi maʻu ʻene tuʻunga māʻolunga fakaeʻulungāngá. Ko e faʻahinga pē ʻoku nau hoko ʻo ʻofa kiate iá pea moʻui ʻo fehoanaki mo ʻene ngaahi tuʻungá ʻe fakaʻatā ke nau moʻui ai pē ʻi he māmani foʻoú.