Fehuʻi mei he Kau Lautohí

Ko e fakaʻilongaʻi ʻoku fakamatalaʻi ʻi he 2 Tesalonaika 3:14 ko ha ngāue ia ke fai ʻe he fakatahaʻangá pe ko e kau Kalisitiane tāutahá?

Naʻe tohi ʻa e ʻapositolo ko Paulá ki he kau Kalisitiane ʻi Tesalonaiká, ʻo pehē: “Kapau ʻoku ʻikai talangofua ha taha ki he fekau ʻoku mau ʻoatu fakafou ʻi he tohí ni, hanganaki fakaʻilongaʻi ʻa e tokotahá ni.” (2 Tes. 3:14) Ki muʻá, naʻa tau pehē ko e fakahinohino ʻeni ki he kau mātuʻá. Kapau naʻe hokohoko atu hono tukunoaʻi ʻe ha tokotaha ʻa e ngaahi tefitoʻi moʻoni Fakatohitapú neongo ʻa e toutou ʻoatu ʻa e akonakí, ʻe fai nai ʻe he kau mātuʻá ha malanga fakatokanga ki he fakatahaʻangá. Hili iá, ko e niʻihi ʻo e kau malangá heʻikai ke nau feohi mo e tokotaha naʻe fakaʻilongaʻí.

Kae kehe, ʻoku fiemaʻu ke fai ha fakatonutonu. ʻOku hā mahino ko e akonaki ʻa Paulá ʻoku ʻuhinga ia ki ha ngāue ʻa ia ʻoku totonu ke fai ʻe he kau Kalisitiane tāutahá ʻi he ngaahi tuʻunga pau. Ko ia ʻoku ʻikai fiemaʻu ia ki he kau mātuʻá ke nau fai ha malanga fakatokanga. Ko e hā ʻoku liliu aí? Fakakaukau ki he puipuituʻa ʻo e akonaki ʻa Paulá.

Naʻe fakatokangaʻi ʻe Paula ko e niʻihi ʻi he fakatahaʻangá naʻa nau “fakamoveuveu.” Naʻa nau taʻetokaʻi ʻa e akonaki fakamānavaʻí. Lolotonga ha ʻaʻahi ki muʻa, naʻá ne ʻoatu ʻa e fekau ko ení: “Kapau ʻoku ʻi ai ha taha ʻoku ʻikai ke fie ngāue, ʻoua naʻa tuku ia ke ne kai.” Neongo ia, ko e niʻihi naʻa nau kei fakafisi pē ke ngāue ke tokonaki maʻanautolu, neongo naʻe malava ke nau fai pehē. Pehē foki, naʻa nau kaunoa ʻi he ngaahi meʻa ʻa e niʻihi kehé. ʻE anga-fēfē fakafeangai ʻa e kau Kalisitiané ki he kau fakamoveuveu peheé?—2 Tes. 3:​6, 10-12.

“Hanganaki fakaʻilongaʻi ʻa e tokotahá ni,” ko e lea ia ʻa Paulá. Ko e foʻi lea faka-Kalisí ʻoku fakahuʻunga mai ai ke fai ha tokanga mavahe ki he tokotahá ni. Naʻe ʻoatu ʻa e fakahinohino ko ení ki he fakatahaʻangá fakalūkufua, ʻo ʻikai ki he kau mātuʻá pē. (2 Tes. 1:1; 3:6) Ko ia ko e kau Kalisitiane tāutaha kuo nau fakatokangaʻi nai ha kaungā-Kalisitiane ʻokú ne talangataʻa ki he akonaki fakamānavaʻí te ne fili ke “tuku ʻa e feohi” mo e tokotaha fakamoveuveú.

Naʻe ʻuhinga ení ko e tokotahá naʻe fakafeangai ki ai ʻo hangē ko ha taha naʻe fakamavaheʻi mei he fakatahaʻangá? ʻIkai, he naʻe toe pehē ʻe Paula: “Hokohoko atu ʻa e enginaki kiate ia ʻi he tuʻunga ko ha tokoua.” Ko ia ko e kau Kalisitiane tāutahá te nau kei feohi pē mo e tokotaha kuo fakaʻilongaʻí ʻi he ngaahi fakatahá pea ʻi he ngāue fakafaifekaú, ka te nau fili ke ʻoua ʻe feohi mo ia ʻi ha ngaahi fakatahataha fakasōsiale pe fakafiefia. Ko e hā hono ʻuhingá? “Koeʻuhí ke ne mā,” ko e lea ia ʻa Paulá. Ko e ola ʻo e fakaʻilongaʻí, ko e Kalisitiane fakamoveuveú te ne mā nai ʻi heʻene tōʻongá pea liliu hono ngaahi ʻalungá.—2 Tes. 3:​14, 15.

ʻE ngāueʻaki fēfē nai ʻe he kau Kalisitiane ʻi he ʻaho ní ʻa e akonaki ko ení? ʻUluakí, ʻe fiemaʻu ke tau fakapapauʻi ko e tōʻonga ʻoku fehuʻiá ko e moʻoni ʻoku “fakamoveuveu,” ʻo hangē ko ia naʻe fakamatalaʻi ʻe Paulá. Naʻe ʻikai ke ne lave fekauʻaki mo e faʻahinga ʻoku nau kehe meiate kitautolu ʻi he ngaahi meʻa fakakonisēnisí pe saiʻia fakafoʻituituí. Pea naʻe ʻikai ke ne ʻuhinga ki he faʻahinga kuo nau fakalotomamahiʻi pē kitautolú. ʻI hono kehé, naʻe ʻi he fakakaukau ʻa Paulá ʻa e faʻahinga pau ʻa ia naʻa nau fili ʻiloʻilo pau ke talangataʻa ki he akonaki māʻalaʻala mei he ʻOtuá.

ʻI he ʻahó ni, kapau ʻoku tau fakatokangaʻi ha kaungā-Kalisitiane ʻokú ne fakahāhā ha laumālie talangataʻa pehē,a te tau fai ha fili fakafoʻituitui ke ʻoua ʻe feohi mo ia ʻi ha ngaahi fakatahataha fakasōsiale pe fakafiefia. Koeʻuhi ko ha fili fakafoʻituitui eni, heʻikai ke tau tālangaʻi eni mo e niʻihi kehe ʻi tuʻa mei hotau lotoʻi fāmilí. Pea te tau kei feohi pē mo e tokotaha ko iá ʻi heʻetau ngaahi fakatahá pe ʻi heʻetau ngāue fakafaifekaú. ʻI heʻene fakatonutonu ʻa hono ʻalungá, te tau toe hoko atu leva ʻa e feohi anga-maheni mo iá.