Ako mo ha Fakakaukau ʻAtaʻatā

ʻI heʻetau teuteu ke akó, te tau ʻeke hifo nai, ‘Ko e hā ʻoku ou ʻamanekina ke akó?’ Kae kehe, ʻoku lelei ke tau tokanga ke ʻoua te tau fakaʻatā ʻetau ngaahi ʻamanekiná ke ne fakakuihi kitautolu ki he meʻa ʻoku akoʻi mai ʻe Sihová. ʻE lava fēfē ke tau tauhi maʻu ha fakakaukau ʻataʻatā ʻi he taimi ʻoku tau ako aí?

Lotu ki ha poto. Kole kia Sihova ke ne tokoniʻi koe ke ʻiloʻi ʻa e meʻa ʻokú ne loto ke ke ako he taimi ní. (Sēm. 1:5) Fakaʻehiʻehi mei he falala ʻataʻatā pē ki hoʻo mahino ʻi he kuohilí.—Pal. 3:​5, 6.

Fakaʻapaʻapaʻi ʻa e mālohi makehe ʻo e Tohi Tapú. “Ko e folofola ʻa e ʻOtuá ʻoku moʻui.” (Hep. 4:12) Ko e “folofola” moʻui ʻa e ʻOtuá ʻe lava ke kehekehe ʻene tākiekina kitautolú ʻi he taimi taki taha ʻoku tau lau ai ʻa e Tohi Tapú—ka ʻe malava pē ia kapau ʻoku tau lāuʻilo ki he fiemaʻu ke tau ako mei aí.

Houngaʻia ʻi he meʻa kotoa ʻi he tēpile ʻa Sihová. Ko ʻene meʻakai fakalaumālié ʻoku hangē ia “ha kātoanga ʻo e ngaahi meʻakai vovo.” (ʻAi. 25:6) Fakaʻehiʻehi mei hono liʻaki ʻa e “ngaahi meʻakai” ʻoku ʻikai ke ke saiʻia aí. Heʻikai ngata pē hoʻo maʻu ʻaonga mei aí ka te ke fiefia moʻoni ʻi he meʻa ʻoku tokonaki ʻe he ʻOtuá!