Teuʻi Ho Lotó

ʻI heʻetau ako ʻa e Tohi Tapú, ʻoku tau loto ke tākiekina ʻe he ngaahi fakakaukau ʻa Sihová ʻa hotau lotó, pe tangata ʻi lotó. Naʻe fokotuʻu ʻe ʻĒsela ha faʻifaʻitakiʻanga lelei ʻi he meʻá ni ʻi heʻene “teuteu . . . ʻa hono lotó ke kumi ki he Lao ʻa Sihová.” (ʻĒsela 7:10) ʻE lava fēfē ke tau teuʻi hotau lotó?

Lotu. Kamata ʻa e taimi ako taki taha ʻaki ha lotu. Kole kia Sihova ke ne tokoniʻi koe ke mahinoʻi pea ngāueʻaki ʻa e meʻa ʻokú ke akó.—Saame 119:​18, 34.

Fakatupulekina ʻa e anga-fakatōkilalo. ʻOku fufū ʻe he ʻOtuá ʻa e moʻoní mei he faʻahinga ʻoku nau hīkisia ʻo falala ki honau poto pē ʻonautolú. (Luke 10:21) Fakaʻehiʻehi mei hono fai ha ngaahi fekumi koeʻuhí ke pehē ʻe he niʻihi kehé ʻoku lahi hoʻo ʻiló. Anga-fakatōkilalo ʻo liliu hoʻo fakakaukaú ʻi he taimi ʻoku ʻikai fehoanaki ai mo e fakakaukau ʻa e ʻOtuá.

Feinga ke fanongo ki ha hiva ʻo e Puleʻangá. ʻOku maʻu ʻe he fasí ʻa e mālohi ke lea ki hotau lotó, ʻo teuʻi kitautolu ki he lotú. Ko e fanongo ki ha hiva ʻo e Puleʻangá ʻi he kamata ʻa e akó ʻe tokoni nai ia ke teuʻi ho lotó.