ʻOkú Ke Manatuʻi?

Kuó ke lau fakalelei ʻa e ngaahi ʻīsiu fakamuimui ʻo e Taua Leʻo ʻi he taʻu ní? Sai, sio angé pe ʻe lava ke ke tali ʻa e ngaahi fehuʻi ko ení:

Ko e hā ʻokú ne ueʻi kitautolu ke ʻoange kia Sihova ʻa e lāngilangí?

ʻOku tau fai ia koeʻuhí ʻoku tau fakaʻapaʻapa loloto kia Sihova pea ʻofa lahi kiate ia. ʻOku tau toe fakalāngilangiʻi ia koeʻuhí ʻoku tau loto ke ʻiloʻi ia ʻe he niʻihi kehé.—w25.01, p. 3.

ʻI hono fakalotomamahiʻi kitautolu ʻe ha taha, ʻe lava fēfē ke tau hoko ʻo fakamolemole lahi angé?

ʻOku ʻikai ke tau tukunoaʻi pē ʻetau ngaahi ongoʻí; ka ko hono tuku ange ʻa e ʻitá mo e loto-mamahí ʻe lava ke ne tokoniʻi kitautolu ke fakaʻehiʻehi mei hono maumauʻi kitautolu ʻe he loto-koná.—w25.02, p. 15-16.

Ko e hā ko ha faʻifaʻitakiʻanga lelei ai ʻa e ākonga ko Maʻaké ki he fanga tokoua kei siʻí?

Naʻe tali loto-lelei ʻe Maʻake ha vāhenga-ngāue. Neongo ʻoku ngalingali naʻá ne loto-mamahi pe tōnoa ʻene ʻamanakí ʻi ha taimi, naʻe ʻikai ke ne foʻi. Naʻá ne fakatupulekina hono vahaʻangatae mo Paulá pea mo e faʻahinga matuʻotuʻa kehe.—w25.04, p. 27.

Ko e hā naʻe ʻuhinga ki ai ʻa Sīsū ʻi heʻene lotu: “Kuó u ʻai ke nau ʻilo ho huafá”? (Sione 17:26)

Naʻe ʻosi ʻiloʻi ʻe heʻene kau ākongá ʻa e huafa ʻo e ʻOtuá. Naʻe ʻai ʻe Sīsū ke ʻiloa kiate kinautolu ʻa e faʻahinga Tokotaha naʻá ne fakafofongaʻi ʻa e huafa ʻo Sihová, ʻo kau ai ʻEne ngaahi taumuʻá, ko ʻene ngaahi ngāué mo hono ngaahi ʻulungāngá.—w25.05, p. 20-21.

Kapau ʻoku tau anga-fakanānā, ko e hā ʻoku tau ʻiloʻí?

ʻOku tau mahinoʻi ʻoku ʻi ai ʻa e ngaahi meʻa ʻoku ʻikai ke tau ʻiloʻi. Ko e fakatātaá, ʻoku ʻikai ke tau ʻiloʻi ʻa e taimi ʻe hoko mai ai ʻa e ngataʻangá pe ko e founga ʻe ngāue mai nai ai ʻa Sihova ʻi he taimi ko iá. ʻOku ʻikai foki ke tau ʻiloʻi ʻa e meʻa ʻe hoko ʻapongipongí pe ko hono ʻiloʻi lelei kitautolu ʻe Sihová.—w25.06, p. 15-18.

Ko e hā ʻe lava ke ne tokoniʻi kitautolu ke maʻu ʻaonga mei ha kupu pe malanga maʻá e kakaí?

ʻE lava ke tau ʻeke hifo kiate kitautolu: ‘Ko e hā ʻa e fakamoʻoni ʻoku ngāueʻaki heni ke fakatuipauʻi ʻa e kau fanongó? ʻOku ʻi ai ha talanoa fakatātā ola lelei ʻe lava ke u ngāueʻaki ʻi heʻeku faiakó? Ko hai ʻe mahuʻingaʻia nai ʻi he kaveinga ko ení?’—w25.07, p. 19.

Ko e hā ʻe lava ke tau ako fekauʻaki mo e fakamolemole ʻa e ʻOtuá ʻi he founga naʻá ne fakafeangai ai kia Tēvitá?

Neongo naʻe fakahoko ʻe Tēvita ha ngaahi angahala mamafa, ʻi he taimi naʻá ne fakatomala loto-moʻoni aí, naʻe fakamolemoleʻi ia ʻe Sihova. (1 Tuʻi 9:​4, 5) ʻI he taimi ʻoku fakamolemole ai ʻa e ʻOtuá, ʻoku ʻikai ke ne fakalau ʻa e faihala ʻa e tokotaha faiangahalá pe ʻohake ia ʻi he kahaʻú.—w25.08, p. 17.

Kapau ʻoku fāinga ha tokotaha ako Tohi Tapu mo ha poini, ko e hā ʻe lava ke ke faí?

Kapau ʻokú ne kei fāinga pē mo ha poini ʻi he hili hoʻo feinga ke akoʻi lelei ia mei he Tohi Tapú, hiki fakalaka mei ai pea toki foki ki ai ʻamui ange.—w25.09, p. 24.

ʻOku pehē ʻi he Tohi Tapú ʻoku ʻi ai ʻa e “mālohi kākā” ʻo e angahalá. (Hep. 3:13) Anga-fēfē?

ʻOku lava ke fakataueleʻi kitautolu ʻe he angahalá ke fai ʻa e ngaahi tōʻonga hala. ʻOku toe lava foki ke ne ʻai ke tau veiveiua maʻu pē pe ʻoku ʻofa moʻoni ʻa e ʻOtuá ʻiate kitautolu.—w25.10, p. 16.

Ko e hā ʻa e meʻa ʻe tolu ʻe lava ke ne ʻai ʻetau ngaahi lotu fakafoʻituituí ke toe mohu ʻuhinga angé?

(1) ʻE lava ke tau fakalaulauloto ki he ʻulungaanga ʻo Sihová. (2) ʻE lava ke tau fakakaukau fekauʻaki mo e meʻa ʻoku tau fekuki mo iá pea fakahaaʻi ia, hangē ko ʻetau fiemaʻu ke fakamolemoleʻi ha tahá. (3) ʻE lava ke tau lotu fakamākukanga. ʻOku ngalingali ange ʻe fakaʻatā heni kitautolu ke fakahaaʻi ʻetau ngaahi fakakaukau lolotó.—w25.10, p. 19-20.

ʻE lava fēfē ke tau tokoni ki he kau taʻumotuʻá?

ʻE lava ke tau ʻaʻahi pe fetuʻutaki ki he faʻahinga ʻoku nau taʻumotuʻá. ʻE lava foki ke tau ʻalu fakataha mo kinautolu ki heʻenau ngaahi ʻapoinimeni fakafaitoʻó. Pe ʻe lava ke tau ngāue mo e kau taʻumotuʻá ʻi he ngaahi founga kehekehe ʻo e ngāue fakafaifekaú.—w25.11, p. 6-7.

Ko e hā ha ngaahi tafaʻaki tefito ʻo ha mali Kalisitiane ʻokú ne fakalāngilangiʻi ʻa Sihova?

Talangofua ki ha fiemaʻu fakalao pē. Fakapapauʻi ko e ʻatimosifia ʻo e kātoangá mo e talitalí ʻoku tapua atu ai ʻa e fua ʻo e laumālie ʻo e ʻOtuá. Hoko ʻo anga-fakanānā ʻi he teunga ʻokú mo tuí, pea fakapapauʻi ke fakaʻehiʻehi mei he ngaahi anga fakafonua taʻefakatohitapú. Fetuʻutaki lelei lolotonga ʻa e palani ki he ʻaho malí.—w25.12, p. 21-24.