Fakafiemālieʻi ʻa e Niʻihi Kehé Neongo ʻEne Ngaahi Palopalema Fakaemoʻuileleí

Ko Clodean, ko ha taha ʻo e Kau Fakamoʻoni ʻa Sihová, ʻoku nofo ʻi ʻAfilika Tonga, naʻe ʻave ia ki he falemahakí ke fakahoko hono tafa. Naʻe lahi ʻa e ngaahi palopalema fakaemoʻuilelei naʻá ne fekuki mo iá pea naʻe pau ke ne fili ʻa e ngaahi faitoʻo ke ne talí. ʻI he ki muʻa pea hili hono tafá, naʻá ne ongoʻi tāvaivaia, faingataʻaʻia mo loto-moʻua. ʻI he hili ʻene foki ki ʻapí, naʻe meimei uike ʻe hongofulu ʻa e ʻikai pē malava ke ne tangutu hake. Pea koeʻuhi ko e mahaki fakaʻauha COVID-19, naʻe ʻikai lava ke fai ha ʻaʻahi kiate ia.

Naʻe fakapapauʻi ʻe Clodean ke ʻoua te ne ongoʻi fakaʻofaʻia ʻiate pē, ko ia naʻá ne kole ha mālohi mei he ʻOtuá ke ne lava ʻo fakafiemālieʻi ʻa e niʻihi kehé. ʻI heʻene lava pē ʻo tangutú, naʻá ne fetuʻutaki ki ha fefine ʻa ia ko ha kaungāʻapi ʻa hono tehiná, naʻá ne ako Tohi Tapu ki muʻa mo e Kau Fakamoʻoní ka naʻe ʻikai ke ne toe hoko atu ʻene akó. Naʻe vahevahe ange kiate ia ʻe Clodean ha fakakaukau fakalototoʻa mei he Folofola ʻa e ʻOtuá, ʻa ia naʻe ueʻi heni ʻa e fefiné ke ne toe hoko atu ʻene akó. Naʻe toe fakamatalaʻi ʻe Clodean ʻa e ngaahi ʻaonga hono maʻu ʻa e ngaahi fakataha faka-Kalisitiané, ʻi he taimi tatau naʻá ne fakapapauʻi ʻoku maʻu ʻe heʻene ako Tohi Tapú ʻa e fakataha fakalotofonuá fakafou ʻi he ʻInitanetí. Naʻe muimui ʻa e fefiné ki he fakahinohinó pea aʻu ʻo ne fai ha tali ʻi he lolotonga ʻa e konga fehuʻi mo e tali ʻi he polokalamá.

Naʻe hoko atu ʻa Clodean ke talanoa mo e tehina ʻene ako Tohi Tapú, ʻa ia naʻá ne loto vēkeveke foki ke ako ʻa e Tohi Tapú. Naʻe aʻu ʻo ne tala ange kia Clodean fekauʻaki mo e niʻihi kehe naʻa nau mahuʻingaʻiá. Ko e hā ʻa e olá? Naʻe kamata ako Tohi Tapu ʻa Clodean mo e kau fefine kehe ʻe toko fā. Pea naʻe ʻi ai mo e ngaahi meʻa lelei lahi naʻe hoko!

Koeʻuhi ko e mahuʻingaʻia loto-moʻoni ʻa Clodean ʻi he niʻihi kehé, naʻe malava ai ke ne kamataʻi ha ngaahi ako Tohi Tapu mo e kau fefine ʻe toko hongofulu kehe​—ʻi he lolotonga ʻa e mahaki fakaʻauhá​—ko e fakakātoá ko e kau ako ʻe toko 16! Ko e niʻihi naʻa nau maʻu tuʻumaʻu ʻa e ngaahi fakataha faka-Kalisitiané fakafou ʻi he ʻInitanetí. Ko e hanganaki femoʻuekina ʻi he founga ko ení naʻá ne tokoniʻi ʻa Clodean ke ʻoua ʻe nōfoʻi ʻi hono tuʻungá. Naʻá ne toe ongoʻi koeʻuhí ko Sihova, ko e “ʻOtua ʻo e fakafiemālie kotoa pē,” naʻá ne maʻu ai ʻa e fakafiemālie ke fekuki mo hono ngaahi ʻahiʻahí, pea malava ai ke ne fakafiemālieʻi ʻa e niʻihi kehé.​—2 Kolinitō 1:3, 4.

Naʻe anga-fēfē ongoʻi ʻa e kau ako ʻa Clodean ki he meʻa naʻa nau akó? Naʻe pehē ʻe ha taha ʻo kinautolu: “Naʻá ku maʻu ʻaonga ʻi he ngaahi founga lahi. Ka ko e ʻaonga lahi tahá ko ʻeku ʻiloʻi ʻa e huafa ʻo e ʻOtuá. Naʻe tokoniʻi heni au ke u ʻunuʻunu ofi ange ai kia Sihova.” Ko e fuofua fefine naʻe fetuʻutaki ki ai ʻa Clodean, ʻokú ne fakatuʻotuʻa atu ke papitaiso. Ko e ngaahi hokosia ko ení naʻá ne ʻai ʻa Clodean ke ne maʻu ʻa e fiefia lahi. Pea ʻokú ne fakalakalaka ki muʻa mei hono tafá.