ʻEKE ʻE HE TOʻUTUPÚ
Ko e Hā ʻE Fiemaʻu Ke U Fai Hili ʻa e Papitaisó?—Konga 2: Tauhi Maʻu Hoʻo Anga-Tonú
ʻOku pehē ʻe he Tohi Tapú “ʻe ʻikai ke taʻofi ʻe Sihova ha meʻa lelei ʻe taha mei he faʻahinga ʻoku ʻaʻeva ʻi he anga-tonú.” (Saame 84:11) ʻOku ʻuhinga ki he hā ʻa e “ʻaʻeva ʻi he anga-tonú”? ʻOku ʻuhinga ia ko e moʻui ʻi ha founga ʻoku fakahaaʻi ai ʻokú ke tauhi hoʻo palōmesi naʻá ke fai kia Sihova ʻi hoʻo fakatapui kiate iá. (Tangata Malanga 5:4, 5) ʻE lava fēfē ke ke ʻaʻeva ʻi he anga-tonú ʻi he hili hoʻo papitaisó?
ʻI he kupu ko ení
Hanganaki kātekina ʻa e ngaahi palopalemá
Konga Tohi Tapu tefitó: “Kuo pau ke tau hū ki he Puleʻanga ʻo e ʻOtuá ʻo fou ʻi he ngaahi mamahi lahi.”—Ngāue 14:22.
Meʻa ʻoku ʻuhinga ki aí: Ko hono moʻoní, ko e kau Kalisitiané kotoa te nau fehangahangai mo e ngaahi pole ʻi he moʻuí. ʻOkú ke fehangahangai mo e ngaahi palopalema ʻe niʻihi koeʻuhí ko hoʻo hoko ko ha Kalisitiané hangē ko e manukí pe fakafepakí. ʻOku ʻi ai mo e ngaahi palopalema kehe ʻoku lava ke ne uesia ʻa e faʻahinga kotoa ʻo e tangatá, hangē ko e palopalema fakapaʻangá pe ko e mahamahakí.
Meʻa ke ʻamanekiná: ʻI he taimi ki he taimi, ko e ngaahi tuʻunga ʻi hoʻo moʻuí ʻe liliu, pea ko e taimi ʻe niʻihi heʻikai te ke saiʻia ai. ʻOku pehē ʻe he Tohi Tapú ko e ngaahi meʻa ʻoku koví ʻe lava ke hoko ia ki ha taha pē—ʻo tatau pē ki he kau Kalisitiané mo e faʻahinga ʻikai ko e kau Kalisitiané.—Tangata Malanga 9:11.
Meʻa ʻe lava ke ke faí: Koeʻuhí ʻokú ke ʻilo te ke fetaulaki mo ha ngaahi pole, ʻe lava ke ke mateuteu ke fehangahangai mo ia. Vakai ki he ngaahi polé ko ha faingamālie ke fakaivimālohiʻi hoʻo tuí pea falala lahi ange kia Sihova. (Sēmisi 1:2, 3) ʻI he faai atu ʻa e taimí, ʻe lava ke ke lea mei he aʻusia, hangē ko e ʻapositolo ko Paulá: “ʻOku ou malava ʻa e meʻa kotoa pē koeʻuhi ʻoku ou maʻu ʻa e ivi fakafou ʻi he tokotaha ko ia ʻokú ne ʻomai kiate au ʻa e mālohí.”—Filipai 4:13.
TALANOA MOʻONI. “ʻI he hili pē ʻeku papitaisó, naʻe siʻaki ʻe hoku fanga tuongaʻané ʻemau ngaahi tui faka-Kalisitiané, puke ʻeku ongo mātuʻá pea naʻá ku puke foki mo au. Naʻe mei faingofua pē ke u foʻi—ke ngalo ʻiate au ko e taimi naʻá ku fakatapui ai ki he ʻOtuá, naʻá ku palōmesi ai ke ʻai ʻa e lotu kiate iá ko e meʻa mahuʻinga taha ʻi heʻeku moʻuí. Neongo ia, ko ʻeku fakatapuí ʻa e meʻa tofu pē naʻá ne tokoniʻi au ke u fekuki mo e ngaahi pole ko iá.”—Karen.
Fokotuʻu: Feinga ke ʻiloʻi ʻa Siosifa. ʻE lava ke ke lau fekauʻaki mo ʻene moʻuí ʻi he Sēnesi vahe 37 mo e 39 ki he 41. Fakakaukau: Ko e hā ʻa e ngaahi faingataʻa taʻeʻamanekina naʻe malanga haké, pea naʻe anga-fēfē ʻene fekuki mo iá? Naʻe anga-fēfē hono tokoniʻi ʻe Sihova ʻa Siosifá?
Fiemaʻu ha tokoni lahi ange?
Lau:
“ʻE Lava Fēfē Ke U Fekuki mo e Hoko ha Meʻa Fakamamahi?”
“ʻOku Mālohi Fēfē ʻEku Kātekina ʻa e Ngaahi Meʻá?”
“Founga ke Fekuki Ai mo e Liliú”
Download:
“ʻI he Puke ha Mātuʻa”
Hanganaki talitekeʻi ʻa e fakatauelé
Konga Tohi Tapu tefitó: “ʻOku ʻahiʻahiʻi ʻa e tokotaha taki taha ʻi hono tohoakiʻi mo fakataueleʻi ʻe heʻene holi pē ʻaʻaná.”—Sēmisi 1:14.
Meʻa ʻoku ʻuhinga ki aí: ʻI he taimi ʻe niʻihi, ko kitautolu kotoa ʻoku fakataueleʻi ʻe he ngaahi holi ʻa ia kapau heʻikai ke mapuleʻi ʻe lava ke ne taki atu kitautolu ke tau faihala.
Meʻa ke ʻamanekiná: Hili ʻa e papitaisó, te ke kei hokosia pē ʻa e “ngaahi holi ʻo e kakanó.” (2 Pita 2:18) ʻE aʻu nai ʻo ke ongoʻi ʻoku fakataueleʻi koe ke ke fehokotaki fakasino ki muʻa ke ke mali.
Meʻa ʻe lava ke ke faí: Fakapapauʻi ʻa e meʻa te ke faí he taimí ni—ki muʻa ke fakataueleʻi koé—koeʻuhí ke ʻoua te ke fakaʻatā hoʻo ngaahi holí ke ne fai hoʻo ngaahi filí maʻau. Manatuʻi, naʻe pehē ʻe Sīsū: “ʻOku ʻikai lava ha taha ke ngāue fakatamaioʻeiki ki ha ʻeiki ʻe toko ua.” (Mātiu 6:24) ʻE lava ke ke fili pe ko hai ʻe hoko ko ho ʻeikí. Fili ʻa Sihova. Tatau ai pē pe ʻoku mālohi fēfē ha holi fehālaaki, ʻe lava ke ke fili ke ʻoua te ke fakatōliʻa ia.—Kalētia 5:16.
Fokotuʻu: Ako ke ʻiloʻi ho ngaahi mālohingá mo e vaivaiʻangá. Fili ʻa e ngaahi kaungāmeʻa te nau tokoniʻi koe ke ke fakahāhā ho ngaahi ʻulungaanga leleí. Fakaʻehiʻehi mei he kakai, ngaahi feituʻu, mo e ngaahi tuʻunga ʻe ʻai ai ke faingataʻa ange kiate koe ke fai ʻa e meʻa ʻoku totonú.—Saame 26:4, 5.
Fiemaʻu ha tokoni lahi ange?
Lau:
“ʻE Lava Fēfē Ke U Talitekeʻi ʻa e ʻAhiʻahí?”
“ʻE Lava Fēfē Ke U Fakaʻehiʻehi mei he Fakakaukau ki he Fehokotaki Fakasinó?”
“Founga ke Talitekeʻi Ai ʻa e Tenge mei he Toʻumeʻá”
Hanganaki fakaivimālohiʻi hoʻo faivelengá
Konga Tohi Tapu tefitó: “Fakahāhā . . . ʻa e faʻa ngāue tatau . . . ʻo aʻu ki he ngataʻangá, koeʻuhí ke ʻoua te mou hoko ai ʻo fakapikopiko.”—Hepelū 6:11, 12.
Meʻa ʻoku ʻuhinga ki aí: Ko ha taha ʻoku ʻikai ke ne tokangataha ki heʻene ngāué ʻe lavangofua pē ke ne fakatuotuai pea hoko ʻo fakapikopiko.
Meʻa ke ʻamanekiná: ʻOku ngalingali naʻá ke fiefia mo faivelenga lahi hili hoʻo papitaisó. Naʻá ke ʻofa lahi faufaua kia Sihova. Ka ʻi he hili ha vahaʻa taimi, ʻe faingataʻa nai kiate koe ke hokohoko atu ke talangofua kia Sihova ʻi he meʻa kotoa pē, pea ʻe lava ke fakalotosiʻi ia kiate koe pea ʻai ke hōloa hoʻo faivelengá.—Kalētia 5:7.
Meʻa ʻe lava ke ke faí: Hokohoko atu ke fai ʻa e meʻa ʻoku totonú, neongo kapau ʻoku ʻi ai ha taimi ʻoku ʻikai nai ke ʻi ai ho lotó. (1 Kolinitō 9:27) ʻI he lolotonga ní, ʻunuʻunu ofi ange ki hoʻo Tamai fakahēvaní ʻaki ʻa e feinga ke ʻiloʻi lelei ange ia pea talanoa maʻu pē kiate ia ʻi he lotu. Pehē foki, hokohoko atu ke langa hake ʻa e kaumeʻa vāofi mo e faʻahinga ʻoku nau fiefia ʻi he tauhi kia Sihová.
Fokotuʻu: Manatuʻi ʻoku ʻofa lahi ʻaupito ʻa Sihova ʻiate koe pea ʻokú ne mateuteu ke tokoniʻi koe. ʻOua ʻe fakamulituku ʻo pehē ʻokú ne loto-mamahi ʻiate koe kapau ʻoku hōloa fakataimi hoʻo faivelengá. ʻOku pehē ʻe he Tohi Tapú: “ʻOkú ne foaki ʻa e mālohi ki he tokotaha helaʻiá mo e mālohi kakato ki he faʻahinga ʻoku ʻikai hanau mālohí.” (ʻAisea 40:29) ʻI he faai atu ʻa e taimí, te ne tāpuakiʻi hoʻo ngaahi feinga ke toe maʻu hoʻo faivelengá.
Fiemaʻu ha tokoni lahi ange?
Lau:
“Toʻutupu—“Hanganaki Ngāueʻi Homou Fakamoʻui ʻo Kimoutolú”
“ʻE Lava Fēfē Ke U ʻAi ke Fakafiefia ʻa e Lotu ki he ʻOtuá?”
Mamata:
Ko e meʻa mahuʻinga tahá: Kapau ʻokú ke ʻaʻeva ʻi he anga-tonú, te ke ʻai ai ke fiefia ʻa e loto ʻo Sihová! (Palōveepi 27:11) Te ne fiefia ʻi hoʻo fili ke tuʻu ʻi heʻene tafaʻakí, pea te ne ʻoatu ʻa e meʻa kotoa ʻokú ke fiemaʻú ke fakafepakiʻi ʻa e ngaahi ʻoho ʻa Sētané.