Ko Hai ʻa e Taki Te Ke Filí?​​—Ko e Hā ʻa e Lau ʻa e Tohi Tapú?

ʻOku fai ʻe he kakaí ʻa e ngaahi fili mahuʻinga pe ko hai ʻa e kau taki te nau filí.

Ko e hā ʻa e lau ʻa e Tohi Tapú?

Ko e kau taki fakaetangatá ʻoku ʻi ai honau fakangatangata

ʻOku fakahaaʻi mai ʻe he Tohi Tapú ha fakangatangata ʻoku maʻu ʻe he kotoa ʻo e kau taki fakaetangatá.

• “ʻOua naʻa tuku hoʻomou falalá ʻi he kau māʻolungá pe ʻi he foha ʻo e tangatá, ʻa ia ʻoku ʻikai lava ke ne ʻomi ha fakamoʻuí. ʻOku mole atu ʻene mānavá, ʻokú ne foki ki he kelekelé; ʻi he ʻaho pē ko iá ʻoku mole ai ʻene ngaahi fakakaukaú.”​​—Saame 146:3, 4, fakamatala ʻi lalo.

Naʻa mo e kau taki lavameʻá ʻe faai atu pē ʻo nau mate. ʻIkai ko ia pē, heʻikai lava ke nau fakapapauʻi ko ʻenau ngaahi ngāue leleí ʻe hokohoko atu hono fai ia ʻe he faʻahinga te ne fetongi kinautolú.​​—Tangata Malanga 2:18, 19.

Ko hono moʻoní, ʻoku fakahaaʻi ʻe he Tohi Tapú naʻe ʻikai ʻaupito ke fakataumuʻa ki he tangatá ke nau pule pē kiate kinautolu.

• “ʻOku ʻikai ʻi he tangata ʻoku ʻaʻevá ke ne tataki ʻa ʻene laká.”​​—Selemaia 10:23.

ʻOku ʻi ai ha taha ʻe lava ke ne hoko ko ha taki lelei ʻi he ʻahó ni?

Ko ha taki ʻoku hōifua ki ai ʻa e ʻOtuá

ʻOku fakamatalaʻi ʻe he Tohi Tapú kuo fakanofo ʻe he ʻOtuá ʻa e taki ʻoku poto mo alafalalaʻanga tahá: ko Sīsū Kalaisi. (Saame 2:6) Ko Sīsū ʻa e Tuʻi ʻo e Puleʻanga ʻo e ʻOtuá, ko ha founga-pule ʻoku pule mei hēvani.​​—Mātiu 6:10.

Te ke fili ke poupou ki he tuʻunga-taki ʻa Sīsuú? ʻOku fakamamafaʻi ʻe he Tohi Tapú ʻa e mahuʻinga ʻo e fili ko iá:

• “Fakalāngilangiʻi ʻa e ʻaló [Sīsū Kalaisi], telia naʻa houhau ʻa e ʻOtuá pea te mou ʻauha ʻi he halá, he ʻoku vave ʻa e ʻalu hake ʻa ʻEne houhaú. Fiefia ē ka ko e faʻahinga kotoa ʻoku hūfanga kiate Iá.”​​—Saame 2:12.

Ko e taimi eni ke fai ai hoʻo filí. ʻOku fakahaaʻi ʻe he kikite ʻi he Tohi Tapú naʻe kamata pule ʻa Sīsū ʻi he taʻu 1914 pea ʻoku vavé ni ke fetongi ʻe he Puleʻanga ʻo e ʻOtuá ʻa e ngaahi founga-pule fakaetangata kotoa pē.​​—Taniela 2:44.

Ke ako lahi ange ki he founga ʻe lava ke ke poupou ai ki he tuʻunga-taki ʻa Sīsuú, lau ʻa e kupu “Fili he Taimí Ni ke Poupou ki he Puleʻanga ʻo e ʻOtuá!”