ʻOku Tui ʻa e Kau Fakamoʻoni ʻa Sihová kia Sīsū?

ʻIo. ʻOku mau tui kia Sīsū, ʻa ia naʻá ne pehē: “Ko au ʻa e halá pea mo e moʻoní pea mo e moʻuí. ʻOku ʻikai haʻu ha taha ki he Tamaí ka ʻi heʻene fou pē ʻiate au.” (Sione 14:6) ʻOku mau tui naʻe haʻu ʻa Sīsū mei hēvani ki he māmaní pea foaki ʻene moʻui haohaoa fakaetangatá ko ha feilaulau huhuʻi. (Mātiu 20:28) Ko ʻene pekiá mo e toetuʻú ʻoku ʻai ai ke malava ki he faʻahinga ʻoku nau ngāueʻi ʻa e tui kiate iá ke maʻu ʻa e moʻui taʻengatá. (Sione 3:16) ʻOku mau tui foki ʻoku pule he taimí ni ʻa Sīsū ko ha Tuʻi ʻi he Puleʻanga fakahēvani ʻo e ʻOtuá, ʻa ia ʻoku vavé ni ke ne ʻomai ʻa e melinó ki he kotoa ʻo e māmaní. (Fakahā 11:15) Kae kehe, ʻoku mau tui ki he lea ʻa Sīsū ʻoku pehē: “ʻOku lahi ange ʻa e Tamaí ʻiate au.” (Sione 14:28) Ko ia ʻoku ʻikai ke mau lotu kia Sīsū, he ʻoku ʻikai ke mau tui ko e ʻOtua Māfimafi-Aoniú ia.