Ko e Hā Kuo Liliu Ai ʻe he Kau Fakamoʻoni ʻa Sihová ʻa e Niʻihi ʻo ʻEnau Ngaahi Tuí?

Kuo tau ngāueʻaki maʻu pē ʻa e Tohi Tapú ko e makatuʻunga tefito ki heʻetau ngaahi tuí, ko ia ʻoku tau fakatonutonu ʻetau tuí ʻi he toe māʻalaʻala ange ʻetau mahinoʻi ʻa e Folofolá.a

Ko e ngaahi liliu peheé ʻoku fehoanaki ia mo e tefitoʻi moʻoni Fakatohitapu ʻoku hā ʻi he Palōveepi 4:​18: “Ko e hala ʻo e kau māʻoniʻoní ʻoku hangē ia ko e maama ʻi he pongipongí ʻa ia ʻoku fakaʻaʻau ke toe maama ange kae ʻoua kuo hoʻatā mālie.” Hangē pē ko e hopo hake ʻa e laʻaá ʻo ne fakaeʻa māmālie ʻa e fakaikiiki ʻo e funga fonuá, ko e ʻOtuá ʻokú ne fakaeʻa māmālie mai ʻa e mahino ki he moʻoni fakaʻotuá, ʻi hono taimi kotofá. (1 Pita 1:​10-​12) Hangē ko ia naʻe tomuʻa tala ʻi he Tohi Tapú, kuó ne ngāue fakavavevave ki hono fakaeʻa mai ʻa e moʻoni fakaʻotuá lolotonga ʻa e “taimi ʻo e ngataʻangá.”​​​—Taniela 12:4.

Ko e ngaahi fakatonutonu ko eni ki heʻetau mahinó ʻoku totonu ke ʻoua te tau ʻohovale ai pe te ne fakahohaʻasi kitautolu. Ko e kau lotu ʻa e ʻOtuá ʻi he kuonga muʻá naʻa nau maʻu foki ʻa e ngaahi fakakaukau mo e ʻamanaki hala pea naʻe fiemaʻu ke fakatonutonu ʻa e anga ʻenau vakaí.

• Naʻe ʻoatu ʻe Mōsese ʻa ia tonu ko ha faifakahaofi ki he puleʻanga ʻo ʻIsilelí ʻi he taʻu ʻe 40 ki muʻa ʻi he taimi ʻa e ʻOtuá.​​​—Ngāue 7:​23-​25, 30, 35.

• Naʻe ʻikai ke mahinoʻi ʻe he kau ʻapositoló ʻa e kikite ʻa ia naʻá ne tomuʻa tala ʻa e pekia mo e toetuʻu ʻa e Mīsaiá.​​​—ʻAisea 53:​8-​12; Mātiu 16:21-​23.

• Naʻe maʻu ʻe he muʻaki kau Kalisitiane ʻe niʻihi ʻa e ngaahi fakakaukau hala fekauʻaki mo e taimi ʻe hoko mai ai ʻa e “ʻaho ʻo Sihová.”​​​—2 Tesalonaika 2:1, 2.

Ki mui ai naʻe fakatonutonu ʻe he ʻOtuá ʻenau mahinó, pea ʻoku tau lotu te ne hokohoko atu ke fai ʻa e meʻa tatau maʻa kitautolu.​​​—Sēmisi 1:5.