FAKAMATALAʻI ʻO E NGAAHI KONGA TOHI TAPÚ
Maʻake 1:15—“Oku Ofi ae Buleaga oe Otua”
“Ko e taimi ne kotofá kuo hoko, pea ko e Puleʻanga ʻo e ʻOtuá kuo ofi. Mou fakatomala, pea tui ki he ongoongo leleí.”—Maʻake 1:15, Liliu Tohi Tapu Māmani Foʻoú.
“Kuo hokojia ae kuoga, bea oku ofi ae buleaga oe Otua: mou fakatomala, bea tui ki he ogoogolelei.”—Maʻake 1:15, Paaki Motuʻa.
ʻUhinga ʻo e Maʻake 1:15
Naʻe tala ange ʻe Sīsū Kalaisi ki heʻene kau fanongó ko e Puleʻanga ʻo e ʻOtuáa “oku ofi” pe “kuo ofi,” koeʻuhí he ko ia ʻa e tokotaha te ne hoko ko e Tuʻi ʻo e Puleʻanga ko iá.
Naʻe ʻikai ʻuhinga ʻa Sīsuú kuo kamata pule ʻa e Puleʻanga ko iá. ʻI hono kehé, naʻá ne fakahaaʻi ki mui ange ki heʻene kau ākongá ko e Puleʻangá ʻe hoko mai ia ʻi he kahaʻú. (Ngāue 1:6, 7) Kae kehe, naʻá ne hoko taimi tonu mai pē ʻi he taʻu tofu pē ko ia naʻe tomuʻa tala ʻe he Tohi Tapú te ne hā mai ko e Tuʻib ʻi he kahaʻú. ʻI he ʻuhinga ko ení, ʻoku malava ai ke pehē ʻe Sīsū: “Ko e taimi ne kotofá kuo hoko”—ke kamata ʻene ngāue fakafaifekaú ʻaki ia ʻene malangaʻi ʻa e kōsipelí, pe ongoongo leleí ʻo fekauʻaki mo e Puleʻangá.—Luke 4:16-21, 43.
Ke maʻu ʻaonga ʻa e kakaí mei he ongoongo lelei fekauʻaki mo e Puleʻangá, ʻoku fiemaʻu ke nau fakatomala, ʻa ia ko e ongoʻi fakaʻiseʻisa ʻi he ngaahi angahala ʻi he kuohilí pea moʻui ʻo fakatatau ki he ngaahi tuʻunga ʻa e ʻOtuá. Ko e faʻahinga ko ia naʻe fakatomalá naʻa nau fakahaaʻi ʻoku nau tui ki he ongoongo lelei fekauʻaki mo e Puleʻanga ko iá ʻi he kahaʻú.
Puipuituʻa ʻo e Maʻake 1:15
Naʻe leaʻaki ʻe Sīsū ʻa e ngaahi lea ko ení ʻi he kamataʻanga ʻene ngāue fakafaifekau ʻi Kālelí. “Mei he taimi ko iá ʻo faai mai,” ko e lau ia ‘a e fakamatala tatau he Mātiu 4:17, naʻe malanga ʻa Sīsū ʻo fekauʻaki mo e Puleʻanga ʻo e ʻOtuá. Ko e Puleʻangá ʻa e kaveinga ʻo e ngāue fakafaifekau ʻa Sīsuú. Ko hono moʻoní, ʻoku lave ʻa e ngaahi Kōsipelíc ki he Puleʻangá ʻo laka hake ʻi he tuʻo 100, ko e lahi tahá ko e ngaahi lea naʻe fai ʻe Sīsū. ʻOku lēkooti ʻi he Tohi Tapú naʻe lahi ange ʻa e lea ʻa Sīsū fekauʻaki mo e Puleʻanga ʻo e ʻOtuá ʻi ha toe kaveinga kehe.
Lau ʻa e Maʻake vahe 1 fakataha mo e fakamatala nounou ʻi laló mo e maʻuʻanga fakamatala fekolosiʻakí.
a Ko e Puleʻanga ʻo e ʻOtuá ko ha founga-pule ia ʻi hēvani naʻe fokotuʻu ʻe he ʻOtuá ke fakahoko mai ai hono finangaló ki he māmaní. (Taniela 2:44; Mātiu 6:10) Ki ha fakamatala lahi ange, sio ki he kupu “Ko e Hā ʻa e Puleʻanga ʻo e ʻOtuá?”
b Naʻe pau ke hoko ʻa Sīsū ko ha tuʻi kae malava ke ne fakahoko ʻa e taha hono ngaahi ngafa ko e Mīsaia naʻe tomuʻa talá, ko e fakafofonga makehe ia ʻo e ʻOtuá. Ki ha fakamatala lahi ange ki he ngaahi kikite Fakatohitapu ʻoku tuhu kia Sīsū ko e Mīsaiá, sio ki he kupu “ʻOku Fakamoʻoniʻi ʻe he Ngaahi Kikite Faka-Mīsaiá ko Sīsū ʻa e Mīsaiá?”
c Ko e ngaahi Kōsipelí ko e ʻuluaki tohi ia ʻe fā ʻo e Ngaahi Konga Tohi Tapu Faka-Kalisi Kalisitiane, ʻoku anga-maheniʻaki ko e Fuakava Foʻoú, ʻa ia ʻokú ne ʻomai ʻa e fakamatala ʻo fekauʻaki mo e moʻui ʻa Sīsuú mo ʻene ngāue fakamalangá.