Loma 12:2—“Kae Tuku ke Fai Ai Pe Homou Liliu, he Fakafoʻou ʻo Homou ʻAtamai”

“Tuku hono fakafuo kimoutolu ki he fokotuʻutuʻu ko ení, ka ke fai homou liliú ʻaki hono fakafoʻou homou ʻatamaí, koeʻuhi ke mou lava ʻo fakamoʻoniʻi kiate kimoutolu ʻa e finangalo lelei mo fakahōifua mo haohaoa ʻo e ʻOtuá.”—Loma 12:2, Liliu Tohi Tapu Māmani Foʻoú.

“ʻOua naʻa mou tuku ke fakaangatatau kimoutolu ki he maama ko eni: kae tuku ke fai ai pe homou liliu, he fakafoʻou ʻo homou ʻatamai, ke mou sivi ʻo ʻilo pe ko e ha ʻa e finangalo ʻo e ʻOtua, ʻa e meʻa ʻoku lelei, ʻa e meʻa te ne hōifua ai, ʻa e meʻa ʻoku haohaoa.”—Loma 12:2, Paaki Foʻou.

ʻUhinga ʻo e Loma 12:2

Ko e faʻahinga ʻoku nau loto ke fakahōifuaʻi ʻa e ʻOtuá kuo pau ke nau talitekeʻi ʻa e ngaahi tākiekina ʻikai leleí pea liliu foki mo ʻenau tōʻongá. ʻOku ʻikai fakamālohiʻi kinautolu ʻe he ʻOtuá ke nau liliu; ʻoku nau fai eni koeʻuhí ʻoku nau ʻofa kiate ia pea ʻiloʻi ko ʻene ngaahi fiemaʻú ʻoku anga-ʻofa mo fakaʻatuʻi pea ʻokú ne ʻomai ʻa e ngaahi ʻaonga.—ʻAisea 48:17.

“Tuku hono fakafuo kimoutolu ki he fokotuʻutuʻu ko ení.” Ko e “fokotuʻutuʻu ko ení,” ʻa ia ko e sōsaieti ia ʻo e faʻahinga ʻo e tangatá mo ʻene ngaahi tuʻungá, ʻulungāngá mo e ngaahi tōʻongá, ʻoku ʻikai ke tapua mei ai ʻa e fakakaukau ʻa e ʻOtuá mo ʻene ngaahi tuʻungá. (1 Sione 2:15-17) ʻOku hoko eni ko ha tenge mālohi ki he kakaí, ʻa ia ʻe lava ke ne fakafuo ʻenau tōʻongá mo e angaʻitangatá. Ke fakahōifua ʻa e lotu ʻa ha taha ki he ʻOtuá, kuo pau ke ne talitekeʻi ʻa e tākiekina ʻikai lelei ʻo e māmaní, he ka ʻikai te ne fakatupulekina ʻa e ngaahi tōʻonga ʻe fakatupu maumau pē kiate ia pea taʻefakahōifua ki he ʻOtuá.—ʻEfesō 2:1-3; 4:17-19.

“Ke fai homou liliú ʻaki hono fakafoʻou homou ʻatamaí.” Kuo pau foki ki he tokotahá ke ne liliu ʻa e anga ʻene fakakaukaú mo e ngaahi ongoʻi lolotó. ʻOku tau sio ko ha liliu lahi eni mei he foʻi lea faka-Kalisi naʻe liliu ke “fai homou liliú,” ʻa ia ʻokú ne fakamatalaʻi ʻa e liliu meimei tatau ʻo ha ʻunufe ki ha kiʻi pepe. Ko e faʻahinga ʻoku nau lotu ki he ʻOtuá kuo pau ke nau kofuʻaki ʻa e “angaʻitangata foʻou.”—ʻEfesō 4:23, 24; Kolose 3:9, 10.

“Fakamoʻoniʻi kiate kimoutolu ʻa e finangalo lelei mo fakahōifua mo haohaoa ʻo e ʻOtuá.” ʻOku fiemaʻu ʻe he ʻOtuá ʻa e faʻahinga ʻoku lotu kiate iá ke nau falala kakato ki he meʻa ʻoku nau tui ki aí. Ko e faʻahinga ko ení ʻoku nau fai eni ʻaki ʻenau ako ʻa e Folofola ʻa e ʻOtuá, ngāueʻaki ʻa e meʻa ʻoku leaʻakí, pea hokosia ʻa e ngaahi ʻaonga ʻo e moʻui ʻo fakatatau mo e ngaahi tuʻunga ʻa e ʻOtuá. ʻI he meʻá ni, ʻoku nau fakamoʻoniʻi ai ko e ngaahi founga pē ʻa e ʻOtuá ʻa e lelei tahá.—Saame 34:8.

Puipuituʻa ʻo e Loma 12:2

ʻOku fakamatalaʻi ʻi he Loma vahe 12 ʻa e meʻa ʻoku fiemaʻu ke fakahōifua ai ʻa e lotu ki he ʻOtuá. Ko e lotu ko iá ʻoku ʻi ai ʻene kaunga ki he tafaʻaki kotoa ʻo ʻetau moʻuí pea ʻoku fiemaʻu ki he tokotaha ko iá ke ne ngāueʻaki ʻene “mafai fakaefakaʻuhingá” kae ʻikai ke tui noaʻia pē pe takihalaʻi ʻe heʻene ngaahi ongoʻí. (Loma 12:1, 3) ʻOku ʻi he vahe ko ení ʻa e ngaahi faleʻi ʻaonga ki he founga ke fakahāhā ai ʻa e ngaahi ʻulungaanga fakaʻotuá, founga ke fakafeangai ai ki he niʻihi kehé, mo e founga ke tali ʻaki ʻi hano ngaohikoviá.—Loma 12:9-21.