Fakamatala ‘i Lalo

c ʻOku fakahuʻunga mai ʻe he kau mataotaó naʻe fai ʻe he kau tangatá ha fuakava Nāsili. (Nōm. 6:1-21) Ko e moʻoni, ko e Lao ʻa Mōsesé, ʻa ia ʻoku pau pē naʻe fai ʻa e fuakava ko iá ʻi hono malumalú, naʻe ʻikai toe fiemaʻu ia ʻi he taimi ko ení. Ka, ʻoku pau pē naʻe fakaʻuhinga ʻa Paula ʻe ʻikai hala ia ki he kau tangatá ke nau fakahoko ha fuakava naʻe fai kia Sihova. Ko ia ai, ʻe ʻikai hala ia kiate ia ke ne totongi ʻenau ngaahi fakamolé pea ʻalu fakataha mo kinautolu. ʻOku ʻikai ke tau ʻilo tonu pe ko e hā ʻa e faʻahinga fuakava naʻe faí, ka neongo pe ko e hā ia, ʻoku ngalingali pē naʻe ʻikai ke poupouʻi ʻe Paula ʻa hono ʻoatu ha feilaulau monumanu (hangē ko ia naʻe fai ʻe he kau Nāsilí), ʻi he tui ʻe fakamaʻa ai ʻa e kau tangatá mei he angahalá. Naʻe hanga ʻe he feilaulau haohaoa ʻa Kalaisí ʻo toʻo mei he ngaahi feilaulau peheé hanau faʻahinga mahuʻinga fakaefakamolemole angahala pē. Pe ko e hā pē ʻa e meʻa naʻá ne faí, ʻoku lava ke tau fakapapauʻi naʻe ʻikai loto-tatau ʻa Paula ia ki ha meʻa pē ʻe maumauʻi ai ʻa hono konisēnisí.