Nōmipa
24 ʻI he vakai ʻa Pēlami naʻe leleiʻia* ʻa Sihova ke tāpuakiʻi ʻa ʻIsilelí, naʻe ʻikai te ne toe ʻalu ke kumi ki ha ngaahi fakaʻilonga kovi,+ ka naʻá ne tafoki ʻo hanga ki he toafá. 2 ʻI he hanga hake ʻa Pēlami ʻo ne vakai ki ʻIsileli ʻoku ʻapitanga mai ʻo fakatatau ki hono ngaahi matakalí,+ naʻe hoko mai leva ʻa e laumālie ʻo e ʻOtuá kiate ia.+ 3 Naʻá ne leaʻaki leva ʻa e lea fakaefakatātā ko ení:+
“Ko e lea ʻa Pēlami ko e foha ʻo Pioa,
Pea ko e lea ʻa ha tangata ʻa ia kuo fakaʻā hono matá,
4 Ko e lea ʻa e tokotaha ʻoku fanongo ki he folofola ʻa e ʻOtuá,
ʻA ia naʻá ne mamata ki ha vīsone mei he Māfimafi-Aoniú,
ʻA ia kuó ne punou hifo kuo fakaʻā ʻa hono matá:+
5 He fakaʻofoʻofa moʻoni ē ko ho ngaahi tēnití ʻe Sēkope,
Ko ho ngaahi tāpanekalé, ʻe ʻIsileli!+
6 ʻI he hangē ko e ngaahi teleʻá* kuo nau lele fakalōloa atu,+
Hangē ko e ngaahi ngoue ʻi he veʻe vaitafé,
Hangē ko e ʻaloe* ʻa ia kuo tō ʻe Sihová,
Hangē ko e ʻulu sita ʻi he veʻe vaí.
7 ʻOku hafu hifo ʻa e vaí mei heʻene ongo kané,
Pea ko hono hakó ʻoku ʻi he ngaahi veʻe vai lahi.+
8 ʻOku ʻomi ia ʻe he ʻOtuá mei ʻIsipite;
ʻOkú ne hangē ko e ongo meʻatui ʻo ha pulu tangata kaivaó kiate kinautolu.
Te ne keina ʻa e ngaahi puleʻangá, ʻa hono kau fakaaoaó,+
Pea te ne ngau honau ngaahi huí, pea te ne fakaʻauha kinautolu ʻaki ʻene ngaahi ngahaú.
9 Kuó ne tulolo hifo, kuó ne tokoto hifo hangē ko e laioné,
Pea ʻi he hangē ko ha laioné, ko hai ia ʻe fakatoʻotoʻa ke ne ueʻi hake ia?
Ko kinautolu ʻoku nau tāpuakiʻi koé ʻe faitāpuekina,
Pea ko kinautolu ʻoku nau talatukiʻi koé te nau malaʻia.”+
10 Naʻe hoko leva ʻa Pēlaki ʻo tōlili ʻia Pēlami. Naʻe pasiʻi manuki ʻe Pēlaki ʻa hono nimá peá ne pehē ange kia Pēlami: “Naʻá ku ui mai koé+ ke ke talatukiʻi ʻa hoku ngaahi filí, ka ko eni kuo ʻikai ha meʻa te ke fai ka ko hono tāpuakiʻi pē kinautolu ʻo tuʻo tolú ni. 11 Foki leva he taimí ni pē ki ʻapi. Naʻá ku taumuʻá ke fakalāngilangiʻi lahi koe,+ kae vakai, kuo taʻofi ʻe Sihova ʻa e lāngilangí meiate koe.”
12 Naʻe tali ange ʻe Pēlami kia Pēlaki: “ʻIkai naʻá ku pehē ki he kau talafekau naʻá ke fekauʻi maí, 13 ‘Kapau ʻe foaki mai ʻe Pēlaki ʻa hono fale ʻoku fonu ʻi he silivá mo e koulá, heʻikai lava ke u fai ʻe au ʻi ha loto pē ʻoʻoku ha meʻa ʻo kehe ia mei he tuʻutuʻuni ʻa Sihová, tatau ai pē pe ko ha meʻa lelei pe kovi. Te u leaʻaki pē ʻa e meʻa ʻe tala mai ʻe Sihova kiate aú’?+ 14 Pea ko eni ʻoku ou ʻalu ki hoku kakaí. Haʻu pea tuku ke u faleʻi koe ki he meʻa ʻe fai ʻe he kakaí ni ki ho kakaí ʻi he kahaʻú.”* 15 Ko ia naʻá ne leaʻaki ai ʻa e lea fakaefakatātā ko ení:+
“Ko e lea ʻa Pēlami ko e foha ʻo Pioa,
Pea ko e lea ʻa ha tangata ʻa ia kuo fakaʻā hono matá,+
16 Ko e lea ʻa e tokotaha ʻoku fanongo ki he folofola ʻa e ʻOtuá,
Pea ko e tokotaha ʻokú ne maʻu ʻa e ʻilo ʻoku ʻomai ʻe he Fungani Māʻolungá,
Ko ha vīsone mei he Māfimafi-Aoniú naʻá ne mamata ki ai
Lolotonga ʻene punou hifo kuo fakaʻā ʻa hono matá:
17 Te u sio kiate ia, kae ʻikai he taimí ni;
Te u sio kiate ia, kae ʻikai vavé ni.
Pea te ne mātuʻaki maumauʻi ʻa e laʻe ʻo Mōapé*+
Pea mo e ngeʻesi-ʻulu ʻo e ngaahi foha faifakaʻauhá kotoa.
18 Pea ʻe hoko ʻa ʻĪtomi ko ʻene meʻa,+
ʻIo, ʻe maʻu ʻa Seia+ ʻe hono ngaahi filí,+
Lolotonga ia hono fakahāhā ʻe ʻIsileli ʻa ʻene loto-toʻá.
19 Pea ʻe haʻu meia Sēkope ha tokotaha te ne fai ʻa e fakamoʻulaloaʻí,+
Pea te ne fakaʻauha ha taha pē ʻe hao mei he koló.”
20 ʻI heʻene sio ki ʻAmalekí, naʻe hoko atu ʻene lea fakaefakatātaá:
21 ʻI heʻene sio ki he kau Kēnaí,+ naʻe hoko atu ʻene lea fakaefakatātaá:
“ʻOku malu ho nofoʻangá, pea ʻoku fokotuʻu ho nofoʻangá ʻi he maká.
22 Ka ʻe tutu ʻe ha taha ʻa Kēnai.*
Ko e hā hono fuoloa pea taki pōpula koe ʻe ʻAsīliá?”
23 Pea naʻe hoko atu ʻene lea fakaefakatātaá:
“ʻOiauē! Ko hai ʻe hao ʻi he taimi ʻe fai ai eni ʻe he ʻOtuá?
24 ʻE haʻu ʻa e ngaahi vaka mei he matāfanga ʻo Kītimí,+
Pea te nau fakamamahiʻi ʻa ʻAsīlia,+
Pea te nau fakamamahiʻi ʻa ʻEpa.
Ka ko ia foki te ne ʻauha ʻosiʻosingamālie.”
25 Naʻe tuʻu hake leva ʻa Pēlami+ ʻo ne fononga ʻo foki ki hono feituʻú. Naʻe ʻalu atu foki mo Pēlaki ʻi hono hala ʻoʻoná.