Nōmipa

29 “‘Pea ʻi he māhina hono fitú, ʻi he ʻuluaki ʻaho ʻo e māhiná, ʻoku totonu ke mou fai ai ha fakataha-lahi toputapu. Kuo pau ke ʻoua naʻa mou fai ai ha ngāue mamafa+ ʻe taha. Ko ha ʻaho ia ʻoku totonu ke mou ifi ai ʻa e talupité.+ 2 Te mou ʻoatu ko ha feilaulau tutu ki ha ngangatu fakahōifua* kia Sihova ʻa e kiʻi pulu tangata ʻe taha, sipi tangata ʻe taha, mo e lami tangata ʻe fitu taki taʻu taha, ʻoku nau taʻemele hono kotoa, 3 mo honau feilaulau meʻakaí ko e mahoaʻa lelei kuo fio mo e lolo, ʻa ia ko e vahe hongofulu ʻe tolu ʻo ha fua efa ki he pulu tangatá, mo e fua ko e vahe hongofulu ʻe ua ki he sipi tangatá, 4 mo e fua ko e vahe hongofulu ʻe taha ki he lami tangata taki taha ʻi he lami tangata ʻe fitú, 5 mo e kiʻi kosi tangata ʻe taha ko ha feilaulau angahala ke faiʻaki ha feilaulau ʻufiʻufi angahala maʻamoutolu. 6 ʻE tānaki atu eni ki he feilaulau tutu fakamāhiná mo hono feilaulau meʻakaí+ pea mo e feilaulau tutu tuʻumaʻú mo hono feilaulau meʻakaí,+ fakataha mo hona ongo feilaulau inú,+ ʻo fakatatau ki he founga anga-maheni kiate kinautolú, ko ha ngangatu fakahōifua,* ko ha feilaulau ʻoku fai ʻaki ʻa e afi kia Sihova.

7 “‘Pea ʻi he ʻaho hono hongofulu ʻo e māhina ko eni hono fitú, ʻoku totonu ke mou fai ai ha fakataha-lahi toputapu,+ pea kuo pau ke mou fakamamahi.* Kuo pau ke ʻoua naʻa mou fai ai ha ngāue ʻe taha.+ 8 Pea te mou ʻoatu ko ha feilaulau tutu kia Sihova, ko ha ngangatu fakahōifua,* ʻa e kiʻi pulu tangata ʻe taha, sipi tangata ʻe taha, mo e lami tangata ʻe fitu taki taʻu taha, ʻoku nau taʻemele+ hono kotoa. 9 Pea ko honau feilaulau meʻakaí ko e mahoaʻa lelei kuo fio mo e lolo, ʻa ia ko e fuá ko e vahe hongofulu ʻe tolu ki he pulu tangatá, mo e fua ko e vahe hongofulu ʻe ua ki he sipi tangata ʻe tahá, 10 ko ha fua ko e vahe hongofulu ʻe taha ki he lami tangata taki taha ʻi he lami tangata ʻe fitú, 11 pea pehē ki he kosi mui ʻe taha ko ha feilaulau angahala, tuku kehe ʻa e feilaulau angahala ʻi he ʻAho ʻo e ʻUfiʻufi Angahalá*+ mo e feilaulau tutu tuʻumaʻú mo hono feilaulau meʻakaí, fakataha mo hona ongo feilaulau inú.

12 “‘Pea ʻi he ʻaho hono 15 ʻo e māhina hono fitú, ʻoku totonu ke mou fai ai ha fakataha-lahi toputapu. Kuo pau ke ʻoua naʻa mou fai ai ha ngāue mamafa ʻe taha, pea kuo pau ke mou fai ha kātoanga kia Sihova ʻo ʻaho fitu.+ 13 Pea te mou ʻoatu ko ha feilaulau tutu,+ ko ha feilaulau ʻoku fai ʻaki ʻa e afi ko ha ngangatu fakahōifua* kia Sihova, ʻa e kiʻi pulu tangata ʻe 13, sipi tangata ʻe 2, mo e lami tangata ʻe 14 taki taʻu taha, ʻoku nau taʻemele+ hono kotoa. 14 Pea ko honau feilaulau meʻakaí ko e mahoaʻa lelei kuo fio mo e lolo, ʻa ia ko e fuá ko e vahe hongofulu ʻe tolu ki he pulu tangata taki taha ʻi he pulu tangata ʻe 13, mo e fua ko e vahe hongofulu ʻe ua ki he sipi tangata taki taha ʻi he sipi tangata ʻe 2, 15 mo ha fua ko e vahe hongofulu ʻe taha ki he lami tangata taki taha ʻi he lami tangata ʻe 14, 16 pea pehē ki he kosi mui ʻe taha ko ha feilaulau angahala, tuku kehe ʻa e feilaulau tutu tuʻumaʻú, mo hono feilaulau meʻakaí, pea mo hono feilaulau inú.+

17 “‘Pea ʻi he ʻaho hono uá, ko e kiʻi pulu tangata ʻe 12, sipi tangata ʻe 2, mo e lami tangata ʻe 14 taki taʻu taha, ʻoku nau taʻemele+ hono kotoa, 18 pea ko honau feilaulau meʻakai mo honau ngaahi feilaulau inu ki he fanga pulu tangatá, mo e ongo sipi tangatá, mo e fanga lami tangatá ʻo fakatatau ki honau tokolahí pea ki he founga anga-mahení, 19 pea pehē ki he kosi mui ʻe taha ko ha feilaulau angahala, tuku kehe ʻa e feilaulau tutu tuʻumaʻú mo hono feilaulau meʻakaí, fakataha mo hona ongo feilaulau inú.+

20 “‘Pea ʻi he ʻaho hono tolú, ko e pulu tangata ʻe 11, sipi tangata ʻe 2, mo e lami tangata ʻe 14 taki taʻu taha, ʻoku nau taʻemele+ hono kotoa, 21 pea ko honau feilaulau meʻakai mo honau ngaahi feilaulau inu ki he fanga pulu tangatá, mo e ongo sipi tangatá, mo e fanga lami tangatá ʻo fakatatau ki honau tokolahí pea ki he founga anga-mahení, 22 pea pehē ki he kosi ʻe taha ko ha feilaulau angahala, tuku kehe ʻa e feilaulau tutu tuʻumaʻú mo hono feilaulau meʻakaí pea mo hono feilaulau inú.+

23 “‘Pea ʻi he ʻaho hono faá, ko e pulu tangata ʻe 10, sipi tangata ʻe 2, mo e lami tangata ʻe 14 taki taʻu taha, ʻoku nau taʻemele+ hono kotoa, 24 ko honau feilaulau meʻakai mo honau ngaahi feilaulau inu ki he fanga pulu tangatá, mo e ongo sipi tangatá, mo e fanga lami tangatá ʻo fakatatau ki honau tokolahí pea ki he founga anga-mahení, 25 pea pehē ki he kosi mui ʻe taha ko ha feilaulau angahala, tuku kehe ʻa e feilaulau tutu tuʻumaʻú mo hono feilaulau meʻakaí, pea mo hono feilaulau inú.+

26 “‘Pea ʻi he ʻaho hono nimá, ko e pulu tangata ʻe 9, sipi tangata ʻe 2, mo e lami tangata ʻe 14 taki taʻu taha, ʻoku nau taʻemele+ hono kotoa, 27 pea ko honau feilaulau meʻakai mo honau ngaahi feilaulau inu ki he fanga pulu tangatá, mo e ongo sipi tangatá, mo e fanga lami tangatá ʻo fakatatau ki honau tokolahí pea ki he founga anga-mahení, 28 pea pehē ki he kosi ʻe taha ko ha feilaulau angahala, tuku kehe ʻa e feilaulau tutu tuʻumaʻú mo hono feilaulau meʻakaí pea mo hono feilaulau inú.+

29 “‘Pea ʻi he ʻaho hono onó, ko e pulu tangata ʻe 8, sipi tangata ʻe 2, mo e lami tangata ʻe 14 taki taʻu taha, ʻoku nau taʻemele+ hono kotoa, 30 pea ko honau feilaulau meʻakai mo honau ngaahi feilaulau inu ki he fanga pulu tangatá, mo e ongo sipi tangatá, mo e fanga lami tangatá ʻo fakatatau ki honau tokolahí pea ki he founga anga-mahení, 31 pea pehē ki he kosi ʻe taha ko ha feilaulau angahala, tuku kehe ʻa e feilaulau tutu tuʻumaʻú mo hono feilaulau meʻakaí, pea mo hono ngaahi feilaulau inú.+

32 “‘Pea ʻi he ʻaho hono fitú, ko e pulu tangata ʻe 7, sipi tangata ʻe 2, mo e lami tangata ʻe 14 taki taʻu taha, ʻoku nau taʻemele+ hono kotoa, 33 pea ko honau feilaulau meʻakai mo honau ngaahi feilaulau inu ki he fanga pulu tangatá, mo e ongo sipi tangatá, mo e fanga lami tangatá ʻo fakatatau ki honau tokolahí pea ki he founga anga-maheni kiate kinautolú, 34 pea pehē ki he kosi ʻe taha ko ha feilaulau angahala, tuku kehe ʻa e feilaulau tutu tuʻumaʻú mo hono feilaulau meʻakaí, pea mo hono feilaulau inú.+

35 “‘ʻI he ʻaho hono valú, ʻoku totonu ke mou fai ai ha fuʻu fakataha makehe. ʻOku ʻikai totonu ke mou fai ai ha ngāue mamafa+ ʻe taha. 36 Te mou ʻoatu ko ha feilaulau tutu, ko ha feilaulau ʻoku fai ʻaki ʻa e afi ko ha ngangatu fakahōifua* kia Sihova, ʻa e pulu tangata ʻe taha, sipi tangata ʻe taha, mo e lami tangata ʻe fitu taki taʻu taha, ʻoku nau taʻemele+ hono kotoa, 37 pea ko honau feilaulau meʻakai mo honau ngaahi feilaulau inu ki he pulu tangatá, mo e sipi tangatá, mo e fanga lami tangatá ʻo fakatatau ki honau tokolahí pea ki he founga anga-mahení, 38 pea pehē ki he kosi ʻe taha ko ha feilaulau angahala, tuku kehe ʻa e feilaulau tutu tuʻumaʻú mo hono feilaulau meʻakaí pea mo hono feilaulau inú.+

39 “‘Te mou ʻoatu ʻa e ngaahi meʻá ni kia Sihova ʻi hoʻomou ngaahi kātoanga fakafaʻahitaʻú,+ ʻo tānaki atu ki hoʻomou ngaahi feilaulau fuakavá+ mo hoʻomou ngaahi feilaulau loto-tauʻatāiná+ ke hoko ko hoʻomou ngaahi feilaulau tutu+ mo hoʻomou ngaahi feilaulau meʻakai+ mo hoʻomou ngaahi feilaulau inu+ mo hoʻomou ngaahi feilaulau feʻinasiʻaki.’”+ 40 Naʻe tala ʻe Mōsese ki he kau ʻIsilelí ʻa e meʻa kotoa pē naʻe tuʻutuʻuni ʻe Sihova kiate iá.