Nōmipa

32 Pea ko e ngaahi foha ʻo Lūpení+ pea mo e ngaahi foha ʻo Katá+ naʻe tokolahi ʻaupito ʻenau fanga manú, pea naʻa nau vakai ko e ongo fonua ko Siasea+ mo Kiliatí ko ha feituʻu lelei ia ki he fanga manú. 2 Ko ia naʻe ʻunuʻunu mai ʻa e ngaahi foha ʻo Katá pea mo e ngaahi foha ʻo Lūpení kia Mōsese, mo ʻEliesa ko e taulaʻeikí, pea mo e ngaahi ʻeiki ʻo e fuʻu fakatahá ʻo nau pehē: 3 “Ko ʻAtaloti, Tīponi, Siasea, Nimila, Hesiponi,+ ʻEleale, Sipami, Nipo,+ pea mo Peoni,+ 4 ʻa e vahefonua naʻe ikunaʻi ʻe Sihova ʻi he ʻao ʻo e fuʻu fakataha ʻo ʻIsilelí,+ ko ha vahefonua lelei ia ki he fanga manú, pea ko hoʻo kau sevānití ʻoku tokolahi ʻenau fanga manú.”+ 5 Naʻa nau hoko atu: “Kapau ʻokú ke leleiʻia ʻiate kimautolu, tuku ke hoko eni ko e vahefonua ke foaki ki hoʻo kau sevānití ke nau maʻu. ʻOua naʻa ʻai kimautolu ke mau kolosi ʻi Sioatani.”

6 Naʻe pehē ange leva ʻe Mōsese ki he ngaahi foha ʻo Katá mo e ngaahi foha ʻo Lūpení: “ʻE ʻalu koā homou fanga tokouá ʻi he taú ka mou nofo pē kimoutolu ia ʻi heni? 7 Ko e hā ke mou fakalotosiʻiʻi ai ʻa e kakai ʻo ʻIsilelí mei heʻenau kolosi ki he fonua ʻe foaki moʻoni ʻe Sihova moʻonautolú? 8 Ko e meʻa ia naʻe fai ʻe hoʻomou ngaahi tamaí ʻi heʻeku fekauʻi atu kinautolu mei Kētesi-pānea ke nau vakaiʻi ʻa e fonuá.+ 9 ʻI heʻenau ʻalu hake ki he Teleʻa* ʻEsikolí+ ʻo vakaiʻi ʻa e fonuá, naʻa nau fakalotosiʻiʻi ʻa e kakai ʻo ʻIsilelí mei heʻenau ʻalu ki he fonua naʻe teu ke foaki ʻe Sihova moʻonautolú.+ 10 Naʻe kakaha ʻa e houhau ʻa Sihová ʻi he ʻaho ko iá ʻo ne fuakava:+ 11 ‘Ko e kau tangata ko ia naʻe ʻalu hake mei ʻIsipite mei he taʻu 20 ʻo faai ki ʻolungá ʻe ʻikai te nau sio ʻi he fonua+ ko ia kuó u fuakavaʻaki kia ʻĒpalahame, ʻAisake, mo Sēkopé,+ koeʻuhí kuo ʻikai te nau muimui ʻaufuatō kiate au— 12 tuku kehe pē ʻa Kēlepi+ ko e foha ʻo Sīfune ko e Kenisaí pea mo Siosiua+ ko e foha ʻo Nuní, koeʻuhí kuó na muimui ʻaufuatō+ kia Sihova.’ 13 Ko ia naʻe kakaha ʻa e houhau ʻa Sihová ki ʻIsileli peá ne ʻai kinautolu ke nau hē holo ʻi he toafá ʻi he taʻu ʻe 40,+ kae ʻoua ke ngata ʻa e toʻutangata kotoa naʻa nau faikovi ʻi he vakai mai ʻa Sihová.+ 14 Pea ko eni kuo mou ʻalu hake ʻo fetongi hoʻomou ngaahi tamaí ko ha hako ʻo e kakai angahalaʻia ʻo mou fakalahi ai ʻa e houhau kakaha ʻa Sihova ki ʻIsilelí. 15 Kapau te mou tafoki mei he muimui kiate iá, te ne toe liʻaki moʻoni kinautolu ʻi he toafá, pea te mou ʻomai ai ʻa e ʻauha ki he kotoa ʻo e kakaí ni.”

16 Ki mui ai, naʻa nau ʻunuʻunu atu kiate ia ʻo nau pehē: “Tuku muʻa ke mau langa heni ha ngaahi ʻā maka maʻa ʻemau fanga manú mo ha ngaahi kolo maʻa ʻemau fānaú. 17 Ka te mau mateuteu ai pē ki he taú+ pea te mau ʻalu atu ʻi he ʻao ʻo e kau ʻIsilelí kae ʻoua kuo mau ʻave kinautolu ki honau feituʻú, lolotonga ia ko ʻemau fānaú te nau nofo ʻi he ngaahi kolo fakakolotau ʻo malu mei he kakai ʻo e fonuá. 18 Heʻikai te mau foki ki homau ngaahi ʻapí kae ʻoua kuo maʻu ʻe he kau ʻIsilelí taki taha hano kelekele ko hano tofiʻa.+ 19 Heʻikai te mau maʻu tofiʻa fakataha mo kinautolu ʻi he tafaʻaki ʻe taha ʻo Sioataní pea fakalaka atu ai, koeʻuhí kuo mau maʻu tofiʻa kimautolu ʻi he tafaʻaki fakahahake ʻo Sioataní.”+

20 Naʻe tali ange ʻe Mōsese kiate kinautolu: “Kapau te mou fai ʻeni: Toʻo hoʻomou meʻataú ʻi he ʻao ʻo Sihová ki he taú;+ 21 pea kapau ʻe toʻo meʻatau ʻa e tokotaha kotoa ʻo kimoutolu pea kolosi atu ʻi Sioatani ʻi he ʻao ʻo Sihová ʻi heʻene kapusi ʻa hono ngaahi filí mei hono ʻaó+ 22 kae ʻoua kuo fakavaivaiʻi ʻa e fonuá ʻi he ʻao ʻo Sihová,+ ʻi he hili leva iá ʻe lava ke mou foki+ pea ʻatā ai mei he halaia ʻi he ʻao ʻo Sihova pea mo ʻIsilelí. Pea ʻe hoko leva ai ʻo mou maʻu ʻa e fonuá ni ʻi he ʻao ʻo Sihová.+ 23 Ka ʻo kapau ʻe ʻikai te mou fai eni, te mou faiangahala ai kia Sihova. ʻI he meʻa ko iá, ke mou ʻiloʻi ʻe foki atu hoʻomou angahalá kiate kimoutolu. 24 Ko ia ke mou langa ʻa e ngaahi kolo maʻa hoʻomou fānaú mo e ngaahi ʻā maʻa hoʻomou ngaahi tākangá,+ ka kuo pau ke mou fai ki he meʻa kuo mou palōmesiʻakí.”

25 Ko e ngaahi foha ʻo Katá mo e ngaahi foha ʻo Lūpení naʻa nau fai ʻa e leá ni kia Mōsese: “ʻE fai ʻe hoʻo kau sevānití ʻo hangē tofu pē ko e tuʻutuʻuni ʻa homau ʻeikí. 26 Ko ʻemau fānaú, ko homau ngaahi uaifí, ko ʻemau fanga pulú, mo ʻemau fanga sipí kotoa te nau nofo ai ʻi he ngaahi kolo ʻo Kiliatí,+ 27 ka ko hoʻo kau sevānití te nau kolosi atu, kuo toʻo meʻatau ʻa e tangata kotoa ke faitau ʻi he ʻao ʻo Sihová,+ ʻo hangē tofu pē ko e lea ʻa homau ʻeikí.”

28 Ko ia naʻe ʻoange ʻe Mōsese ha tuʻutuʻuni fekauʻaki mo kinautolu kia ʻEliesa ko e taulaʻeikí, kia Siosiua ko e foha ʻo Nuní, pea ki he ngaahi ʻulumotuʻa ʻo e ngaahi fale ʻo e ngaahi tamai ʻa e ngaahi matakali ʻo ʻIsilelí. 29 Naʻe pehē ʻe Mōsese kiate kinautolu: “Kapau ʻe kolosi atu ʻa e ngaahi foha ʻo Katá mo e ngaahi foha ʻo Lūpení ʻi Sioatani fakataha mo kimoutolu, ʻa e tangata kotoa kuo toʻo meʻatau ʻi he ʻao ʻo Sihová ki he taú, pea fakavaivaiʻi ʻa e fonuá ʻi homou ʻaó, te mou toki ʻoange leva ai kiate kinautolu ʻa e fonua ko Kiliatí ke nau maʻu.+ 30 Ka ʻo kapau ʻe ʻikai ke nau toʻo meʻatau pea nau kolosi atu fakataha mo kimoutolu, te nau nofo leva ʻi homou lotolotongá ʻi he fonua ko Kēnaní.”

31 Naʻe tali ange ai ʻa e ngaahi foha ʻo Katá pea mo e ngaahi foha ʻo Lūpení: “Ko e meʻa ko ia kuo folofolaʻaki ʻe Sihova ki hoʻo kau sevānití ko e meʻa ia te mau faí. 32 Te mau toʻo meʻatau pea kolosi atu ʻi he ʻao ʻo Sihová ki he fonua ko Kēnaní,+ ka ko e tofiʻa te mau maʻú ʻe ʻi he tafaʻaki ia ko eni ʻo Sioataní.” 33 Ko ia naʻe ʻoange ʻe Mōsese kiate kinautolu—ki he ngaahi foha ʻo Katá, ko e ngaahi foha ʻo Lūpení,+ pea ki he vaeua ʻo e matakali ʻo Manase+ ko e foha ʻo Siosifá—ʻa e puleʻanga ʻo Sīhoni+ ko e tuʻi ʻo e kau ʻĀmolí pea mo e puleʻanga ʻo ʻOki+ ko e tuʻi ʻo Pēsaní, ʻa e kelekele ʻo e ngaahi kolo ʻi he ngaahi feituʻu ko iá, pea mo e ngaahi kolo ʻo e fonua takatakaí.

34 Pea naʻe langa* ʻe he ngaahi foha ʻo Katá ʻa Tīponi,+ ʻAtaloti,+ ʻAloeli,+ 35 ʻAtaloti-sofani, Siasea,+ Siokipeha,+ 36 Pete-nimila,+ mo Pete-hālani,+ ko e ngaahi kolo fakakolotau, pea naʻa nau langa ʻa e ngaahi ʻā maka ki he ngaahi tākangá. 37 Pea naʻe langa ʻe he ngaahi foha ʻo Lūpení ʻa Hesiponi,+ ʻEleale,+ Kiliataimi,+ 38 Nipo,+ mo Pēali-meoni+—kuo liliu honau ngaahi hingoá—mo Sipima; pea naʻe kamata ke nau toe fakahingoa foʻou ʻa e ngaahi kolo naʻa nau toe langá.

39 Ko e ngaahi foha ʻo Mākili+ ko e foha ʻo Manasé naʻa nau laka atu ki Kiliati ʻo nau puke ia pea kapusi ʻa e kau ʻĀmoli naʻa nau ʻi aí. 40 Ko ia naʻe ʻoange ʻe Mōsese ʻa Kiliati kia Mākili ko e foha ʻo Manasé, pea naʻe kamata ke ne nofo ai.+ 41 Pea ko Saili ko e hako ʻo Manasé naʻá ne laka atu kiate kinautolu ʻo ne puke ʻa e ngaahi kolo iiki ʻi he feituʻu ko iá, pea naʻe kamata ke ne fakahingoa kinautolu ko Havoti-saili.*+ 42 Pea naʻe laka atu ʻa Nopa ʻo ne puke ʻa Kēnati mo hono ngaahi kolo takatakaí,* pea naʻe kamata ke ne fakahingoaʻaki ia hono hingoa ʻoʻoná ko Nopa.