Nōmipa
36 Ko e ngaahi ʻuluʻi fāmili ʻo e hako ʻo Kiliati ko e foha ʻo Mākili+ ko e foha ʻo Manase mei he ngaahi fāmili ʻo e hako ʻo Siosifá naʻa nau ʻunuʻunu mai ʻo lea ʻi he ʻao ʻo Mōsesé mo e ngaahi ʻeikí, ʻa e ngaahi ʻuluʻi fāmili ʻo e kau ʻIsilelí. 2 Naʻa nau pehē: “Naʻe tuʻutuʻuni ʻe Sihova ki homau ʻeikí ke ne vahe ʻa e fonuá ʻaki hono fai ha lulu+ ki ai ke hoko ko ha tofiʻa ki he kau ʻIsilelí; pea ko homau ʻeikí naʻe tuʻutuʻuni ki ai ʻe Sihova ke ne foaki ʻa e tofiʻa ʻo homau tokoua ko Silofehatí ki hono ngaahi ʻofefiné.+ 3 Kapau te nau mali ki ha kau tangata mei ha matakali ʻIsileli ʻe taha, ko e tofiʻa ʻo e kau fefiné ʻe toʻo foki ia mei he tofiʻa ʻo ʻemau ngaahi tamaí ʻo tānaki atu ki he tofiʻa ʻo e matakali te nau mali ki aí, ko ia ʻe toʻo ai ia mei homau tofiʻa naʻe fai ʻa e lulu ki aí. 4 Pea ʻi he taimi ʻe fakahoko ai ʻa e Siupelí+ maʻá e kakai ʻo ʻIsilelí, ko e tofiʻa ʻo e kau fefiné ʻe toe tānaki atu ia ki he tofiʻa ʻo e matakali ʻa ia te nau mali ki aí, ko ia ʻe toʻo ai honau tofiʻá mei he tofiʻa ʻo e matakali ʻo ʻemau ngaahi tamaí.”
5 Naʻe fekau leva ʻe Mōsese ki he kau ʻIsilelí ʻi he tuʻutuʻuni ʻa Sihová: “Ko e meʻa ʻoku leaʻaki ʻe he matakali ʻo e hako ʻo Siosifá ʻoku moʻoni. 6 Ko e folofola eni kuo tuʻutuʻuni ʻe Sihova ki he ngaahi ʻofefine ʻo Silofehatí: ‘ʻE lava ke nau mali mo ha taha pē te nau loto ki ai. Kae kehe, ʻoku totonu ke nau mali mo ha taha mei ha fāmili ʻo e matakali ʻo ʻenau tamaí. 7 ʻOku ʻikai totonu ke feʻaveʻaki ʻa e tofiʻa ʻo e kau ʻIsilelí ʻi he matakali ki he matakali, he ʻoku totonu ke pīkitai ʻa e kau ʻIsilelí ki he tofiʻa ʻo e matakali ʻo ʻenau fanga kuí. 8 Pea ko e ʻofefine kotoa pē ʻokú ne maʻu ha tofiʻa ʻi he lotolotonga ʻo e ngaahi matakali ʻo ʻIsilelí ʻoku totonu ke ne hoko ko ha uaifi ʻo ha hako ʻo e matakali ʻo ʻene tamaí,+ koeʻuhi ke hokohoko atu ai hono maʻu ʻe he kau ʻIsilelí ʻa e tofiʻa ʻo ʻenau fanga kuí. 9 ʻOku ʻikai totonu ke feʻaveʻaki ha tofiʻa ʻi he matakali ʻe taha ki ha matakali ʻe taha, he ʻoku totonu ke pīkitai ʻa e ngaahi matakali ʻo ʻIsilelí ki honau tofiʻa ʻonautolú.’”
10 Ko e ngaahi ʻofefine ʻo Silofehatí naʻa nau fai ʻo hangē tofu pē ko e tuʻutuʻuni ʻa Sihova kia Mōsesé.+ 11 Ko ia ko Mahala, Tilisa, Hokela, Milika, pea mo Noa, ʻa e ngaahi ʻofefine ʻo Silofehatí,+ naʻa nau mali ki he ngaahi foha ʻo e fanga tokoua ʻo ʻenau tamaí. 12 Naʻa nau hoko ko e ngaahi uaifi ʻo e kau tangata mei he ngaahi fāmili ʻo Manase ko e foha ʻo Siosifá koeʻuhí ke nofo ai pē honau tofiʻá ʻi he matakali ʻo e fāmili ʻo ʻenau tamaí.
13 Ko e ngaahi fekau eni mo e ngaahi tuʻutuʻuni fakaefakamaau naʻe ʻoange ʻe Sihova ki he kau ʻIsilelí fakafou ʻia Mōsese ʻi he toafa ʻo Mōapé ʻi he veʻe Sioataní, ofi ki Sielikō.+