Nōmipa
5 Naʻe toe folofola ʻa Sihova kia Mōsese, ʻo pehē: 2 “Fekau ki he kau ʻIsilelí ke nau tuku ki tuʻa mei he ʻapitangá ʻa e tokotaha kilia+ kotoa pē mo e tokotaha kotoa pē ʻoku ʻau+ pea mo e tokotaha kotoa pē ʻoku taʻemaʻa ʻi ha tokotaha kuo mate.+ 3 Tatau ai pē pe ko ha tangata pe ko ha fefine, ʻoku totonu ke mou tuku kinautolu ki tuʻa. ʻOku totonu ke mou tuku kinautolu ki tuʻa mei he ʻapitangá, koeʻuhí ke ʻoua naʻa nau ʻuliʻi+ ʻa e ngaahi ʻapitanga ʻo e faʻahinga ko ia ʻoku ou nofo*+ ʻi honau lotolotongá.” 4 Ko ia naʻe fai pehē ʻa e kau ʻIsilelí ʻo tuku kinautolu ki tuʻa mei he ʻapitangá. Hangē ko e meʻa naʻe tala ʻe Sihova kia Mōsesé, naʻe pehē ʻa e meʻa naʻe fai ʻe he kau ʻIsilelí.
5 Naʻe hoko atu ʻa e folofola ʻa Sihova kia Mōsesé, ʻo pehē: 6 “Tala ki he kau ʻIsilelí, ‘Kapau ʻe fai ʻe ha tangata pe ko ha fefine ha taha ʻo e ngaahi angahala ʻa e faʻahinga ʻo e tangatá pea taʻefaitōnunga kia Sihova, kuo hoko ʻo halaia+ ʻa e tokotaha ko iá. 7 Kuo pau ke ne* vete+ ʻa e angahala kuó ne* faí pea ʻoatu ʻa e totongi kakato ʻo e huhuʻi ki heʻene halaiá pea toe tānaki foki ki ai ha vahe nima ʻe taha ʻo hono mahuʻingá;+ te ne foaki ia ki he tokotaha kuó ne faihala ki aí. 8 Ka ʻo kapau ʻoku ʻikai ha kāinga ofi ʻo e tokotaha mamahí ke ne maʻu ʻa e totongi huhuʻí, ʻoku totonu ke ʻoatu ia kia Sihova pea ʻe maʻu ia ʻe he taulaʻeikí, tuku kehe pē ʻa e sipi tangata ʻo e feilaulau ʻufiʻufi angahalá ʻa ia te ne faiʻaki ha feilaulau ʻufiʻufi angahala maʻá e tangatá.+
9 “‘Ko e meʻaʻofa toputapu+ kotoa pē mei he kau ʻIsilelí ʻa ia ʻoku ʻoatu ki he taulaʻeikí ʻoku totonu ke hoko ia ko ʻene meʻa.+ 10 Ko e ngaahi meʻa toputapu ʻa e tokotaha taki taha ʻe kei ʻa e taulaʻeikí ai pē ia. Ko e hā pē ʻa e meʻa ʻoku foaki ʻe he tokotaha taki taha ki he taulaʻeikí, ʻe maʻu ia ʻe he taulaʻeikí.’”
11 Naʻe hoko atu ʻa e folofola ʻa Sihova kia Mōsesé, ʻo pehē: 12 “Lea ki he kau ʻIsilelí ʻo tala kiate kinautolu, ‘Ko e meʻa eni ʻoku totonu ke faí kapau ʻe ʻalu hē ha uaifi ʻo ha tangata peá ne taʻefaitōnunga kiate ia 13 pea mohe* ha tangata ʻe taha mo ia,+ ka naʻe ʻikai ke ʻiloʻi ʻe hono husepānití pea kuo ʻikai ai pē ke ʻiloʻi, ʻo ne ʻuliʻi ai ia ka ʻoku ʻikai ha fakamoʻoni kiate ia pea kuo ʻikai ke maʻu ia: 14 Pe ʻoku hoko ʻa e husepānití ʻo fuaʻa mo huʻuhuʻu fekauʻaki mo e faitōnunga ʻa hono uaifí lolotonga ia kuo ʻuliʻi ʻe he fefiné ʻa ia tonu, pe ʻokú ne fuaʻa mo huʻuhuʻu fekauʻaki mo e faitōnunga ʻa hono uaifí ka kuo ʻikai ke ʻuliʻi ʻe he fefiné ʻa ia tonu, 15 kuo pau ke ʻomi ʻe he tangatá ʻa hono uaifí ki he taulaʻeikí, fakataha mo ha feilaulau ʻa hono uaifí, ko ha vahe hongofulu ʻo ha efa* ʻo e mahoaʻa paʻale. Kuo pau ke ʻoua naʻá ne lilingi ai ha lolo pe ʻai ki ai ha ʻinisēnisi hinehina, koeʻuhí ko ha feilaulau meʻakai ia ʻo e fuaʻa, ko ha feilaulau meʻakai ʻoku fakamanatu ai ʻa e halaiá.
16 “‘ʻE ʻomai ʻe he taulaʻeikí ʻa e fefiné ki muʻa pea ʻai ia ke ne tuʻu ʻi he ʻao ʻo Sihová.+ 17 ʻE ʻave ʻe he taulaʻeikí ha vai toputapu ʻi ha ʻaiʻanga meʻa ʻumea, pea ʻe toʻo ʻe he taulaʻeikí ha konga ʻo e efu mei he faliki ʻo e tāpanekalé ʻo ʻai ia ki he vaí. 18 Pea ʻe ʻai ʻe he taulaʻeikí ʻa e fefiné ke ne tuʻu ʻi he ʻao ʻo Sihová pea tuku ange ʻa e ʻulu ʻo e fefiné mo ʻai ki hono ongo ʻaofinimá ʻa e feilaulau meʻakaí ko ha fakamanatu, ʻa ia, ko e feilaulau meʻakai ʻo e fuaʻá,+ pea ʻe ʻi he nima ʻo e taulaʻeikí ʻa e vai kona ʻoku ʻomi ai ha mala.+
19 “‘ʻE ʻai leva ia ʻe he taulaʻeikí ke ne fai ha fakapapau, ʻo ne pehē ki he fefiné: “Kapau naʻe ʻikai ha tangata kehe ʻe mohe mo koe lolotonga hoʻo ʻi he mafai ʻo ho husepānití+ pea naʻe ʻikai te ke ʻalu hē pea hoko ʻo ʻuliʻi, ʻofa ke ke ʻatā mei he nunuʻa ʻo e vai kona ko eni ʻoku ʻomi ai ha malá. 20 Ka ʻo kapau kuó ke ʻalu hē lolotonga hoʻo ʻi he mafai ʻo ho husepānití ʻaki hoʻo ʻuliʻi koe, pea kuó ke mohe mo ha tangata ʻe taha+ tuku kehe ʻa ho husepānití—” 21 ʻE ʻai leva ʻe he taulaʻeikí ʻa e fefiné ke ne fai ha fuakava ʻoku kau ki ai ha mala, pea ʻe pehē ʻe he taulaʻeikí ki he fefiné: “ʻOfa ke ʻai koe ʻe Sihova ko ha fakatātā ʻo ha fakamalaʻia pea mo ha fuakava ʻi he lotolotonga ho kakaí, ʻi hono ʻai koe ʻe Sihova ke homo* ho alangá* pea fakatupunga ai ho keté ke pupula. 22 Ko e vai ko eni ʻoku ʻomi ai ha malá ʻe hū ia ki ho toʻotoʻongá ʻo ne fakatupunga ho keté ke pupula pea ʻai ke homo* ho alangá.”* ʻI he meʻá ni ʻoku totonu ke pehē ai ʻe he fefiné: “ʻĒmeni! ʻĒmeni!”*
23 “‘ʻOku totonu leva ke tohi ʻe he taulaʻeikí ʻa e ngaahi mala ko ení ʻi he tohí pea olo ia ke maʻa ʻi he vai koná. 24 Te ne ʻai leva ʻa e fefiné ke ne inu ʻa e vai kona ʻoku ʻomi ai ha malá, pea ko e vai ʻoku ʻomi ai ha malá ʻe hū kiate ia ʻo fakatupunga ai ha meʻa fakamamahi. 25 Pea ʻoku totonu ke toʻo ʻe he taulaʻeikí ʻa e feilaulau meʻakai ʻo e fuaʻá+ mei he nima ʻo e fefiné ʻo hapai ʻa e feilaulau meʻakaí ki muʻa mo mui ʻi he ʻao ʻo Sihová, pea te ne ʻomi ia ke ofi ki he ʻōlitá. 26 ʻE toʻo ʻe he taulaʻeikí ha falukunga mei he feilaulau meʻakaí ko ha feilaulau fakaefakaʻilonga pea tutu ia ke kohu ʻi he funga ʻōlitá,+ pea ʻi he hili iá te ne ʻai ʻa e fefiné ke ne inu ʻa e vaí. 27 ʻI heʻene ʻai ia ke ne inu ʻa e vaí, kapau kuó ne ʻuliʻi ia peá ne fai ha tōʻonga taʻefaitōnunga ki hono husepānití, ʻe hū leva ʻa e vai ʻokú ne ʻomi ha malá kiate ia pea hoko ia ko ha meʻa fakamamahi, pea ʻe pupula ʻa hono keté, pea ʻe homo* hono alangá,* pea ko e fefiné te ne hoko ko ha fakatātā ʻo ha fakamalaʻia ʻi he lotolotonga ʻo hono kakaí. 28 Kae kehe, kapau kuo ʻikai ke ʻuliʻi ʻe he fefiné ia pea ʻokú ne maʻa, te ne ʻatā leva ai mei he tautea ko iá, pea te ne malava ke tuʻituʻia pea maʻu fānau.
29 “‘Ko e lao eni fekauʻaki mo e fuaʻá+ ʻi he ʻalu hē ha fefine pea ʻuliʻi ia lolotonga ʻene ʻi he mafai ʻo hono husepānití, 30 pe ʻi he tuʻunga ʻo ha tangata ʻoku hoko ʻo fuaʻa pea huʻuhuʻu ʻoku taʻefaitōnunga ʻa hono uaifí; ʻoku totonu ke ne ʻai hono uaifí ke ne tuʻu ʻi he ʻao ʻo Sihová, pea kuo pau ke fakahoko ʻe he taulaʻeikí kiate ia ʻa e lao kotoa ko ení. 31 ʻE ʻatā ʻa e tangatá mei he halaiá, ka ʻe fua ʻe hono uaifí ʻa e nunuʻa ʻo ʻene halaiá.’”