Nōmipa
17 Naʻe folofola leva ʻa Sihova kia Mōsese: 2 “Lea ki he kau ʻIsilelí pea toʻo meiate kinautolu ʻa e tokotoko ʻe taha ki he fale taki taha ʻo ʻenau ngaahi tamaí, mei he ngaahi ʻeiki ʻo e fale taki taha ʻo ʻenau ngaahi tamaí,+ ko e tokotoko ʻe 12 fakakātoa. Tohiʻi ʻa e hingoa ʻo e tokotaha taki taha ʻi heʻene tokotokó. 3 ʻOku totonu ke ke tohiʻi ʻa e hingoa ʻo ʻĒloné ʻi he tokotoko ʻa Līvaí, koeʻuhí he ko e tokotoko ʻe taha ki he ʻulumotuʻa ʻo e fale taki taha ʻo ʻenau ngaahi tamaí. 4 Tuku ʻa e ngaahi tokotokó ʻi he tēniti feʻiloakiʻangá ʻi he ʻao ʻo e Fakamoʻoní,+ ʻa ia ʻoku ou hā maʻu atu ai pē kiate kimoutolú.+ 5 Pea ko e tokotoko ʻa e tangata ʻoku ou filí+ ʻe moto ia, pea te u fakangata ʻa e lāunga ʻa e kau ʻIsilelí kiate aú,+ ʻa ia ʻoku nau toe lāunga ʻaki foki kiate kimouá.”+
6 Ko ia naʻe lea ʻa Mōsese ki he kau ʻIsilelí, pea ko honau ngaahi ʻeikí kotoa naʻa nau ʻoange kiate ia ha ngaahi tokotoko—ko ha tokotoko ki he ʻeiki taki taha ʻo e fale ʻo ʻenau ngaahi tamaí, ko e tokotoko ʻe 12—pea naʻe kau ʻa e tokotoko ʻa ʻĒloné ʻi heʻenau ngaahi tokotokó. 7 Naʻe tuku leva ʻe Mōsese ʻa e ngaahi tokotokó ʻi he ʻao ʻo Sihová ʻi he tēniti ʻo e Fakamoʻoní.
8 ʻI he ʻaho hono hokó, ʻi he taimi naʻe hū atu ai ʻa Mōsese ki he tēniti ʻo e Fakamoʻoní, vakai, ko e tokotoko ʻa ʻĒlone maʻá e fale ʻo Līvaí kuo moto ia pea naʻe laku moto mai mo matala pea fua mai ai ha ngaahi foʻi ʻalimoni motuʻa. 9 Naʻe ʻomi leva ki tuʻa ʻe Mōsese ʻa e ngaahi tokotokó kotoa mei he ʻao ʻo Sihová ki he kakai kotoa ʻo ʻIsilelí. Naʻa nau sio ki ai, pea naʻe toʻo ʻe he tangata taki taha ʻa ʻene tokotoko ʻaʻana.
10 Naʻe folofola ange leva ʻa Sihova kia Mōsese: “Fakafoki ʻa e tokotoko ʻa ʻĒloné+ ki he ʻao ʻo e Fakamoʻoní ko ha meʻa ia ke tauhi ko ha fakaʻilonga+ ki he ngaahi foha angatuʻú,+ koeʻuhí ke ngata ai ʻenau lāunga kiate aú pea koeʻuhí ke ʻoua naʻa nau mate.” 11 Naʻe fai leva he taimi pē ko iá ʻe Mōsese ʻa e meʻa tofu pē naʻe tuʻutuʻuni ʻe Sihova kiate iá. Naʻá ne fai ʻa e meʻa tofu pē ko iá.
12 Naʻe pehē ange leva ʻe he kau ʻIsilelí kia Mōsese: “Ko eni te mau mate, ko e moʻoni te mau ʻauha, te mau ʻauha hono kotoa! 13 Ko ha taha pē ʻe aʻu ʻo ne haʻu ʻo ofi ki he tāpanekale ʻo Sihová te ne mate!+ ʻE pau koā ke mau iku ʻo mate pehē?”+