Nōmipa

18 Naʻe folofola leva ʻa Sihova kia ʻĒlone: “Ko koe mo ho ngaahi fohá mo e fale ʻo hoʻo ngaahi tamaí te mou fua ʻa e nunuʻa ki ha faihala pē ʻoku fai ʻi he fekauʻaki mo e feituʻu toputapú,+ pea ko koe mo ho ngaahi fohá te mou fua ʻa e nunuʻa ki ha faihala pē ʻoku fai ʻi he fekauʻaki mo homou tuʻunga taulaʻeikí.+ 2 Fakaofiofi mai foki ho fanga tokoua ʻi he matakali ʻo Līvaí, ʻa e matakali ʻo hoʻo tamaí, koeʻuhí ke nau kau fakataha mo koe pea fai fatongia kiate koe+ mo ho ngaahi fohá ʻi muʻa ʻi he tēniti ʻo e Fakamoʻoní.+ 3 Te nau fakahoko honau ngaahi fatongia kiate koé pea ki he tēnití fakakātoa.+ Kae kehe, kuo pau ke ʻoua naʻa nau haʻu ʻo ofi ki he ngaahi naunau ʻo e potu toputapú pea mo e ʻōlitá, koeʻuhí ke ʻoua naʻa nau mate pea pehē foki kiate kimoutolu.+ 4 Te nau kau mo koe pea fakahoko honau ngaahi fatongia fekauʻaki mo e tēniti feʻiloakiʻangá mo e ngāue kotoa pē ʻi he tēnití, pea heʻikai haʻu ha tokotaha taʻefakamafaiʻi* ʻo ofi kiate kimoutolu.+ 5 Kuo pau ke mou fakahoko homou fatongia ki he potu toputapú+ pea mo e ʻōlitá,+ koeʻuhi ke ʻoua naʻa toe hoko mai ha houhau+ ki he kakai ʻo ʻIsilelí. 6 Ko au tonu kuó u toʻo homou fanga tokouá, ʻa e kau Līvaí, mei he haʻohaʻonga ʻo e kau ʻIsilelí ke hoko ko ha meʻaʻofa kiate kimoutolu.+ ʻOku foaki kinautolu kia Sihova ke nau tokangaʻi ʻa e ngāue ʻi he tēniti feʻiloakiʻangá.+ 7 Ko koe mo ho ngaahi fohá ʻoku ʻomoutolu ʻa hono fua ʻa e fatongia ki homou ngaahi ngafa fakataulaʻeiki ʻi he fekauʻaki mo e ʻōlitá pea mo e meʻa ʻoku ʻi he loto puipuí,+ pea te mou fai ʻa e ngāué ni.+ Kuó u foaki ʻa e ngāue ʻo e tuʻunga taulaʻeikí ko ha meʻaʻofa kiate kimoutolu, pea ko ha tokotaha taʻefakamafaiʻi* pē ʻoku fakaofiofi ki ai ʻoku totonu ke tāmateʻi ia.”+

8 Naʻe toe folofola ʻa Sihova kia ʻĒlone: “Ko au tonu ʻoku ou fokotuʻu koe ke ke tokangaʻi ʻa e ngaahi meʻaʻofa kuo foaki kiate aú.+ Kuó u ʻoatu kiate koe pea ki ho ngaahi fohá ko homou ʻinasi ʻa e ngaahi meʻa toputapu kotoa pē kuo meʻaʻofaʻaki ʻe he kau ʻIsilelí ke hoko ko homou ʻinasi tuʻumaʻu.+ 9 Ko hoʻo meʻa eni te ke maʻu mei he ngaahi feilaulau mātuʻaki toputapu ʻoku fai ʻaki ʻa e afí: Ko e feilaulau kotoa pē ʻoku nau faí, ʻo kau ai ʻenau ngaahi feilaulau meʻakai+ mo ʻenau ngaahi feilaulau angahala+ mo ʻenau ngaahi feilaulau halaia+ ʻoku nau ʻomi kiate aú. Ko ha meʻa mātuʻaki toputapu ia kiate koe pea ki ho ngaahi fohá. 10 ʻOku totonu ke ke kai ia ʻi ha potu mātuʻaki toputapu.+ ʻE kai ia ʻe he tangata kotoa pē. ʻE hoko ia ko ha meʻa toputapu kiate koe.+ 11 ʻOku ʻaʻau foki mo eni: Ko e ngaahi meʻaʻofa ʻoku nau meʻaʻofaʻakí+ fakataha mo e ngaahi feilaulau hapai+ kotoa pē ʻa e kau ʻIsilelí. Kuó u foaki ia kiate koe mo ho ngaahi fohá mo ho ngaahi ʻofefiné ko ha ʻinasi tuʻumaʻu.+ Ko e tokotaha kotoa pē ʻoku maʻa ʻi ho falé te ne kai ia.+

12 “Ko e lolo lelei taha kotoa pē mo e uaine foʻou mo e uite lelei taha kotoa pē, ko ʻenau ʻuluaki fuá,+ ʻa ia ʻoku nau foaki kia Sihová, ʻoku ou foaki ia kiate koe.+ 13 Ko e ʻuluaki fua kuo motuʻa ʻo e meʻa kotoa pē mei honau kelekelé, ʻa ia te nau ʻomi kia Sihová, ʻe ʻaʻau ia.+ Ko e tokotaha kotoa pē ʻoku maʻa ʻi ho falé te ne kai ia.

14 “Ko e meʻa kotoa pē kuo līʻoa* ʻi ʻIsilelí ʻoku totonu ke ʻaʻau ia.+

15 “Ko e ʻuluaki foha kotoa ʻo e meʻamoʻui kotoa pē,*+ ʻa ia te nau ʻoatu kia Sihová, pe ko ha tangata pe manu, ʻoku totonu ke ʻaʻau ia. Kae kehe, ʻoku totonu ke ke mātuʻaki huhuʻi ʻa e ʻuluaki foha ʻo e faʻahinga ʻo e tangatá,+ pea ko e ʻuluaki ʻuhiki tangata ʻo e fanga manu taʻemaʻá ʻoku totonu ke ke huhuʻi ia.+ 16 ʻOku totonu ke ke huhuʻi ia ʻaki ʻa e mahuʻinga ʻo e totongi huhuʻí ʻi he taimi ʻoku māhina taha ai ʻa hono motuʻá ʻo faai ki ʻolunga, ʻo fakatatau ki he mahuʻinga kuo fakamahuʻingaʻi ko e sikeli*+ siliva ʻe nima, ʻo fakatatau ki he tuʻunga ʻo e fua sikeli ʻo e potu toputapú.* Ko e kela* ia ʻe 20. 17 Ko e ʻuluaki ʻuhiki tangata pē ʻo e pulú pe ko e ʻuluaki ʻuhiki tangata ʻo e lamí pe ko e ʻuluaki ʻuhiki tangata ʻo e kosí ʻoku ʻikai totonu ke ke huhuʻi ia.+ Ko e meʻa toputapu ia. ʻOku totonu ke ke afuhi honau totó ʻi he funga ʻōlitá,+ pea ko honau ngakó ʻoku totonu ke ke tutu ke kohu ia ko ha feilaulau ʻoku fai ʻaki ʻa e afi ko ha ngangatu fakahōifua* kia Sihova.+ 18 Pea ko honau kakanó ʻoku totonu ke ʻaʻau ia. Hangē ko e fatafata ʻo e feilaulau hapaí pea hangē ko e alanga mui toʻomataʻú, ʻoku totonu ke ʻaʻau ia.+ 19 Ko e kotoa ʻo e ngaahi meʻaʻofa toputapú ʻa ia ʻe meʻaʻofaʻaki ʻe he kau ʻIsilelí kia Sihová,+ kuó u ʻoatu ia kiate koe mo ho ngaahi fohá pea mo ho ngaahi ʻofefiné ke hoko ko ha ʻinasi tuʻumaʻu.+ Ko ha fuakava māsima* taʻengata ia ʻi he ʻao ʻo Sihová kiate koe mo ho hakó.”

20 Naʻe hoko atu ʻa Sihova ʻo ne folofola kia ʻĒlone: “Heʻikai te ke maʻu ha tofiʻa ʻi honau fonuá, pea ʻe ʻikai hao ʻinasi ʻi he kelekele ʻi honau lotolotongá.+ Ko au ʻa ho ʻinasi mo ho tofiʻa ʻi he lotolotonga ʻo e kau ʻIsilelí.+

21 “Pea vakai kuó u foaki ki he ngaahi foha ʻo Līvaí ʻa e vahe hongofulu ʻe taha+ kotoa pē ʻi ʻIsileli ko ha tofiʻa koeʻuhi ko e ngāue ʻoku nau fakahokó, ʻa e ngāue ʻi he tēniti feʻiloakiʻangá. 22 ʻE ʻikai ke kei fakaofiofi ʻa e kakai ʻo ʻIsilelí ki he tēniti feʻiloakiʻangá, telia naʻa nau hoko ai ʻo angahala pea nau mate. 23 Ko e kau Līvaí tonu te nau fakahoko ʻa e ngāue ʻi he tēniti feʻiloakiʻangá, pea ko kinautolu te nau fua ʻa e nunuʻa ki he faihala ʻa e kakaí.+ Ko ha tuʻutuʻuni taʻengata ia lolotonga homou ngaahi toʻutangatá kotoa ʻa ia ʻe ʻikai totonu ke nau maʻu ha tofiʻa ʻi he lotolotonga ʻo e kau ʻIsilelí.+ 24 He kuó u foaki ki he kau Līvaí ko ha tofiʻa ʻa e vahe hongofulu ʻe taha ʻo e meʻaʻofa ʻa e kakai ʻo ʻIsilelí, ʻa ia te nau meʻaʻofaʻaki kia Sihová. Ko e ʻuhinga ia kuó u pehē ai kiate kinautolu, ‘ʻOku ʻikai totonu ke nau maʻu ha tofiʻa ʻi he lotolotonga ʻo e kau ʻIsilelí.’”+

25 Naʻe folofola leva ʻa Sihova kia Mōsese: 26 “ʻOku totonu ke ke tala ki he kau Līvaí, ‘Te mou maʻu mei he kau ʻIsilelí ʻa e vahe hongofulu ʻe taha ʻa ia kuó u foaki atu kiate kimoutolu meiate kinautolu ko homou tofiʻá,+ pea ʻoku totonu ke mou meʻaʻofaʻaki mei ai ha vahe hongofulu ʻe taha ʻo e vahe hongofulu ko iá ke hoko ko ha meʻaʻofa kia Sihova.+ 27 Pea ʻe lau ia ko hoʻomou meʻaʻofa, ʻo hangē ko e uite ia ʻo e ʻauʻauʻangá+ pe ko e mahu ʻo e tataʻoʻanga uaine pe loló. 28 ʻI he foungá ni te mou toe foaki foki ai ha meʻaʻofa kia Sihova mei he kotoa ʻo e ngaahi vahe hongofulu ʻe taha ʻoku mou maʻu mei he kau ʻIsilelí, pea te mou foaki mei ai ʻa e meʻaʻofa kia Sihová kia ʻĒlone ko e taulaʻeikí. 29 Te mou ʻai ʻa e faʻahinga kotoa ʻo e meʻaʻofa kia Sihová mei he lelei taha ʻo e ngaahi meʻaʻofa kotoa kuo foaki kiate kimoutolú+ ke hoko ko ha meʻa toputapu.’

30 “Pea kuo pau ke ke pehē kiate kinautolu, ‘ʻI he taimi te mou meʻaʻofaʻaki ai ʻa e lelei taha ʻo kinautolú, ʻe lau leva ia maʻá e kau Līvaí ko e fua ʻo e ʻauʻauʻanga uité pea ko e mahu ʻo e tataʻoʻanga uainé pe loló. 31 Ko kimoutolu mo homou falé te mou kai ia ʻi ha faʻahinga feituʻu pē, he ko hoʻomou totongi ia koeʻuhi ko hoʻomou ngāue ʻi he tēniti feʻiloakiʻangá.+ 32 Heʻikai te mou hoko ʻo angahala ʻi he meʻá ni kehe pē ke mou meʻaʻofaʻaki mei ai ʻa e lelei tahá, pea kuo pau ke ʻoua naʻa mou taʻefakatoputapuʻi ʻa e ngaahi meʻa toputapu ʻa e kau ʻIsilelí, telia naʻa mou mate.’”+