Fakamaau

9 ʻI he faai mai ʻa e taimí naʻe ʻalu atu ʻa ʻApimeleki+ ko e foha ʻo Selupēalí ki he fanga tuongaʻane ʻo ʻene faʻeé ki Sīkemi, peá ne pehē kiate kinautolu pea ki he kotoa ʻo e fāmili ʻo ʻene kui tangatá:* 2 “ʻEke muʻa ki he kau taki* kotoa ʻo Sīkemí, ‘Ko fē ʻoku lelei ange kiate kimoutolú, ke puleʻi kimoutolu ʻe he ngaahi foha kotoa ʻe toko 70 ʻo Selupēalí+ pe ke puleʻi kimoutolu ʻe ha tangata ʻe toko taha? Pea manatuʻi ko homou hui mo homou kakano tonu au.’”*

3 Ko ia naʻe leaʻaki eni maʻana ʻe he fanga tuongaʻane ʻo ʻene faʻeé ki he kau taki kotoa ʻo Sīkemí, pea naʻe hehema honau lotó ke muimui ʻia ʻApimeleki, he naʻa nau pehē: “Ko hotau tokoua tonu ia.” 4 Naʻa nau ʻoange leva kiate ia ʻa e konga siliva ʻe 70 mei he fale* ʻo Pēali-pelití,+ pea naʻe ngāueʻaki ia ʻe ʻApimeleki ke ne totongiʻi ʻaki ha kau tangata naʻe nofo noa pē mo ʻafungi, ke nau ō mo ia. 5 ʻI he hili iá, naʻá ne ʻalu atu ki he fale ʻo ʻene tamaí ʻi ʻŌfila+ ʻo ne tāmateʻi hono fanga tokouá,+ ʻa e ngaahi foha ʻo Selupēalí, ko e kau tangata ʻe toko 70, ʻi he funga maka pē ʻe taha. Ko Siotame pē taha naʻe haó, ʻa e foha siʻi taha ʻo Selupēalí, koeʻuhí he naʻá ne toi.

6 Naʻe fakatahataha leva ʻa e kau taki kotoa ʻo Sīkemí pea mo e kotoa ʻo Pete-miló pea nau ʻai ʻa ʻApimeleki ke tuʻi,+ ʻo ofi ki he fuʻu ʻakau naʻe tuʻu ʻi he veʻe pou ʻa ia naʻe ʻi Sīkemí.

7 ʻI heʻenau fakahā ia kia Siotamé, naʻá ne ʻalu atu leva ʻo tuʻu ʻi he funga Moʻunga Kelisimí+ ʻo ne kalanga leʻo-lahi atu kiate kinautolu: “Fanongo mai kiate au, ʻa kimoutolu kau taki ʻo Sīkemí, pea ʻe fanongo atu leva ʻa e ʻOtuá kiate kimoutolu.

8 “Tokua naʻe ʻi ai ha ʻuluʻakau naʻa nau ʻalu atu ke pani ha tuʻi kiate kinautolu. Ko ia naʻa nau pehē ki he fuʻu ʻōlivé, ‘Pule mai kiate kimautolu.’+ 9 Ka naʻe pehē ange ʻe he fuʻu ʻōlivé kiate kinautolu, ‘Te u liʻaki koā ʻeku fakatupu ʻa e loló,* ʻa ia ʻoku ngāueʻaki ke fakalāngilangiʻi ai ʻa e ʻOtuá mo e tangatá, ka u ʻalu atu ʻo tākalo holo ʻi ʻolunga ʻi he ʻuluʻakau kehé?’ 10 Naʻe pehē ange leva ʻe he ʻuluʻakaú ki he fuʻu fikí, ‘Haʻu ʻo pule kiate kimautolu.’ 11 Ka naʻe pehē ange ʻe he fuʻu fikí kiate kinautolu, ‘Te u liʻaki koā ʻeku huʻamelié mo ʻeku fua leleí ka u ʻalu atu ʻo tākalo holo ʻi ʻolunga ʻi he ʻuluʻakau kehé?’ 12 Ko hono hokó, naʻe pehē ange ʻe he ʻuluʻakaú ki he kālepí, ‘Haʻu ʻo pule kiate kimautolu.’ 13 Naʻe tali ange ʻe he kālepí kiate kinautolu, ‘Te u liʻaki koā ʻeku uaine foʻou ʻoku ʻai ai ke fiefia ʻa e ʻOtuá mo e tangatá ka u ʻalu atu ʻo tākalo holo ʻi ʻolunga ʻi he ʻuluʻakaú?’ 14 Fakaʻosí, naʻe pehē ange ʻe he ʻuluʻakau kehé kotoa ki he ʻakau talatalá, ‘Haʻu ʻo pule kiate kimautolu.’+ 15 ʻI he meʻá ni naʻe pehē atu ai ʻe he ʻakau talatalá ki he ʻuluʻakaú, ‘Kapau moʻoni ʻoku mou pani au ko e tuʻi kiate kimoutolu, mou haʻu ʻo hūfanga ʻi hoku malumalú. Ka ʻikai, tuku ke ʻalu atu ha afi mei he ʻakau talatalá ʻo ne keina ʻa e ʻulu sita ʻo Lepanoní.’

16 “Pea kuo mou fai moʻoni koā pea ʻi he fakangeingeia ʻa hono ʻai ke tuʻi ʻa ʻApimelekí,+ pea kuo mou fakahaaʻi koā ha lelei kia Selupēali mo hono falé, pea kuo mou fai koā kiate ia ʻa e meʻa ʻokú ne tuha mo iá? 17 ʻI he taimi naʻe faitau ai ʻeku tamaí maʻamoutolú,+ naʻá ne tuku atu ʻene moʻuí ki he tuʻunga fakatuʻutāmaki ke fakahaofi kimoutolu mei he nima ʻo Mitianí.+ 18 Ka kuo mou tuʻu hake ʻi he ʻahó ni ke fakafepaki ki he fale ʻo ʻeku tamaí pea tāmateʻi hono ngaahi fohá, ko e kau tangata ʻe toko 70, ʻi he funga maka pē ʻe taha.+ Pea mou ʻai leva ʻa ʻApimeleki, ko e tama ʻa ʻene kaunangá,+ ke tuʻi ki he kau taki ʻo Sīkemí koeʻuhí pē ko homou tokoua ia. 19 ʻIo, kapau ʻoku mou fai moʻoni pea ʻi he fakangeingeia kia Selupēali mo hono falé ʻi he ʻahó ni, mou fiefia ʻia ʻApimeleki pea tuku foki ke ne fiefia ʻiate kimoutolu. 20 Ka ʻikai, tuku ke ʻalu atu ha afi meia ʻApimeleki ʻo ne keina ʻa e kau taki ʻo Sīkemí mo Pete-milo,+ pea tuku ke ʻalu atu ha afi mei he kau taki ʻo Sīkemí mo Pete-milo ʻo ne keina ʻa ʻApimeleki.”+

21 Naʻe hola leva ʻa Siotame+ ʻo ne hao ki Pea, peá ne nofo ai koeʻuhi ko hono tokoua ko ʻApimelekí.

22 Naʻe pule* ʻa ʻApimeleki ki ʻIsileli ʻi he taʻu ʻe tolu. 23 Pea ko e ʻOtuá naʻá ne tuku ke hoko ha fakafili ʻi he* vahaʻa ʻo ʻApimeleki mo e kau taki ʻo Sīkemí, pea naʻa nau faikākā kia ʻApimeleki. 24 Naʻe hoko ení ke sāuni ai ʻa e fakamālohi naʻe fai ki he ngaahi foha ʻe toko 70 ʻo Selupēalí, koeʻuhí ke ʻeke honau totó ki honau tokoua ko ʻApimelekí ʻi heʻene tāmateʻi kinautolú+ pea ki he kau taki ʻo Sīkemí ʻi heʻenau tokoni kiate ia ke tāmateʻi hono fanga tokouá. 25 Ko ia naʻe fokotuʻu ʻe he kau taki ʻo Sīkemí ha kau tangata ke nau lapasi ia ʻi he ngaahi funga moʻungá, pea naʻa nau kaihaʻa mei he tokotaha kotoa pē naʻe fou atu ʻi he hala naʻa nau ʻi aí. Naʻe faifai pē pea fakahā ia kia ʻApimeleki.

26 Ko Keali leva ko e foha ʻo ʻĒpetí mo hono fanga tokouá naʻa nau kolosi atu ki Sīkemi,+ pea ko e kau taki ʻo Sīkemí naʻa nau tuku ʻenau falalá kiate ia. 27 Naʻa nau ʻalu atu ki he ngoué ʻo tānaki kālepi mei heʻenau ngaahi ngoue kālepí, pea tāmalaki ia ke ngaohi ha uaine, pea nau fai ha kātoanga, pea ʻi he hili iá naʻa nau hū ki he fale ʻo honau ʻotuá+ ʻo nau kai mo inu mo nau talatukiʻi ʻa ʻApimeleki. 28 Naʻe pehē leva ʻe Keali ko e foha ʻo ʻĒpetí: “Ko hai ʻa ʻApimeleki, pea ko hai ʻa Sīkemi ke mau tauhi ai kiate ia? ʻIkai ko e foha ia ʻo Selupēali,+ pea ʻikai ko Sepuli ʻa ʻene talafekaú? Mou tauhi ki he kau tangata ʻa Hēmoá, ʻa e tamai ʻa Sīkemí! Ka ko e hā ke mau tauhi ai kiate iá? 29 Kapau ko e kakaí ni naʻe ʻi hoku mafaí, naʻá ku mei fakahifo ʻa ʻApimeleki.” Naʻá ne pehē ange leva kia ʻApimeleki: “Fakatokolahi hoʻo kau taú peá ke haʻu.”

30 ʻI he fanongo ʻa Sepuli ko e ʻeiki ʻo e koló ki he lea ʻa Keali ko e foha ʻo ʻĒpetí, naʻe kakaha ʻa ʻene ʻitá. 31 Ko ia naʻá ne tuku fakafufū* atu ha kau talafekau kia ʻApimeleki ʻo ne pehē: “Vakai! Ko Keali eni ko e foha ʻo ʻĒpetí mo hono fanga tokouá ʻoku nau ʻi Sīkemi, pea ko eni ʻoku nau fakaʻaiʻai ʻa e koló ke nau fakafepaki kiate koe. 32 Pea ko eni ke ke haʻu poʻuli, ʻa koe mo hoʻo kau tangatá, pea mou toi ʻo malumu ʻi he manafá. 33 ʻI he ʻalu hake pē ʻa e laʻaá ʻi he pongipongí, te ke tuʻu pongipongia hake ʻo ʻohofi ʻa e koló; pea ʻi heʻene hū ki tuʻa mo ʻene kau tangatá ke tauʻi koé, fai ha meʻa pē te ke malavá ke ikunaʻi ai ia.”*

34 Ko ia naʻe tuʻu poʻuli hake ʻa ʻApimeleki mo e kakai kotoa naʻe ʻiate iá, pea naʻa nau toi ko e kongakau ʻe fā ʻo malumu ki Sīkemi. 35 ʻI he ʻalu atu ʻa Keali ko e foha ʻo ʻĒpetí ʻo tuʻu ʻi he hūʻanga ʻo e matapā ʻo e koló, naʻe mālanga hake ʻa ʻApimeleki mo e kakai naʻe ʻiate iá mei he malumú. 36 ʻI he sio atu ʻa Keali ki he kakaí, naʻá ne pehē kia Sepuli: “Vakai! Ko e kakai ena ʻoku nau ʻalu hifo mei he ngaahi funga moʻungá.” Ka naʻe pehē ange ʻe Sepuli kiate ia: “ʻOkú ke sio koe ki he ʻata ʻo e ngaahi moʻungá ʻo hangē ia ko ha kau tangatá.”

37 Ki mui ai, naʻe pehē ange ʻe Keali: “Vakai! ʻOku ʻalu hifo ha kakai mei he loto fonuá, pea ko e kongakau ʻe taha ʻoku haʻu ʻi he hala ʻo e fuʻu ʻakau ko Mioninimí.” 38 Naʻe tali atu ʻe Sepuli kiate ia: “Ko fē ai hoʻo pōlepole, ‘Ko hai ʻa ʻApimeleki ke mau tauhi ai kiate iá?’+ ʻIkai ko e kakai eni naʻá ke siʻakí? ʻAlu atu he taimí ni ʻo tau mo kinautolu.”

39 Ko ia naʻe ʻalu ʻi muʻa ʻa Keali ʻi he kau taki ʻo Sīkemí ʻo ne tau mo ʻApimeleki. 40 Naʻe tuli ia ʻe ʻApimeleki, pea hola ʻa Keali meiate ia, pea naʻe tō ʻa e tokolahi kuo tāmateʻí ʻo aʻu atu ki he hūʻanga ʻo e matapā ʻo e koló.

41 Pea naʻe hokohoko atu ʻa e nofo ʻa ʻApimelekí ʻi ʻAluma, pea naʻe kapusi ʻe Sepuli+ ʻa Keali mo hono fanga tokouá mei Sīkemi. 42 ʻI he ʻaho hono hokó naʻe ʻalu atu ʻa e kakaí ki tuʻa mei he koló, pea naʻe fakahā ia kia ʻApimeleki. 43 Ko ia naʻá ne ʻave ʻa e kakaí ʻo ne vahe kinautolu ki he kongakau ʻe tolu pea nau toi ʻo malumu ʻi he manafá. ʻI heʻene sio ki he hū ki tuʻa ʻa e kakaí mei he koló, naʻá ne ʻohofi kinautolu ʻo ne taaʻi kinautolu. 44 Naʻe ʻoho atu ʻa ʻApimeleki mo e kongakau naʻe ʻiate iá ʻo nau tuʻu ʻi he hūʻanga ʻo e matapā ʻo e koló, lolotonga ia hono ʻohofi ʻe he kongakau ʻe ua ʻa e faʻahinga kotoa naʻe ʻi he manafá, pea nau taaʻi kinautolu. 45 Naʻe tauʻi ʻe ʻApimeleki ʻa e koló ʻi he ʻaho kotoa ko iá ʻo ne hamu ia. Naʻá ne tāmateʻi ʻa e kakai ʻi aí, ʻo ne holoki leva ʻa e koló+ pea naʻá ne tūtuuʻi ai ʻa e māsima.

46 ʻI he fanongo heni ʻa e kau taki kotoa ʻo e taua ʻo Sīkemí, naʻa nau ʻalu leva ki he toitoiʻanga* ʻi he fale* ʻo ʻEla-pelití.+ 47 ʻI hono fakahaaʻi pē kia ʻApimeleki kuo fakatahataha ʻa e kau taki kotoa ʻo e taua ʻo Sīkemí, 48 naʻe ʻalu hake ʻa ʻApimeleki mo e kau tangata kotoa naʻe ʻiate iá ki Moʻunga Salimona. Naʻe toʻo ʻe ʻApimeleki ha toki ʻi hono nimá ʻo ne tā ʻa e vaʻa ʻo ha fuʻu ʻakau peá ne fua ia ʻi hono umá peá ne pehē ki he kakai naʻe ʻiate iá: “Ko e meʻa naʻa mou sio ai kuó u faí, fakavave ʻo fai ʻa e meʻa tatau!” 49 Ko ia naʻe tā foki ʻe he kakaí kotoa ha ngaahi vaʻa pea nau muimui ʻia ʻApimeleki. Naʻa nau fokotuʻu atu leva ʻa e ngaahi vaʻá ki he toitoiʻangá pea nau tutu ʻa e toitoiʻangá. Ko ia naʻe mate foki ai ʻa e kakai kotoa ʻo e taua ʻo Sīkemí, ko e kakai tangata mo e kakai fefine ʻe toko 1,000 nai.

50 Naʻe ʻalu atu leva ʻa ʻApimeleki ki Tēpesi; naʻá ne tauʻi ʻa Tēpesi peá ne hamu ia. 51 Naʻe ʻi ai ha taua mālohi ʻi he loto koló, pea naʻe hola ki ai ʻa e kotoa ʻo e kakai tangata mo e kakai fefine pea mo e kau taki kotoa ʻo e koló. Naʻa nau tāpuniʻi kinautolu ʻi loto pea nau kaka ki he funga tauá. 52 Naʻe ʻalu atu ʻa ʻApimeleki ki he tauá ʻo ne ʻohofi ia. Naʻá ne fakaofiofi atu ki he hūʻanga ʻo e tauá ke tutu ia. 53 Pea naʻe lī hifo leva ʻe ha taha ʻo e kau fefiné ha maka momosi tokaʻolunga ʻi he ʻulu ʻo ʻApimelekí ʻo momo ai hono ngeʻesi-ʻulú.+ 54 Naʻá ne ui fakavave ʻa ʻene tangata toʻo meʻataú ʻo ne pehē kiate ia: “Unuhi hoʻo heletaá peá ke tāmateʻi au, ke ʻoua naʻa nau lea ʻo fekauʻaki mo au, ‘Naʻe tāmateʻi ia ʻe ha fefine.’” Ko ia naʻe tuiʻi ia ʻe heʻene tangata toʻo meʻataú ʻo ne mate.

55 ʻI he sio ʻa e kau tangata ʻo ʻIsilelí kuo mate ʻa ʻApimelekí, naʻa nau foki kotoa ki ʻapi. 56 Ko ia naʻe totongi ai ʻe he ʻOtuá kia ʻApimeleki ʻa e kovi naʻá ne fai ki heʻene tamaí ʻi heʻene tāmateʻi hono fanga tokoua ʻe toko 70.+ 57 Naʻe ʻai foki ʻe he ʻOtuá ʻa e kovi kotoa ʻa e kau tangata ʻo Sīkemí ke foki atu ki honau tumuʻaki ʻonautolú. Ko ia naʻe tō atu ai ʻa e talatuki naʻe fai ʻe Siotame+ ko e foha ʻo Selupēalí+ kiate kinautolu.