Fakamaau

18 ʻI he ngaahi ʻaho ko iá, naʻe ʻikai ha tuʻi ʻi ʻIsileli.+ Pea ʻi he ngaahi ʻaho ko iá naʻe kumi ʻa e matakali ʻo e haʻa Taní+ ki ha tofiʻa ke nau nofo ai, koeʻuhí ʻi he aʻu mai ki he taimi ko ení naʻe teʻeki ai ke nau maʻu ha tofiʻa ʻi he lotolotonga ʻo e ngaahi matakali ʻo ʻIsilelí.+

2 Naʻe fekauʻi atu ʻe he haʻa Taní ha kau tangata ʻe toko nima mei honau fāmilí, ko ha kau tangata lavameʻa mei Sola mo ʻEsitaoli,+ ke nau asiasi ʻa e fonuá pea ke vakaiʻi ia. Naʻa nau pehē kiate kinautolu: “Mou ō ʻo vakaiʻi ʻa e fonuá.” ʻI heʻenau aʻu ki he feituʻu moʻungaʻia ʻo ʻIfalemí, ki he fale ʻo Maiká,+ naʻa nau nofo ai ʻi he pō ko iá. 3 Lolotonga ʻenau fakaofi atu ki he fale ʻo Maiká, naʻa nau fakatokangaʻi ai ʻa e leʻo ʻo e* talavou Līvaí, ko ia naʻa nau ʻalu atu ai kiate ia ʻo nau ʻeke: “Ko hai naʻá ne ʻomai koe ki hení? Ko e hā hoʻo meʻa ʻoku fai ʻi he feituʻú ni? Ko e hā ʻa e meʻa ʻokú ne ʻai koe ke ke nofo ai ʻi hení?” 4 Naʻá ne tali ange kiate kinautolu: “Naʻe fai pehē mo pehē ʻa Maika kiate au, pea naʻá ne totongiʻi au ke u ngāue ko e taulaʻeiki kiate ia.”+ 5 Naʻa nau pehē ange leva kiate ia: “ʻEke muʻa ki he ʻOtuá pe ʻe ola lelei koā ʻemau fonongá.” 6 Naʻe pehē ʻe he taulaʻeikí kiate kinautolu: “Mou ʻalu ʻi he fiemālie. ʻOku kau ʻa Sihova mo kimoutolu ʻi hoʻomou fonongá.”

7 Ko ia naʻe hoko atu ʻa e fononga ʻa e kau tangata ʻe toko nimá ʻo nau aʻu ki Laisi.+ Naʻa nau sio ki he anga ʻo e nofo ʻa e kakai ʻi aí ʻa ʻenau nofo ʻo ʻikai fakafalala ki ha taha ʻo hangē ko e anga ʻo e kau Saitoní. Naʻa nau nonga mo mūnoa,+ pea naʻe ʻikai ha tokotaha fakamamahi naʻá ne ʻohofi ʻa e fonuá ke fakahohaʻasi kinautolu. Naʻa nau mamaʻo ʻaupito mei he kau Saitoní, pea naʻe ʻikai haʻanau fengāueʻaki mo ha toe taha kehe.

8 ʻI heʻenau foki ki honau fanga tokoua ʻi Sola mo ʻEsitaolí,+ naʻe pehē ange ʻe honau fanga tokouá kiate kinautolu: “Naʻe fēfē hoʻomou fonongá?” 9 Naʻa nau tali ange: “Tau ʻalu hake kiate kinautolu, he kuo mau mamata ko e fonuá ʻoku lelei ʻaupito. Ko e hā ʻoku mou toumoua aí? ʻOua ʻe fakatuotuai ke hū atu ʻo maʻu ʻa e fonuá. 10 ʻI hoʻomou aʻu ki aí, te mou ʻilo ai ha kakai mūnoa,+ pea ko e fonuá ʻoku ʻatā ʻaupito. Kuo foaki atu ia ʻe he ʻOtuá ki homou nimá, ko ha feituʻu ʻoku ʻikai masiva ʻi ha meʻa ʻe taha ʻi he māmaní.”+

11 Naʻe mavahe leva ha kau tangata toʻo meʻatau ʻe toko 600 mei he fāmili ʻo e haʻa Taní mei Sola mo ʻEsitaoli.+ 12 Naʻa nau ʻalu hake ʻo ʻapitanga ʻi Kiliate-sialimi+ ʻi Siuta. Ko e ʻuhinga ia ʻoku ui ai ʻa e feituʻu ko iá, ʻa ia ʻoku ʻi he fakahihifo ʻo Kiliate-sialimí, ko Mahaneha-tani*+ ʻo aʻu mai ki he ʻaho ní. 13 Naʻa nau ʻalu mei ai ki he feituʻu moʻungaʻia ʻo ʻIfalemí ʻo nau aʻu ki he fale ʻo Maiká.+

14 Pea ko e kau tangata ʻe toko nima naʻa nau ō ke asiasi ʻa e fonua ko Laisí+ naʻa nau pehē ki honau fanga tokouá: “Naʻa mou ʻilo ʻoku ʻi ai ha ʻēfoti, ngaahi ʻīmisi telafimi,* mo ha ʻīmisi kuo tongi, pea mo ha ʻīmisi mētale*+ ʻi he ngaahi fale ko ení? Mou fakakaukau ki he meʻa ʻoku totonu ke mou faí.” 15 Ko ia naʻa nau tuʻu hifo ai pea nau ʻalu atu ki he fale ʻo e talavou Līvaí+ ʻa ia naʻe ofi ki he fale ʻo Maiká ʻo nau ʻeke pe ʻokú ne fēfē. 16 Lolotonga ia ko e kau tangata ʻe toko 600 ʻo Taní,+ ʻa ia naʻe toʻo meʻataú, naʻa nau tuʻu ʻi he hūʻanga ʻo e matapā ʻo e koló. 17 Ko e kau tangata ʻe toko nima naʻa nau ō ke asiasi ʻa e fonuá+ naʻa nau hū ki loto ke ʻave ʻa e ʻīmisi kuo tongí, ko e ʻēfotí,+ ko e ngaahi ʻīmisi telafimí,*+ pea mo e ʻīmisi mētalé.*+ (Ko e taulaʻeikí+ naʻe tuʻu ia ʻi he hūʻanga ʻo e matapā ʻo e koló fakataha mo e kau tangata ʻe toko 600 naʻe toʻo meʻataú.) 18 Naʻa nau hū ki he fale ʻo Maiká ʻo ʻave ʻa e ʻīmisi kuo tongí, ko e ʻēfotí, ko e ngaahi ʻīmisi telafimí,* mo e ʻīmisi mētalé.* Pea naʻe pehē ʻe he taulaʻeikí kiate kinautolu: “Ko e hā hoʻomou meʻa ʻoku faí?” 19 Ka naʻa nau pehē kiate ia: “Fakalongolongo. ʻAi ho nimá ki ho ngutú, peá ke haʻu mo kimautolu ke ke hoko ko ha tamai* mo ha taulaʻeiki kiate kimautolu. Ko fē ʻoku lelei angé—ke ke hoko ko ha taulaʻeiki ki he fale ʻo e tangata pē ʻe toko taha+ pe hoko ko ha taulaʻeiki ki ha matakali mo ha fāmili ʻi ʻIsileli?”+ 20 Ko ia naʻe fiemālie ai ʻa e taulaʻeikí, pea naʻá ne ʻave ʻa e ʻēfotí, ko e ngaahi ʻīmisi telafimí,* pea mo e ʻīmisi kuo tongí+ peá ne ʻalu fakataha mo e kakaí.

21 Naʻa nau tafoki leva ke hoko atu ʻenau fonongá, pea nau fakamuʻomuʻa ʻa e fānaú, mo e fanga manú, pea mo e ngaahi meʻa naʻe mahuʻingá ʻiate kinautolu. 22 ʻI heʻenau mavahe ʻo kiʻi mamaʻo atu mei he fale ʻo Maiká, naʻe fakatahataha ʻa e kau tangata naʻe nofo ʻi he ngaahi fale naʻe ofi ki he fale ʻo Maiká pea nau tuli atu ʻo maʻu ʻa e haʻa Taní. 23 ʻI heʻenau kaila atu ki he haʻa Taní, naʻa nau tafoki ʻo hanga mai pea nau pehē kia Maika: “Ko e hā ʻa e meʻa ʻoku hokó? Ko e hā kuó ke fakatahatahaʻi ai ʻa e fuʻu kakaí ni?” 24 Ko ia naʻá ne pehē ange: “Kuo mou ʻave ʻa hoku ngaahi ʻotua naʻá ku ngaohí, pea kuo mou ʻalu foki mo e taulaʻeikí. Ko e hā haʻaku meʻa ʻoku toe? ʻOku lava fēfē leva ai ke mou ʻeke mai, ‘Ko e hā ʻa e meʻa ʻoku hoko kiate koé?’” 25 Naʻe tali ange ʻe he haʻa Taní: “ʻOua ʻe hiki hake ho leʻó kiate kimautolú; telia naʻa ʻohofi kimoutolu ʻe ha kau tangata ʻiteʻita, pea ʻe mole ai hoʻo moʻuí mo e moʻui ʻa ho falé.” 26 Ko ia naʻe hoko atu ʻa e fononga ʻa e haʻa Taní; pea ko Maika, ʻi heʻene sio naʻa nau mālohi ange ʻiate iá, naʻá ne tafoki ʻo ne foki ki hono falé.

27 ʻI he hili ʻenau ʻave ʻa e meʻa naʻe ngaohi ʻe Maiká, pea pehē ki heʻene taulaʻeikí, naʻa nau ō ki Laisi,+ ki ha kakai naʻe nofo nonga mo mūnoa.+ Naʻa nau taaʻi kinautolu ʻaki ʻa e heletaá pea tutu ʻa e koló ʻaki ʻa e afi. 28 Naʻe ʻikai ha taha ke ne fakahaofi ʻa Laisi, he naʻe mamaʻo ia mei Saitoni pea naʻe ʻikai haʻanau fengāueʻaki mo ha toe taha kehe pea naʻe tuʻu ia ʻi he teleʻa lautoka* naʻe ʻo Pete-lehopí.+ Naʻa nau toe langa leva ʻa e koló pea nofo ai. 29 ʻIkai ko ia pē, naʻa nau fakahingoa ʻa e koló ko Tani+ ʻo tauhingoa kia Tani ko ʻenau tamaí, ʻa ia naʻe fanauʻi kia ʻIsilelí.+ Ka ko Laisi ʻa e hingoa ki muʻa ʻo e koló.+ 30 ʻI he hili iá, naʻe fokotuʻu ʻe he haʻa Taní ʻa e ʻīmisi kuo tongí+ maʻanautolu, pea ko Sionatane+ ko e foha ʻo Kēsomi,+ ko e foha ʻo Mōsesé, pea mo hono ngaahi fohá naʻa nau hoko ko e kau taulaʻeiki ki he matakali ʻo e haʻa Taní ʻo aʻu ki he ʻaho naʻe ʻave fakamālohi ai ʻa e kakai ʻo e fonuá. 31 Pea naʻa nau fokotuʻu ʻa e ʻīmisi kuo tongi ʻa ia naʻe ngaohi ʻe Maiká, pea naʻe tuʻu ia ai ʻi he ngaahi ʻaho kotoa naʻe ʻi Sailo ai ʻa e fale ʻo e ʻOtua moʻoní.+