ʻUluaki Kalonikali
10 Pea naʻe tauʻi ʻe he kau Filisitiá ʻa ʻIsileli. Pea naʻe hola ʻa e kau tangata ʻo ʻIsilelí mei he ʻao ʻo e kau Filisitiá, pea naʻe tō ʻa e tokolahi ʻi hono tāmateʻi ʻi Moʻunga Kilipoa.+ 2 Naʻe tuli ofi atu ʻa e kau Filisitiá kia Saula mo hono ngaahi fohá, pea naʻe taaʻi ʻe he kau Filisitiá ʻa Sionatane, ʻApinatapi, pea mo Maliki-sua,+ ko e ngaahi foha ʻo Saulá. 3 Naʻe fakaʻaʻau ʻo mālohi ange ʻa e taú kia Saula, pea naʻe maʻu ia ʻe he kau fana ngahaú, pea naʻe fakalaveaʻi ia ʻe he kau fana ngahaú.+ 4 Naʻe pehē leva ʻe Saula ki heʻene tangata toʻo meʻataú: “Unuhi hoʻo heletaá ʻo hokaʻi ʻaki au, ke ʻoua naʻa omi ʻa e kau tangata taʻekamú ni ʻo fakamamahiʻi*+ au.” Ka naʻe ʻikai ke loto ki ai ʻa ʻene tangata toʻo meʻataú, he naʻá ne ilifia lahi ʻaupito. Ko ia naʻe toʻo ai ʻe Saula ʻa e heletaá ʻo ne tō hifo ki ai.+ 5 ʻI he sio ʻa ʻene tangata toʻo meʻataú kuo mate ʻa Saulá, naʻá ne tō hifo mo ia ki heʻene heletā ʻaʻaná ʻo ne mate. 6 Ko ia naʻe mate ai ʻa Saula mo hono foha ʻe toko tolú, pea ko kinautolu kotoa ko ia ʻi hono falé naʻa nau mate fakataha.+ 7 ʻI he sio ʻa e kakai kotoa ʻo ʻIsileli ʻi he teleʻá* kuo hola ʻa e tokotaha kotoa pea kuo mate ʻa Saula mo hono ngaahi fohá, naʻe kamata ke nau liʻaki honau ngaahi koló pea nau hola; naʻe omi leva ʻa e kau Filisitiá ʻo nofo ai.
8 ʻI he ʻaho hono hokó, ʻi he omi ʻa e kau Filisitiá ke huʻi ʻa e ngaʻotoʻotá mei he faʻahinga kuo tāmateʻí, naʻa nau ʻilo ʻa Saula mo hono ngaahi fohá kuo nau tō tau ʻi Moʻunga Kilipoa.+ 9 Ko ia naʻa nau huʻi ʻa hono teungá pea tuʻusi ʻa hono ʻulú ʻo ʻave fakataha mo ʻene meʻataú, pea ʻoatu ha tala ki he kotoa ʻo e fonua ʻo e kau Filisitiá ke fakamafola ʻa e ongoongó ni ki he fale ʻo honau ngaahi ʻaitolí+ pea mo e kakaí. 10 Pea naʻa nau tuku ʻa ʻene meʻataú ʻi he fale* ʻo honau ʻotuá pea fakamaʻu ʻa hono ngeʻesi-ʻulú ki he fale ʻo Tākoní.+
11 ʻI he fanongo ʻa e faʻahinga kotoa ʻi Siepesi+ ʻi Kiliatí ki he meʻa kotoa naʻe fai ʻe he kau Filisitiá kia Saulá,+ 12 naʻe tuʻu hake ʻa e kau taú kotoa ʻo nau ʻave ʻa e ʻangaʻanga ʻo Saulá pea mo e ʻangaʻanga ʻo hono ngaahi fohá. Naʻa nau ʻave kinautolu ki Siepesi ʻo tanu ʻa honau ngaahi huí ʻi he fuʻu lalo ʻakau ʻi Siepesi,+ pea naʻa nau ʻaukai ʻi he ʻaho ʻe fitu.
13 Ko ia naʻe mate ʻa Saula ʻi he taʻefaitōnunga naʻá ne fakahāhā kia Sihová koeʻuhí naʻe ʻikai te ne talangofua ki he folofola ʻa Sihová,+ pehē foki ki heʻene kumi faleʻi ki ha taula faʻahikehe+ 14 kae ʻikai fehuʻi kia Sihová. Ko ia naʻá Ne tāmateʻi ia pea ʻoange ʻa e tuʻunga-tuʻí kia Tēvita ko e foha ʻo Sesé.+