Ua Kalonikali

8 ʻI he ʻosi ʻa e taʻu ʻe 20 ʻa ia naʻe langa ai ʻe Solomone ʻa e fale ʻo Sihová pea mo hono fale* ʻoʻoná,+ 2 naʻe toe langa ʻe Solomone ʻa e ngaahi kolo naʻe foaki ange ʻe Hailame+ kia Solomoné peá ne fakanofonofo ʻa e kau ʻIsilelí* ʻi ai. 3 ʻIkai ko ia pē, naʻe ʻalu ʻa Solomone ki Hēmati-sopa ʻo ne hamu ia. 4 Pea naʻá ne langa* ʻa Tatimoa ʻi he toafá pea mo e ngaahi kolo tukuʻanga koloa kotoa+ naʻá ne langa ʻi Hēmatí.+ 5 Naʻá ne toe langa ʻa e tafaʻaki ki ʻolunga ʻo Pete-holoní+ mo e tafaʻaki ki lalo ʻo Pete-holoní,+ ko e ongo kolo fakakolotau mo hona ngaahi ʻā, ngaahi matapā, mo e ngaahi meʻa fakamaʻu, 6 pea mo Pealati+ pea pehē foki ki he ngaahi kolo tukuʻanga koloa kotoa ʻa Solomoné, ko e ngaahi kolo tukuʻanga salioté kotoa,+ ko e ngaahi kolo ki he kau tangata heka hōsí, pea mo ha meʻa pē naʻe loto ʻa Solomone ke langa ʻi Selusalema, ʻi Lepanoni, pea ʻi he fonua kotoa naʻá ne pule ki aí.

7 Pea ko e meʻa ki he kakai kotoa naʻe toe ʻi he kau Hetí, ko e kau ʻĀmolí, ko e kau Pēlisí, ko e kau Heví, pea mo e kau Siepusí,+ ʻa ia naʻe ʻikai te nau kau ki ʻIsilelí,+ 8 ko honau hako naʻe toe ʻi he fonuá—ʻa e faʻahinga naʻe ʻikai ke fakaʻauha ʻosi ʻe he kau ʻIsilelí+—naʻe kounaʻi kinautolu ʻe Solomone ke nau ngāue kiate ia ʻo aʻu mai ki he ʻahó ni.+ 9 Ka naʻe ʻikai ke ʻai ʻe Solomone ha taha ʻo e kau ʻIsilelí ko ha kau pōpula ke fai ʻene ngāué,+ he ko kinautolú ko ʻene kau tau, ko e kau pule ʻo ʻene kau ʻōfisa fakakautaú, pea mo e kau pule ʻo ʻene kau heka salioté mo ʻene kau tangata heka hōsí.+ 10 Ko e kau pule ʻo e kau kōvana fakavahefonua ʻa Tuʻi Solomoné naʻe toko 250, ko e kau taki ngāue kinautolu ki he kakaí.+

11 Naʻe ʻomai foki ʻe Solomone ʻa e ʻofefine ʻo Feló+ mei he Kolo-ʻo-Tēvitá ki he fale naʻá ne langa moʻoná,+ he naʻá ne pehē: “Neongo ko hoku uaifi, ʻe ʻikai totonu ke ne nofo ʻi he fale ʻo Tuʻi Tēvita ʻo ʻIsilelí, he ko e ngaahi feituʻu kuo ʻomai ki ai ʻa e ʻAʻake ʻa Sihová ʻoku toputapu.”+

12 Pea naʻe ʻohake ʻe Solomone ha ngaahi feilaulau tutu+ kia Sihova ʻi he ʻōlita+ ʻa Sihova ʻa ia naʻá ne langa ʻi muʻa ʻi he fale-hūʻangá.+ 13 Naʻá ne muimui ki he founga tuʻumaʻu fakaʻahó peá ne fai ʻa e ngaahi feilaulau ʻo fakatatau ki he fekau ʻa Mōsese ʻo fekauʻaki mo e ngaahi Sāpaté,+ ko e ngaahi māhina foʻoú,+ pea mo e ngaahi kātoanga kuo vaheʻi ke fai tuʻo tolu ʻi he taʻú+—ʻa e Kātoanga ʻo e Mā Taʻelēvaní,+ mo e Kātoanga ʻo e Ngaahi Uiké,+ pea mo e Kātoanga ʻo e Falelouʻakaú.*+ 14 Pehē foki, naʻá ne vaheʻi ʻa e ngaahi vāhenga ʻo e kau taulaʻeikí+ ki heʻenau ngaahi ngāué ʻo fakatatau ki he tuʻutuʻuni ʻa ʻene tamai ko Tēvitá, pea mo e kau Līvaí ki honau ngaahi ngafá, ke fai ha fakahīkihiki+ pea ke faifatongia ʻi he ʻao ʻo e kau taulaʻeikí ʻo fakatatau ki he founga tuʻumaʻu fakaʻahó, pea mo e kau leʻo matapaá ʻi honau ngaahi vāhenga ki he ngaahi matapā kehekehe,+ he ko e fekau ia ʻa Tēvita, ko e tangata ʻa e ʻOtua moʻoní. 15 Pea naʻe ʻikai te nau fai ha meʻa kehe mei he fekau naʻe fai ʻe he tuʻí ki he kau taulaʻeikí mo e kau Līvaí ʻo fekauʻaki mo ha meʻa pē pe fekauʻaki mo e ngaahi fale tukuʻanga koloá. 16 Ko ia ko e ngāue ʻa Solomoné naʻe mātuʻaki fokotuʻutuʻu maau* kotoa, mei he ʻaho naʻe fakatoka+ ai ʻa e fakavaʻe ʻo e fale ʻo Sihová ʻo aʻu ki heʻene ʻosi. Ko ia naʻe kakato ai ʻa e fale ʻo Sihová.+

17 Hili iá, naʻe ʻalu ʻa Solomone ki ʻEsioni-kepa+ pea mo ʻĒloti+ ʻi he matātahi ʻo e fonua ko ʻĪtomí.+ 18 Naʻe tuku atu ʻe Hailame+ kiate ia fakafou ʻi heʻene kau sevāniti ʻaʻaná ha ngaahi vaka mo e kau tangata ʻalu tahi taukei. Naʻa nau ʻalu mo e kau sevāniti ʻa Solomoné ki ʻŌfeli+ pea ʻomi mei ai ʻa e talēniti* koula+ ʻe 450 pea ʻave ia kia Tuʻi Solomone.+