Ua Kalonikali
21 Pea naʻe toka ʻa Sihosafate ʻo mālōlō fakataha mo ʻene fanga kuí pea naʻe tanu ia fakataha mo ʻene fanga kuí ʻi he Kolo-ʻo-Tēvitá; pea naʻe hoko ʻa hono foha ko Siholamé ko e tuʻi ʻo fetongi ia.+ 2 Ko hono fanga tokouá, ʻa e ngaahi foha ʻo Sihosafaté, ko ʻAsalaia, Siheli, Sākalaia, ʻAsalaia, Maikeli, pea mo Sefataia; ko kinautolú ni kotoa ko e ngaahi foha ia ʻo Tuʻi Sihosafate ʻo ʻIsilelí. 3 Pea naʻe foaki ange ʻe heʻenau tamaí kiate kinautolu ha ngaahi meʻaʻofa lahi ko e siliva mo e koula, mo e ngaahi meʻa mahuʻinga, fakataha mo ha ngaahi kolo fakakolotau ʻi Siuta;+ ka naʻá ne foaki ʻa e puleʻangá kia Siholame,+ he ko ia ʻa e ʻuluaki fohá.
4 ʻI he pule pē ʻa Siholame ʻi he puleʻanga ʻo ʻene tamaí, naʻá ne ʻai ke mālohi ʻa hono tuʻungá ʻi heʻene tāmateʻi ʻa hono fanga tokouá kotoa+ ʻaki ʻa e heletaá, pea pehē ki he niʻihi ʻo e houʻeiki ʻo ʻIsilelí. 5 Naʻe taʻu 32 ʻa Siholame ʻi heʻene hoko ko e tuʻí, pea naʻá ne pule ʻi he taʻu ʻe valu ʻi Selusalema.+ 6 Naʻá ne ʻaʻeva ʻi he ʻalunga ʻo e ngaahi tuʻi ʻo ʻIsilelí,+ ʻo hangē tofu pē ko ia naʻe fai ʻe he faʻahinga ʻo e fale ʻo ʻĒhapí, he naʻe hoko ʻa e ʻofefine ʻo ʻĒhapí ko hono uaifi;+ pea naʻá ne hanganaki fai ʻa e meʻa naʻe kovi ʻi he vakai mai ʻa Sihová. 7 Ka naʻe ʻikai ke finangalo ʻa Sihova ke fakaʻauha ʻa e fale ʻo Tēvitá koeʻuhi ko e fuakava naʻá ne fai mo Tēvitá,+ he naʻá ne talaʻofa te ne ʻoange ha maama* kiate ia pea mo hono ngaahi fohá maʻu ai pē.+
8 ʻI hono ngaahi ʻahó naʻe angatuʻu ai ʻa ʻĪtomi ki Siuta+ pea naʻá ne fokotuʻu hano tuʻi pē ʻoʻona.+ 9 Ko ia naʻe kolosi atu ʻa Siholame mo ʻene kau ʻeikitaú fakataha mo ʻene ngaahi salioté kotoa, pea naʻá ne tuʻu poʻuli hake ʻo ne ʻohofi ʻo ikunaʻi ʻa e kau ʻĪtomi naʻa nau takatakai kiate iá pea mo e kau ʻeikitau ʻi he ngaahi saliote taú. 10 Ka naʻe hoko atu ai pē ʻa e angatuʻu ʻa ʻĪtomi ki Siutá ʻo aʻu mai ki he ʻahó ni. Naʻe angatuʻu foki mo Līpina+ kiate ia ʻi he taimi ko iá, koeʻuhí ko ʻene liʻaki ʻa Sihova ko e ʻOtua ʻo ʻene fanga kuí.+ 11 Naʻá ne fokotuʻu foki ha ngaahi potu māʻolunga+ ʻi he ngaahi moʻunga ʻo Siutá ke ʻai ai ʻa e kakai ʻo Selusalemá ke nau fai ha feʻauaki fakalaumālie, pea naʻá ne takiheeʻi ʻa Siuta.
12 Faifai atu pē naʻe aʻu atu kiate ia ha pōpoaki kuo hiki meia ʻIlaisiā+ ko e palōfitá, ʻo pehē: “Ko e meʻa eni ʻoku folofolaʻaki ʻe Sihova ko e ʻOtua ʻo Tēvita ko hoʻo kuí, ‘Kuo ʻikai te ke ʻaʻeva ʻi he ngaahi ʻalunga ʻo hoʻo tamai ko Sihosafaté+ pe ʻi he ngaahi ʻalunga ʻo Tuʻi ʻAsa+ ʻo Siutá. 13 Ka ʻokú ke ʻaʻeva ʻi he ʻalunga ʻo e ngaahi tuʻi ʻo ʻIsilelí+ peá ke ʻai ʻa Siuta pea mo e kakai ʻo Selusalemá ke nau fai ha feʻauaki fakalaumālie+ ʻo hangē ko e faifeʻauaki ʻa e fale ʻo ʻĒhapí,+ pea naʻe aʻu ʻo ke tāmateʻi ʻa ho fanga tokouá tonu,+ ʻa e fāmili ʻo hoʻo tamaí, ʻa ia naʻa nau sai ange ʻiate koé. 14 Ko ia ai, ʻe fai ʻe Sihova ha tā lahi ki ho kakaí, ki ho ngaahi fohá, ki ho ngaahi uaifí, pea ki he kotoa ʻo hoʻo ngaahi koloá. 15 Pea ʻe lahi ʻa e mahamahaki te ke tofanga aí, ʻo kau ai ha mahaki ʻi ho toʻotoʻongá, kae ʻoua ke haʻu ki tuʻa ʻa ho toʻotoʻongá koeʻuhí ko e mahakí, ʻi he ʻaho ki he ʻaho.’”
16 Pea naʻe ueʻi ʻe Sihova+ ʻa e kau Filisitiá*+ mo e kau ʻAlepea+ ʻa ia naʻe nofo ʻo ofi ki he kau ʻItiopeá ke nau tauʻi ʻa Siholame. 17 Ko ia naʻa nau fakatūʻuta ʻi Siuta, ʻo nau hū fakamālohi ki ai, ʻo ʻave ʻa e ngaahi koloa kotoa naʻe maʻu ʻi he fale*+ ʻo e tuʻí, pea pehē ki hono ngaahi fohá mo hono ngaahi uaifí; pea ko hono foha pē naʻe toé ko Sihoaasi,*+ ʻa hono foha siʻisiʻi tahá. 18 Pea ʻi he hili ʻa e meʻá ni kotoa, naʻe taaʻi ia ʻe Sihova ʻaki ha mahaki ʻi hono toʻotoʻongá+ ʻa ia naʻe ʻikai lava ke faitoʻo. 19 ʻI ha taimi ki mui ai, ʻi he hili ha taʻu kakato ʻe ua, naʻe haʻu ki tuʻa ʻa hono toʻotoʻongá koeʻuhí ko e mahaki naʻá ne puke aí, pea naʻá ne mate lolotonga ʻene faingataʻaʻia lahi ʻi hono mahakí; pea naʻe ʻikai fai ʻe hono kakaí ha tutu meʻa namu-kakala maʻana ʻo hangē ko ʻenau fai ha tutu meʻa pehē maʻa ʻene fanga kuí.+ 20 Naʻá ne taʻu 32 ʻi heʻene hoko ko e tuʻí, pea naʻá ne pule ʻi he taʻu ʻe valu ʻi Selusalema. Naʻe ʻikai ha taha naʻe fakaʻiseʻisa ʻi heʻene maté. Ko ia naʻa nau tanu ia ʻi he Kolo-ʻo-Tēvitá,+ kae ʻikai ʻi he ngaahi tanuʻanga ʻo e ngaahi tuʻí.+