Nehemaia
1 Ko e ngaahi lea eni ʻa Nehemaia*+ ko e foha ʻo Hakalaiá: Pea ʻi he māhina ko Kisileú,* ʻi he taʻu hono 20,* naʻá ku ʻi Sūsani*+ ai ko e feituʻu fakakolotaú.* 2 ʻI he taimi ko iá, naʻe aʻu mai ai ʻa Hēnani,+ ko e taha ʻo hoku fanga tokouá mo ha kau tangata kehe mei Siuta, pea naʻá ku ʻeke kiate kinautolu ʻo fekauʻaki mo e toenga ʻo e kau Siu naʻe hao mei he nofo pōpulá,+ pea pehē foki ki Selusalema. 3 Naʻa nau tali mai: “Ko e faʻahinga ʻoku toe ʻi he vahefonuá* ʻa ia naʻa nau hao mei he nofo pōpulá ʻoku nau ʻi he tuʻunga faingataʻa mo fakamā.+ Ko e ngaahi ʻā ʻo Selusalemá kuo maumau,+ pea ko hono ngaahi matapaá kuo tutu ʻaki ʻa e afí.”+
4 ʻI heʻeku fanongo pē ki he ngaahi leá ni, naʻá ku tangutu hifo ʻo kamata ke u tangi mo fakamamahi ʻi ha ngaahi ʻaho, pea naʻá ku hanganaki ʻaukai+ mo lotu ʻi he ʻao ʻo e ʻOtua ʻo langí. 5 Naʻá ku pehē: “ʻE Sihova, ko e ʻOtua ʻo langí, ko e ʻOtua lahi mo fakamanavahē ʻa ia ʻokú ne fai ki heʻene fuakavá mo fakahaaʻi ʻa e ʻofa mateaki ki he faʻahinga ʻoku ʻofa kiate iá mo tauhi ʻene ngaahi fekaú,+ 6 fakamolemole muʻa, ka ke tokanga ʻo fanongo mai peá ke hāngaifofonga mai ki he lotu ʻa hoʻo sevānití ʻa ia ʻoku fai atu he ʻaho ní, ʻi he ʻaho mo e pō,+ ʻo fekauʻaki mo hoʻo kau sevāniti ko e kau ʻIsilelí, lolotonga ia hono vete atu ʻa e ngaahi angahala kuo fai ʻe he kakai ʻo ʻIsilelí kiate koé. Kuo mau faiangahala, ʻa au mo e fale ʻo ʻeku tamaí.+ 7 Kuo mau faikākā moʻoni kiate koe+ ʻi he ʻikai te mau tauhi ki he ngaahi fekau, ngaahi tuʻutuʻuni, mo e ngaahi tuʻutuʻuni fakaefakamaau naʻá ke ʻoange ki hoʻo sevāniti ko Mōsesé.+
8 “Fakamolemole ʻo manatuʻi ange muʻa ʻa e lea naʻá ke folofolaʻaki* ki hoʻo sevāniti ko Mōsesé: ‘Kapau te mou taʻefaitōnunga, te u fakamovetevete kimoutolu ʻi he lotolotonga ʻo e ngaahi kakaí.+ 9 Kapau te mou foki kiate au pea tauhi ʻeku ngaahi fekaú pea talangofua ki ai, neongo kapau ʻe fakamovetevete atu kimoutolu ki he ngataʻanga ʻo e langí, te u fakatahatahaʻi mai kimoutolu+ mei ai ʻo ʻomi ki he feituʻu naʻá ku fili ke ʻi ai ʻa hoku hingoá.’+ 10 Ko kinautolú ko hoʻo kau sevāniti mo ho kakai, ʻa ia naʻá ke huhuʻi ʻaki ho fuʻu mālohí mo ho nima māfimafí.+ 11 ʻE Sihova, fakamolemole muʻa ka ke tokanga ʻo fanongo mai ki he lotu ʻa hoʻo sevānití pea ki he lotu ʻa hoʻo kau sevānití ʻa ia ko e manavahē ki ho huafá ʻa honau fiefiaʻangá, pea fakamolemole ʻalā, tuku ke lavameʻa ʻa hoʻo sevānití he ʻahó ni, pea ʻofa ke faimanavaʻofa mai ʻa e tangatá ni kiate au.”+
Pea ko ha tokotaha tauhi-inu au ʻa e tuʻí.+