ʻAisea
27 ʻI he ʻaho ko iá, ko Sihova mo ʻene heletā fefeka mo lahi pea mo mālohí,+
ʻE fakahanga ʻene tokangá kia Levaiatani,* ko e ngata ngaoló,
Kia Levaiatani, ko e ngata ʻalu pikopikó,
Pea te ne tāmateʻi ʻa e fuʻu manu ʻa ia ʻoku ʻi he tahí.
2 ʻI he ʻaho ko iá mou hiva kiate ia:*
“Ko ha ngoue kālepi ʻo e uaine kuo fakatoka!+
3 Ko au Sihova, ʻoku ou maluʻi iá.+
ʻOku ou fuʻifuʻi ia he mōmeniti kotoa pē.+
ʻOku ou maluʻi ia ʻi he pō mo e ʻaho,
Ke ʻoua naʻa fai ʻe ha taha ha maumau kiate ia.+
Ko hai ʻe tuʻu mai kiate au mo e ʻakau talatala mo e vao ʻi he taú?
Te u tāmalaki ia pea tutu kinautolu kotoa.
5 Ko ia ai, tuku ke ne piki maʻu ki hoku kolo malú.
Tuku ke ne fakamelino mo au;
Ko e fakamelinó tuku ke ne fai ia mo au.”
6 ʻI he ngaahi ʻaho ka hoko maí ʻe faiaka ai ʻa Sēkope,
ʻE matala mo talamuka ʻa ʻIsileli,+
Pea te nau fakafonu ʻa e fonuá ʻaki ʻa e fua.+
7 Kuo pau koā ke taaʻi ia ʻaki ʻa e tā ʻa e tokotaha ʻokú ne taaʻi iá?
Pe kuo pau koā ke tāmateʻi ia ʻo hangē ko hono tāmateʻi ʻa e faʻahinga ʻoku ʻaʻaná?
8 ʻI ha kaila fakailifia te ke fakakikihi mo ia ʻi hono tuku atu ia ke ne mavahé.
Te ne kapusi ia ʻaki ha fuʻu matangi mālohi ʻi he ʻaho ʻo e matangi hahaké.+
9 Ko ia ʻe peheni ʻa hono fakamolemoleʻi ʻa e faihala ʻa Sēkopé,+
Pea ko e ola kakato eni ʻe hoko ʻi hono ʻave ʻa ʻene angahalá:
Te ne ngaohi ʻa e maka kotoa ʻo e ʻōlitá
Ke movete ʻo hangē ha momomomoʻi sioká,
Pea ʻe ʻikai ke fakatoe ai ha ngaahi pou ʻakau toputapu* pe tuʻuʻanga ʻinisēnisi.+
10 He ko e kolo fakakolotaú ʻe liʻaki;
ʻE tuku ange pea liʻaki ʻa e ngaahi kaikaiʻangá ʻo hangē ha toafá.+
ʻE kaikai mo tokoto ai ʻa e ʻuhikiʻi pulú
Pea te ne keina ʻa hono ngaahi vaʻá.+
11 ʻI he mōmoa ʻa hono ngaahi vaʻá,
ʻE haʻu ʻa e kau fefiné ʻo fesi ia,
ʻO tafu ʻaki ʻa e afí.
He ko e kakaí ni ʻoku ʻikai te nau maʻu ha mahino.+
Ko e ʻuhinga ia heʻikai ke fakahāhā ai kiate kinautolu ʻe honau Tokotaha-Ngaohí ha mēsí,
Pea ko e Tokotaha naʻá ne fokotuʻu kinautolú ʻe ʻikai te ne fakahāhā ha hōifua kiate kinautolu.+
12 ʻI he ʻaho ko iá ʻe tā hifo ʻe Sihova ʻa e fua mei he matavai ʻo e Vaitafe* ʻoku tafé ki he Teleʻa* ʻo ʻIsipité,+ pea ʻe tānaki taha taha kimoutolu, ʻe kakai ʻo ʻIsileli.+ 13 ʻI he ʻaho ko iá ʻe ifiʻi ai ha fuʻu meʻaifi,+ pea ko e faʻahinga kuo meimei ʻauha ʻi he fonua ko ʻAsīliá+ mo e faʻahinga kuo movete ʻi he fonua ko ʻIsipité+ te nau haʻu ʻo punou kia Sihova ʻi he moʻunga tapú ʻi Selusalema.+