ʻAisea
23 Ko ha fanongonongo ʻo fekauʻaki mo Tāia:+
Fākafoa, ʻa kimoutolu ngaahi vaka ʻo Tāsisí!+
He kuo fakaʻauha ʻa e taulangá; ʻe ʻikai lava ke fai ha hū ki ai.
Kuo fakahaaʻi ia kiate kinautolu ʻi he fonua ko Kītimí.+
2 Fakalongolongo, ʻa kimoutolu kakai ʻo e matāfonuá.
Kuo fakafonu koe ʻaki ʻa e koloa ʻe he kau mēsianiti mei Saitoni+ ʻa ia ʻoku nau kolosi atu ʻi he tahí.
3 Kuo ʻoatu ʻi he ngaahi vai lahi ʻa e uite* ʻa Sehoá,*+
ʻA e utu-taʻu ʻo Nailá, ʻoku maʻu ai hoʻo paʻanga hū maí,
ʻO maʻu ai ʻa e tupu ʻa e ngaahi puleʻangá.+
4 Ke ke mā, ʻe Saitoni, ʻa koe ko e kolo malu ʻo e tahí,
Koeʻuhí kuo pehē ʻe he tahí:
“Kuo ʻikai te u langā, pea kuo ʻikai te u fāʻele,
Pea kuo ʻikai te u ʻohake ha kau talavou pe tauhi hake ha kau finemui.”*+
5 Hangē ko ia ko ʻenau fanongo ʻi he ongoongo ʻo fekauʻaki mo ʻIsipité,+
ʻE mamahi ʻa e kakaí ʻi he ongoongo ʻo fekauʻaki mo Tāiá.+
6 Kolosi atu ki Tāsisi!
Fākafoa, ʻa kimoutolu kakai ʻo e matāfonuá!
7 Ko homou kolo eni ʻa ia naʻe fiefia ʻi he kuohilí, ʻi hono ngaahi ʻaho ki muʻá?
Naʻe faʻa ʻave ia ʻe hono vaʻé ki he ngaahi fonua mamaʻo ke ne nofo ai.
8 Ko hai kuó ne tuʻutuʻuni ke fai ʻa e meʻá ni ki Tāiá,
ʻA ia naʻá ne hilifaki ha ngaahi kalauní,
ʻA ia ko ʻene kau mēsianití ko e kau houʻeiki,
ʻA ia ko ʻene kau tangata fefakatauʻakí naʻe fakalāngilangiʻi ʻi he kotoa ʻo e māmaní?+
9 Ko Sihova tonu ʻo e ngaahi kau taú kuó ne fai ʻa e tuʻutuʻuni ko ení,
Ke fakataʻeʻaongaʻi ʻa ʻene pōlepole ʻi he kotoa ʻo hono fakaʻofoʻofá,
Ke fakamaaʻi ʻa e faʻahinga kotoa naʻe fakalāngilangiʻi ʻi he kotoa ʻo e māmaní.+
10 Kolosi atu ʻi ho fonuá ʻo hangē ko e Vaitafe Nailá, ʻe ʻofefine ʻo Tāsisi.
ʻOku ʻikai ke kei ʻi ai ha feituʻu ngaohiʻanga vaka* ia.+
11 Kuó ne mafao atu hono nimá ki he tahí;
Kuó ne luluʻi ʻa e ngaahi puleʻangá.
Kuo tuʻutuʻuni ʻe Sihova ke fakaʻauha ʻosi ʻa e ngaahi kolo malu ʻo Finisiá.+
12 Peá ne folofola: “ʻE ʻikai te ke toe fiefia,+
ʻA koe tokotaha kuo lōmekiná, ʻa e ʻofefine kei nofo anga-maʻa ʻo Saitoní.
Tuʻu hake, ʻo kolosi atu ki Kītimi.+
Naʻa mo e feituʻu ko iá ʻe ʻikai te ke maʻu ai ha mālōlō.”
13 Vakai! Ko e fonua ena ʻo e kau Kalitiá.+
Ko e kakai eni—ʻo ʻikai ko ʻAsīlia+—
Naʻa nau ngaohi ia* ko ha feituʻu ke nofo ai ʻa e faʻahinga ʻoku nofo holo ʻi he toafá.
Kuo nau fokotuʻu ʻenau ngaahi taua ki he taú;
Kuo nau fakatekelei ʻa hono ngaahi taua fakakolotaú,+
ʻO holoki ia ke hoko ko ha fokotuʻunga maumau.
14 Fākafoa, ʻa kimoutolu ngaahi vaka ʻo Tāsisí,
He kuo fakaʻauha homou kolo malú.+
15 ʻI he ʻaho ko iá ʻe ngalo ai ʻa Tāia ʻi he taʻu ʻe 70,+ ʻo tatau mo e lōloa ʻo e moʻui ʻa ha* tuʻi. ʻI he ʻosi ʻa e taʻu ʻe 70, ʻe hoko ki Tāia ʻo hangē ko ia ʻi he hiva fekauʻaki mo ha fefine feʻauakí:
16 “Toʻo ha haʻape, ʻalu takai ʻi he koló, siʻi fefine feʻauaki kuo ngalo.
Tā pōtoʻi ʻa hoʻo haʻapé;
Fai ha ngaahi hiva lahi,
Koeʻuhí ke nau manatuʻi koe.”
17 ʻI he ʻosi ʻa e taʻu ʻe 70, ʻe fakahanga ʻe Sihova ʻa ʻene tokangá ki Tāia, pea ʻe toe foki ia ki heʻene faifeʻauaki totongí ʻo ne faifeʻauaki mo e kotoa ʻo e ngaahi puleʻanga ʻoku ʻi he funga ʻo e māmaní. 18 Ka ko ʻene tupú mo e totongi ʻokú ne maʻú ʻe hoko ia ko e meʻa toputapu kia Sihova. ʻE ʻikai ke tānaki ia pe tauhi, koeʻuhí ko e totongi ʻokú ne maʻú ʻe ʻave ia maʻá e faʻahinga ʻoku nofo ʻi he ʻao ʻo Sihová, koeʻuhi ke nau kai ʻo mākona mo tui ha vala ʻoku masani.+