ʻOku Totonu Ke U Lotu ki he Kau Sangató?

Tali ʻa e Tohi Tapú

ʻIkai. ʻOku fakahaaʻi ʻi he Tohi Tapú ʻoku totonu ke tau lotu ki he ʻOtuá pē, ʻo fakafou ʻi he huafa ʻo Sīsuú. Naʻe tala ange ʻe Sīsū ki heʻene kau ākongá: “Ko ia ke pehe ni haʻamoutolu lotu: Ko ʻemau Tamai ʻoku ʻi Hevani, ke tapuhā ho Huafa.” (Mātiu 6:9, Paʻaki Foʻou) Naʻe ʻikai ʻaupito ke ne akoʻi ʻene kau ākongá ke nau lotu ki he kau sangató, kau ʻāngeló pe ko ha taha pē tuku kehe ʻa e ʻOtuá.

Naʻe toe tala ange ʻe Sīsū ki heʻene kau muimuí: “Ko au ʻa e halá pea mo e moʻoní pea mo e moʻuí. ʻOku ʻikai haʻu ha taha ki he Tamaí ka ʻi heʻene fou pē ʻiate au.” (Sione 14:6) Ko Sīsū pē ʻokú ne maʻu ʻa e mafai mei he ʻOtuá ke fakalaloa maʻatautolu.​—Hepelū 7:25.

ʻE lava ke u lotu ki he ʻOtuá pea toe lotu foki ki he kau sangató?

ʻI he ngaahi Fekau ʻe Hongofulú naʻe pehē ʻe he ʻOtuá: “Ko au Jihova ko ho Otua koe Otua fuaa au.” (ʻEkisoto 20:5, Paʻaki Motuʻa) ʻI he ʻuhinga fē ʻoku “fuaa” ai ʻa e ʻOtuá? ʻI he Liliu Tohi Tapu Māmani Foʻoú ʻoku pehē ai ʻokú Ne “fiemaʻu ʻa e anga-līʻoa maʻataʻatā.” ʻOku ʻuhinga iá, ko e lotú ʻoku fiemaʻu ʻe he ʻOtuá ke fai fakahangatonu ange kiate ia pē.​—ʻAisea 48:11.

ʻOku tau fakahouhauʻi ʻa e ʻOtuá, kapau ʻoku tau lotu ki ha tokotaha kehe naʻa mo e kau sangató, pe ko e kau ʻāngelo māʻoniʻoní. ʻI he feinga ʻa e ʻapositolo ko Sioné ke lotu ki ha ʻāngelo naʻe taʻofi ia ʻe he ʻāngeló ʻo ne pehē: “ʻOua te ke fai pehē! Ko aú ko ha kaungā-tamaioʻeiki pē mo koe pea mo ho fanga tokouá ʻa ia ʻoku nau maʻu ʻa e ngāue ko e faifakamoʻoni fekauʻaki mo Sīsuú. Lotu ki he ʻOtuá!”​—Fakahā 19:10.