Kuo ʻi ai nai ha taimi naʻá ke fakakaukau ke lau e Tohi Tapú ka ʻokú ke tuku ia koeʻuhí ko e ngaahi ʻuhinga ʻi ʻolungá? Ki he tokolahi, ko hono lau ʻo e Tohi Tapú ʻoku hā ngali fakapipiko. Kae fēfē kapau ʻokú ke ʻiloʻi ʻoku lava ʻe he Tohi Tapú ʻo tokoniʻi koe ke ke hoko ʻo fiefia ange mo maʻu ha moʻui ʻoku fiemālie angé? Fēfē kapau te ke maʻu ha founga ʻoku fakamānako ange ki hono laú? Te ke loto-lelei ke vakaiʻi ʻa e meʻa ʻoku ʻoatu ʻe he Tohi Tapú?

Vakai angé ki he ngaahi fakamatala ʻa ha niʻihi naʻa nau maʻu ʻaonga mei hono kamata lau ʻo e Tohi Tapú.

Naʻe pehē ʻe Ezekiel, ʻa ia ʻoku ʻi hono taʻu 20 tupu: “ʻI he kuohilí naʻá ku hangē ai ko ha tokotaha ʻoku fakaʻuli ʻi ha kā kae ʻikai ha feituʻu pau ke huʻu ki ai. Ka ʻi hono lau e Tohi Tapú naʻe tokoniʻi ai au ke maʻu ha moʻui mohu ʻuhinga. ʻOku ʻi ai ha ngaahi faleʻi ʻaonga ʻoku lava ke u ngāueʻaki ʻi he ʻaho kotoa pē.”

Ko Frieda, ʻoku ʻi hono taʻu 20 tupú, ʻokú ne fakamatala: “Naʻá ku faʻa ʻita vave. Ka ko ʻeku lau ʻa e Tohi Tapú, naʻá ku ako ai ke mapuleʻi au. Naʻá ku toe anga-fakakaumeʻa ange ai pea maʻu mo ha ngaahi kaungāmeʻa lahi he taimí ni.”

Ko ha fefine ʻi hono taʻu 50 tupú ko Eunice naʻá ne pehē ko e Tohi Tapú, “ʻOkú ne tokoniʻi au ke hoko ko ha tokotaha lelei ange, ʻo liliu ʻeku ngaahi tōʻonga naʻe ʻikai saí.”

Hangē ko e kau lautohi ko ení mo ha laui miliona tupu kuo nau fakamoʻoniʻi, ko hono lau ʻa e Tohi Tapú ʻoku lava ke ne tokoniʻi koe ke ke maʻu ha moʻui fiefia ange. (ʻAisea 48:17, 18) Ko e niʻihi eni ʻo e ngaahi meʻa te ne tokoniʻi koe (1) fai ha ngaahi fili lelei, (2) fili ha ngaahi kaumeʻa moʻoni, (3) fekuki mo e loto-moʻua mo e (4) ko e mahuʻinga tahá, ko hono ako ʻa e moʻoni fekauʻaki mo e ʻOtuá. Ko e ngaahi tataki ʻa e Tohi Tapú ko e haʻu ia mei he ʻOtuá, pea ʻi hoʻo muimui aí te ke maʻu ʻaonga mei ai. ʻOku ʻikai ʻaupito ke ʻomai ʻe he ʻOtuá ha faleʻi ʻoku kovi.

Ko e meʻa mahuʻingá ko hoʻo kamata lau ia. Ko e hā ʻa e ngaahi fokotuʻu ʻaonga ʻe lava ke ne ʻai ke faingofua mo fakafiefia ange hoʻo lau ʻa e Tohi Tapú?

Ko e hā ʻa e founga te ne tokoniʻi koe ke fakamānako ange ai hoʻo lau Tohi Tapú pea maʻu ʻaonga lahi mei ai? Fakatokangaʻi ha fokotuʻu ʻe nima naʻe ʻaonga ki he tokolahi.

Kumi ha ʻātakai feʻungamālie. Feinga ke kumi ha feituʻu ʻoku lōngonoa. Fakasiʻisiʻi ʻa e ngaahi fakahohaʻá koeʻuhi ka ke lava ʻo tokangataha ki he meʻa ʻokú ke laú. Ko ha feituʻu ʻoku maama feʻunga mo ʻea lelei ʻe lava ke tokoni ia ke ke maʻu ʻaonga lahi mei he meʻa ʻokú ke laú.

Maʻu ha fakakaukau totonu. Koeʻuhi ko e Tohi Tapú ʻoku mei heʻetau Tamai fakahēvaní, te ke maʻu ʻa e ʻaonga lahi tahá kapau te ke maʻu ha fakakaukau ʻo ha kiʻi tama ʻoku mateuteu ke ako mei ha ongo mātuʻa ʻofa. Kapau ʻoku ʻi ai haʻo fakakaukau taʻetotonu pē tōmuʻa fakamāuʻi ʻa e Tohi Tapú, feinga ke toʻo ia kae lava ʻe he ʻOtuá ke ne akoʻi koe.—Saame 25:4.

Lotu peá ke toki lau. ʻOku ʻi he Tohi Tapú ʻa e ngaahi fakakaukau ʻa e ʻOtuá, ko e ʻuhinga ia ʻoku tau fiemaʻu ai ʻene tokoní ke mahinoʻi ia. ʻOku talaʻofa ʻa e ʻOtuá te ne foaki ʻa e “laumālie māʻoniʻoní ki he faʻahinga ʻoku kole kiate iá!” (Luke 11:13) Ko e laumālie māʻoniʻoní ʻe lava ke ne tokoniʻi koe ke mahinoʻi ʻa e fakakaukau ʻa e ʻOtuá. Faai atu pē ʻa e taimí, ʻe mahino ia kiate koe “naʻa mo e ngaahi meʻa loloto ʻa e ʻOtuá.”—1 Kolinitō 2:10.

Lau ke mahino. ʻOua ʻe feinga pē ke ʻosiki ʻa e fakamatalá. Fakakaukau fakamātoato ki he meʻa ʻokú ke laú. ʻEke hifo kiate koe ʻa e ngaahi fehuʻi hangē ko ení: ‘Ko e hā ʻa e ngaahi ʻulungaanga ʻoku ou ako mei he tokotaha ko ení? ʻE lava fēfē ke u ngāueʻaki eni ʻi heʻeku moʻuí?’

Fokotuʻu ha ngaahi taumuʻa pau. Ke maʻu ʻaonga mei hoʻo lau Tohi Tapú, fokotuʻu ha taumuʻa ke ako ʻa ia ʻe lava ke lelei ange ai hoʻo moʻuí. Te ke fokotuʻu nai ha taumuʻa hangē ko ení: ‘ʻOku ou fie ako lahi ange fekauʻaki mo e ʻOtuá tonu.’ ‘ʻOku ou loto ke hoko ko ha tokotaha lelei, husepāniti pe uaifi lelei ange.’ Pea fili leva ʻa e konga ʻi he Tohi Tapú te ne tokoniʻi koe ke aʻusia ʻa e ngaahi taumuʻa ko iá.a

Ko e fokotuʻu ʻe nima ko ení ʻe tokoniʻi ai koe ke ke kamata lau ʻa e Tohi Tapú. Ka ʻi he founga fē ʻe lava ke ʻai ai hoʻo lau Tohi Tapú ke fakamānako angé? Ko e kupu hoko maí ʻoku toe ʻomai ai ha ngaahi founga.

Fakapipiko? Pe fakaivifoʻou? ʻE fēfē hoʻo lau Tohi Tapú? Ko e lahi tahá ʻoku makatuʻunga ia mei hoʻo founga lautohí. Tau vakai angé ki he meʻa ʻe lava ke ke fai ke fakamānako mo fakafiefia ange ai hoʻo lautohí.

Fili ha liliu Tohi Tapu alafalalaʻanga ʻi onopooni. Kapau te ke lau ʻa e fakamatalá ʻoku ʻi ai ha ngaahi foʻi lea motuʻa mo faingataʻa ke mahinoʻi ʻe ngalingali heʻikai te ke fiefia ke lau ia. Ko ia kumi ha Tohi Tapu ʻoku ngāueʻaki ai ʻa e lea ʻoku faingofua ke mahinoʻi ʻa ia ʻe aʻu ki ho lotó. Neongo ia, ʻi he taimi tatau ʻoku totonu ke sivisiviʻi fakalelei pe ʻoku tonu ʻa e liliú.a

Ngāueʻaki ʻa e tekinolosia ʻi onopōní. ʻI he ʻahó ni ʻoku ʻikai ngata pē hono maʻu ʻa e Tohi Tapú ʻi ha takainga tohi, tatau ʻosi pulusi ka ʻoku toe maʻu ia ʻi ha tatau fakaʻilekitulōnika. Ko e ngaahi Tohi Tapu ʻe niʻihi ʻoku lava ke lau ia ʻi he ʻinitanetí pe hiki ia ki he komipiutá, tepiletí pe ngaahi telefoni toʻotoʻó ke lau fakafoʻituitui ia. ʻOku ʻi ai ha ngaahi founga foʻou ʻo kau ai ʻa e ngaahi meʻangāue ko ení ʻa ia ʻoku lava ai ke vave hoʻo vakaiʻi ʻa e ngaahi veesi kehe ʻi he Tohi Tapú ʻi ha kaveinga tatau pe naʻa mo hano fakahoa ʻo e ngaahi liliu kehé. Kapau ʻokú ke saiʻia ange ke fanongo pē ki ai kae ʻikai lau, ʻoku toe ala maʻu ʻa e Tohi Tapú ʻi ha tatau kuo hiki-leʻo. ʻOku saiʻia ʻa e kakai tokolahi ke fanongo ki ai lolotonga haʻanau fefonongaʻaki, fai e foó pe fai ha faʻahinga ngāue ʻoku kei lava pē ke fanongo ki ai. Ko e hā ʻoku ʻikai ke ke ʻahiʻahiʻi ai ʻa e founga ʻoku feʻungamālie mo koé?

Ngāueʻaki ʻa e ngaahi meʻangāue ki he ako Tohi Tapú. Ko e ngaahi meʻangāue ki he ako Tohi Tapú ʻoku lava ke ne tokoniʻi koe ke maʻu ʻaonga lahi ange ai ʻi hoʻo lautohí. ʻOku ʻi ai ha ngaahi mape ʻi he ngaahi fonua ʻi he Tohi Tapú, ʻa ia ʻoku lava ke ne tokoniʻi koe ke ke ʻiloʻi ʻa e feituʻu ʻi he Tohi Tapú ʻokú ke laú pea ʻai ke moʻoni ange kiate koe ʻa e ngaahi meʻa ʻoku hoko aí. Ko e ngaahi kupu ʻo hangē ko ia ʻoku ʻi he makasini ko ení pe ko ia ʻi he “Bible Teachings” ʻi he uepisaiti jw.org, ʻoku lava ke ne tokoniʻi koe ke ke ʻiloʻi ʻa e ʻuhinga ʻo e ngaahi konga lahi ʻi he Tohi Tapú.

Fulifulihi hoʻo founga lautohí. Kapau ʻokú ke lau ʻa e Tohi Tapú mei he takafi ʻe tahá ki heʻene ʻosi ʻe hā ngali fakapipiko, ko e hā ʻoku ʻikai ʻai ai ke fakamānako ange hoʻo lautohí ʻaki ʻa e kamata lau ʻa e konga ʻoku fakamānako taha kiate koé? Kapau ʻokú ke loto ke ʻiloʻi ʻa e kakai ʻiloa ʻi he Tohi Tapú, ʻe lava ke ke kamata ʻi hono lau ʻa e ngaahi vahe ʻoku fekauʻaki mo kinautolú. ʻOku ʻi ai ha sīpinga ʻe ua ʻoku ʻasi ʻi he puha, “Fekumi ke ʻIloʻi ʻa e Kakai ʻi he Tohi Tapú.” Pe mahalo nai te ke saiʻia ke lau ʻa e Tohi Tapú fakafou ʻi ha ngaahi kaveinga pe ko ha ngaahi meʻa naʻe hoko hokohoko. Ko e hā ʻoku ʻikai ʻahiʻahiʻi ai ha taha ʻo e ngaahi foungá ni?

Ko e Tohi Tapú ʻoku ʻikai ko ha tohi anga-maheni pē ia. ʻOku ʻi ai ʻa e faleʻi mei hotau Tokotaha-Fakatupú. (2 Tīmote 3:16) ʻOku lava ke ʻaonga lahi kiate kitautolu ʻa e ngaahi pōpoaki ʻi aí. Ko e moʻoni, ʻoku pehē ʻe he Tohi Tapú: “Ko e folofola ʻa e ʻOtuá ʻoku moʻui pea ko e koto mālohi.” (Hepelū 4:12) ʻOku ʻi ai hono mālohi ke fakaleleiʻi ʻetau moʻuí ʻi ha founga tefito ʻe ua—ʻomai ʻa e tataki ki heʻetau moʻui ʻi he ʻaho taki taha ʻi he taimí ni pea tokoniʻi kitautolu ke ʻiloʻi ʻa e ʻOtuá mo ʻene ngaahi talaʻofá.—1 Tīmote 4:8; Sēmisi 4:8.

Fakaleleiʻi hoʻo moʻuí he taimí ni. ʻOku lava ke tokoni ʻa e Tohi Tapú ki he ngaahi meʻa fakafoʻituitui mafatukitukí. ʻOku ʻomai ʻa e faleʻi ʻaonga ʻo fekauʻaki mo e ngaahi meʻá ni.

• Vahaʻangatae mo e niʻihi kehé.​—ʻEfesō 4:31, 32; 5:22, 25, 28, 33.

• Moʻui lelei fakaeongo mo fakaesino.​—Saame 37:8; Palōveepi 17:22.

• Fakamahuʻingaʻi ʻa e ngaahi ʻulungaanga tāú.​—1 Kolinitō 6:9, 10.

• Tuʻunga fakaʻekonōmiká.​—Palōveepi 10:4; 28:19; ʻEfesō 4:28.a

Ko ha ongo meʻa mali kei talavou ʻi ʻĒsia naʻá na houngaʻia lahi ʻi he mahuʻinga ʻo e ngaahi faleʻi ʻi he Tohi Tapú. Hangē ko ha ngaahi hoa mali foʻou ʻoku nau fāinga ʻi heʻenau feʻunuaki honau angaʻitangatá ke hoa mo e angaʻitangata ʻa e tokotaha ʻe tahá pea hoko ʻo fetuʻutaki tauʻatāina. Ka naʻa nau kamata ke ngāueʻaki ʻa e meʻa naʻa nau lau ʻi he Tohi Tapú. Ko e hā ʻa e olá? Ko ha husepāniti ko Vicent, ʻokú ne pehē: “Ko e meʻa naʻá ku lau ʻi he Tohi Tapú naʻe tokoni ia ke u fekuki mo e ngaahi palopalema ʻi heʻema nofo malí ʻi ha founga anga-ʻofa. Ko e moʻui ʻo fehoanaki mo e Tohi Tapú kuó ne ʻomai kia kimaua ha moʻui fakafiefia.” Ko hono uaifí ko Annalou, naʻá ne loto-tatau: “Ko hono lau ʻa e ngaahi faʻifaʻitakiʻanga ʻi he Tohi Tapú naʻe tokoniʻi kimaua. ʻI he taimí ni ʻoku ou ongoʻi fiefia mo nonga ʻi heʻema nofo malí pea mo ʻema ngaahi taumuʻa ʻi he moʻuí.”

Hoko ʻo ʻiloʻi ʻa e ʻOtuá. Tuku kehe ʻene fakamatala ʻo fekauʻaki mo e nofo malí, naʻe toe pehē ʻe Vicent: “Ko hono lau ʻa e Tohi Tapú, ʻoku ou ofi ange ai kia Sihova ʻi ha toe taimi ki muʻa.” Ko e meʻa naʻe fakatokangaʻi ʻe Vicent naʻe fakahangataha ki ha meʻa mahuʻinga—​ʻa ia ko e Tohi Tapú ʻoku lava ke ne tokoniʻi koe ke ʻiloʻi ʻa e ʻOtuá. ʻI hono fai ení, ʻoku ʻikai ngata pē hoʻo maʻu ʻaonga mei heʻene faleʻí ka ʻoku toe lava heni ke ke ʻiloʻi ai ia ko ha kaumeʻa. Pea te ke sio ai ʻokú ne fakahaaʻi ʻa e ngaahi fakaikiiki ki ha kahaʻu ʻoku lelei ange, ko ha taimi ʻoku lava ke ke fiefia ʻi he “moʻui moʻoní”—​ʻa ia ʻe tuʻuloa. (1 Tīmote 6:19) Ko e meʻa eni ʻoku ʻikai ha toe tohi ia te ne ʻomai.

Kapau ʻokú ke fokotuʻutuʻu ke lau ʻa e Tohi Tapú pea hokohoko atu, te ke lava mo koe ʻo maʻu ʻaonga—​ʻi hono fakaleleiʻi hoʻo moʻuí he taimí ni pea hoko ʻo ʻiloʻi ʻa e ʻOtuá. Kae kehe, ʻi hoʻo lau ʻa e Tohi Tapú, ʻe lahi nai ha ngaahi meʻa te ke fehuʻia. Pea kapau te ke fai pehē, manatuʻi ʻa e faʻifaʻitakiʻanga lelei ʻa e ʻōfisa ʻItiopeá ʻa ia naʻe moʻui ʻi he taʻu ʻe 2,000 kuohilí. Naʻá ne ʻeke ha ngaahi fehuʻi lahi fekauʻaki mo e Tohi Tapú. ʻI he ʻeke ange pe naʻá ne mahinoʻi ʻa e meʻa naʻá ne laú, naʻá ne tali: “ʻE lava fēfē ke faifai ange peá u ʻiloʻi, ʻo ka ʻikai ʻi ai ha taha ke ne tataki au?”b Naʻá ne tali leva ha tokoni mei ha tokotaha naʻe ʻosi taau ko ha faiako Tohi Tapu, ko Filipe, ko e ākonga ia ki muʻa ʻa Sīsū. (Ngāue 8:30, 31, 34) ʻI he founga meimei tatau, kapau ʻokú ke saiʻia ke ʻilo lahi ange ki he Tohi Tapú, ʻoku mau fakaafeʻi koe ke fakafonu ha foomu kole ʻi he ʻinitanetí ʻi he www.pr2711.com pe tohi ki he tuʻasila ofi taha ʻoku hā ʻi he makasini ko ení. Te ke lava foki ʻo fetuʻutaki ki he Kau Fakamoʻoni ʻa Sihova ʻoku ofi atu kia koé pe ʻaʻahi ki he Fale Fakatahaʻanga ʻi ho feituʻú. Fēfē ke lau e Tohi Tapú pea tuku ia ke ne tataki hoʻo moʻuí ki ha tuʻunga ʻoku lelei angé?