Ko e Vakai ʻa e Tohi Tapú
“Sipoti Fakatuʻutāmakí”—ʻOku Totonu Ke Ke Kau ki Ai?
“ʻI HE ʻAHÓ NI KO E KAKAI TOKOLAHI ʻOKU ʻIKAI KE NAU SIO ʻATAʻATĀ PĒ ʻI HE NGAAHI SIPOTI FAKATUʻUTĀMAKÍ HANGĒ KO E PUNA MEI HE NGAAHI VAKAPUNA, KAKA ʻI HE NGAAHI MOʻUNGA, ʻAʻALO ʻI HE FANGA KIʻI VAKA IIKI ʻI HE VAITOÓ PE UKU MO E FANGA ʻANGÁ, ʻOKU NAU FAI IA KE MAʻU AI ʻENAU FIEFIÁ.”—KO E NUSIPEPA WILLOW GLEN RESIDENT.
KO E fakamatala ko ení ʻoku fakahaaʻi ai ʻa e faʻahinga sipoti ʻoku fakahoko ʻi he ʻaho ní. ʻOku manakoa ʻi he ʻahó ni ʻa e ngaahi sipoti fakatuʻutāmakí. Ko e kakaí ʻoku nau fai ʻa e ngaahi meʻa mātuʻaki fakatuʻutāmaki ʻi heʻenau heka pasikalá, sikií mo e sikeití. Fakatatau ki he fakamatala ʻi he makasini Time, ko e ngaahi sipoti ko ení ʻoku fuʻu manakoa koeʻuhí ko e kakai tokolahi ʻoku nau loto ke fai ʻa e ngaahi meʻa fakatuʻutāmaki koeʻuhí ke ikuʻi ai ʻenau manavaheé pea maʻu ʻa e fiefia lahi ange ʻi heʻenau moʻuí.
Koeʻuhi ko e ngaahi sipoti fakatuʻutāmaki ko ení ʻoku toe manakoa ange pea ko e kakaí ʻoku nau fai ʻa e ngaahi sipoti anga-mahení ʻi ha founga fakatuʻutāmaki ange, ʻoku tokolahi ange ʻa e kakai ʻoku laveá. ʻI ʻAmelika ʻi he 1997, ko e lahi ko ia ʻo e lavea felāveʻi mo e sikeití naʻe ʻave ki he loki fakatuʻutāmakí naʻe kaka ʻaki ʻa e pēseti ʻe 33, pēseti ʻe 31 ʻa e sikií pea pēseti ʻe 20 ʻa e kaka moʻungá. Ko e ola ʻo e ngaahi sipoti kehé naʻe toe kovi ange he naʻe fakamoʻoniʻi eni ʻi he lahi ʻa e maté. Ko e kakai ʻoku nau kau ki he ngaahi sipoti ko ení ʻoku nau lāuʻilo ki he ngaahi fakatuʻutāmakí. Ko ha fefine ʻokú ne kau ʻi he sikī fakatuʻutāmakí ʻokú ne pehē: “ʻOku ou fakakaukau maʻu pē ki he maté.” Ko ha tokotaha sikeiti palōfesinale ʻokú ne pehē kapau “heʻikai te ke lavea, ʻoku mahino iá ʻoku ʻikai ke ke feinga mālohi.”
ʻI he vakai ki he ngaahi moʻoniʻi meʻa ko ení, ʻoku totonu ke fēfē ʻa e vakai ʻa ha Kalisitiane ki he kau ki he ngaahi sipoti ko iá? ʻE lava fēfē ke tokoniʻi kitautolu ʻe he Tohi Tapú ʻi he fili pe ʻoku totonu ke tau kau ʻi he sipoti fakatuʻutāmakí? Ko ha lāulea ki he anga ʻo e ongoʻi ʻa e ʻOtuá fekauʻaki mo e toputapu ʻa e moʻuí ʻe tokoni ke tali ʻa e ongo fehuʻi ko ení.
Vakai ʻa e ʻOtuá ki he Moʻuí
ʻOku tala mai ʻe he Tohi Tapú ko Sihová ko e “matavai ʻo e moʻuí.” (Saame 36:9) Naʻe ʻikai ngata pē ʻene fakatupu ʻa e faʻahinga ʻo e tangatá ka naʻá ne toe ʻomai ʻa e meʻa ʻoku tau fiemaʻu ke fiefia ai ʻi he moʻuí. (Saame 139:14; Ngāue 14:16, 17; 17:24-28) Ko ia ai, ʻoku ʻuhinga lelei ke tau fakamulituku ʻokú ne ʻamanekina mai ke tau tokangaʻi ʻa e meʻa kuó ne foaki anga-lelei mai kiate kitautolú. Ko e ngaahi lao mo e ngaahi tefitoʻi moʻoni naʻe ʻoange ki he puleʻanga ʻo ʻIsilelí ʻokú ne tokoniʻi kitautolu ke houngaʻia ʻi he moʻoniʻi meʻa ko iá.
Naʻe fiemaʻu ʻi he Lao ʻa Mōsesé ki he kakaí ke nau fou ʻi he ngaahi sitepu ke maluʻi ʻa e moʻui ʻa e niʻihi kehé. Kapau naʻe ʻikai ke fakahoko eni pea mole ha moʻui, ko e tokotaha naʻe totonu ke ne taʻofi ʻa e fakatuʻutāmakí ʻe lau ia ʻokú ne halaia ʻi he toto. Ko e fakatātaá, ko ha tokotaha naʻá ne langa hano fale foʻou naʻe fekauʻi ke ne langa ha ʻā māʻulalo takatakai ʻi hono funga falé. He ka ʻikai, te ne halaia ʻi he toto kapau ʻe tō ha taha mei he funga falé ʻo mate. (Teutalōnome 22:8) Kapau naʻe tuiʻi taʻeʻamanekina ʻe ha pulu ha tokotaha ʻo mate, ko e tokotaha ʻaʻana ʻa e pulú heʻikai ke ne fua ʻa e hia ko iá. ʻI he tafaʻaki ʻe tahá, kapau naʻe ʻiloʻi ko e pulú ʻokú ne fakatuʻutāmaki pea naʻe ʻosi fai ʻa e fakatokanga ki he tokotaha ʻaʻaná kae ʻikai pē ke ne leʻohi ʻa e pulú, ko ia kapau ʻe tuiʻi ʻe he pulú ha taha, ko e tokotaha ʻaʻana ʻa e pulú ʻe lau ia ʻokú ne halaia ʻi he toto pea ʻe lava ke tāmateʻi. (ʻEkisoto 21:28, 29) Koeʻuhi ko e moʻuí ʻoku mahuʻinga kia Sihova, naʻe tapua mai ʻi heʻene Laó ʻa e vakai mafatukituki ki hono fakatolonga mo maluʻi ʻo e moʻuí.
Ko e kau sevāniti faitōnunga ʻa e ʻOtuá naʻa nau mahinoʻi neongo kapau naʻe ʻikai ha lao pau, naʻe hala ke nau tuku ʻenau moʻuí pe ko e moʻui ʻa e niʻihi kehé ke ʻi he tuʻunga fakatuʻutāmaki. ʻI ha talanoa ʻe taha ʻi he Tohi Tapú, naʻe fakahaaʻi ʻe Tēvita ʻene holi ke “inu ha vai mei he lepa ʻoku ʻi he veʻe matapā ʻo e kolo ko Pētelihemá.” Ko Pētelihema naʻe ʻi he malumalu ʻo e pule ʻa Filisitiá ʻi he taimi ko iá. ʻI he fanongo ki he kole ʻa Tēvitá, ko e toko tolu ʻi heʻene kau sōtiá naʻa nau hū fakamālohi atu ki he kemi ʻa e kau Filisitiá, ʻo ohu mai ha vai mei he lepa ʻi he kolo ko Pētelihemá pea ʻoatu ia kia Tēvita. Naʻe anga-fēfē fakafeangai ʻa Tēvitá? Naʻe ʻikai ke ne inu ʻa e vaí ka naʻá ne lilingi ia ki he kelekelé. Naʻá ne pehē: “Mole ke mamaʻo haʻaku fakakaukau ke u fai ʻa e meʻá ni ʻi he vakai ʻa hoku ʻOtuá! Te u inu koā ʻa e toto ʻo e kau tangatá ni ʻa ia naʻa nau tuku atu ki he tuʻunga fakatuʻutāmaki ʻa ʻenau moʻuí? He naʻe ʻi he tuʻunga fakatuʻutāmaki ʻenau moʻuí ʻi heʻenau ʻomi iá.” (1 Kalonikali 11:17-19) Kia Tēvita naʻe mole ke mamaʻo ke ne tuku ke ʻi ha tuʻunga fakatuʻutāmaki ha moʻui koeʻuhí ke fakalato ʻene fiemaʻú.
Naʻe fakafeangai ʻa Sīsū ʻi he founga meimei tatau, ʻo ngalingali ʻi ha vīsone, ʻi he taimi naʻe fakataueleʻi ai ia ʻe he Tēvoló ke ne hopo ki lalo mei he ʻā ʻo e funga temipalé ke sio pe ʻe maluʻi ia ʻe he kau ʻāngeló mei haʻane lavea. Naʻe tali ʻe Sīsū: “Kuo pau ke ʻoua te ke ʻahiʻahiʻi ʻa Sihova ko ho ʻOtuá.” (Mātiu 4:5-7) ʻIo, naʻe fakatou ʻilo ʻe Tēvita mo Sīsū naʻe hala ʻi he vakai ʻa e ʻOtuá ke fai ha meʻa ʻe lava ke ne tuku ai ʻa e moʻui ʻa e tangatá ke ʻi ha tuʻunga fakatuʻutāmaki.
ʻI he fakakaukau ki he ongo fakatātā ko ení, te tau fifili nai, ‘Te tau ʻilo fēfē ʻa e sipoti ʻoku fakatuʻutāmakí? Pea koeʻuhi ko e kakai ʻe niʻihi ʻoku nau vaʻinga ʻi he ngaahi sipoti anga-mahení ʻi ha founga fakatuʻutāmaki, ʻe lava fēfē ke tau ʻiloʻi ʻa e founga malu ke vaʻinga aí?’
ʻOku Totonu Ke U Kau ki Ai?
Ke fai ha fili lelei, ʻoku totonu ke tau fakakaukau fakalelei fekauʻaki mo e sipoti ʻoku tau loto ke kau ki aí. Ko e fakatātaá, te tau ʻeke hifo nai, ‘ʻOku lahi ʻa e fakatuʻutāmaki ʻoku hoko ʻi he sipoti ko ení? ʻOku ou maʻu ʻa e ʻilo pe naunau maluʻi ʻoku fiemaʻu ke fakaʻehiʻehi ai mei he laveá? Ko e hā ʻa e ngaahi nunuʻa kapau te u tō pe kapau naʻe maumau ʻa e naunau maluʻí? Te u lavea siʻisiʻi pē pe te u lavea lahi pe mate?’
ʻI he kau ʻiloʻilo pau ha Kalisitiane moʻoni ki ha fakafiefia ʻe hoko ai ha fakatuʻutāmaki ʻe lava ke ne uesia ai hono vahaʻangatae mahuʻinga mo Sihová kae pehē foki ki heʻene taau ki ha ngaahi monū makehe ʻi he fakatahaʻangá. (1 Tīmote 3:2, 8-10; 4:12; Taitusi 2:6-8) ʻOku hā mahino, naʻa mo e kau ʻi he ngaahi fakafiefiá, ʻoku lelei ki he kau Kalisitiané ke nau fakakaukau ki he vakai ʻa e Tokotaha-Fakatupú ki he toputapu ʻa e moʻuí.