Ko Filo ʻo ʻAlekisanituliá—Ko Hono Fio ʻa e Tohi Tapú mo e Fakamahaló

ʻI HE 332 K.M., naʻe ngaʻunu ai ʻa ʻAlekisānita ko e Lahí ki ʻIsipite. Ki muʻa ke laka fakahahake ʻi he hala ki hono ikunaʻi ʻo e māmaní, naʻá ne fokotuʻu ha kolo ʻa ia naʻá ne ui ko ʻAlekisanitulia. Naʻe hoko ia ko ha senitā ʻo e tōʻonga fakafonua faka-Kalisí. ʻI ai, ʻi he 20 K.M. nai, naʻe fanauʻi ai ha toe tokotaha ikuna ʻe taha, ko e tokotaha ʻa ia ko ʻene ngaahi meʻataú, naʻe ʻikai ko e ngaahi heletaá mo e taó, ka ko e ngaahi fakaʻuhinga fakafilōsofiá. ʻOku ʻiloa ia ko Filo ʻo ʻAlekisanituliá, pe Filo Siuteasi koeʻuhí ko hono puipuituʻa faka-Siú.

Ko e Fakalelei ʻo e Ngaahi Kolonia Siú, ʻa ia naʻe hoko hili hono fakaʻauha ʻo Selusalema ʻi he 607 K.M., naʻe iku ai ʻo nofo ʻa e kau Siu tokolahi ʻi ʻIsipite. Naʻe nofo ʻa e laui afe ʻi ʻAlekisanitulia. Kae kehe, naʻe ʻi ai ʻa e ngaahi palopalema, ʻi he vahaʻa ʻo e kau Siú mo honau ngaahi kaungāʻapi Kalisí. Naʻe fakafisi ʻa e kau Siú ke lotu ki he ngaahi ʻotua Kalisí, lolotonga ia naʻe manukiʻi ʻe he kau Kalisí ʻa e Ngaahi Konga Tohi Tapu Faka-Hepeluú. ʻI hono tuʻunga ako faka-Kalisí mo hono ʻohake faka-Siú, naʻe maheni ai ʻa Filo mo e fekīhiakí. Naʻá ne tui ko e lotu faka-Siú ʻa e lotu moʻoní. Ka ʻi he ʻikai hangē ko e tokolahi, naʻe kumi ʻa Filo ki ha founga fakamelino ke tataki ʻaki ʻa e kau Senitailé ki he ʻOtuá. Naʻá ne loto ke ʻai ʻa e lotu faka-Siú ke nau ala tali.

ʻUhinga Foʻou ki he Ngaahi Tohi Motuʻá

Ko e ʻuluaki lea ʻa Filó ʻa e lea faka-Kalisí, hangē ko ia ko e kau Siu tokolahi ʻi ʻAlekisanituliá. Ko ia ko e liliu Sepituakini Kalisi ʻo e Ngaahi Konga Tohi Tapu Faka-Hepeluú naʻe makatuʻunga ai ʻene akó. ʻI heʻene sivisiviʻi ʻa e konga tohi Septuagint, naʻá ne hoko ai ʻo tuipau naʻe ʻi ai ʻa e ngaahi ʻelemēniti ʻo e filōsofiá pea naʻe maʻu ʻe Mōsese ʻa e “pōtoʻi fakafilōsefá.”

ʻI he ngaahi senituli ki muʻá, naʻe maʻu ai ʻe he kau poto Kalisí ʻa e ngaahi talanoa fekauʻaki mo e ngaahi ʻotua mo e ngaahi ʻotua fefine—ko e kau saiāniti mo e kau tēmeniō ʻo ʻenau ngaahi talatupuʻa faka-Kalisi he kuonga muʻá—naʻe faingataʻa ke tali. Naʻa nau kamata ke toe fakaʻuhingaʻi ʻa e ngaahi talanoa motuʻa ko iá. Ko e mataotao Kalisi ko James Drummond naʻá ne leaʻaki eni fekauʻaki mo ʻenau foungá: “Naʻe kamata ke kumi ʻa e filōsefá ki he ngaahi founga olopoto naʻe fufū ai ʻa e ngaahi talanoa fakaetalatupuʻá, pea ke fakamulitukuʻaki mei heʻenau fakalielia mo ngali valé ko honau kau faʻu-tohí kuo pau pē naʻa nau fakataumuʻa ke fakaʻaliʻali fakafou ʻi heʻenau lea fakatātā ongongofuá ha foʻi moʻoni loloto pe fakamaama.” Ko e founga ko ení ʻoku ui ia ko e fakaʻuhinga fakaefakatātā, pea naʻe feinga ʻa Filo ke ngāueʻaki ia ke fakamatalaʻi ʻaki ʻa e Tohi Tapú.

Ko ha fakatātā, fakakaukau angé fekauʻaki mo e Senesi 3:​22 ʻi he liliu ʻa Bagster ʻo e Septuagint, ʻa ia ʻoku pehē: “Naʻe ngaohi ʻe he ʻEiki ʻOtuá maʻa ʻĀtama mo hono uaifí ʻa e ngaahi vala kili, ʻo ne fakavalaʻi ʻaki kinaua.” Naʻe ongoʻi ʻe he kau Kalisí ko e ngaohi valá naʻe māʻulalo ia ʻi he tuʻunga ngeia ʻo e ʻOtua Aoniú. Ko ia naʻe maʻu ai ʻe Filo ʻa e tuʻunga fakaefakatātā ʻi he veesi ko iá ʻo ne fakamatala: “Ko e vala kilí ko ha kupuʻi lea fakaefakatātā ia ki he kili fakanatulá, ʻa ia ko e pehē, ko hotau sinó; he ko e ʻOtuá, ʻi heʻene ʻuluaki ngaohi ʻa e tokotaha potó, naʻá ne ui ia ko ʻĀtama; hili iá naʻá ne fakatupu ʻa e moʻui ʻi tuʻá, ʻa ia naʻá ne fakahingoa ko e Moʻuí. Ko hono fakaʻosí, ko ia ʻi hono fiemaʻú naʻá ne toe ngaohi ha sino, ʻo ui ia ʻaki ha kupuʻi lea fakaefakatātā, ko ha vala kilí.” Ko ia ai, naʻe feinga ʻa Filo ke ʻai ʻa e ngāue ʻa e ʻOtuá ʻa hono fakavalaʻi ʻa ʻĀtama mo ʻIví ko ha poini fakafilōsofia ke fakakaukauloto ki ai.

Toe fakakaukau angé ki he Senesi 2:​10-​14, ʻa ia ʻoku fakamatalaʻi ai ʻa e maʻuʻanga vai ki he ngoue ʻi ʻĪtení pea lave ai ki he vaitafe ʻe fā naʻe tafe mai mei he ngoué. Naʻe feinga ʻa Filo ke hūhū ʻi he ngaahi foʻi leá pea sio fakalaka mamaʻo atu ʻi he fakatātaá. Hili ʻa e fakamatala ki he kelekelé tonu, naʻá ne pehē: “Mahalo pē ko e kupú ni ʻoku toe ʻi ai hano ʻuhinga fakaefakatātā; he ko e vaitafe ʻe faá ko e ngaahi fakaʻilonga ia ʻo e ʻulungāanga lelei ʻe fā.” Naʻá ne fakamahamahalo ko e vaitafe Pīsoní ʻokú ne fakafofongaʻi ʻa e fakapotopoto, ko e vaitafe Kīhoní ko e fakatātā ia ʻo e faʻa fakakaukau, ko e Taikilisí ʻokú ne fakatātaaʻi ʻa e mālohi, pea ko e ʻIufaletesí ʻokú ne fakatātaaʻi ʻa e fakamaau totonu. Ko ia ʻoku toʻo ʻosi ai ʻe he tuʻunga fakaefakatātaá ʻa e siokālafí.

Naʻe ngāueʻaki ʻe Filo ʻa e fakaʻuhinga fakaefakatātaá ke ʻanalaiso ʻaki ʻa e fakamatala ki he fakatupú, ko e lēkooti ʻo hono fakapoongi ʻe Keini ʻa ʻĒpelí, ko e Lōmaki ʻo e ʻaho ʻo Noá, ko e veuveuki ʻa e ngaahi lea ʻi Pēpelí, mo e ngaahi tefitoʻi moʻoni lahi ʻo e Lao ʻa Mōsesé. Hangē ko hono fakahaaʻi ʻi he fakatātā ʻi he palakalafi ki muʻá, naʻá ne faʻa lāuʻilo ki he poini fakahangatonu ʻo ha foʻi veesi Tohi Tapu pea toki ʻomai ʻene mahino fakaefakatātaá ʻaki ʻa e ngaahi foʻi lea hangē ko ení: “Mahalo pē ʻoku totonu ke tau vakai ki he ngaahi meʻá ni ʻo hangē ko ia ʻoku leaʻaki ʻi ha ʻuhinga fakaefakatātaá.” ʻI he ngaahi tohi ʻa Filó, ʻoku tuʻu ʻo ʻiloa ai ʻa e ngaahi tuʻunga fakaefakatātaá lolotonga ia, ko e meʻa fakamamahí, ko e ʻuhinga mahino ko ia ʻo e Tohi Tapú ʻoku mole atu ia.

Ko Hai ʻa e ʻOtuá?

Naʻe fakakikihiʻi ʻe Filo ʻa e ʻi ai ʻa e ʻOtuá ʻaki ha fakatātā mālohi. Hili hono fakamatalaʻi ʻa e fonuá, ngaahi vaitafé, ngaahi palanité, mo e ngaahi fetuʻú, naʻá ne fakaʻosiʻaki: “Ko e māmaní ʻa e fakatupu fakaeʻaati mo pōtoʻi taha ʻi he ngaahi ngāué kotoa, ʻo hangē pē naʻe faʻu ia ʻe ha taha ʻa ia naʻe kakato fakaʻaufuli mo haohaoa taha ʻi he ʻiló. Ko e foungá ni kuo tau maʻu ai ha fakakaukau fekauʻaki mo e ʻi ai ʻa e ʻOtuá.” Ko ha fakaʻuhinga lelei eni.—Loma 1:​20.

Ka ʻi he taimi naʻe fakamatalaʻi ai ʻe Filo ʻa e natula ʻo e ʻOtua Māfimafi-Aoniú, naʻá ne hē mamaʻo mei he moʻoní. Naʻe taukaveʻi ʻe Filo ko e ʻOtuá “ʻoku ʻikai hano ngaahi ʻulungāanga makehe” pea ko e ʻOtuá “ʻoku taʻealamahinoʻi.” Naʻe fakalotosiʻi ʻe Filo ʻa e ngaahi feinga ke hoko ʻo ʻiloʻi ʻa e ʻOtuá, ʻo pehē “ko e feinga ke hokohoko atu, koeʻuhi ke tuli ki ha ngaahi fakatotolo ki he uho pe ngaahi ʻulungāanga makehe ʻo e ʻOtuá, ko ha tuʻunga fakavalevale ʻaupito ia.” Ko e fakakaukaú ni naʻe hoko mai ia, ʻikai mei he Tohi Tapú, ka mei he filōsefa pangani ko Palató.

Naʻe pehē ʻe Filo ko e ʻOtuá ʻoku mātuʻaki taumamaʻo ia mei hono mahinoʻí ʻa ia ʻoku taʻemalava ʻa hono ui ia ʻaki ha hingoa fakafoʻituituí. Naʻe pehē ʻe Filo: “Ko ia ai, naʻe mātuʻaki huʻufataha mo e fakaʻuhingá ʻa e pehē ʻoku ʻikai ha hingoa totonu ʻe lava ke feʻungamālie ʻi hono vaheʻi kiate Iá ʻa ia ko hono moʻoní ko e ʻOtua moʻuí.” He kehe moʻoni ē mei he moʻoní!

ʻOku fakahaaʻi mahino ʻe he Tohi Tapú ko e ʻOtuá ʻoku ʻi ai hono huafa fakafoʻituitui. ʻOku pehē ʻe he Sāme 83:18 (PM): “Ko koe, ko ho huafa oou ko Jihova, koe Fugani Maoluga i mamani kotoabe.” ʻOku hiki ʻe he Aisea 42:8 ʻa e pehē ʻe he ʻOtuá: “Ko Sihova au; ko hoku hingoa ia.” Ko e hā naʻe akoʻi ai ʻe Filo, ko ha Siu ia fakataha mo e ʻilo fekauʻaki mo e ngaahi konga Tohi Tapu ko ení, ʻo pehē naʻe taʻehingoa ʻa e ʻOtuá? Koeʻuhí he naʻá ne fakamatalaʻi, ʻo ʻikai ko e ʻOtua fakafoʻituitui ʻo e Tohi Tapú, ka ko ha ʻotua, taʻehingoa mo ʻikai ala aʻu ki ai ʻo e filōsofia faka-Kalisí.

Ko e Hā ʻa e Soulú?

Naʻe akoʻi ʻe Filo ʻo pehē ko e soulú ʻoku mavahe ia mei he sinó. Naʻá ne lea fekauʻaki mo e tangatá “ʻoku faʻuʻaki ʻa e sino mo e soulu.” ʻE lava nai ke mate ʻa e soulú? Fakatokangaʻi ange ʻa e fakamatala ʻa Filó: “ʻI he taimi ʻoku tau moʻui aí, ʻoku tau moʻui neongo ko hotau soulú ʻoku mate pea tanu ia ʻi hotau sinó, ʻo hangē ʻokú ne ʻi ha fonualotó. Ka ʻo kapau [ko e sinó] naʻe pau ke mate, ʻe moʻui leva hotau soulú ʻo fakatatau ki heʻene moʻui totonú, ʻi heʻene ʻatā mei he koví mo e sino maté ʻa ia ʻoku haʻisia ki aí.” Kia Filo, ko e mate ʻa e soulú naʻe fakaefakatātā. ʻOku ʻikai ʻaupito ke mate moʻoni ia. ʻOku taʻefaʻamate ia.

Neongo ia, ko e hā ʻoku akoʻi ʻe he Tohi Tapú fekauʻaki mo e soulú? ʻOku pehē ʻe he Senesi 2:7: “Pea naʻe ngaohi ʻe Sihova Elohimi ʻa e tangata mei he efu ʻo e kelekele, ʻo ne hō ki hono avaʻi ihu ʻa e mānava moʻui; pea naʻe hoko ʻa e tangata ko e [“soulu,” NW] moʻui.” Fakatatau ki he Tohi Tapú, ʻoku ʻikai ke maʻu ʻe he faʻahinga ʻo e tangatá ha ngaahi soulu; ka ʻi hono kehé, ko e ngaahi soulu kinautolu.

ʻOku toe akoʻi ʻe he Tohi Tapú ko e soulú ʻoku ʻikai ke taʻefaʻamate ia. ʻOku fakamatala ʻa e Isikeli 18:4: “Ko e [“soulu,” NW] ʻoku fai angahala ko ia ia ʻe mate.” Mei he ongo konga Tohi Tapu ko ení ʻe lava ke tau maʻu totonu mei ai ha fakamulituku: Ko e tangatá ko ha soulu ia. Ko ia ai, ʻi he taimi ʻoku mate ai ha tangatá, ʻoku mate ʻa e soulú.​—Senesi 19:19.a

Hili e mate ʻa Filó, naʻe siʻi ʻa e tokanga kiate ia ʻa e kau Siú. Kae kehe, ko e Puleʻanga-Haʻa-Kalisitiané, naʻa nau talitali lelei ia. Ko ʻIusepiasi mo e kau taki lotu kehé naʻa nau tui naʻe tafoki ʻa Filo ki he lotu faka-Kalisitiané. Naʻe fakahokohoko ia ʻe Selome ko e taha ʻo e ngaahi Tamai ʻa e Siasí. Ko e kau Kalisitiane tafoki mei he moʻoní, kae ʻikai ko e kau Siú, naʻa nau fakatolonga ʻe kinautolu ʻa e ngaahi tohi ʻa Filó.

Naʻe taki atu ʻa e ngaahi tohi ʻa Filó ki ha liukava fakalotu. Ko ʻene tākiekiná naʻe taki atu ai ʻa e kau Kalisitiane lau peé ke nau ohi ʻa e tokāteline taʻefakatohitapu ʻo e taʻefaʻamate ʻa e soulú. Pea ko e akonaki ʻa Filo fekauʻaki mo e Lōkosí (pe Folofolá) naʻe taki atu ia ki hono faʻu ʻo e Tolu-Tahaʻi-ʻOtuá, ko ha tokāteline ʻikai Fakatohitapu ʻa e lotu faka-Kalisitiane tafoki mei he moʻoní.

ʻOua ʻe Takihalaʻi

ʻI heʻene ako fekauʻaki mo e Ngaahi Konga Tohi Tapu Faka-Hepeluú, naʻe fakapapauʻi ai ʻe Filo naʻe “ʻikai te ne liʻaki ha ʻuhinga fakaefakatātā ʻa ia ʻe fufū nai ʻi he lea mahinó.” Kae kehe, hangē ko ia ʻoku maʻu ʻi he Teutalonome 4:​2, naʻe pehē ʻe Mōsese ʻo fekauʻaki mo e Lao ʻa e ʻOtuá: “ʻE ʻikai te mou fakalahi, pea ʻe ʻikai te mou fakasiʻisiʻi ki he meʻa ʻoku ou tuʻutuʻuni atu, ʻi hoʻomou tauhi ʻa e ngaahi fekau ʻa Sihova ko homou ʻOtua, ʻa ia ʻoku ou kouna atu.” ʻI he kotoa ʻo ʻene ngaahi fakakaukau ngali leleí, naʻe tānaki atu ki ai ʻe Filo ʻa e ngaahi ʻotu fakamahalo, ʻa ia ʻi heʻene hangē ha konga ʻao matolú, naʻá ne fakaʻuliʻulilātai ʻa e fakahinohino mahino ʻa e Folofola fakamānavaʻi ʻa e ʻOtuá.

“Talaʻehai ko ʻemau fai ki ha ngaahi fananga ne faʻu ke fakahinga ʻa e kakai, ʻa ʻemau ongoongoa atu ʻa e māfimafi ʻa hotau ʻEiki ko Sisu Kalaisi, mo ʻene toe hoko mai,” ko e lea ia ʻa e ʻapositolo ko Pitá. (2 Pita 1:​16) ʻI he ʻikai hangē ko e ngaahi tohi ʻa Filó, ko e fakahinohino ʻa Pita ki he muʻaki fakatahaʻanga Kalisitiané naʻe makatuʻunga ia ʻi he foʻi moʻoni pea ʻi he tataki ʻa e laumālie ʻo e ʻOtuá, ko e “Laumālie ʻo e Moʻoni,” ʻa ia naʻá ne tataki kinautolu ki he moʻoni kotoa pē.​—Sione 16:13.

Kapau ʻokú ke mahuʻingaʻia ʻi he lotu ki he ʻOtua ʻo e Tohi Tapú, ʻokú ke fiemaʻu ʻa e tataki moʻoni, ʻikai ko e ngaahi fakaʻuhinga makatuʻunga ʻi he fakakaukau fakaetangatá. ʻOkú ke fiemaʻu ʻa e ʻilo totonu ʻo Sihova mo hono finangaló, pea ʻokú ke fiemaʻu ʻa e anga-fakatōkilaló ke ke hoko ai ko ha tokotaha ako loto-moʻoni. Kapau ʻokú ke ako ʻa e Tohi Tapú fakataha mo e fakakaukau lelei ko iá, te ke hoko ai ʻo ʻiloʻi ʻa e “Tohitapu, ʻa ia ʻoku ne mafai ke fakapoto koe ke maʻu ʻa e fakamoʻui ʻi he tui ʻoku ʻia Kalaisi Sisu.” Te ke ʻiloʻi ai ko e Folofola ʻa e ʻOtuá ʻe lava ke ne ʻai koe ke ke ‘tuʻu kakato, kuo ʻosi sāuni ki he ngaue lelei fulipe.’​—2 Timote 3:​15-​17.

[Fakamatala ʻi lalo]

[Puha/Fakatātā ʻi he peesi 10]

KO E KOLO ʻO FILÓ

Naʻe moʻui mo ngāue ʻa Filo ʻi ʻAlekisanitulia ʻo ʻIsipité. ʻI he laui senituli, naʻe hoko ai ʻa e kolo ko iá ko e kolomuʻa ʻo e ʻū tohí mo e ngaahi lāulea ʻa e kau mataotaó.

Naʻe ako ʻa e kau akó mei he kau mataotao ʻiloa ʻa ia naʻa nau faiako ʻi he ngaahi ʻapiako ʻo e koló. Naʻe hoko ʻa e laipeli ʻo ʻAlekisanituliá ʻo ʻiloa ʻi he māmaní. Naʻe tupu ʻa e ngaahi meʻa naʻá ne tānakí ʻo aʻu ki he ngaahi meʻa ʻe laui kilu ʻi he feinga ʻa e kau tauhi laipelí ke maʻu ʻa e ngaahi tatau ʻo e fakamatala tefito kotoa pē kuo tohi.

Ki mui mai, naʻe hōloa māmalie ʻa hono fakahīkihikiʻi ko ia ʻi māmani lahi ʻa ʻAlekisanitulia mo ʻene fuʻu tānekina ʻo e ʻiló. Naʻe fakamāʻolungaʻi ʻe he kau ʻEmipola ʻi Lomá ʻa honau koló tonu, pea naʻe hiki ai ʻa e senitā fakafonuá ki ʻIulope. Ko e hōloa ʻa ʻAlekisanituliá naʻe aʻu ki hono tumutumú ʻi he senituli hono fitu T.S. ʻi he taimi naʻe ikunaʻi ai ʻe he kau tau fakatūʻutá ʻa e koló. ʻOku aʻu mai ki he ʻahó ni, ʻa e tangilāulau ʻa e kau faihisitōliá ʻi he mole ʻa e laipeli ʻiloa ko iá, ʻi he taukaveʻi ʻe he niʻihi naʻe holomui ai ʻa e fakalakalaka e sivilaisé ʻaki ʻa e taʻu ʻe 1,000.

[Maʻuʻanga]

L. Chapons/Illustrirte Familien-Bibel nach der deutschen Uebersetzung Dr. Martin Luthers

[Puha ʻi he peesi 12]

FAKAʻUHINGA FAKAEFAKATĀTĀ HE ʻAHÓ NI

Ko e fakaʻuhinga fakaefakatātaá ʻoku faʻa hoko “ko e fakamatala ia fakafou ʻi he kakai fakaefakatātā ʻikai moʻoni mo e ngaahi ngāue moʻoni pe ngaahi moʻoniʻi meʻa ʻoku talilahia fekauʻaki mo e ʻi ai ʻa e tangatá.” Ko e ngaahi talanoa ʻoku ngāueʻaki ai ʻa e fakaʻuhinga fakaefakatātaá ʻoku pehē ko e fakatātā ia ʻo e ngaahi meʻa mahuʻinga ange ʻa ia ʻoku fufuú. ʻI he hangē ko Filo ʻo ʻAlekisanituliá, ko e kau faiako fakalotu ʻe niʻihi ʻi onopōní ʻoku nau ngāueʻaki ʻa e fakaʻuhinga fakaefakatātaá ke fakamatalaʻi ʻaki ʻa e Tohi Tapú.

Fakakaukau angé ki he Senesi vahe 1-​11, ʻa ia ʻoku lēkooti ai ʻa e hisitōlia ʻo e tangatá mei he fakatupú ʻo aʻu ki hono fakamovetevete ko ia ʻo e kakaí ʻi he taua ʻo Pēpelí. Ko e New American Bible, ko ha liliu Katolika, ʻoku pehē ai fekauʻaki mo e konga ko ia ʻo e Tohi Tapú: “Ke ʻai ke ala mahinoʻi ʻa e ngaahi moʻoni ʻoku ʻi he ngaahi vahe ko ení ʻe he kakai ʻIsileli ʻoku nau taumuʻa ke fakatolonga iá, naʻe fiemaʻu ke fakahaaʻi kinautolu fakafou he ngaahi ʻelemēniti naʻe ʻilolahia ʻi he lotolotonga ʻo e kakai ʻi he taimi ko iá. ʻI he ʻuhinga ko ení, ko e ngaahi moʻoní tonu kuo pau ke fakamavaheʻi mahino ia mei honau teunga fakaetohí.” Ko e lea eni ʻo pehē ko e Senesi vahe 1-​11 ʻoku ʻikai fiemaʻu ke fakaʻuhingaʻi hangatonu. ʻI hono kehé, hangē ko e hanga ʻe he teungá (valá) ʻo ʻufiʻufiʻi ʻa e sinó, ʻoku pehē pē hono ʻufiʻufiʻi ʻe he ngaahi foʻi leá ha ʻuhinga loloto ange.

Kae kehe, naʻe akoʻi ʻe Sīsū ko e ngaahi muʻaki vahe ko ia ʻo e tohi Senesí naʻe moʻoni fakahangatonu ia. (Mātiu 19:​4-6; 24:​37-​39) Naʻe fai pehē pē mo e ongo ʻapositolo ko Paula mo Pitá. (Ngāue 17:​24-​26; 2 Pita 2:5; 3:​6, 7) Ko e kau ako Tohi Tapu loto-moʻoní ʻoku nau siʻaki ʻa e ngaahi fakamatala ʻoku ʻikai ke felotoi mo e Folofola fakakātoa ʻa e ʻOtuá.

[Fakatātā ʻi he peesi 9]

Ko e fale maama lahi ʻo ʻAlekisanituliá

[Maʻuʻanga]

Archives Charmet/Bridgeman Art Library