Feinga Fakamātoató​—Ko Fē ʻa e Taimi ʻOku Tāpuakiʻi Ai ʻe Sihová?

“TUKU au keu alu, he kuo maa ae aho;”

“E ikai teu tukuage koe o kabau e ikai te ke tabuaki au.”

“Kohai ho higoa?”

“Ko Jekobe.”

“E ikai toe ui ho higoa ko Jekobe, ka ko Isileli: he oku hage ko ha eiki a hoo fai malohi ki he Otua, moe tagata, bea kuo ke lavaʻi.”—Senesi 32:​26-28, PM.

Ko e fetalanoaʻaki fakamānako ko iá ko e ola ia ʻo ha fakahāhā fakaofo ʻo e fetakai mālohi ʻa e taʻu 97 ko Sēkopé. Neongo ʻoku ʻikai ke fakamatalaʻi ia ʻe he Tohitapú ko ha tangata sipoti, naʻá ne fangatua pe fefaʻuhi ʻi he poó kotoa mo ha ʻāngelo. Ko e hā hono ʻuhingá? Ko Sēkopé naʻe tokanga lahi ki he talaʻofa ʻa Sihova ki heʻene kuí—ki hono tofiʻá.

ʻI he laui taʻu lahi ki muʻá ko e tokoua ʻo Sēkope ko ʻĪsoá naʻá ne tuku ange kiate ia ʻa e totonu ki he ʻuluaki fohá ʻi he fakafetongi ki ha poulu sitiu. ʻOku aʻu atu eni ʻa e tala kia Sēkope ʻoku lolotonga fakaofiofi mai ʻa ʻĪsoa mo e kau tangata ʻe toko 400. ʻI he hohaʻa totonú, ʻoku kumi ʻa Sēkope ke fakapapauʻi ʻa e talaʻofa ʻa Sihova ʻe lakalakaimonū ʻa hono fāmilí ʻi he fonua he tafaʻaki ʻe taha ʻo e Vaitafe Sioataní. ʻI he fehoanaki mo ʻene ngaahi lotú, ʻoku fai ʻe Sēkope ʻa e ngāue pau. ʻOkú ne ʻoatu ʻa e ngaahi meʻaʻofa nima-homo kia ʻĪsoa ʻoku fakaofiofi atú. ʻOkú ne toe fai ʻa e ngaahi ngaʻunu fakaemaluʻi, ʻo vaeua ʻa ʻene ʻapitangá mo fetukutuku ʻa hono ongo uaifí mo e fānaú ʻi he aʻaʻanga ʻo Siapokí. ʻI he kikivi pea mo e loʻimataʻiá, ʻokú ne toe feinga mālohi eni ʻaki ʻa e fefaʻuhi ʻi he poó kotoa mo ha ʻāngelo koeʻuhi “naʻa lava ke ne kōlenga ha lelei maʻana.”—Hosea 12:​4, NW; Senesi 32:​1-32.

Fakakaukau ki ha fakatātā ki muʻa ange, ʻa Lesieli, ko e uaifi hono ua ʻo Sēkopé pea mo ia naʻá ne ʻofa lahi taha aí. ʻOku ʻilo lelei ʻa Lesieli ki he talaʻofa ʻa Sihova te ne tāpuakiʻi ʻa Sēkopé. Ko hono tokoua ko Liá, ʻa e ʻuluaki uaifi ʻo Sēkopé, ʻoku tāpuakiʻi ia ʻaki ʻa e ngaahi foha ʻe toko fā lolotonga ia ʻoku kei paʻa pē ʻa Lesieli. (Senesi 29:​31-35) ʻI he ʻikai ke fakavaivai ki he fakaʻofaʻia ʻia kitá, ʻokú ne hanganaki kōlenga kia Sihova ʻi he lotu pea fai mo e ngāue pau ʻi he fehoanaki mo ʻene ngaahi lotú. Hangē ko e fai ʻa ʻene kui fefine ko Selá kia Hekaʻaá, ʻoku ʻomai ʻe Lesieli ʻa ʻene kaunanga ko Pilaá pea ʻoatu ia kia Sēkope ʻi he tuʻunga ko ha uaifi hono ua, koeʻuhi ʻo hangē ko e lea ʻa Lesielí, “kau maʻu fanau foki ʻe au ʻiate ia.”a Naʻe fāʻeleʻi ʻe Pilā ha ongo foha kia Sēkope—ko Tani mo Nafitalai. ʻI he fāʻeleʻi ʻo Nafitalaí ʻoku talaki ʻe Lesieli ʻa e tuʻunga ʻo ʻene fāinga fakaeongó: “Ko e ngaahi fefaʻuhi lalahi kuo u fefaʻuhi ai mo hoku taʻokete, pea kuo u [lavaʻi] foki.” ʻOku tāpuakiʻi lahi ange ʻa Lesieli ʻaki ha ongo foha tonu ʻoʻona, ko Siosefa mo Penisimani.—Senesi 30:​1-8; 35:24.

Ko e hā naʻe tāpuakiʻi ai ʻe Sihova ʻa e ngaahi feinga fakaesino mo fakaeongo ʻa Sēkope mo Lesielí? Naʻá na tauhi ʻa e finangalo ʻo Sihová ke muʻomuʻa taha pea koloaʻaki hona tofiʻá. Naʻá na lotu fakamātoato ki heʻene tāpuakí ʻi heʻena moʻuí pea fai mo e ngāue pau ʻi he fehoanaki mo e finangalo ʻo e ʻOtuá pea mo ʻena ngaahi kolé tonu.

ʻI he hangē ko Sēkope mo Lesielí, ko e tokolahi ʻi he ʻahó ni ʻoku lava ke nau fakamoʻoniʻi ko e feinga tōtōiví ʻoku fiemaʻu ia ke maʻu ai ʻa e tāpuaki ʻa Sihová. Ko ʻenau ngaahi feingá ʻoku faʻa ʻalu fakataha ia mo e loʻimataʻia, fakalotosiʻi mo e ongoʻi feifeitamaki. Ko ha faʻē Kalisitiane ʻe taha ko ʻIlisapesi, ʻokú ne manatu ki he feinga fakamātoato naʻe fai ke toe foki ai ki hono maʻu tuʻumaʻu ʻa e ngaahi fakataha faka-Kalisitiané ʻi he hili ia ha liʻaki fuoloa. ʻI he maʻu ʻa e fānau tangata iiki ʻe toko nima, ko ha husepāniti taʻetui pea mo ha fakaʻuli kilomita ʻe 30 ki he Fale Fakatahaʻanga ofi tahá, ko ha ngāue faingataʻa ia. “Ko e feinga ke aʻu maʻu pē ki he ngaahi fakatahá naʻe fiemaʻu lahi ki ai ʻa e akonakiʻi-kita, ʻa ia naʻá ku ʻiloʻi naʻe lelei kiate au pea ki hoku ngaahi fohá. Naʻe tokoni ia kia kinautolu ke nau sio ko ha ʻalunga eni ʻoku tuha ke tuli ki ai.” Naʻe tāpuakiʻi ʻe Sihova ʻa ʻene ngaahi feingá. ʻI hono foha ʻe toko tolu ʻoku longomoʻui ʻi he fakatahaʻanga Kalisitiané, ko e toko ua ai ʻokú na ʻi he ngāue fakafaifekau taimi-kakató. ʻI he fiefia ʻi heʻenau laka ki muʻa fakalaumālié, ʻokú ne pehē: “Kuo nau lakasi au ʻi he tupu fakalaumālié.” Ko ha tāpuaki ē ki heʻene feinga fakamātoató!

Feinga Fakamātoato ʻOku Tāpuakiʻi ʻe Sihová

Ko e feinga fakamātoató mo e ngāue mālohí ʻoku ʻi ai moʻoni hona ngaahi pale. Ko e lahi ange ʻo e feinga ʻoku tau fai ʻi ha ngāue pe ko ha ngafa kuo vaheʻi mai, ko e lahi ange ia ʻo e fiemālie te tau maʻú. Ko e founga eni naʻe ngaohi ai ʻe Sihova kitautolú. “Koe kai moe inu ae tagata kotoabe, moe fiefia i he lelei o ene gaue kotoabe, koe foaki ia ae Otua,” ko e tohi ia ʻa Tuʻi Solomoné. (Koheleti 3:​13, PM; Koheleti 5:​18, 19) Kae kehe, ke maʻu ha tāpuaki mei he ʻOtuá, kuo pau ke tau fakapapauʻi ko ʻetau ngaahi feingá ʻoku fakahanga totonu. Ko e fakatātaá, ʻoku ʻuhinga lelei ke ʻamanekina ʻa e tāpuaki ʻa Sihová ʻi ha founga moʻui ʻa ia ʻoku tuku ai ʻa e ngaahi meʻa fakalaumālié ia ke fika ua? ʻE lava ke fakatuʻotuʻa atu ha Kalisitiane ʻosi fakatapui ki he hōifua ʻa Sihová ʻo kapau ʻokú ne tali ha ngāue pe ngaahi hiki lakanga ʻa ia ʻe ʻuhingá ko ʻene liʻaki maʻu pē ʻa e feohi mo e fakahinohino ʻoku langa hake ai ʻa e tuí ʻi he ngaahi fakataha faka-Kalisitiané?—Hepelu 10:​23-25.

Ko ha moʻui ngāue mālohi ʻi hono muia ha ngāue fakamāmani pe lakalakaimonū fakamatelie ʻe ʻikai ke ʻuhinga pau ia ʻe “fiefia i he lelei” ha taha kapau ʻoku fai ia ʻo ʻikai fakakau ai ʻa e ngaahi meʻa fakalaumālié. Naʻe fakamatalaʻi ʻe Sīsū ʻa e ngaahi nunuʻa ʻo e feinga ʻoku ʻalu halá ʻi heʻene talanoa fakatātā ki he tangata tūtūʻí. ʻI he fekauʻaki mo e tenga “naʻe tūtūʻi ʻi he potu ʻakau talatala,” naʻe fakamatalaʻi ʻe Sīsū “ko e toko taha ia ʻoku fanongo ki he folofola; pea ko e lotomoʻua ki māmani, mo e fakahekeheke ʻa koloa, ʻoku kāsia ai ʻa e folofola, pea ne taʻe fua.” (Mātiu 13:22) Naʻe toe fakatokanga ʻa Paula ki he tauhele tatau peá ne tānaki mai ko e faʻahinga ʻoku nau tuli ki ha ʻalunga fakamatelié “ʻoku nau to ki he ʻahiʻahi, mo e tauhele, mo e ngaahi holi kehekehe, ʻa ia ʻoku fakasesele pea ko e meʻa ʻoku te lavea ai; ko e faʻahinga meʻa ʻoku nau lomekina ʻa e kakai ki he ʻauha mo e malaʻia.” Ko e hā ʻa e faitoʻo ki ha founga moʻui fakatupu maumau fakalaumālie pehē? Naʻe hoko atu ʻe Paula: ‘Hola mei he ngaahi meʻa peheé pea ʻoua ʻe tuʻu hoʻo falalá ki he koto taʻemaʻu na ko e koloa; ka ki he ʻOtuá, ʻa ia ʻoku ne ʻomi ʻa e meʻa kehekehe ʻo fuʻu lahi, maʻatau fiemalie pe.’—1 Timote 6:​9, 11, 17.

Neongo pe ko e hā hotau taʻumotuʻá pe ko hono fuoloa ʻo ʻetau tauhi kia Sihová, ko kitautolu kotoa ʻe lava ke tau maʻu ʻaonga mei he faʻifaʻitaki ki he feinga fakamātoato naʻe fakahāhā ʻe Sēkope mo Lesielí. ʻI heʻena fekumi ki he hōifua fakaʻotuá, naʻe ʻikai ʻaupito mole mei heʻena tokangá ʻa hona tofiʻá, neongo pe ko e hā nai hono fakamanavahē pe feifeitamaki ne ʻi ai ʻa hona tuʻungá. ʻI he ʻahó ni, ko e ngaahi tenge mo e ngaahi faingataʻa ʻoku tau fehangahangai mo iá ʻe fakamanavahē mo feifeitamaki tatau pē nai pe aʻu ʻo fakalotomafasia. Ko e tauhelé ke tau foʻi ʻi he fekuki ʻoku faí pea hoko ko ha toe tokotaha lavekovia ʻi he ʻoho ʻa Sētané. Te ne ngāueʻaki nai ha taha ʻo e ngaahi founga ʻoku ʻi hono mafaí, pe ko e fakafiefiá pe fakaivifoʻoú, sipotí pe vaʻingá, ngāué pe lakalakaimonū fakamatelié, ke aʻusia ai ʻa ʻene ngaahi taumuʻá. Ko e ngaahi ola fakamānakó ʻoku faʻa talaʻofaʻaki ka ʻoku tātātaha ke hoko moʻoni. Ko e faʻahinga ʻoku kākaaʻi pe fakataueleʻi ke fakatuituia ʻa e ngaahi ngāue peheé ʻoku nau faʻa ʻilo ʻoku iku lahi ia ki heʻenau loto-mamahi. ʻI he hangē ko Sēkope mo Lesieli ʻo e kuonga muʻá, tau fakatupulekina ʻa e laumālie ʻo ha tokotaha fāinga fakamātoato pea ikuʻi ʻa e ngaahi filioʻi kākā ʻa Sētané.

ʻOku ʻikai ha meʻa ʻe toe saiʻia ange ai ʻa e Tēvoló ka ko ʻene sio kia kitautolu ʻoku tau fakavaivai ki he hoko ʻo ikunaʻí, ʻi he ongoʻi ‘ʻoku ʻikai ha toe ʻamanaki ki he tuʻungá. ʻE ʻikai ha toe meʻa ʻe lava ke fai. ʻOku ʻikai hano ʻaonga.’ He mātuʻaki mahuʻinga leva ē kia kitautolu kotoa ke maluʻi kitautolu mei hono fakatupu ha tōʻonga fakafisi, ʻi he fakakaukau ‘ʻoku ʻikai ha taha ʻe ʻofa ʻiate kita’ pea ‘kuo ngalo kita ʻia Sihova.’ Ko e tō ki he faʻahinga fakakaukau peheé ʻoku fakatupu ʻauha kia kita. ʻE lava ke fakahaaʻi ai kuo tau foʻi pea ʻoku ʻikai ke tau kei fāinga kae ʻoua kuo tau maʻu ha tāpuaki? Manatuʻi, ʻoku tāpuakiʻi ʻe Sihova ʻa ʻetau feinga fakamātoató.

Hanganaki Fāinga ki he Tāpuaki ʻa Sihová

Ko ʻetau lakalakaimonū fakalaumālié ʻoku fakatuʻunga lahi ia ʻi heʻetau mahinoʻi ʻa e ongo foʻi moʻoni tefito ʻe ua fekauʻaki mo ʻetau moʻui ko ha sevāniti ʻa Sihová. (1) ʻOku ʻikai ha taha te ne puleʻi kakato ʻa e ngaahi palopalemá, ngaahi mahakí, pe ngaahi tuʻunga faingataʻa ʻi he moʻuí, pea (2) ʻoku fanongo ʻa Sihova ki he tangi ʻa e faʻahinga ʻoku nau kōlenga fakamātoato kiate ia ha tokoni mo ha tāpuakí.—Ekisoto 3:​7-10; Semisi 4:​8, 10; 1 Pita 5:​8, 9.

Neongo pe ko e hā hono faingataʻa ho ngaahi tuʻungá pe ko e fakangatangata nai ʻa hoʻo ongoʻí, ʻoua te ke ʻulutukua ki he “angahala ʻoku tau moʻuangofua ki ai”—ʻa e siʻi ʻo e tuí. (Hepelu 12:1) Hokohoko atu ʻa hoʻo fāingá kae ʻoua kuó ke maʻu ha tāpuaki. Faʻa kātaki ʻo manatuʻi ʻa e taʻumotuʻa ko Sēkopé, ʻa ia naʻá ne fangatua ʻi he poó kotoa ki ha tāpuakí. ʻI he hangē ko e tangata faʻa ʻoku tūtuuʻi ʻi he faʻahitaʻu failaú pea tatali ki he utu-taʻú, kumi anga-kātaki ki he tāpuaki ʻa Sihová ʻi hoʻo ngāue fakalaumālié, neongo hono lahi ʻo hoʻo ongoʻi nai ʻo e fakangatangata ʻa hoʻo ngāué. (Semisi 5:​7, 8) Pea manatuʻi maʻu pē ʻa e lea ʻa e tokotaha-tohi-sāmé: “Ko kinautolu oku tūtūʻi i he loimata te nau tuuji i he fiefia.” (Sāme 126:​5, PM; Kaletia 6:9) Tuʻu mālohi, pea nofo maʻu ʻi he lotolotonga ʻo e kau fefaʻuhí.

[Fakamatala ʻi lalo]