Ko e Hā ʻOku Tau Tupu Ai ʻo Motuʻa Pea Maté?

Naʻe tala ʻe he ʻOtuá kia ʻĀtama, “ʻI he ʻaho te ke kai mei [he ʻakaú],” ko e moʻoni te ke mate.” (Sēnesi 2:17) Ko e fekau ko iá ʻe ʻikai mei feʻungamālie nai ia kapau naʻe fakataumuʻa kia ʻĀtama ke tupu ʻo motuʻa pea mate. Naʻe ʻiloʻi ʻe ʻĀtama kapau heʻikai te ne kai mei he fuʻu ʻakaú heʻikai te ne mate.

Naʻe ʻikai fiemaʻu kia ʻĀtama mo ʻIvi ke na kai mei he fuʻu ʻakaú ke na moʻui fuoloa ai​—naʻe lahi ʻa e ngaahi ʻakau fua ʻi he ngoué. (Sēnesi 2:9) Kapau naʻe ʻikai ke kai ʻa e ʻuluaki ongo mātuʻá mei he fuʻu ʻakaú, naʻá na mei fakahāhā ai ʻa ʻena talangofua ki he Tokotaha naʻá ne ʻoange kiate kinaua ʻa e moʻuí. ʻE toe fakahaaʻi ai naʻá na ʻiloʻi ʻa e totonu ʻa e ʻOtuá ke ne tala ange ʻa e meʻa ke na faí.

ʻUHINGA NAʻE MATE AI ʻA ʻĀTAMA MO ʻIVÍ

Ke mahinoʻi ʻa e ʻuhinga naʻe mate ai ʻa ʻĀtama mo ʻIví, ʻoku fiemaʻu ke tau sivisiviʻi ʻa e fetalanoaʻaki kuó ne uesia ʻa e kotoa ʻo kitautolú. Naʻe ngāueʻaki ʻe Sētane ko e Tēvoló ha ngata ke ne fai ha loi fakalotokovi. ʻOku pehē ʻe he fakamatala ʻa e Tohi Tapú: “Pea ko e ngatá ʻa e manu mata-ʻiloʻilo taha ʻi he fanga manu kaivao kotoa pē ʻa ia naʻe ngaohi ʻe Sihova ko e ʻOtuá. Ko ia naʻá ne pehē ki he fefiné: ‘Ko e moʻoni koā naʻe folofola ʻa e ʻOtuá ʻo pehē kuo pau ke ʻoua te mo kai mei he ʻakau kotoa pē ʻo e ngoué?’”​—Sēnesi 3:1.

Naʻe tali ki ai ʻa ʻIvi: “ʻE lava ke ma kai ʻa e fua ʻo e ʻuluʻakau ʻo e ngoué. Ka kuo folofola ʻa e ʻOtuá ʻo fekauʻaki mo e fua ʻo e fuʻu ʻakau ʻoku ʻi he loto ngoué: ‘Kuo pau ke ʻoua te mo kai mei ai, ʻio, kuo pau ke ʻoua te mo ala ki ai; he ka pehē, te mo mate.’” Hokó naʻe tala ange ʻe he ngatá kiate ia: “ʻE ʻikai moʻoni te mo mate. He ʻoku ʻafioʻi ʻe he ʻOtuá ko e ʻaho pē ko ia te mo kai ai mei aí, ʻe ʻā homo matá pea te mo hangē ko e ʻOtuá, ʻo ʻilo ʻa e leleí mo e koví.” Naʻe fakahuʻunga heni ʻe Sētane ko Sihová ko e tokotaha loi pea naʻá ne taʻofi ʻa e ngaahi meʻa leleí mei heʻetau ʻuluaki ongo mātuʻá.​—Sēnesi 3:2-​5.

Naʻe tui ʻa ʻIvi ki he meʻa naʻá ne fanongo ki aí. Naʻá ne toe sio fakamamaʻu ki he ʻakaú. Naʻe hā fakamānako ia, pea mo matamatalelei! Naʻá ne ala atu, ʻo ne pakiʻi ʻa hono fuá, pea kai ia! Pea pehē leva ʻe he Tohi Tapú: “Hili iá, naʻá ne ʻoange foki ha meʻa ki hono husepānití ʻi heʻene ʻiate iá, pea naʻe kamata ke ne kai ia.”​—Sēnesi 3:6.

He meʻa fakamamahi ē ʻi he vakai hifo ʻa e ʻOtuá ki heʻene fānau naʻe ʻofa aí ʻoku talangataʻa loto-lelei kiate ia! Ko e hā naʻá ne faí? Kia ʻĀtamá, naʻe tala ange ʻe Sihova: “Te ke . . . foki ki he kelekelé, he naʻe toʻo koe mei ai. He ko e efu koe pea ko e efu te ke foki ki aí.” (Sēnesi 3:17-19) Koeʻuhi ko e meʻá ni, “ko e ngaahi ʻaho kotoa ʻo e moʻui ʻa ʻĀtamá naʻe feʻunga mo e taʻu ʻe 930, pea naʻá ne toki mate leva.” (Sēnesi 5:5) Naʻe ʻikai ke ʻalu ʻa ʻĀtama ki hēvani pe ko ha toe nofoʻanga laumālie. Naʻe ʻikai te ne ʻi ai ki muʻa ka ʻi hono fakatupu ia ʻe Sihova mei he efu ʻo e kelekelé. Ko ia ʻi heʻene maté, naʻá ne hoko pē ʻo hangē ko e efu naʻe ngaohi ia mei aí. Naʻe ʻikai ke ne toe ʻi ai. He meʻa fakamamahi ē!

ʻUHINGA ʻOKU ʻIKAI KE TAU HAOHAOA AÍ

Koeʻuhi ko e talangataʻa ʻiloʻilo pau ʻa ʻĀtama mo ʻIví, naʻe mole ai meiate kinaua ʻa e haohaoá mo ʻena ʻamanaki ki he moʻui taʻengatá. Naʻá na fekuki mo ha ngaahi liliu ʻi hona sinó; naʻá na hoko ʻo taʻehaohaoa mo angahalaʻia. Naʻe ʻikai ko kinaua pē naʻe uesia ʻi heʻena talangataʻá. Naʻe toe tukufakaholo atu ia ki hona hakó. ʻOku pehē ʻe he Loma 5:12: “Ko e fou mai ʻi he tangata ʻe toko taha [ʻa ʻĀtama] ʻa e hoko mai ʻa e angahalá ki he māmaní pea mo e maté fakafou ʻi he angahalá, pea ʻoku pehē ʻa e mafola ʻa e maté ki he kakai kotoa pē koeʻuhi kuo nau angahala kotoa pē.”

ʻOku fakamatala ʻa e Tohi Tapú ko e angahalá mo e maté ko e “ʻufiʻufi ʻokú ne fakapūlouʻi ʻa e ngaahi kakaí kotoa pea mo e ʻufiʻufi ʻoku tāvani ʻi he ngaahi puleʻangá kotoa.” (ʻAisea 25:7) Ko e ʻufiʻufi ko ení ʻokú ne fakapūlouʻi ʻa e faʻahinga ʻo e tangatá ʻo hangē ha hahau kona ʻa ia ʻoku ʻikai lava ke hao mei ai ha taha. Ko e moʻoni, “ʻoku mate kotoa pē koeʻuhi ko ʻĀtama.” (1 Kolinitō 15:22) ʻOku langaʻi ai ʻa e fehuʻi, ʻo hangē ko ia ʻoku ʻomai ʻe he ʻapositolo ko Paulá: “Ko hai te ne fakahaofi au mei he sino ʻokú ne fakatupunga ʻa e mate ko ení?”​—Loma 7:24.