ʻOku Tokanga Mai ʻa e ʻOtuá kia Kitautolu?

ʻOKÚ KE ʻiloʻi ʻokú ke fāinga ʻi he malumalu ʻo ha mafasia fakaeongo koeʻuhi ko e ngaahi palopalema mo ho fāmilí, moʻui leleí, ngāué, pe ko ha ngaahi fatongia mafatukituki kehe? ʻOku pehē ʻa e kakai tokolahi. Pea ko hai ia he ʻahó ni ʻoku ʻikai uesia ʻe he fakamaau taʻetotonú, faihiá mo e fakamālohí? Ko e moʻoni, ko e meʻa tofu pē ia ʻoku tala ʻe he Tohi Tapú: “ʻOku fai ʻo aʻu ki he taimi ni ʻa e fetoʻeaki mo langa ʻa Natula [“ngaahi meʻa fakatupú,” NW] katoa.” (Loma 8:22) ʻOku ʻikai ha ofo ʻi hono ʻeke ʻe he kakai tokolahi: ‘ʻOku tokanga mai ʻa e ʻOtuá? Te ne tokoniʻi kitautolu?’

Naʻe pehē ʻe he tuʻi poto ko Solomoné ʻi he lotu ki he ʻOtuá: “Ko koe toko taha tofu pe ʻoku ke meaʻi ʻa e loto fuape ʻo e hakoʻi tangata.” Naʻe falala ʻa Solomone ko e ʻOtuá ʻoku ʻikai ngata pē heʻene ʻafioʻi kitautolú ka ʻokú ne toe tokanga tāutaha mai kia kitautolu. Naʻá ne malava ke kole ki he ʻOtuá ke ‘fanongo mai mei langi’ pea ke tali ʻa e ngaahi lotu ʻa e toko taha manavahē-ʻOtua taki taha ʻokú ne fakaeʻa ki he ʻOtuá “hono ta mo hono mamahi.”—2 Kalonikali 6:​29, 30.

ʻI he ʻahó ni, ʻoku kei tokanga mai pē ʻa Sihova ko e ʻOtuá fekauʻaki mo kitautolu pea fakaafeʻi kitautolu ke ui kiate ia ʻi he lotu. (Sāme 50:15) ʻOkú ne talaʻofa ke tali ʻa e ngaahi lotu loto-moʻoni ʻa ia ʻoku fehoanaki mo hono finangaló. (Sāme 55:​16, 22; Luke 11:​5-​13; 2 Kolinito 4:7) ʻIo, ʻoku fanongo mai ʻa Sihova ki he “hu ʻe fai ʻe ha tangata pe ko [hono] kakai Isileli kotoa.” Ko ia ai, kapau ʻoku tau falala ki he ʻOtuá, lotu ki heʻene tokoní, pea ʻunuʻunu ofi kiate ia, te tau hokosia ʻa ʻene tokangá mo e tataki ʻofá. (Palovepi 3:​5, 6) ʻOku fakapapauʻi mai kia kitautolu ʻe he tokotaha-tohi Tohi Tapu ko Sēmisí: “ʻUnuʻunu atu ki he ʻOtua, pea ʻe ʻunuʻunu mai ia kiate kimoutolu.”—Semisi 4:8.