“Ko Hai ʻOkú Ne Tuku ʻa e Potó ki he Ngaahi Pupunga ʻAó”?

“ʻI HE taimi ʻokú ke sio ai ki ha konga ʻao ʻoku mahiki hake ʻi he ngaahi tafaʻaki fakahihifó, ʻokú ke pehē leva, ‘ʻOku ʻi ai ha afā ʻoku haʻu,’ pea ʻoku hoko ia ʻo pehē. Pea ʻi he taimi ʻokú ke sio ai ʻoku angi mai ha matangi mei he tongá, ʻokú ke pehē, ‘ʻE hoko ha vahaʻa taimi vela anga kehe,’ pea ʻoku hoko ia.” Ko e ngaahi lea ko eni ʻa Sīsuú, ʻa ia naʻe hiki ʻe he tokotaha tohi Kōsipeli ko Luké, ko e ngaahi fakatātā ia ʻo e ngaahi fakamatala ʻeá ʻi hono fai ʻi Pālesitaine ʻo e kuonga muʻá. (Luke 12:​54, 55, NW) ʻI he ngaahi tuʻunga ʻe niʻihi, naʻe lava ʻa e kakai he kuonga muʻá ʻo lau ʻa e ngaahi fakaʻilongá pea tala ha ngaahi meʻa ki muʻa, taimi nounou pea totonu.

ʻI he ʻahó ni, ʻoku ngāueʻaki ʻe he kau vakai matangí ʻa e ngaahi meʻangāue fihi, hangē ko e ngaahi satelaite ʻoku nau takaiʻi ʻa e māmaní, mīsini ʻokú ne tala e vavé, mo e ngaahi komipiuta mālohi, ke ne fakafuofua ʻa e ngaahi anga ʻo e ʻeá ʻo laka hake ʻi ha ngaahi vahaʻa taimi lōloa ange. Ka ʻoku faʻa hala ʻenau ngaahi tala ki muʻá. Ko e hā hono ʻuhingá?

ʻOku ʻai ʻe he ngaahi meʻa lahi, ʻo faingataʻa ʻa e fakamatala ʻeá. Ko e fakatātaá, ko e ngaahi liliu taʻeʻamanekina ʻi he fua māfaná, hauhau ʻo e ʻeá, mālohi ʻo e ʻeá, mo e vave ʻa e matangí pea mo e feituʻú ʻe lava ke ne ʻai ke faingataʻa ʻa e ngaahi meʻá. Tānaki atu ki he ngaahi meʻá ni ko e ngaahi felāveʻiʻaki fihi ʻa e laʻaá, ko e ngaahi ʻaó, pea mo e tahí, ʻa ia kuo teʻeki ai mahino kakato ia ki he kau saienisí. ʻI he ʻuhinga ko iá, ʻokú kei hoko ai ko ha saienisi taʻetotonu ʻa e fakamatala ʻeá.

Ko e ʻilo fakangatangata ʻa e tangatá ki he ʻeá ʻoku fakamanatu mai ai kiate kitautolu ʻa e ngaahi fehuʻi naʻe ʻeke kia Siopé: “Ko hai naʻá ne fanauʻi ʻa e hahaú? ʻOku haʻu moʻoni mei he kete ʻo hai ʻa e ʻaisí? . . . ʻE lava ke ke hiki hake ho leʻó ki he ʻaó, koeʻuhi ke lolo hifo ha vai ʻo ʻufiʻufi koe? . . . Ko hai ʻokú ne tuku ʻa e potó ki he ngaahi pupunga ʻaó, pe ʻokú ne ʻoange ʻa e mahinó ki he meʻa hā kehe ʻi he ʻataá? Ko hai ia ʻe lava ke ne lau totonu ʻa e ngaahi ʻaó ʻi he poto, pe ko e ngaahi siā vai ʻo hēvaní​—ko hai ʻe lava ke ne huaʻi hifo iá?”​—Siope 38:​28-37, NW.

Ko e tali eni ki he ngaahi fehuʻi kotoa ko ení, ʻOku ʻikai ko e tangatá ka ko Sihova ko e ʻOtuá. ʻIo, neongo ʻa e hā ngali poto ʻa e tangatá, ko e poto ʻa hotau Tokotaha-Fakatupú ʻoku māʻolunga mātuʻaki mamaʻo ange ia. Ko e anga-ʻofa moʻoni ia ʻi heʻene tafaʻakí ʻi heʻene ʻai ʻene potó ke ala maʻu maʻa kitautolu ʻi he ngaahi peesi ʻo e Tohitapú, koeʻuhi ke tau lava ai ʻo ʻai ke lavameʻa hotau halá.​—Palovepi 5:​1, 2.