“ʻOkú Ne Tataki Au ki he Veʻe Vai Fakanonga”
ʻI HE ʻea vela ʻo e ngaahi fonua ʻi he Tohitapú, ʻoku fiemaʻu ai ke inu ʻa e fanga sipí ʻi he ʻaho kotoa pē. Ko ia ai, ko ha konga mātuʻaki mahuʻinga ʻo ha ngāue ʻa ha tauhi-sipi ko hono tokonaki ha vai ki heʻene tākangá. ʻI he taimi ʻe niʻihi ʻoku fakainu ai ʻe he kau tauhi-sipí ʻenau ngaahi tākangá mei ha vaitupu, ʻo lingi ʻa e vaí ki ha ngaahi fuʻu topu lōloa koeʻuhi ke lava ʻo inu ʻa e fanga sipí. (Senesi 29:1-3) Kae kehe, tautefito ʻi he faʻahitaʻu ʻuhoʻuhá, ko e feituʻu takatakai ʻi he fanga kiʻi vaí mo e vaitafé ʻoku ʻomai ai ha “ngaahi vai fakanonga.”—Sāme 23:2.
Ko ha tauhi-sipi lelei kuo pau ke ne ʻiloʻi ʻa e feituʻu ke maʻu ai fakatouʻosi ʻa e vaí pea mo e kaikaiʻanga feʻungamālie ki heʻene tākangá. Ko ʻene ʻilo lahi ki ha feituʻú ʻoku fakapapauʻi ai ʻa e hao ʻa ʻene fanga sipí. Ko Tēvita, ʻa ia naʻá ne fakamoleki ʻa e ngaahi taʻu lahi ʻi he tauhi ʻo e fanga sipí ʻi he ngaahi moʻunga Siuteá, naʻá ne fakahoa ʻa e tataki fakalaumālie ʻa e ʻOtuá ki ha tauhi-sipi ʻokú ne tataki ʻa ʻene fanga sipí ki ha ngaahi kaikaiʻanga lelei pea ki ha vai foaki moʻui. “ʻOkú ne tataki au ki he veʻe vai fakanonga,” ko e lea ia ʻa Tēvitá fakatatau ki ha liliu ʻe taha.—Sāme 23:1-3, New International Version.
ʻI ha ngaahi taʻu ki mui ai, fakafou ʻi heʻene palōfita ko ʻIsikelí, naʻe ngāueʻaki ai ʻe Sihova ha talanoa fakatātā meimei tatau. Naʻá ne talaʻofa ke tānaki ʻa hono kakaí mei he ngaahi fonua naʻa nau movetevete ki aí, ʻo hangē ko hono tānaki ʻe ha tauhi-sipi ʻa ʻene fanga sipí. “Teu omi akinautolu . . . ki honau fonua onautolu, bea e fafaga akinautolu i he gaahi mounga o Isileli i he vee vaitafe,” ko ʻene fakapapau ia kia kinautolú.—Isikeli 34:13, PM.
ʻOku toe tokanga ʻaupito ʻa Sihova ko e ʻOtuá fekauʻaki mo hono tokonaki mai ʻa e vai fakalaumālié. Ko e tohi ʻa Fakahaá ʻoku fakamatalaʻi ai ha “vaitafe maa oe vai moui” ʻoku tafe mai mei he taloni ʻo e ʻOtuá. (Fakahā 22:1, PM) Ko e fakaafe ke inu mei he vaitafe ko ení ʻoku fakaaʻu atu ia ki he kakai kotoa pē. “Ko ia oku loto ki ai, [ʻe lava] ke ne too taetotogi eia ae vai oe moui.”—Fakahā 22:17, PM.
Ko e vai fakaefakatātā ko eni ʻo e moʻuí ʻokú ne fakafofongaʻi ʻa e ngaahi tokonaki ʻa e ʻOtuá ki he moʻui taʻengatá. ʻOku lava ke kamata ha taha pē ke inu mei he vai peheé ʻi he ‘ʻe nau ilo ʻa e Otua mooni be tahá, mo Jisu Kalaisi, aia naá ne fekaú.’—Sione 17:3, PM.