“ʻI Hoʻo Māma Te Mau Sio Māma”

KO E māmá ko ha meʻa ia ʻoku tau faʻa fakamaʻamaʻaʻi kae ʻoua kuo mate ʻa e ʻuhilá pea fakapoʻulituʻu mo hotau kaungāʻapí. ʻOku fakafiefiá, ko ʻetau “maʻuʻanga ivi” fakalangi—ko e laʻaá—ʻoku alafalalaʻanga moʻoni. Pea ʻi he tokoni ʻa e maama mei he laʻaá, ʻoku lava ai ke tau sio, kai, mānava mo moʻui.

Koeʻuhi ʻoku fiemaʻu ʻa e māmá ki he moʻuí, ʻoku totonu ke ʻoua te tau ʻohovale ʻi hono lau ʻi he tohi ʻa Senesí naʻe hā ʻa e māmá ʻi he ʻuluaki ʻaho fakaefakatupú. “Pea folofola ʻa e ʻOtua, Ke maama mai: pea naʻe maama.” (Senesi 1:3) Ko e kau tangata anga-ʻapasia hangē ko Tuʻi Tēvitá naʻa nau ʻilo maʻu pē ko Sihová ko e matavai ia ʻo e moʻuí mo e māmá. “Ko e matavai ʻo e moʻui ʻoku ʻi he ʻAfiona,” ko e tohi ia ʻa Tēvitá. “ʻI hoʻo māma te mau sio māma.”—Sāme 36:9.

Ko e ngaahi lea ʻa Tēvitá ʻoku fakatou ngāueʻaki fakahangatonu mo fakaefakatātā. ʻOku pehē ʻe he Encyclopædia Britannica: “ʻOku kaunga moʻoni ʻa e māmá ki he ongoʻanga ʻo e sió.” ʻOkú ne tānaki mai leva: “ʻOku lahi ange ʻa e fakamatala ʻoku aʻu ki he ʻatamai fakaetangatá ʻo fakafou ʻi he matá ʻi ha toe faʻahinga ʻōkani fakaeongo kehe.” Koeʻuhi ko e lahi taha ʻo e meʻa ʻoku tau akó ʻoku fakatuʻunga ia ʻi he meʻaʻofa ʻo e sió—ʻa ia ʻokú ne fiemaʻu ha maama ke ngāue leleí—ʻoku toe ngāueʻaki ʻa e māmá ʻi ha founga fakaefakatātā ʻi he ngaahi Konga Tohitapú.

Ko ia, naʻe tala ʻe Sīsū ki heʻene kau ākongá: “Ko au pe ko e Maama ʻo Māmani: ko ia ʻoku ne muimui kiate au, ʻe ʻikai ʻaupito te ne fononga ʻi he poʻuli, ka te ne maʻu ʻa e maama ʻo e moʻui.” (Sione 8:12) Ko e maama fakaefakatātā naʻe lave ki ai ʻa Sīsuú ko e pōpoaki ia ʻo e moʻoni naʻá ne malangaʻí, ʻa ē ʻoku lava ke fakamaama ai ʻa e ʻatamai mo e loto ʻo ʻene kau fanongó. ʻI he hili ha ngaahi taʻu ʻo e fakapoʻuli fakalaumālié, naʻe toki lava ke mahino ki he kau ākonga ʻa Sīsuú ʻa e taumuʻa ʻa e ʻOtuá ki he faʻahinga ʻo e tangatá pea mo e ʻamanaki ʻo e Puleʻangá. Ko e “maama ʻo e moʻui” moʻoní ʻeni, koeʻuhi ʻoku lava ke iku atu ʻa e ʻilo ko iá ki he moʻui taʻengata. “Pea ko eni ia ʻa e moʻui taʻengata,” ko e lea ia ʻa Sīsū ʻi heʻene lotu ki heʻene Tamai fakahēvaní, “ke nau fai ke ʻilo koe ko e Otua moʻonia pe taha, pea mo Sisu ne ke fekau mai ko e Misaia.” (Sione 17:3) ʻOfa ke ʻoua ʻaupito te tau fakamaʻamaʻaʻi ʻa e maama fakalaumālie ko ʻení!