Fakaʻapaʻapa ki he Tuʻunga Mafaí—Ko e Hā ʻOku Fiemaʻu aí?

KO HAI ia ʻoku ʻikai ke houngaʻia ʻi hono maʻu ʻe he kau polisí ʻa e tuʻunga mafai ke puke ʻa e kau faihia ko ia ʻoku nau kaihaʻasi ʻetau ngaahi koloá pe fakamanamanaʻi hotau fāmilí? Pea ʻikai ʻoku tau houngaʻia ʻi hono maʻu ʻe he ngaahi fakamaauʻangá ʻa e tuʻunga mafai ke tauteaʻi ʻa e kau faihiá koeʻuhi ke maluʻi ʻa e feituʻú?

Ko e ngaahi ngāue tokoni fakapuleʻanga kehé, hangē ko hono tokangaʻi ʻa e halá, tauhi ʻo e tuʻunga maʻá, mo e akó​—ʻoku faʻa totongi ia ʻaki ʻa e ngaahi tukuhau ʻoku tānaki ʻe he tuʻunga mafai fakapuleʻangá​—te tau toe fakakaukau nai ki ai. ʻOku ʻi ha tuʻunga muʻomuʻa ʻa e kau Kalisitiane moʻoní ʻi hono ʻiloʻi ko e fakaʻapaʻapa ki he tuʻunga mafai kuo fakanofó ʻi he tuʻunga totonú ʻoku fiemaʻu ia. Ka ko e hā hono lahi ʻoku fiemaʻu ki he fakaʻapaʻapa peheé? Pea ko e hā ʻa e ngaahi tafaʻaki ʻi he moʻuí ʻoku fiemaʻu ki ai ʻa e fakaʻapaʻapa ki he tuʻunga mafaí?

Tuʻunga Mafai ʻi he Feituʻú

ʻOku tala ʻe he Tohitapú ki he kakai kotoa pē, tatau ai pē pe ko e kau tui pe ko e kau taʻetui, ke nau fakaʻapaʻapa ki he tuʻunga mafai fakapuleʻangá, ʻa ia ʻoku ngāue ki he lelei ʻa e feituʻú. Naʻe tohi ʻa e ʻapositolo Kalisitiane ko Paulá ki hono kaungātui ʻi Lomá fekauʻaki mo e meʻá ni, pea ʻoku tokoni lahi ke fakakaukau ki he meʻa ʻokú ne leaʻakí, hangē ko ia ʻoku lēkooti ʻi he Loma 13:​1-7.

Ko Paulá ko ha tangataʻifonua Loma, pea ko Loma ʻa e hau ʻo e māmaní ʻi he taimi ko iá. Ko e tohi ʻa Paulá, naʻe hiki ia ʻi he taʻu 56 T.S. nai, naʻe faleʻi ai ki he kau Kalisitiané ke nau hoko ko e kau tangataʻifonua alafaʻifaʻitakiʻanga. Naʻá ne tohi: “Ke anganofo ʻa e tangata kotoa pe ki he ngaahi pule ʻoku maʻolunga: he ʻoku ʻikai ha pule [“tuʻunga mafai,” NW], ka ʻoku mei he ʻOtua pe; pea ko e ngaahi pule ʻoku ʻi ai ni ko e fokotuʻu ʻe he ʻOtua.”

ʻOku fakamatalaʻi heni ʻe Paula naʻe ʻikai mei ʻi ai ha tuʻunga mafai fakaetangata kapau naʻe ʻikai fakaʻatā ia ʻe he ʻOtuá. ʻI he ʻuhinga ko iá ko e ngaahi tuʻunga mafai māʻolungá ʻoku nau maʻu ha tuʻunga felāveʻiʻaki ʻi loto ʻi he faʻunga tefito ʻo e taumuʻa ʻa e ʻOtuá. Ko ia ʻoku hoko atu ai “ʻilonga ʻa ia ʻoku angatuʻu ki he [tuʻunga mafaí], ko ʻene tuʻu ia ki he tuʻutuʻuni ʻa e ʻOtua.”

Lolotonga ʻoku maʻu nai ʻe he kau tangataʻifonua ko ia ʻoku faileleí ʻa e fakahīkihiki mei he ngaahi tuʻunga mafai māʻolungá, ko e ngaahi tuʻunga mafai ko ení ʻoku toe fakamafaiʻi kinautolu ke nau fakahoko ʻa e tautea ki he kau faihalá. Ko e faʻahinga ko ia ʻoku nau fai ʻa e meʻa ʻoku koví ʻoku ʻi ai ʻa e ʻuhinga feʻunga ke nau manavahē ai ki he totonu ʻa e ngaahi tuʻunga mafaí ke nau ngāue ko ha “tokotaha fakahoko tauteá,” koeʻuhi ʻoku fai ia ʻe he ngaahi founga-pulé ʻi he tuʻunga ko e “sevaniti ia ʻa e ʻOtua.”

ʻOku fakaʻosiʻaki ʻe Paula ʻa ʻene fakaʻuhingá ʻaki ʻene pehē: “Ko ia kuo pau ke mou anganofo, ʻo ʻikai telia ʻa e houhau pe, kae telia ʻa konisenisi foki. Seuke, ko hono ʻuhinga foki ia ʻoku mou tukuhau ai: he ko e kau fai ʻo e ngaue tapu ʻa e ʻOtua ʻa kinautolu, pea ʻoku nau nofo pe ki he meʻa ko ia.”

Ko e fatongia ki hono tuku mai ʻa e ngaahi tukuhaú ʻoku ʻi he ngaahi tuʻunga mafai māʻolungá ia, ʻo ʻikai ʻi he tokotaha totongi tukuhaú. ʻI he tuʻunga ko ha tangataʻifonua faitotonú, ʻoku tauhi maʻu ʻe ha Kalisitiane ha konisēnisi lelei. ʻOkú ne ʻiloʻi ko ʻene anganofo ʻa ia tonu ki he ngaahi tuʻunga mafai māʻolungá pea mo e totongi ʻa e ngaahi tukuhau ʻokú ne moʻuaʻakí, ʻoku ʻikai ngata pē ʻi heʻene poupou ai ki he tuʻunga ʻo e feituʻu ko ia ʻokú ne nofo aí ka ʻokú ne toe moʻui ai ʻo fehoanaki mo e ngaahi fiemaʻu fakaʻotuá.

Ko e Fāmilí mo e Tuʻunga Mafaí

Fēfē ʻa e tuʻunga mafai ʻi he fāmilí? ʻI he muʻaki ngaahi ʻaho ʻo ʻene moʻuí, ʻe faʻa fiemaʻu ai ʻe ha pēpē ʻa e tokangá ʻaki ʻa ʻene tangi pe naʻa mo haʻane kekē. Ka ko ha mātuʻa fakapotopoto te ne ʻiloʻilo ki he ngaahi fiemaʻu moʻoni ʻa e pēpeé pea ʻikai tuku ke fakaaoao ha ʻita tōlili. Ko e fānau ʻe niʻihi, ʻi heʻenau tupu hake ʻo taʻumotuʻa angé, ʻoku foaki ai kiate kinautolu ʻa e tauʻatāina ke fai ha meʻa, pea ʻoku fakaʻatā ke nau fokotuʻu ʻenau ngaahi tuʻunga pē ʻanautolu. ʻI he ʻikai ha taukeí, te nau hoko nai ʻo kau ʻi ha faihia pe ko ha faihala kehe, ʻo veuki fakatouʻosi ai ʻa e fāmilí mo e feituʻú fakalūkufua, hangē ko ia ʻoku lāuʻilo lelei ki ai ʻa e ngaahi tuʻunga mafai fakalotofonua lahi.

“ʻOku tōmui ʻa e akonakiʻi ʻe he ngaahi mātuʻá ʻa e fānaú,” ko e lau ia ʻa Rosalind Miles, ko e faʻu-tohi ʻo e Children We Deserve. “Ko e taimi ke kamata aí ko e mōmeniti pē ko ia ʻoku fanauʻi mai ai ha kiʻi tamá.” Kapau ʻoku lea ʻi he kamatá ʻa e ngaahi mātuʻá ʻaki ʻa e leʻo ʻo e tuʻunga mafai anga-ʻofa, mo tokanga pea huʻufataha ʻi heʻenau ngaahi tōʻongá, ʻe vave ai ʻa e ako ʻa e fānaú ke tali ʻa e tuʻunga mafai ko iá pea mo e akonaki ʻofa ko ia ʻoku tupu mei aí.

ʻOku ʻi he Tohitapú ha fakamatala lahi ʻaupito fekauʻaki mo e tuʻunga mafai ʻi he fāmilí. ʻI he tohi ʻa Palovepí, ʻoku tohoaki ai ʻe he tangata poto ko Solomoné ʻa e tokangá ki he fāʻūtaha ʻa e ngaahi mātuʻa manavahē-ʻOtuá ʻi he vakai mai ʻa e fānaú, ʻi heʻene pehē: “Tama, fanongo ki he akonaki ʻa hoʻo tamai, pea ʻouae hiki mei he ngaahi tala ʻa hoʻo faʻe.” (Palovepi 1:8 [Lea Fakatātā, PM]) ʻI he taimi ʻoku tauhi maʻu ai ʻe he ngaahi mātuʻá ʻa e tuʻu fāʻūtaha lelei pehē ʻi he vakai mai ʻenau fānaú, ʻoku ʻiloʻi ai ʻe he fānaú ʻa e meʻa ʻoku ʻamanekina mai ke nau faí. Te nau feinga nai ke ngāueʻaki ha taha ʻo e ongo mātuʻá ke fakafepaki ki he tokotaha ko eé ʻi ha feinga ke tuʻu ʻenau fakakaukaú tonu, ka ko e tuʻunga mafai fāʻūtaha fakaemātuʻá ko ha maluʻi ia ki he fānau īkí.

ʻOku fakamatalaʻi ʻe he Tohitapú ʻoku maʻu ʻe he husepānití ʻa e fatongia tefito ki he lelei fakalaumālie ʻo ʻikai ki heʻene fānaú pē kae toe pehē foki ki hono uaifí. ʻOku fakamatalaʻi eni ko e tuʻunga-ʻulu. ʻOku totonu ke ngāueʻi fēfē ʻa e tuʻunga-ʻulu ko ení? ʻOku fakahaaʻi ʻe Paula ʻo pehē hangē ko e ʻUlu ʻa Kalaisi ki he fakatahaʻangá ʻoku pehē ʻa e hoko ʻa e tangatá ko e ʻulu ki hono uaifí. ʻOku toe tānaki mai leva ʻe Paula: “ʻA e kau tangata, mou ʻofa ki homou ngaahi uaifi, ʻo hange foki ko Kalaisi ne ne ofaʻi ʻa e Siasi [ʻa ʻene taʻahine mali fakalaumālié], ʻo ne liʻoa ʻa ʻEne ʻAfio koeʻuhi ko ia.” (Efeso 5:25) ʻI he taimi ʻoku muimui ai ha tangata ki he faʻifaʻitakiʻanga ʻa Sīsuú pea ngāueʻi ʻa e tuʻunga-ʻulú ʻi ha founga ʻofá, te ne maʻu ai ʻa e “fakaʻapaʻapa” ʻa hono uaifí. (Efeso 5:33) Ko e fānau ʻoku nau ʻi ha fāmili peheé te nau toe sio ai ki he mahuʻinga ʻo e tuʻunga mafai kuo foaki ʻe he ʻOtuá pea nau loto-toʻa ai ke tali ia.​—Efeso 6:​1-3.

ʻE lava fēfē ki he ngaahi mātuʻa taʻemalí, ʻo kau ai ʻa e faʻahinga ko ia kuo mole honau hoá ʻi he maté, ke fekuki mo e ʻīsiu ko ení? Tatau ai pē pe ko e tamai pe ko e faʻē, ʻe lava ke nau kole fakahangatonu ki he tuʻunga mafai ʻo Sihova ko e ʻOtuá pea mo Sīsū Kalaisi. Naʻe lea maʻu pē ʻa Sīsū ʻaki ʻa e tuʻunga mafai​—ko ia ʻo ʻene Tamaí pea mo ia ʻi he ngaahi Konga Tohitapu fakamānavaʻí.​—Mātiu 4:​1-​10; 7:​29; Sione 5:​19, 30; 8:​28.

ʻOku tokonaki mai ʻe he Tohitapú ha ngaahi tefitoʻi moʻoni mahuʻinga lahi ʻo felāveʻi mo e ngaahi palopalema ʻoku fehangahangai mo e fānaú. ʻI hono fokotuʻu ʻa e ngaahi tefitoʻi moʻoni ko ení pea muimui kiate kinautolú, ʻe malava ai ha mātuʻa ke ne tokonaki ʻa e akonaki ʻofa mo ʻaonga ki he fānaú. (Senesi 6:​22; Palovepi 13:20; Mātiu 6:​33; 1 Kolinito 15:33; Filipai 4:​8, 9) ʻOku toe lava ke fakakaukau ʻa e ngaahi mātuʻá ki he fakamatala makatuʻunga ʻi he Tohitapú kuo faʻufaʻu tefito ke tokoniʻi kinautolu ke akoʻi ʻenau fānaú ke nau houngaʻia ʻi he ngaahi ʻaonga ʻo e fakaʻapaʻapa ki he tuʻunga mafai ʻo e ngaahi Konga Tohitapú.a

Ko e Fakatahaʻanga Kalisitiané mo e Tuʻunga Mafaí

“Ko hoku ʻAlo Pele ʻena, ʻa ia kuo u hōifua ai; mou fakaongo kiate ia.” (Mātiu 17:5) Ko e ngaahi leá ni, naʻe folofolaʻaki ia ʻe Sihova ko e ʻOtuá tonu, ʻo fakamoʻoniʻi ai ʻa Sīsū ko ha tokotaha ʻokú ne leaʻaki ʻa e tuʻunga mafai fakaʻotuá. Ko e meʻa naʻá ne leaʻakí ʻoku lēkooti ia ʻi he ngaahi fakamatala Kōsipeli ʻe faá ʻa ia ʻe lavangofua ke tau lave ki ai.

Ki muʻa pē ʻi heʻene hāʻele hake ki hēvaní, naʻe fakahinohino ʻe Sīsū ki heʻene kau ākongá: “Kuo tuku kiate au ʻa e pule kotoa pe ʻi langi pea ki mamani.” (Mātiu 28:18) ʻI hono tuʻunga ko e ʻUlu ʻo e fakatahaʻangá, naʻe ʻikai ngata pē ʻi hono hanganaki siofi tokanga ʻe Sīsū ʻa e ʻalunga ʻo hono kau muimui paní ʻi he māmaní, kae talu mei hono huaʻi hifo ʻa e laumālie māʻoniʻoní ʻi he Penitekosi ʻo e 33 T.S., mo ʻene toe ngāueʻaki kinautolu ko ha fouʻanga ia ʻo e moʻoní, ʻi he tuʻunga ko ha “tamaioeiki agatonu mo boto.” (Mātiu 24:​45-47, PM; Ngāue 2:​1-​36) Ko e hā kuó ne fai ke fakahoko kotoa ʻaki ʻa e meʻá ni koeʻuhi ke fakaivimālohiʻi ai ʻa e fakatahaʻanga Kalisitiané? “ʻI heʻene haʻele hake ki ʻolungá . . . , naʻá ne foaki ʻa e ngaahi meʻaʻofa ʻi he kau tangata.” (Efeso 4:​8, NW) Ko e “ngaahi meʻaʻofa ʻi he kau tangata” ko ení ko e kau mātuʻa Kalisitiane, ʻa ia kuo fakanofo ʻe he laumālie māʻoniʻoní pea kuo foaki kiate kinautolu ʻa e tuʻunga mafai ke nau tokangaʻi ʻa e ngaahi meʻa fakalaumālie ʻa e kaungātuí.​—Ngāue 20:28.

ʻI he ʻuhingá ni ʻoku akonaki ai ʻa Paula: “Fakamanatu hake ki he kakai naʻe takimuʻa kiate kimoutolu, ʻa e faʻahinga naʻe tala kiate kimoutolu ʻa e folofola ʻa e ʻOtua: pea mou fakatokangaʻi ʻa e ikuʻanga o ʻenau moʻui, ʻo faʻifaʻitaki ki heʻenau tui.” Koeʻuhi ʻoku muimui ofi ʻa e kau tangata anga-tonu ko ení ki he topuvaʻe ʻo Sīsuú, ko e ʻalunga moʻoni ia ʻo e potó ke faʻifaʻitaki ki heʻenau tuí. ʻOku toe tānaki mai leva ʻe Paula: “Mou tuitala ki he kau tuʻukimuʻa ʻomoutolu, pea fakavaivai kiate kinautolu [“hokohoko atu ʻi he ʻiloʻi honau tuʻunga mafai kiate kimoutolú,” The Amplified Bible], he ko kinautolu ia ʻoku nau ʻā ke leʻohi homou laumalie, he ko kinautolu te nau fakamatala kimoutolu ʻamui; koeʻuhiā ke nau fai fiefia ʻenau ngaue ko ia, ʻo ʻikai fai mo e toʻe: he ʻe taeʻaonga ia kiate kimoutolu.”​—Hepelu 13:​7, 17.

Ko e hā ʻoku hoko ʻi he taimi ʻoku liʻaki ai ʻa e fakahinohino peheé? Naʻe fai ʻe he kau mēmipa ʻe niʻihi ʻo e muʻaki fakatahaʻanga Kalisitiané ʻa e meʻa tofu pē ko iá pea nau hoko ai ko e kau tafoki mei he moʻoní. Ko ʻAiminia mo Failito ʻoku lave ki ai ko e ongo tangata naʻá na mioʻi ʻa e tui ʻa e niʻihi, pea ko ʻena lau taʻemoʻoní naʻe ‘maumauʻi ai ʻa e meʻa naʻe māʻoniʻoní.’ Ko e taha ʻo ʻena ngaahi laú naʻe pehē ai kuo ʻosi fai ʻa e toetuʻú, ʻo hā mahino ia ʻi ha tuʻunga fakalaumālie pe fakaefakatātā, pea ko ia ʻoku ʻikai ha toe toetuʻu ʻe taha ʻi he kahaʻú ʻi he malumalu ʻo e Puleʻanga ʻo e ʻOtuá.​—2 Timote 2:​16-​18, NW.

Naʻe hoko mai ai ʻa e tuʻunga mafai kuo fakanofó ki ha faifakahaofi. Naʻe malava ʻa e kau mātuʻa Kalisitiané ke fakahalaʻi ʻa e ngaahi fakakikihi peheé koeʻuhi ʻi honau tuʻunga ko e kau fakafofonga ʻo Sīsū Kalaisí, naʻa nau ngāueʻaki ʻa e tuʻunga mafai ʻo e Konga Tohitapú. (2 Timote 3:​16, 17) ʻOku hoko moʻoni ʻa e meʻa tatau ʻi he ʻahó ni ʻi he fakatahaʻanga Kalisitiané, ʻa ia ʻoku fakamatalaʻi ko e “pou mo e tuʻunga ʻo e Moʻoni.” (1 Timote 3:15) ʻE ʻikai ʻaupito ke fakaʻatā ʻa e ngaahi akonaki loí ke ne maumauʻi ʻa e “sīpinga ʻo e ngaahi lea lelei,” naʻe fakatolonga mai maʻatautolu ko ha ʻamanaki lelei ʻi he ngaahi peesi ʻo e Tohitapú.​—2 Timote 1:​13, 14, NW.

Lolotonga ʻoku mole vave atu ʻa e fakaʻapaʻapa ki he tuʻunga mafaí ʻi he māmaní, ʻi he tuʻunga ko e kau Kalisitiané ʻoku tau ʻiloʻi ko e ngaahi tuʻunga mafai totonu ʻi he feituʻú, ʻi he fāmilí, pea ʻi he fakatahaʻanga Kalisitiané ʻoku fokotuʻu ia ki he lelei maʻatautolu. Ko e fakaʻapaʻapa ki he tuʻunga mafaí ʻoku fiemaʻu ia ki heʻetau moʻui lelei fakaesinó, fakaeongó, mo e fakalaumālié. ʻI hono tali mo fakaʻapaʻapaʻi ʻa e tuʻunga mafai pehē kuo foaki ʻe he ʻOtuá, ʻe maluʻi ai kitautolu ʻe he ongo tuʻunga mafai lahi tahá​—ko Sihova ko e ʻOtuá mo Sīsū Kalaisi—ki heʻetau lelei taʻengatá.​—Sāme 119:165; Hepelu 12:9.

[Fakamatala ʻi lalo]

[Fakamatala ʻi he peesi 5]

ʻOku ʻi he Tohitapú ha fakamatala lahi ʻaupito fekauʻaki mo e tuʻunga mafai ʻi he fāmilí

[Fakatātā ʻi he peesi 6]

ʻOku lava ke kole fakahangatonu ʻa e ngaahi mātuʻa taʻemalí ki he tuʻunga mafai ʻo Sihova ko e ʻOtuá mo Sīsū Kalaisí

[Fakatātā ʻi he peesi 7]

ʻOku ʻiloʻi ʻe he kau Kalisitiané ko e ngaahi tuʻunga mafai totonu ko ia ʻi he fāmilí, ʻi he fakatahaʻanga Kalisitiané, pea ʻi he feituʻú ʻoku fokotuʻu ia ki he lelei ʻanautolú

[Maʻuʻanga ʻo e tā ʻi he peesi 4]

Faitā ʻe Josh Mathes, Collection of the Supreme Court of the United States