ʻOku Totonu Ke Ke Fakafiefiemālie?

KO E tokolahi taha ʻo e kakaí te nau ongoʻi nai ko ha meʻa ia ke fakamālōʻia ʻa e vakai ki ha taha ko ha tokotaha fakafiefiemālie, ko ha taha nonga, taʻehohaʻa, mo natula kātaki. Kae kehe, ʻoku toe ʻi ai ʻa e tafaʻaki ʻe taha ʻo e fakafiefiemālié. ʻOku pehē ʻe he Tohitapú: “E auha ae vale i he e nau fakafie[fie]malie.” (Palovepi 1:​32, PM) ʻOku ʻuhinga ia ki he hā?

ʻOku fakalea ʻe he ngaahi liliu Tohitapu kehé ʻa e muʻaki foʻi lea faka-Hepeluú ʻaki ʻa e ngaahi kupuʻi lea hangē ko e “fakafiemālie taʻetokanga” (American Standard Version), “loto-nonga siokita” (The New American Bible), mo e “taʻehohaʻa.” (The New English Bible) ʻI he ʻuhinga ko ení, ko e fakafiefiemālié ʻoku fakafehokotaki ia ki he fakapikopikó mo e taʻetokangá ʻo hangē ia ko e fakaseselé pe ko e fakavalevalé.

ʻI he ʻuluaki senitulí, ko e kau Kalisitiane ʻi he fakatahaʻanga ʻi Leotisiá naʻa nau taʻeʻilo taʻetokanga pe taʻehohaʻa fekauʻaki mo ʻenau ngaahi taʻefeʻunga fakalaumālié. Naʻa nau pōlepole ʻi he loto-nonga siokita ko kinautolú “[naʻe] ʻikai [haʻanau] masiva.” Naʻe fakatonutonuʻi kinautolu ʻe Sīsū Kalaisi, ʻo ne fiemaʻu ha fakafoʻou ʻo ʻenau faivelenga faka-Kalisitiané.​—Fakahā 3:​14-​19.

Ko e fakafiefiemālie taʻehohaʻá naʻe toe angaʻaki foki ia ʻe he kakai ʻi he ʻaho ʻo Noá. Naʻa nau nōfoʻi ʻi he ngaahi meʻa anga-maheni ʻi he moʻuí, “ʻo nau kai mo inu, ʻo nau maʻu uaifi mo maʻu husepaniti . . . , pea naʻe ʻikai te nau ʻaloʻiloa kaeʻoua ke hoko mai ʻa e Lomaki, ʻo ʻave kinautolu fulipe.” Naʻe toe tānaki mai ʻe Sīsū: “ʻE pehe foki ʻa e hoko mai [‘‘ʻi ai,” NW] ʻa e Fanautama ʻa Tangata.”—Mātiu 24:​37-39.

Ko e ngaahi kikite faka-Tohitapu kuo fakahokó ʻoku fakahaaʻi ai ʻoku tau moʻui ʻi he lolotonga ʻa e “ʻi ai ʻa e Fanautama ʻa Tangata,” ʻa Sīsū Kalaisi. ʻOfa ke ʻoua ʻaupito te tau hoko ʻo taʻehohaʻa, taʻetokanga mo loto-nonga siokita—ʻo fakafiefiemālie ʻi ha ʻuhinga hala.—Luke 21:​29-36.