Tūtuuʻi ʻa e Māʻoniʻoní, Utu ʻa e ʻAloʻofa ʻa e ʻOtuá

“ʻE KOVI​—ka ko ha kovi​—ʻa ia ʻoku hoko ko e talifaki maʻa ha kehe: ka ko ia ʻoku fehiʻa ki he ʻatu nima [“lulululú,” NW], ʻoku nofo nonga.” (Palovepi 11:15) He fakamoʻoniʻi moʻoni ē ʻe he palōveepi nounou ko ení ʻa e kaunga ki ha meʻa naʻe fai! Kaungā fakamoʻoni ki ha nō ʻa ha taha nō ngali fakatuʻutāmaki pea ʻe ngalingali ʻomai ai ʻa e palopalema. Fakaʻehiʻehi mei he lulululú​—ko ha fakaʻilonga ia naʻe hoko ko ha fakamoʻoni ki ha aleapau ʻi ʻIsileli ʻo e kuonga muʻá—pea ʻatā ai pē mei he fihia ʻi he meʻa fakapaʻangá.

ʻOku hā mahino, ko e tefitoʻi moʻoni eni ʻoku ngāueʻaki hení: “ʻIlonga pe meʻa ʻoku to ʻe ha tangata, ko ia ia te ne utu foki.” (Kaletia 6:7) “Tūtūʻi kiate kimoutolu i he agatonu [“māʻoniʻoni,” NW],” ko e lau ia ʻa e palōfita ko Hōseá, “utu i he aloofa.” (Hosea 10:​12, PM) ʻIo, tūtuuʻi ʻa e māʻoniʻoní ʻaki hono fai ʻa e ngaahi meʻá ʻi he founga ʻa e ʻOtuá, pea utu ʻa ʻene ʻaloʻofá. ʻI hono toutou ngāueʻaki ʻa e tefitoʻi moʻoni ko ení, naʻe fakalotolahiʻi mālohi ai ʻe Tuʻi Solomone ʻo ʻIsilelí ʻa e ngāue totonú, lea hangatonú, pea mo ha tōʻonga totonu. ʻI hono sivisiviʻi ofi ʻa ʻene ngaahi lea ʻo e potó ʻe fakalotolahiʻi moʻoni ai kitautolu ke tūtuuʻi maʻatautolu ʻa e tenga ʻi he māʻoniʻoní.​—Palovepi 11:​15-​31.

Tūtuuʻi ʻa e “Lelei,” Utu ʻa e “Ogoogolelei”

“Oku mau i he fefine [lelei] ae ogoogolelei,” ko e lau ia ʻa e tuʻi potó, “bea oku mau be ki he kakai malohi [“pule kakahá,” NW] e nau koloa.” (Palovepi 11:​16, PM) ʻOku ʻomai ʻe he vēsí ni ha faikehekehe ʻi he vahaʻa ʻo e ongoongo-lelei tuʻuloa ʻa ia ʻe lava ke maʻu ʻe he fefine leleí, “ko ha fefine anga-ʻofa,” pea mo e koloa fakataimi ʻoku maʻu ʻe ha tokotaha pule kakaha.​—An American Translation.

ʻE anga-fēfē nai hano maʻu ʻe ha taha ʻa e tuʻunga lelei ʻoku iku ki he ongoongo-leleí? “Tauhi ke mau ae boto mooni moe iloilo,” ko e akonaki ia ʻa Solomoné, “Bea e hoko ai ia koe . . . teuga lelei ki ho kia.” (Palovepi 3:​21, 22, PM) Pea naʻe lea ʻa e tokotaha-tohi-sāmé fekauʻaki mo hono ‘lilingi ʻa e meʻa lelei ki he loungutu ʻo ha tuʻi.’ (Sāme 45:​1, 2, NW) ʻIo, ko e poto moʻoní, ʻiloʻiló, mo e ngāueʻaki totonu ʻa e ʻeleló ʻoku fakalahi ai ʻa e mahuʻinga mo e lelei ʻo ha taha. ʻOku moʻoni papau ia ʻi ha fefine fakapotopoto. Ko ʻApikale, ʻa e uaifi ʻo Nāpale valé, ko e fakatātā ia ʻe taha. Naʻe “loto matala ia, pea hoihoifua,” pea naʻe fakahīkihikiʻi ia ʻe Tuʻi Tēvita ʻi heʻene “fai fakapotopoto.”​—1 Samiuela 25:​3, 33.

Ko ha fefine anga-fakaʻotua ʻa ia ʻokú ne ʻi he tuʻunga lelei moʻoní te ne maʻu papau ha ongoongo-lelei. ʻE talanoa lelei ki ai ʻa e niʻihi kehé. Kapau ʻokú ne mali, te ne maʻu maʻana ʻa e ongoongo-lelei ʻi he vakai mai ʻa hono husepānití. Ko hono moʻoní, te ne ʻomai ʻa e ongoongo-lelei ki he fāmilí kotoa. Pea ko hoʻoná ongoongo-lelei ʻoku ʻikai fakataimi pē. “Oku lelei hake ae fili ki he higoa oku ogolelei i he fili ki he koloa lahi, bea lelei hake ke ofeina i he maʻu ae siliva moe koula.” (Palovepi 22:​1, PM) Ko e hingoa lelei ʻokú ne ʻai ki he ʻOtuá ʻoku mahuʻinga tuʻuloa.

Ko e tuʻungá ʻoku fehangahangai ia mo ha tokotaha pule kakaha, ‘ko ha tangata anga-fītaʻa.’ (Palovepi 11:​16, New International Version) Ko ha tokotaha pule kakaha ʻoku fakakalasi fakataha ia mo e kau tangata fulikivanú mo e faʻahinga ʻa ia ko e ngaahi fili ʻo e kau lotu ʻa Sihová. (Siope 6:​23; 27:13) Ko ha tangata pehē ‘oku ikai te ne fokotuu ae Otuá i hono aó.’ (Sāme 54:​3, PM) ʻI hono fakavaivaiʻi mo ngāue siokita ʻaki ʻa e faʻahinga tonuhiá, ko ha tokotaha pehē te ne lava ke “fokotuʻu noa ʻa e siliva hange ko e efu.” (Siope 27:16) Neongo ia, ʻi ha tuʻunga ʻi he faai mai ʻa e taimí, te ne tokoto nai ai ʻo ʻikai mālanga hake, pea te ne ʻā hake ʻi ha ʻaho te ne mate nai ai. (Siope 27:19) Ko e kotoa ʻo ʻene koloá mo e lavameʻá ʻe iku nai ki he launoa.​—Luke 12:​16-​21.

Ko ha lēsoni mahuʻinga moʻoni ia ʻoku akoʻi mai ʻe he Palovepi 11:16! ʻI hono fokotuʻutuʻu nounou mai kia kitautolu ʻa e meʻa ʻe utu taki taha ʻe he leleí mo e pule kakahá, ʻoku fakaʻaiʻai ai kitautolu ʻe he tuʻi ʻo ʻIsilelí ke tūtuuʻi ʻa e māʻoniʻoní.

ʻOmai ʻe he “Aloofa” ʻa e Ngaahi Pale

ʻI hono akoʻi ha toe lēsoni ʻe taha ʻi he ngaahi vā fakaetangatá, ʻoku pehē ʻe Solomone: “Ko e tangata [ʻalo]ʻofa ʻoku ʻaonga ʻene ʻofa kiate ia: ka ko e tangata fakamamahi ʻoku ʻasi ʻene fakamamahi ʻi hono kakano oʻona.” (Palovepi 11:17) “Ko e poini ʻo e palōvēpí,” ko e lau ia ʻa ha mataotao ʻe taha, “ko ʻete tōʻonga ki he niʻihi kehé, pe ʻoku lelei pe kovi, ʻoku ʻi ai hono ngaahi ola naʻe ʻikai fakataumuʻa ki ai pe taʻeʻamanekina kia kita.” Fakakaukau ki ha finemui ko hono hingoá ko Lisa.a Neongo ʻa ʻene taumuʻa leleí, ʻokú ne tōmui maʻu pē ki heʻene ngaahi ʻapoinimení. ʻOku ʻikai ngalikehe ʻa ʻene tōmui miniti ʻe 30 pe lōloa ange ai ki heʻene ngaahi fokotuʻutuʻu ke fetaulaki mo e kau fanongonongo kehe ʻo e Puleʻangá ki he ngāue fakamalangá. ʻOku ʻikai tōʻongafai ʻa Lisa ke ne maʻu ai ha ʻaonga. ʻE lava ke ne tukuakiʻi ʻa e niʻihi kehé kapau te nau taʻefaʻakātaki ʻi hono fakamoleki ʻa e taimi mahuʻingá pea fakaʻehiʻehi ai mei hono toe fai ha ngaahi ʻapoinimeni mo ia?

Ko ha tokotaha tui ki he anga-fakahaohaoá​—ha tokotaha ʻokú ne fokotuʻu ʻa e ngaahi tuʻunga māʻolunga ʻaupito ki he lavameʻá​—ʻoku toe anga-fakamamahi ia kiate ia pē. ʻOku feinga taʻehela maʻu pē ke ne aʻusia ha ngaahi taumuʻa ʻe ʻikai ala maʻu, ʻokú ne ʻai ia ki ha tuʻunga ʻe iku ongosia ai mo siva ʻene ʻamanakí. ʻI he tafaʻaki ʻe tahá, ʻoku tau fakafiemālieʻi kitautolu ʻi he taimi ʻoku tau fokotuʻu ai ha ngaahi taumuʻa moʻoni mo ʻuhinga leleí. Mahalo pē ʻoku ʻikai te tau mahinoʻi vave ʻa e ngaahi meʻá ʻo hangē ko e niʻihi kehé. Pe kuo hilifaki mai nai ʻe he mahamahakí pe ko e taʻumotuʻá ha ngaahi fakangatangata kia kitautolu. ʻOua ʻaupito te tau hoko ʻo foʻi ʻi heʻetau fakalakalaka fakalaumālié, kae hokohoko atu maʻu pē ke fakahāhā ʻa e fakaʻatuʻi ʻi heʻetau fehangahangai mo hotau ngaahi ngataʻangá. He fiefia ē ko kitautolu ʻi heʻetau ‘fai ʻetau lelei tahá’ ʻo fakatatau ki heʻetau ngaahi malavá.​—2 Timote 2:​15; Filipai 4:5.

Ko hono fakamatalaʻi fakaikiiki lahi ange ʻa e founga ʻo e maʻu ʻaonga ʻa ha tokotaha māʻoniʻoní lolotonga ia ʻoku mamahi ʻa e tokotaha anga-fakamamahí, ʻoku pehē ʻe he tuʻi potó: “Oku fai e he agahala ae gaue fakakākāʻi: ka e maʻu ae totogi mooni eia oku tutuʻi ae maonioni. O hage oku fakatau ae maonioni ki he moui: oku behe, koia oku tulituli bau ki he kovi oku ne fai ia ke ne mate ai ia. Ko kinautolu oku loto bikobiko oku fakalielia kia Jihova: ka oku fiemalie ia iate kinautolu oku totonu ho nau hala. Ne ogo ae febukeaki ae nima oe kakai agahala e ikai tae tautea akinautolu: ka e fakamoui ae hako oe maonioni.”​—Palovepi 11:​18-21, PM.

ʻI he ngaahi founga kehekehe ʻoku fakamamafaʻi ai ʻe he ngaahi vēsí ni ʻa e poini tefito ko ení: Tūtuuʻi ʻa e māʻoniʻoní pea utu ʻa hono palé. ʻE hanga nai ʻa e angahalá ki he kākaá pe ko e pele paʻangá koeʻuhi ke maʻu taʻetotongi ai ha meʻa. Koeʻuhi ko e ngaahi totongi peheé ʻoku hala, ʻe siva nai ʻa ʻene ʻamanakí. Ko e tokotaha ʻoku ngāue faitotonú ʻokú ne ʻomai ʻa e totongi moʻoni ʻa ia ko ʻene maʻu ʻa e maluʻanga. ʻI hono maʻu ʻa e hōifua ʻa e ʻOtuá, ko e tokotaha faitotonú ʻokú ne maʻu ai ʻa e ʻamanaki ki he moʻuí. Ka ʻe fēfē ha tokotaha kovi? “Ne ogo ae febukeaki ae nima” ʻi he faʻufaʻu lavakí, ʻe ʻikai hao ʻa e angahalá mei he tauteá. (Palovepi 2:​21, 22) Ko ha enginaki lelei moʻoni ē ke tūtuuʻi ʻa e māʻoniʻoní!

Fakaʻofoʻofa Moʻoni ki he Tokotaha Anga-Fakapotopotó

“Hage koe mama koula i he ihu oe buaka, oku behe ae fefine hoihoifua oku ikai ke aga fakabotoboto,” ko e hoko atu ia ʻa Solomoné. (Palovepi 11:​22, PM) Ko e ngaahi mama ʻi he ihú ko ha teuteu manakoa ia lolotonga ʻa e taimi ʻo e Tohitapú. Ko ha foʻi mama koula ki he ihú ʻoku tuiʻi ʻi he tafaʻaki ihú pe vahaʻa ʻo e ongo avaʻi ihú ʻe hoko ia ko ha meʻa teuteu fakatokangaʻi ngofua ʻi ha fefine. He taʻefeʻungamālie moʻoni ē ko ha meʻa teuteu fakaʻofoʻofa pehē ke ʻi he ihu ʻo ha puaka! ʻOku tatau ia mo ha tokotaha fakaʻofoʻofa ʻi tuʻa ʻoku ʻikai ke “aga fakabotoboto.” ʻOku ʻikai moʻoni feʻunga ʻa e meʻa teuteú mo e tokotaha ko iá, tatau ai pē pe ko e fefine pe tangata. ʻOku taʻefeʻunga​—ʻo ʻikai ʻaupito fakamānako.

Ko ia ai, ʻoku fakanatula pē ke tokanga ki he anga ʻo ʻetau hā ki he niʻihi kehé. Ka ko e hā ke hohaʻa tōtuʻa ai pe taʻefiemālie ʻi hotau matá pe faʻunga fakaesinó? ʻOku ʻikai te tau puleʻi ʻa e ngaahi tafaʻaki lahi ʻo hotau faʻungá. Pea ʻoku ʻikai ko e meʻa mahuʻingá ʻa e fōtunga fakaesinó. ʻIkai ʻoku moʻoni ko e tokolahi taha ʻo e kakai ʻoku tau saiʻia mo leleiʻia aí ʻoku nau mātuʻaki hā anga-maheni pē? Ko e fakaʻofoʻofa fakaesinó ʻoku ʻikai ko e kī ia ki he fiefiá. Ko e meʻa moʻoni ʻoku laú ʻa e fakaʻofoʻofa ʻi loto ʻo e ngaahi ʻulungaanga fakaʻotua tuʻuloá. ʻOfa ke tau hoko leva ʻo anga-fakapotopoto pea fakatupulekina ʻa e ngaahi ʻulungaanga peheé.

“Ko e Loto Faʻa Tapuaki ʻe Ngaʻeke”

“Oku lelei mau be ae holi ae kakai maonioni,” ko e fakamatala ia ʻa Tuʻi Solomoné, “koe houhau oku amanaki ki ai ae agahala.” ʻI hono fakatātaaʻi ʻa e pehē ʻa e meʻá ni, ʻokú ne tānaki mai: “Oku ai aia oku faa foaki, kae maʻu ai o lahi: bea oku ai oku taofi i he mea oku totonu ke fai, ka oku tubu ai a ene majiva.”​—Palovepi 11:​23, 24, PM.

ʻI heʻetau faʻa foaki tōtōivi​—ʻi hono ʻoatu ki he niʻihi kehé​—ʻa e ʻiloʻi ʻo e Folofola ʻa e ʻOtuá, ʻoku tau fakaleleiʻi moʻoni ai ʻa ʻetau mahinoʻi ʻo hono “māukupu, mo hono loloa, mo hono maʻolunga, mo hono loloto.” (Efeso 3:18) ʻI he tafaʻaki ʻe tahá, ko e tokotaha ʻoku ʻikai te ne ngāueʻaki ʻa ʻene ʻiló, ʻokú ne ʻi he fakatuʻutāmaki ʻo e mole ʻa e meʻa ʻokú ne maʻú. ʻIo, “ko ia oku tūtūi fakajiijii, e utu fakajiijii foki; bea ko ia oku tūtūi lahi, e utu lahi foki.”​—2 Kolinito 9:​6, PM.

“Ko e loto faʻa tapuaki ʻe ngaʻeke [lakalakaimonū],” ko e hoko atu ia ʻa e tuʻí, “pea ko ia ʻoku fakaviviku ngoue kehe ʻe fakaviviku haʻana foki.” (Palovepi 11:25) ʻI heʻetau ngāueʻaki fiefoaki ʻa hotau taimí mo e koloá ke laka ki muʻa ʻa e lotu moʻoní, ʻoku mātuʻaki hōifua mai ai ʻa Sihova kia kitautolu. (Hepelu 13:​15, 16) Te ne ‘tangaki ʻa e ngaahi katupa ʻo e langí, ʻo vakili ʻa e tapuakí, kaeʻoua ke ʻikai hao.’ (Malakai 3:10) Vakai atu pē ki he lakalakaimonū fakalaumālie ʻa ʻene kau sevāniti ʻi he ʻaho ní!

Ko hono ʻomai ha toe fakatātā ʻe taha ʻo e ngaahi holi kehe ʻa e māʻoniʻoní pea mo e angahalá, ʻoku pehē ʻe Solomone: “Ko ia ʻoku ne taʻofi ʻa e mahoaʻa, ʻe kape ki ai ʻa e kakai: kae hili ʻa e tapuaki ki he ʻulu ʻo ia ʻoku ne fakatau atu.” (Palovepi 11:26) Ke fakatau ʻa e ngaahi koloá ʻi he taimi ʻoku māʻulalo ai ʻa e totongí pea tauhi ia kae ʻoua kuo siʻisiʻi ʻa e koloá pea mahiki hake ʻa e ngaahi totongí ʻe lava ke ʻaonga ia. Neongo ʻe iku nai ki ha lelei ʻi he fakangatangata ʻa hono ngāueʻakí mo hono tauhi maʻu ha meʻa talifakí, ʻoku fehiʻa fakalūkufua ʻa e kakaí ʻi ha tokotaha ʻokú ne fai ʻa e meʻá ni koeʻuhi ko ʻene siokitá. ʻI he tafaʻaki ʻe tahá, ko e tokotaha ʻoku fakaʻehiʻehi mei hono maʻu ha tupu lahi mei he tuʻunga fakavavevavé ʻokú ne maʻu ʻa e leleiʻia ʻa e kakaí.

ʻI hono fakalotolahiʻi kitautolu ke hokohoko atu ʻa e holi ki he meʻa ʻoku leleí, pe māʻoniʻoní, ʻoku pehē ʻe he tuʻi ʻo ʻIsilelí: “Ko ia ʻoku tutui ki he lelei te ne ʻeke pe ko e ha ʻa e manako: pea ko ia ʻoku kumi ki he kovi ʻe aʻu ia ki ai. Ko ia ʻoku falala ki heʻene koloa, ko ia ia ʻe to: ka ko e faitotonu ʻe talamuka hange ko e vaʻa.”​—Palovepi 11:​27, 28.

Ko e Tokotaha Māʻoniʻoní ʻOkú Ne Ikunaʻi ʻa e Ngaahi Soulú

ʻI hono fakatātaaʻi ʻa e anga ʻo e iku ʻa e tōʻonga fakavalevalé ki he ngaahi nunuʻa koví, ʻoku pehē ʻe Solomone: “Ko ia ʻoku ne fakamamahi hono fale oʻona, ko e ʻinasi te ne maʻu ko e matangi pe.” (Palovepi 11:29a) Ko e faihala ʻa ʻĀkaní ‘naʻe ʻomai ai ʻa e mamahi kiate ia,’ pea ko ia fakatouʻosi mo e ngaahi mēmipa ʻo hono fāmilí naʻe tolomakaʻi ki he mate. (Siosiua, vahe 7) ʻI he ʻahó ni, ko e ʻulu ʻo ha fāmili Kalisitiane pea mo e niʻihi kehe ʻi hono fāmilí te nau kau nai ʻi ha faihala ʻe iku ai ki honau tuʻusi mei he fakatahaʻanga Kalisitiané. ʻI he ʻikai malava fakafoʻituitui ke fai ki he ngaahi fekau ʻa e ʻOtuá pea ʻi hono fakangofua ʻa e faihala mafatukituki ʻi loto ʻi hono fāmilí, ʻoku ʻomai ai ʻe ha tangata ha mamahi ki hono fale ʻoʻoná. Ko ia pea mahalo mo e niʻihi kehe ʻi hono fāmilí ʻe taʻofi mei he feohi faka-Kalisitiané ʻi he tuʻunga ko e kau faihala taʻefakatomala. (1 Kolinito 5:​11-​13) Pea ko e hā te ne maʻú? Ko e matangi pē​—ko e meʻa ʻoku ʻikai moʻoni hano kakano pe mahuʻinga.

“Ko e vale ʻe tamaioʻeiki ki he loto poto,” ko e hoko atu ia ʻa e vēsí. (Palovepi 11:29e) Koeʻuhi ʻoku hala ha tokotaha vale ʻi ha poto ʻaonga, ʻe ʻikai lava ke ʻoange kiate ia ha fatongia lahi. ʻIkai ngata aí, ko ʻene fakalele ʻa ʻene ngaahi meʻa fakafoʻituituí ʻe fakatupunga nai ai ia ke ne hoko ʻo moʻua ki ha tokotaha ʻe taha ʻi ha founga. Ko ha tokotaha taʻefakapotopoto pehē te ne hoko lelei nai ai ko ha “tamaioʻeiki ki he loto poto.” ʻOku hā mahino leva, ʻoku mātuʻaki mahuʻinga ke tau ngāueʻaki ʻa e fakafuofua lelei mo e poto ʻaonga ʻi he kotoa ʻo ʻetau ngaahi feangaingá.

“Koe fua oe maonioni oku hage koe akau oe moui,” ko e fakapapauʻi mai ia ʻe he tuʻi potó kia kitautolú, “bea koia oku lavaʻi [“ikunaʻi,” NW] ae gaahi [“soulú,” NW] oku boto ia.” (Palovepi 11:​30, PM) ʻOku anga-fēfē ʻene hoko ení? Sai, ʻi heʻene leá mo e ʻulungāngá, ʻoku ʻoatu ai ʻe ha tokotaha māʻoniʻoni ʻa e meʻakai fakalaumālié ki he niʻihi kehé. ʻOku fakalotolahiʻi ai kinautolu ke nau tauhi kia Sihova pea ʻe iku nai ai ke maʻu ʻa e moʻui ʻoku ʻai ʻe he ʻOtuá ke ala maʻú.

‘E Maʻu Totogi Lahi Hake e he Agahalá’

He fakaʻaiʻai moʻoni ē ko kitautolu ʻe he ngaahi palōveepi naʻe lave ki ai ki muʻá ke tau tūtuuʻi ʻa e māʻoniʻoní! ʻI hono ngāueʻaki ʻi ha toe founga ʻe taha ʻa e tefitoʻi moʻoni “ʻilonga pe meʻa ʻoku to ʻe ha tangata, ko ia ia te ne utu foki,” ʻoku fakamatala ʻa Solomone: “Vakai, e maʻu totogi ae maonioni i he mamani: ka e lahi hake ene maʻu totogi e he agakovi moe agahala.”​—Palovepi 11:​31, PM.

Neongo ʻoku fai ʻe ha tokotaha māʻoniʻoni ʻa e feinga ke fai ʻa e meʻa ʻoku totonú, ʻokú ne faihala ʻi he taimi ʻe niʻihi. (Koheleti 7:​20) Pea ʻi heʻene ngaahi fehālaakí ʻe “totogi” ia ʻaki ʻene maʻu ʻa e akonaki. Ko ia ai, fēfē leva ʻa e tokotaha fulikivanu ʻokú ne fili ʻosi fakakaukauʻi ha ʻalunga kovi pea ʻikai fai ha feinga ke tafoki ki he ʻalunga ʻo e māʻoniʻoní? ʻIkai ʻokú ne tuha mo ha “totogi” lahi ange​—ko ha tautea mamafa? “Kapau ʻoku ʻikai ke meimei hao ʻa e maʻoniʻoni,” ko e tohi ia ʻa e ʻapositolo ko Pitá, “ʻe tuʻu ʻi fē ʻa e fakaʻotuamate mo e angahala?” (1 Pita 4:18) Ko ia ai, tau fakapapauʻi maʻu pē ke tūtuuʻi ha tenga maʻatautolu ʻi he māʻoniʻoní.

[Fakamatala ʻi lalo]

[Fakatātā ʻi he peesi 28]

Ko e “lelei” naʻe ʻoange ai kia ʻApikale ʻa e “ogoogolelei”

[Fakatātā ʻi he peesi 30]

‘Oku fai e he agahalá ae gāue fakakākāʻi: ka e maʻu ae totogi mooní e he maonioní’

[Fakatātā ʻi he peesi 31]

‘Tūtūi lahi, utu lahi’