ʻOkú Ke Manatuʻi?

Kuó ke lau fakalelei ʻa e ngaahi ʻīsiu fakamuimui ʻo e Taua Leʻo? Sai, sio angé pe ʻe lava ke ke tali ʻa e ngaahi fehuʻi ko ení:

Ko e hā ʻa e fakamoʻoni Fakatohitapu ʻoku kaungāongoʻi mai ʻa e ʻOtuá kiate kitautolu?

ʻI he taimi naʻe nofo pōpula ai ʻa e kau ʻIsileli ʻo e kuonga muʻá ʻi ʻIsipité, naʻe lāuʻilo ʻa e ʻOtuá ki heʻenau mamahí pea ongoʻi ʻenau faingataʻaʻiá. (ʻEki. 3:7; ʻAi. 63:9) Naʻe ngaohi kitautolu ʻi he ʻīmisi ʻo e ʻOtuá, pea ʻoku lava ke tau maʻu ʻa e kaungāongoʻí. ʻOkú ne kaungāongoʻi mai kiate kitautolu neongo ʻoku tau ongoʻi nai ʻoku ʻikai te tau taau mo ʻene ʻofá.​—wp18.3, p. 8-9.

Naʻe anga-fēfē tokoni ʻa e ngaahi akonaki ʻa Sīsuú ki he kakaí ke nau ikuʻi ʻa e tomuʻa fehiʻá?

Ko e kau Siu tokolahi ʻi he taimi ʻo Sīsuú naʻa nau tomuʻa fehiʻa. Naʻe fakamamafaʻi ʻe Kalaisi ʻa e fiemaʻu ke hoko ʻo anga-fakatōkilaló pea akoʻi ʻoku hala ʻa e pōlepoleʻaki ʻe he kakaí ʻa honau matakalí. Naʻá ne enginaki ki hono kau muimuí ke nau fevakaiʻaki ko e fanga tokoua.​—w18.06, p. 9-10.

Ko e hā ʻoku tau ako mei he ʻuhinga naʻe ʻikai fakaʻatā ai ʻe he ʻOtuá ʻa Mōsese ke ne hū ki he Fonua ʻo e Talaʻofá?

Naʻe hoko ʻa Mōsese ko ha kaumeʻa ofi ʻo Sihova. (Teu. 34:10) ʻI he ofi ke ngata ʻa e taʻu ʻe 40 ʻi he toafá, naʻe toe lāunga ʻa e kakaí ko hono tuʻo uá ia ko e ʻikai ʻi ai ha vaí. Naʻe tala ʻe he ʻOtuá kia Mōsese ke ne lea ki he maká. ʻI hono kehé, naʻe taaʻi ʻe Mōsese ʻa e maká. Naʻe houhau lahi ʻa Sihova ʻi he ʻikai talangofua ʻa Mōsese ki heʻene fakahinohinó pe ko e ʻikai ʻave ʻe Mōsese ʻa e lāngilangí ki he ʻOtuá koeʻuhi ko e maná. (Nōm. 20:6-12) ʻOku totonu ke akoʻi mai heni kiate kitautolu ʻa e mahuʻinga ʻo e talangofua kia Sihova pea ʻoange ʻa e lāngilangí kiate ia.​—w18.07, p. 13-14.

ʻE anga-fēfē nai haʻatau fai ha fehālaaki kapau te tau fakamaauʻaki ʻa e meʻa ʻoku hā ki tuʻá?

ʻOku ʻi ai ʻa e tafaʻaki ʻe tolu ʻa ia ʻoku tākiekina ai ʻa e tokolahi ʻe he meʻa ʻoku hā ki tuʻá: Ko e matakali pe fonua ʻo ha tokotaha, lahi ʻo e paʻanga ʻokú ne maʻú pea mo hono taʻumotuʻá. ʻOku mahuʻinga ke tau feinga ke sio ki he niʻihi kehé fakafou ʻi he vakai taʻefilifilimānako ʻa e ʻOtuá! (Ngā. 10:34, 35)​—w18.08, p. 8-12.

Ko e hā ʻa e ngaahi founga ʻe niʻihi ʻe lava ke tokoniʻi ai ʻe he kau Kalisitiane taʻumotuʻá ʻa e niʻihi kehé?

Ko ha Kalisitiane taʻumotuʻa kuo liliu hono vāhenga-ngāué ʻoku kei fakamahuʻingaʻi pē ia ʻe he ʻOtuá pea lava ke ne fai ʻa e meʻa lahi ke tokoni ki he niʻihi kehé. Te ne kakapa atu ki he ngaahi hoa taʻetuí, tokoniʻi ʻa e faʻahinga ʻikai longomoʻuí, fai ʻa e ngaahi ako Tohi Tapu, pea fakalahi ʻene ngāue fakafaifekaú.​— w18.09, p. 8-11.

Ko e hā ʻa e meʻa ʻoku ʻi he Puha Meʻangāue Fakafaiako ʻa e kau Kalisitiané?

ʻOku ʻi ai ʻa e kaati fetuʻutaki mo e tohi fakaafe. ʻOku kau ai ʻa e tuleki kuo fokotuʻutuʻu lelei ʻe valú pehē ki he Taua Leʻo. ʻOku maʻu ʻi he puha meʻangāué ʻa e ngaahi polosiua ʻe niʻihi, tohi ako tefito ʻe ua, mo e vitiō ʻaonga ʻe fā kau ai ʻa e Ko e Hā ke Ako Ai ʻa e Tohi Tapú?​—w18.10, p. 16.

ʻE lava fēfē ke “fakatau mai ʻa e moʻoní” ʻe ha Kalisitiane, hangē ko ia ʻoku ekinaki ʻi he Palōveepi 23:23?

ʻOku ʻikai ke tau totongi ha paʻanga ke maʻu ʻa e moʻoní. Neongo ia, ʻoku fiemaʻu ke tau fakamoleki ha taimi pea fai mo e feinga lahi koeʻuhi ke maʻu mai ia.​—w18.11, p. 4.

Ko e hā ʻoku lava ke tau ako mei he anga ʻo e fakafeangai ʻa Hōsea ki hono uaifí, ʻa Kōmela?

Naʻe toutou fai ʻe Kōmela ʻa e tono, ka naʻe fakamolemoleʻi ia ʻe Hōsea pea nofo mali ai pē mo ia. Kapau ʻoku fai ʻe ha hoa mali Kalisitiane ha fehokotaki fakasino taʻetaau, ko e hoa tonuhiá ʻe lava ke ne fakamolemoleʻi ia. ʻI he taimi ʻoku hoko atu ʻa e fehokotaki fakasino mo e hoa halaiá, ʻoku ʻikai ha toe ʻuhinga Fakatohitapu ke fai ha vete.​—w18.12, p. 13.