Poupou ki Hoʻo Fakatahaʻanga Fakalotofonuá

Takatakai he māmaní, ko e kakai ʻe laui miliona ʻoku nau tauhi fiefia kia Sihova ʻi he ngaahi fakatahaʻanga ʻe laui afe. ʻOku nau houngaʻia ʻi he fakahinohino mo e tataki ʻoku nau maʻú, pea ʻoku nau poupou vēkeveke ki he fakatahaʻangá ʻi he ngaahi founga lahi. Ko e anga ia hoʻo ongoʻí ki he fakatahaʻanga ʻokú ke kau ki aí?

1. Ko e hā ha ngaahi founga te ke lava ai ʻo ngāueʻaki ho taimí mo e iví ke poupou ki he fakatahaʻangá?

Ko kitautolu kotoa ʻoku lava ke tau tokoni ki he fakatahaʻangá. Ko e fakatātaá, ʻoku ʻi ai ha niʻihi ʻi hoʻo fakatahaʻangá ʻoku taʻumotuʻa pe mahamahaki? Te ke lava ʻo tokoni kiate kinautolu ke maʻu ʻa e ngaahi fakatahá? Pe te ke lava ʻo tokoni kiate kinautolu ʻi he ngaahi meʻa hangē ko e fai ha fakatau pe fakamaau fale? (Lau ʻa e Sēmisi 1:27.) ʻOku toe lava ke tau pole ke tokoni ki hono fakamaʻa mo tokangaʻi hotau Fale Fakatahaʻangá. ʻOku ʻikai ha taha te ne fakamālohiʻi kitautolu ke fai ʻa e ngaahi meʻa ko ení. Ko e ʻofa ki he ʻOtuá pea ki hotau fanga tokouá ʻoku ueʻi ai ke tau “foaki loto-lelei atu” kitautolu.​—Saame 110:3.

Ko e Kau Fakamoʻoni ʻosi papitaisó ʻoku lava ke nau poupou ki he fakatahaʻangá ʻi ha ngaahi founga lahi ange. Ko e fanga tokoua taau fakalaumālié ʻoku lava ke nau ngāue ko ha sevāniti fakafaifekau pea faai atu pē ʻo nau ngāue ko ha mātuʻa. Fakatouʻosi ʻa e fanga tokouá mo e fanga tuofāfiné ʻoku nau poupou longomoʻui ki he ngāue fakamalangá ʻaki ʻa e hoko ko e kau tāimuʻa. Ko e Kau Fakamoʻoni ʻe niʻihi ʻoku nau tokoni ʻi hono langa ʻo e ngaahi feituʻu faiʻanga lotú pe hiki ki ha feituʻu ʻoku ʻi ai ha fakatahaʻanga ʻoku fiemaʻu tokoni.

2. ʻOku lava fēfē ke tau ngāueʻaki ʻetau paʻangá mo e ngaahi meʻa fakafoʻituituí ke poupou ki he fakatahaʻangá?

ʻOku lava ke tau “fakalāngilangiʻi ʻa Sihova ʻaki” ʻetau “ngaahi meʻa mahuʻingá.” (Palōveepi 3:9) ʻOku tau lau ia ko ha monū ke ʻoatu ha paʻanga mo e ngaahi meʻa kehe ke poupou ki he fakatahaʻanga fakalotofonuá mo e ngāue fakamalanga ʻi māmani lahí. (Lau ʻa e 2 Kolinitō 9:7.) Ko ʻetau ngaahi meʻaʻofá ʻoku toe ngāueʻaki ia ke tokoni ʻi he taimi fakatamakí. ʻOku fili ʻa e tokolahi ke “tuku mavahe” maʻu pē ha meʻa ko ha meʻaʻofa. (Lau ʻa e 1 Kolinitō 16:2.) ʻOku lava ke tau lī ia ʻi ha puha tokoni ʻi hotau feituʻu faiʻanga lotú pe ʻi he ʻinitanetí ʻi he donate.jw.org. ʻOku lava ke tau fakahaaʻi ʻetau ʻofa kia Sihová ʻi heʻetau ngāueʻaki ʻetau paʻangá mo e ngaahi meʻa fakafoʻituituí ke poupou ki he fakatahaʻangá.

KELI LOLOTO ANGE

3. ʻOku lava ke tau ngāueʻaki ʻetau ngaahi meʻa fakamatelié

ʻOku ʻofa ʻa Sihova mo Sīsū ʻi he faʻahinga ʻoku nau foaki fiefiá. Ko e fakatātaá, naʻe fakaongoongoleleiʻi ʻe Sīsū ha uitou naʻe siʻisiʻi ʻaupito ʻene paʻangá ka naʻá ne kei foaki ha meʻa kia Sihova. Lau ʻa e Luke 21:1-4, pea lāulea leva ki he ongo fehuʻi ko ení:

• ʻOku fiemaʻu ke tau foaki ha fuʻu paʻanga lahi ke fakahōifua kia Sihova?

• Ko e hā ʻa e ongoʻi ʻa Sihova mo Sīsū fekauʻaki mo ʻetau loto-lelei ke foakí?

Ke ʻilo ʻa e founga ʻoku ngāueʻaki ai ʻetau meʻaʻofá, huluʻi ʻa e VITIOÓ. Lāulea leva ki he fehuʻi hokó.

VITIŌ: ‘Meʻaʻofa Maʻa Sihova’ (4:47)

• ʻOku ngāueʻaki fēfē ʻa e meʻaʻofá ke tokoni ki he ngaahi fakatahaʻanga takatakai he māmaní?

4. ʻOku lava ke tau pole ke tokoni

ʻI he taimi ʻo e Tohi Tapú, ko e kau lotu ʻa Sihová naʻa nau ngāue longomoʻui ke tokangaʻi honau ngaahi feituʻu faiʻanga lotú. Ka naʻe kau ki heni ʻa e meʻa lahi ange ʻi he tokoni fakapaʻangá pē. Lau ʻa e 2 Kalonikali 34:9-11, pea lāulea leva ki he fehuʻi ko ení:

• Ko e hā naʻe fai ʻe he tokotaha ʻIsileli kotoa pē ke tokoni ki hono tokangaʻi ʻa e fale ʻo Sihová, pe feituʻu faiʻanga lotú?

Ke sio ki he anga ʻo e muimui ʻa e Kau Fakamoʻoni ʻa Sihová ki he faʻifaʻitakiʻanga Fakatohitapu ko iá, huluʻi ʻa e VITIOÓ. Lāulea leva ki he fehuʻi hokó.

VITIŌ: Ko Hono Tokangaʻi Hotau Ngaahi Feituʻu Faiʻanga Lotu (3:31)

• Ko e hā ʻoku mahuʻinga ai ke tauhi hotau Fale Fakatahaʻangá ke maʻa pea ʻi ha tuʻunga leleí?

• Ko e hā ha ngaahi founga ʻe lava ai ke ke tokoni?

5. ʻOku lava ke kakapa atu ʻa e fanga tokouá ke fua fatongia lahi ange

ʻOku fakalototoʻaʻi ʻe he Tohi Tapú ʻa e kau tangata Kalisitiané ke kakapa atu ke fai ʻa e meʻa kotoa te nau malavá ke poupou ki he fakatahaʻangá. Ke sio ki ha fakatātā, huluʻi ʻa e VITIOÓ. Tali leva ʻa e fehuʻi hokó.

VITIŌ: Fanga Tokoua​—Kakapa Atu ki he Ngaahi Ngāue Leleí (5:23)

• ʻI he vitioó, ko e hā naʻe fai ʻe Ryan ke kakapa atu ʻo poupou lahi ange ki he fakatahaʻangá?

ʻOku fakamatalaʻi ʻe he Tohi Tapú ʻa e ngaahi meʻa ʻoku fiemaʻu ki he fanga tokoua ʻoku nau ngāue ko ha sevāniti fakafaifekau mo ha mātuʻa. Lau ʻa e 1 Tīmote 3:1-13, pea lāulea leva ki he ngaahi fehuʻi ko ení:

• Ko e hā ʻoku fiemaʻu mei he fanga tokoua ʻoku nau kakapa atu ke ngāue ko ha sevāniti fakafaifekaú mo ha mātuʻá?

• Ko e hā ʻoku fiemaʻu mei honau ngaahi fāmilí?​—Sio ki he veesi 4 mo e 11.

• ʻI he ngāue mālohi ʻa e fanga tokouá ke aʻusia ʻa e ngaahi tuʻunga taau ko ení, ʻoku anga-fēfē maʻu ʻaonga mei ai ʻa e taha kotoa ʻi he fakatahaʻangá?

FAKANOUNOU

ʻOku houngaʻia lahi ʻa Sihova ʻi heʻetau ngaahi feinga ke poupou ki he fakatahaʻangá ʻaki hotau taimí, iví mo e ngaahi meʻa fakamatelié.

Fakamanatu

• ʻOku lava fēfē ke tau ngāueʻaki hotau taimí mo e iví ke poupou ki he fakatahaʻangá?

• ʻOku lava fēfē ke tau ngāueʻaki ʻetau ngaahi meʻa fakamatelié ke poupou ki he fakatahaʻangá?

• ʻI he ngaahi founga fē te ke loto ai ke poupou ki he fakatahaʻangá?

AKO LAHI ANGE

Sio ki he ʻuhinga ʻoku ʻikai kei fiemaʻu ai ʻe he ʻOtuá ʻene kau lotú ke vahe hongofulu.

“Ko e Hā ʻOku Leaʻaki ʻe he Tohi Tapú Fekauʻaki mo e Vahe Hongofulú?” (Kupu ʻi he uepisaití)

ʻOku lave ʻa e Tohi Tapú ki he niʻihi ʻo e ngaahi ngafa ʻoku maʻu ʻe he kau tangata ʻosi papitaisó. Kae fēfē kapau ʻoku fiemaʻu ki ha fefine ʻosi papitaiso ke ne fakahoko ʻa e ngaahi ngafa ko ení?

“Mahinoʻi ʻa e Tuʻunga-ʻUlu ʻi he Fakatahaʻangá” (Ko e Taua Leʻo, Fepueli 2021)

Fetaulaki mo e Kau Fakamoʻoni loto-toʻa ʻoku nau fai ʻa e ngaahi feilaulau lahi ke ʻave ʻa e ʻū tohí ki honau kaungālotú.

Tufaki ʻa e ʻŪ Tohi Fakatohitapú ʻi Kongo (4:25)

Sio ki he faikehekehe hono poupouʻi fakaepaʻanga ʻetau ngāué mo ia ʻi he ngaahi kautaha lotu kehé.

“ʻOku Fakapaʻanga Fēfē ʻa e Ngāue ʻa e Kau Fakamoʻoni ʻa Sihová?” (Kupu ʻi he uepisaití)