Ko e Taimi Lelei Taha ke Moʻui Aí

ʻI HE fehangahangai mo e ngaahi tuʻunga faingataʻá, ʻokú ke fakaʻamu ki he “ngaahi ʻaho lelei he kuohilí”? Fakakaukau leva ki he ngaahi lea ʻa Tuʻi Solomone potó: “ʻOua te ke pehe, Ko e ha naʻe leleiange ai ʻa e ngaahi ʻaho muʻa ʻi he ngaahi ʻaho ko eni? he ʻoku ʻikai tupu mei he poto hoʻo fehuʻi pehe.”—Koheleti 7:10.

Ko e hā naʻe ʻomai ai ʻe Solomone ʻa e faleʻi ko ení? Koeʻuhi naʻá ne ʻiloʻi ko hono maʻu ha vakai totonu ki he kuohilí ko ha tokoni mahuʻinga ia ki he fekuki mo e ngaahi tuʻunga kovi ʻo e lolotonga ní. Ko e faʻahinga ʻoku nau fakaʻamu ki he “ngaahi ʻaho lelei he kuohilí” ʻe ngalo moʻoni nai ʻia kinautolu ko e ngaahi ʻaho ko iá naʻe toe fonu ia he ngaahi palopalema mo e faingataʻa, pea ko e moʻuí naʻe ʻikai ʻaupito moʻoni ke haohaoa. Ne lelei ange nai ha meʻa ʻe niʻihi he kuohilí, kae ngalingali naʻe ʻikai pehē ʻa e ngaahi meʻa kehé. Hangē ko ia ne fakahaaʻi ʻe Solomoné, ʻoku ʻikai ha poto ʻi he nōfoʻi taʻetotonu ʻi he kuohilí, koeʻuhi ʻoku hā mahino ʻe ʻikai lava ke tau toe fakafoki ʻa e uasí.

ʻE lava ke ʻi ai ha maumau ʻi he holi fakaʻānaua ki he kuohilí? ʻIo, kapau ʻokú ne taʻofi kitautolu mei he hoko ʻo ngaofengofua mo liliu ki he lolotongá pe kapau ʻokú ne taʻofi kitautolu mei hono fakahoungaʻi ʻa e taimi ʻoku tau moʻui aí pea mo e ʻamanaki ʻe lava ke ʻatautolú.

Ko hono moʻoní, ko e taimi lelei taha eni ke moʻui aí, neongo ʻa e ngaahi palopalema fakautuutu ʻi he māmaní. Ko e hā hono ʻuhingá? Koeʻuhi ʻoku tau fakaofiofi atu ki hono fakahoko ʻo e taumuʻa ʻa e ʻOtuá fekauʻaki mo hotau māmaní, pea mo e ngaahi tāpuaki ʻo e pule melino ʻa hono Puleʻangá. ʻOku talaʻofa ʻa e Tohitapú: “Te ne holoholo ʻa e loʻimata kotoa pē mei honau mata; pea ʻe ʻikai toe ai ha mate, pea ʻe ʻikai toe ai ha mamahi, pe ha tangi, pe ha ongosia; kuo mole ʻa e ngaahi meʻa muʻa.” (Fakahā 21:4) Pea ʻi he ngaahi tuʻunga lelei ʻaupito ange, ʻe ʻikai maʻu ʻe ha taha ha ʻuhinga ke fakaʻamu ai ki he “ngaahi ʻaho lelei he kuohilí.”