Poto Fakaʻotuá ʻOku Anga-Fēfē Hono Fakahāhaaʻí?

“OKU [taʻetokaʻi] ae boto oe tagata majiva, bea oku ikai ogoʻi ene gaahi lea.” Ko e ngaahi lea ko ʻení, naʻe fakaʻosiʻaki ʻe Tuʻi Solomone poto ʻa e talanoa ki ha tangata poto kae angavaivai ʻa ia naʻá ne fakahaofi ha kolo fakakātoa mei he fakaʻauhá. Neongo ia, ʻoku fakamamahí, he “nae ikai manatuʻi e ha toko taha ae tagata majiva koia.”​—Koheleti 9:​14-16 (Tagata Malaga), PM.

ʻOku hehema ʻa e faʻahinga ʻo e tangatá ke siolalo ki he kakai ʻoku siʻi ʻenau ngaahi koloá, naʻa mo hono fai ʻe he faʻahinga masiva ko ʻení ha ngaahi ngāue ʻiloá. Naʻe moʻoni ʻeni ʻi he tuʻunga ʻo Sīsuú. Naʻe kikite ʻa ʻAisea fekauʻaki mo ia: “Ko e toko taha taʻetokaʻi, mo eʻehi mei ai ʻa e kakai; ko e tangata falenga mamahi, pea maheni mo e mahaki.” (Aisea 53:3 [Isaia, PM]) Naʻe taʻetokaʻi ʻa Sīsū ʻe he niʻihi koeʻuhí pē he naʻe ʻikai te ne maʻu ʻa e tuʻunga ʻiloa ʻo e kau taki ʻo hono taimí. Ka, naʻá ne maʻu ʻa e poto naʻe lahi mamaʻo ange ia ʻi he poto ʻa ha faʻahinga angahalaʻia pē ʻo e tangatá. Ko e kakai ʻi he kolo tupuʻanga ʻo Sīsuú naʻa nau fakafisi ke fakahaaʻi ko e “foha ʻeni ʻo e motuʻa tufunga” naʻá ne fakahāhā ʻa e poto peheé peá ne fai mo e ngaahi ngāue fakaofo peheé. Kae kehe, ko ha fehālaaki lahi ia, he ʻoku hoko atu ʻa e fakamatalá ʻo pehē ko Sīsuú naʻe “ʻikai te ne loko fai ai ha ngaue fakaofo, ko e meʻa ʻi heʻenau taʻetui.” Ko ha mole lahi ē ki he kakai ko iá!​—Mātiu 13:​54-58.

ʻOfa ke ʻoua te tau fai ha fehālaaki tatau. “Naʻe fakatonuhia ʻa Poto ʻe heʻene fanau [“ngaahi ngāué,” NW],” ko e lea ia ʻa Sīsuú. Ko e faʻahinga ko ia ʻoku nau fai ʻa e ngāue ʻa e ʻOtuá pea ʻoku nau ʻoatu ʻa e poto fakahēvaní ʻoku fakaʻilongaʻi, ʻo ʻikai ʻaki honau ngaahi tuʻunga pe lakanga fakasōsialé, kae ʻaki ʻa e “fua ʻaonga” ʻoku nau fakahāhaá​—ko ʻenau tui mo ʻenau ngaahi ngāue makatuʻunga ʻi he Tohitapú.​—Mātiu 7:​18-20; 11:19.