ʻOfa ʻOku Mālohi Ange Ia ʻi he ʻOfa ʻa ha Faʻē
ʻI HE ngaahi tauʻanga lēlue ʻi lalofonuá, ʻi he ngaahi falemālōlō maʻá e kakaí, pe ʻi he ngaahi hala femoʻuekiná, ʻoku liʻaki ai ʻe he ngaahi faʻeé ʻenau fanga kiʻi pēpē toki fanauʻi foʻoú. ʻI ha ngaahi taimi, ʻoku maʻu ai ʻe he kau tānaki vevé naʻa mo e ʻi he ngaahi kapa vevé ʻa e fanga kiʻi pēpē valevale kuo nau helaʻia ʻi he tangi ki heʻenau ngaahi faʻeé. Fakatatau ki he O Estado de S. Paulo, “ko e ngaahi keisi ʻo e fanga kiʻi pēpē kuo liʻaki ʻi he ngaahi halá ʻoku tupulekina.” Ko e moʻoni, ʻe toki fakaʻiseʻisa nai ʻamui ʻa e faʻē kei siʻí ʻi heʻene filí. Ka, ʻokú ne fai ia, neongo nai ʻe mole ai ʻa e moʻui ʻa ʻene tamá.
Te ke fifili nai, ‘ʻE lava fēfē ki ha faʻē ke aʻu ʻo fakakaukau ki hono liʻaki ʻa ʻene pēpeé ki ha kahaʻu taʻepau?’ ʻOku ngāueʻaki ʻe he Tohitapú ha ngaahi tuʻunga fakamamahi pehē ko ha lea fakatātā ke ne ʻomai ha faikehekehe mālohi ki he anga ʻo e ongoʻi ʻa hotau Tokotaha-Fakatupú ki he faʻahinga ʻoku ʻaʻaná: “ʻE mangalo koā ʻi ha finemotuʻa ʻene tamasiʻi kei huhu, ke ʻoua te ne fakaʻatuʻi ʻa e tama ʻa hono manava? Talaatu, ka ne mangalo ʻa e faʻahinga ko ia, kae ʻikai mangalo koe ʻiate au.”—Aisea 49:15.
Ko e moʻoni, laka hake ʻi ha faʻē fakaetangata pē, ʻoku ʻofa lahi mai ʻa e ʻOtuá kiate kitautolu peá ne fakahaaʻi ʻa e ongongofua ki heʻetau ngaahi fiemaʻú. Pe ko ha taha kei siʻi koe pe ko ha tokotaha lahi, ko e hā pē ha palopalema te ke fehangahangai nai mo ia, ʻoku ʻikai te ke tokotaha pē. ʻOku loto ho Tokotaha-Fakatupú ke tokoniʻi koe pea ʻoku mahuʻingaʻia ia ʻi hoʻo leleí. ʻI he ngaahi lea ʻa e tokotaha-tohi-sāmé, “neongo ʻe liʻaki au ʻe heʻeku tamai mo ʻeku faʻē, ʻe fakahoko au ʻe Sihova kiate ia pe.”—Sāme 27:10.
ʻI māmani lahi, ʻoku pulusi ai ʻa e ngaahi makasini Taua Leʻo mo e Awake! ke tokonaki mai ai ʻa e ʻilo ki he “ʻOtua moʻonia pe taha,” ko Sihová, pea mo hono ʻAló, ʻa Sīsū Kalaisi, ʻa ia ʻe lava ke ʻuhinga ia ko e moʻui taʻengata ki he faʻahinga ʻoku nau tali loto-hounga iá.—Sione 17:3.