‘Hanganaki Leʻo’—Kuo Hokosia ʻa e Taimi ʻo e Fakamāú!
Ko e fakamatala ʻi he kupu ako ko ʻení ʻoku makatuʻunga ia ʻi he polosiua Hanganaki Leʻo! naʻe tukuange mai ʻi he ngaahi fakataha-lahi fakavahe naʻe fai takatakai ʻi he māmaní lolotonga ʻa e 2004/05.
“Mou [hanganaki] leʻo; he ʻoku ʻikai te mou ʻilo pe ko e ʻaho fē ʻe hoko mei ai ʻa homou ʻEiki.”—MĀTIU 24:42.
1, 2. Ko e hā naʻe fakatatau feʻungamālie ki ai ʻe Sīsū ʻene haʻú?
KO E HĀ te ke faí kapau naʻá ke ʻilo ha tokotaha kaihaʻa ʻoku moulu takai holo, ke hae ʻa e ngaahi ʻapi ʻi homou feituʻú? Ke maluʻi ʻa e faʻahinga ʻokú ke ʻofa aí pea mo hoʻo ngaahi meʻa mahuʻingá, te ke hanganaki tokanga, ʻo faʻa leʻo. Ko hono ʻuhingá, heʻikai ʻomai ʻe ha tokotaha kaihaʻa ia ha tohi ʻo tala mai ai ʻa e taimi te ne haʻu aí. ʻI hono kehé, ʻokú ne haʻu fakalongolongo mo taʻeʻamanekina.
2 Naʻe ngāueʻaki ʻe Sīsū ʻo laka hake he tuʻo tahá, ʻa e ngaahi founga ʻa ha tokotaha kaihaʻa ko ha fakatātā. (Luke 10:30; Sione 10:10) ʻI he fekauʻaki mo e ngaahi meʻa ʻe hoko ʻi he lolotonga ʻa e taimi ʻo e ngataʻangá pea ʻe iku atu ai ki heʻene haʻu ke fai ʻa e fakamāú, naʻe ʻomai ai ʻe Sīsū ʻa e fakatokanga ko ʻení: “Ko ia ke mou [hanganaki] leʻo; he ʻoku ʻikai te mou ʻilo pe ko e ʻaho fē ʻe hoko mei ai ʻa homou ʻEiki. Ka ko e meʻa ko eni ʻoku mou lāuʻilo ki ai, ʻo ka ne toka meaʻi ʻe he Tangataʻeiki pe ko e uasi fe ʻe haʻu ai ʻa e kaihaʻa, pehe ne leʻo, ʻo ʻikai tuku hono fale ke haea.” (Mātiu 24:42, 43) Ko ia ai, naʻe fakatatau ʻe Sīsū ʻene haʻú ki he aʻu mai ʻa ha tokotaha kaihaʻa—ʻoku taʻeʻamanekina.
3, 4. (a) Ko e hā ʻoku kau ki he tokanga ki he fakatokanga ʻa Sīsū ʻo fekauʻaki mo ʻene haʻú? (e) Ko e hā ʻa e ngaahi fehuʻi ʻoku malanga haké?
3 Naʻe feʻungamālie ʻa e foʻi fakatātaá, he ko e ʻaho tofu pē ko ia ʻo e haʻu ʻa Sīsuú ʻe ʻikai ha ʻilo ki ai. ʻI he konga ki muʻá, ʻi he kikite tatau pē, naʻe pehē ai ʻe Sīsū: “Ko e meʻa ki he ʻaho ko ia mo hono houa, ʻoku ʻikai ha taha ʻoku ʻilo ki ai; ʻio, pe ko e kau angelo ʻi he langi; pea naʻa mo e ʻAlo ʻoku ʻikai; ngata pe ʻi he Tamai toko taha.” (Mātiu 24:36) Ko ia ai, naʻe naʻinaʻi ʻa Sīsū ki heʻene kau fanongó: “Ke toka teuteu ʻa kimoutolu.” (Mātiu 24:44) Ko e faʻahinga ʻoku nau tokanga ki he fakatokanga ʻa Sīsuú te nau mateuteu, ʻo nau fai ʻa e tōʻonga totonu, ki ha taimi pē te ne haʻu ai ʻi he tuʻunga ko e Fakafofonga Fakahoko Tautea ʻa Sihová.
4 ʻOku malanga hake ha ngaahi fehuʻi mahuʻinga: Ko e fakatokanga ʻa Sīsuú ki he kakai pē ʻo e māmaní, pe ʻoku toe fiemaʻu ki he kau Kalisitiane moʻoní ke nau ‘hanganaki leʻo’? Ko e hā ʻoku fiemaʻu fakavavevave ai ke ‘hanganaki leʻó,’ pea ko e hā ʻoku kau ki aí?
Ko ha Fakatokanga kia Hai?
5. ʻOku tau ʻilo fēfē ko e fakatokanga ko ia ke ‘hanganaki leʻo’ ʻoku fakataumuʻá ki he kau Kalisitiane moʻoní?
5 ʻOku mātuʻaki moʻoni ko e haʻu ʻa e ʻEikí ʻe hangē ia ha kaihaʻá ki he kakai ʻo e māmaní, ʻa ia ʻoku nau tāpuniʻi honau telingá ki he fakatokanga ʻo e fakatamaki ʻoku maluʻaki maí. (2 Pita 3:3-7) Kae kehe, fēfē ʻa e kau Kalisitiane moʻoní ia? Naʻe tohi ʻa e ʻapositolo ko Paulá ki hono kaungātuí: “ʻOku mou ʻilo kanokano, ko e hoko mai ʻa e ʻaho ʻo e ʻEiki [Sihová] ʻoku hange ko e haʻu ʻa e kaihaʻa ʻi he po.” (1 Tesalonaika 5:2) ʻOku ʻikai ha veiveiua ʻi heʻetau fakakaukaú ʻe ‘hoko mai ʻa e ʻaho ʻo Sihová.’ Ka ʻoku fakasiʻisiʻi ʻe he meʻa ko iá ʻa e fiemaʻu kiate kitautolu ke hanganaki leʻó? Fakatokangaʻi ange ko ʻene kau ākongá naʻe pehē ki ai ʻe Sīsuú: “Ko e hoko mai ʻa e Fanautama ʻa Tangata ʻe fai ʻi ha taimi ʻoku ʻikai te mou ʻamanaki ai kiate ia.” (Fakaʻītali ʻamautolu; Mātiu 24:44) Ki muʻa angé, ʻi he ekinaki ki heʻene kau ākongá ke hanganaki kumi ki he Puleʻangá, naʻe fakatokanga ai ʻa Sīsū: “Mou toka teuteu: he ko e hoko mai ʻa e Fanautama ʻa Tangata ʻe fai ʻi ha taimi ʻoku ʻikai te mou ʻamanaki ai kiate ia.” (Fakaʻītali ʻamautolu; Luke 12:31, 40) ʻIkai ʻoku hā mahino naʻe ʻi he fakakaukau ʻa Sīsuú ʻa hono kau muimuí ʻi he taimi naʻá ne fakatokanga ai: ‘Mou hanganaki leʻo’?
6. Ko e hā ʻoku fiemaʻu ai ke tau ‘hanganaki leʻo’?
6 Ko e hā ʻoku fiemaʻu ai ke tau ‘hanganaki leʻo’ pea mo “toka teuteu”? Naʻe fakamatala ʻa Sīsū: “ʻEne tokaange ha ongo meʻa te na ʻi he ngoue; ʻe ʻave ʻa e taha, kae tuku ʻa e taha. ʻEne tokaange ha ongo fafine ʻoku fai ʻena momosi koane; ʻe ʻave ʻa e taha kae tuku ʻa e taha.” (Mātiu 24:40, 41) Ko e faʻahinga ko ia ʻoku nau fakamoʻoniʻi ʻoku nau toka teuteú ʻe “ʻave” kinautolu, pe fakahaofi, ʻi he taimi ʻe fakaʻauha ai ʻa e māmani anga-taʻefakaʻotuá. ʻE “tuku” ʻa e niʻihi kehé ki he fakaʻauhá koeʻuhi kuo nau tuli siokita ki heʻenau founga moʻui pē ʻa kinautolú. ʻOku kau nai ʻi he faʻahingá ni ʻa e faʻahinga tāutaha ʻa ia naʻe ʻosi fakamaama ki muʻa ka naʻe ʻikai te nau hanganaki leʻó.
7. Ko e hā ʻe fakaʻatā kitautolu ke tau fai ʻi he ʻikai ko ia ke ʻiloʻi ʻa e taimi ʻe hoko mai ai ʻa e ngataʻangá?
7 Ko e ʻikai ko ia ke ʻiloʻi ʻa e ʻaho tonu ʻo e ngataʻanga ʻo e fokotuʻutuʻu motuʻa ko ʻení ʻoku ʻomai ai kiate kitautolu ʻa e faingamālie ke fakahāhaaʻi ai ʻoku tau tauhi ki he ʻOtuá ʻi ha fakaueʻiloto maʻa. Anga-fēfē ia? Mahalo pē ʻoku hā ngali kei toe ha taimi lahi ia pea toki aʻu mai ʻa e ngataʻangá. ʻOku fakamamahi ke leaʻaki, kuo fakaʻatā ʻe he kau Kalisitiane ʻoku nau ongoʻi peheé ʻa ʻenau faivelenga ki he ngāue ʻa Sihová ke fakaʻaʻau ʻo momoko. Neongo ia, ʻi heʻetau fakatapuí, kuo tau foaki kakato atu ai kitautolu kia Sihova ke tauhi kiate ia. Ko e faʻahinga ko ia ʻoku nau ʻiloʻi ʻa Sihová ʻoku nau ʻiloʻi ko ha fakahāhā ʻo e faivelenga ʻi he miniti fakaʻosí ʻe ʻikai maongo ia kiate ia. ʻOkú ne ʻafioʻi ʻa e meʻa ʻoku ʻi he lotó.—1 Samiuela 16:7.
8. ʻOku anga-fēfē hono ueʻi kitautolu ʻe he ʻofa kia Sihová ke tau hanganaki leʻó?
8 Koeʻuhi ʻoku tau ʻofa moʻoni ʻia Sihova, ʻoku tau maʻu ʻa e fiefia lahi tahá ʻi he fai hono finangaló. (Sāme 40:8; Mātiu 26:39) Pea ʻoku tau loto ke tauhi kia Sihova ʻo taʻengata. Ko e ʻamanaki ko iá ʻoku ʻikai siʻi ʻa hono mahuʻingá koeʻuhi pē ko e pau ko ia ke tau tatali ʻo kiʻi lōloa ange ʻi he meʻa nai naʻa tau ʻamanekiná. Sinoemeʻa, ʻoku tau hanganaki leʻó koeʻuhi ʻoku tau fakatuʻotuʻa vēkeveke atu ki he meʻa ʻe ʻuhinga ki ai ʻa e ʻaho ʻo Sihová ki hono fakahoko ʻo ʻene taumuʻá. ʻOku ueʻi kitautolu ʻe heʻetau holi fakamātoato ke fakahōifuaʻi ʻa e ʻOtuá ke ngāueʻaki ʻa e akonaki ʻo ʻene Folofolá pea fakamuʻomuʻa ʻa hono Puleʻangá ʻi heʻetau moʻuí. (Mātiu 6:33; 1 Sione 5:3) Tau lāulea angé ki he founga ʻoku totonu ke tākiekina ai ʻe he hanganaki leʻó ʻa e ngaahi fili ʻoku tau faí pea mo e founga ʻoku tau moʻui ai ʻi he ʻaho taki tahá.
ʻOku Huʻu ki Fē Hoʻo Moʻuí?
9. Ko e hā ʻoku ʻi ai ai ha fiemaʻu fakavavevave ki he kakai ʻo e māmaní ke nau lāuʻilo ki he ʻuhinga ʻo hotau taimí?
9 ʻOku ʻiloʻi ʻe he kakai tokolahi he ʻahó ni ko e ngaahi palopalema mamafá mo e ngaahi meʻa fakailifiá kuo hoko ia ko ha ngaahi meʻa ʻoku hoko fakaʻaho, pea ʻoku ʻikai nai te nau leleiʻia ʻi he ʻalunga ʻoku huʻu ki ai ʻenau moʻuí tonu. Kae kehe, ʻoku nau ʻiloʻi ʻa e ʻuhinga moʻoni ʻo e ngaahi tuʻunga ʻo e māmaní? ʻOku nau ʻiloʻi ʻoku tau moʻui ʻi he “fakaʻosiʻosi ʻo e fokotuʻutuʻu ʻo e ngaahi meʻá”? (Mātiu 24:3, NW) ʻOku nau lāuʻilo ko e mafolalahia ʻa e siokitá, fakamālohí, naʻa mo e ngaahi fakakaukau taʻefakaʻotuá ʻoku nau fakaʻilongaʻi ko e “kuonga fakamui” ʻa e taimi ko ʻení? (2 Timote 3:1-5) ʻOku ʻi ai ha fiemaʻu fakavavevave kiate kinautolu ke nau lāuʻilo ki he ʻuhinga kotoa ʻo e meʻá ni pea fakakaukau ki he feituʻu ʻoku huʻu ki ai ʻenau moʻuí.
10. Ko e hā kuo pau ke tau faí ke fakapapauʻi ai ʻoku tau hanganaki leʻó?
10 Fēfē kitautolu? ʻOku tau fehangahangai ʻi he ʻaho kotoa pē mo e ngaahi fili ʻa ia ʻoku kau ki ai ʻetau ngāué, ʻetau moʻui leleí, ko hotau fāmilí mo ʻetau lotú. ʻOku tau ʻiloʻi ʻa e meʻa ʻoku leaʻaki ʻe he Tohi Tapú, pea ʻoku tau feinga ke ngāueʻaki ia. Ko ia ai, ʻoku lelei ke tau ʻeke hifo kiate kitautolu: ‘Kuó u fakaʻatā ʻa e ngaahi loto-moʻua ʻi he moʻuí ke ne afeʻi au ki he ʻalunga ʻoku halá? ʻOku ou fakaʻatā ʻa e ngaahi filōsofia ʻa e māmaní, ʻa ʻene fakakaukaú, ke ne fakapapauʻi ʻa e ngaahi fili ʻoku ou faí?’ (Luke 21:34-36; Kolose 2:8) ʻOku fiemaʻu ke tau hokohoko atu ke fakahāhā ʻoku tau falala kia Sihova ʻaki ʻa e kotoa ʻo hotau lotó pea ʻoua ʻe faʻaki ki he poto ʻotautolú. (Palovepi 3:5) ʻI he founga ko iá, te tau hanganaki ‘puke ai ki he moʻui moʻoní’—ʻa e moʻui taʻengata ʻi he māmani foʻou ʻa e ʻOtuá.—1 Timote 6:12, 19.
11-13. Ko e hā ʻoku malava ke tau ako mei he ongo fakatātā ʻo e meʻa naʻe hoko (a) ʻi he ngaahi ʻaho ʻo Noá? (e) ʻi he ngaahi ʻaho ʻo Loté?
11 ʻOku ʻi he Tohi Tapú ʻa e ngaahi fakatātā fakaefakatokanga lahi ʻoku malava ke nau tokoniʻi kitautolu ke tau hanganaki leʻo. Fakakaukau atu ki he meʻa naʻe hoko ʻi he ʻaho ʻo Noá. ʻI he taimi feʻunga ki muʻa, naʻe fakapapauʻi ai ʻe he ʻOtuá ke fai ha fakatokanga. Kae tuku kehe ʻa Noa mo hono fāmilí, naʻe ʻikai tokanga ʻa e kakaí ia. (2 Pita 2:5) ʻI he fekauʻaki mo e meʻá ni, naʻe pehē ʻe Sīsū: “Hange ko e taimi ʻo Noa, ʻe pehe foki ʻa e hoko mai ʻae Fanautama ʻa Tangata. He hange naʻe nofo ʻa e kakai ʻi he kuonga ʻo e Lomaki, ʻo nau kai mo inu, ʻo nau maʻu uaifi mo maʻu husepaniti, ʻo aʻu ki he ʻaho ko ia naʻe hu ai ʻa Noa ki he aake; pea naʻe ʻikai te nau ʻaloʻiloa kaeʻoua ke hoko mai ʻa e Lomaki, ʻo ʻave kinautolu fulipe: ʻe pehe foki ʻa e hoko mai ʻa e Fanautama ʻa Tangata.” (Mātiu 24:37-39) Ko e hā ʻoku malava ke tau ako mei aí? Kapau ʻoku fakaʻatā ʻe ha niʻihi ʻo kitautolu ʻa e ngaahi loto-hohaʻa fakaemāmaní—naʻa mo e ngaahi ngāue anga-maheni ʻo e moʻuí—ke ne kāpui ʻa e ngaahi ngāue fakalaumālié ʻa ia ʻoku ekinaki mai ʻe he ʻOtuá ke tau tauhi ke muʻomuʻá, ʻoku fiemaʻu ke tau fakakaukau fakamātoato fekauʻaki mo hotau tuʻungá.—Loma 14:17.
12 Toe fakakaukau ange fekauʻaki mo e ngaahi ʻaho ʻo Loté. Ko e kolo ko Sōtomá, ʻa ia naʻe nofo ai ʻa Lote mo hono fāmilí, naʻe lakalakaimonū fakamatelie kae halaʻatā fakaeʻulungāanga. Naʻe fekauʻi mai ʻe Sihova ʻene ongo ʻāngelo ke na fakaʻauha ʻa e feituʻu ko iá. Naʻe ekinaki ʻa e ongo ʻāngeló kia Lote mo hono fāmilí ke nau hola mei Sōtoma pea ʻoua ʻe sio ki mui. ʻI hono fakalototoʻaʻi ʻe he ongo ʻāngeló, naʻa nau mavahe mei he koló. Kae kehe, ko e uaifi ʻo Loté, ʻoku hā mahino naʻe ʻikai malava ke tuku ʻene fakakaukau ki hono ʻapi ʻi Sōtomá. ʻI he talangataʻá, naʻá ne sio ki mui, pea naʻe mole ai ʻene moʻuí. (Senesi 19:15-26) ʻI he tuʻu fakaekikité, naʻe fakatokanga mai ai ʻa Sīsū: “Manatuʻi ʻa e uaifi ʻo Lote.” ʻOku tau fai ki he fakatokanga ko iá?—Luke 17:32.
13 Ko e faʻahinga naʻe tokanga ki he ngaahi fakatokanga fakaʻotuá naʻe fakahaofi. Naʻe moʻoni ia fekauʻaki mo Noa mo hono fāmilí pea mo Lote mo hono ongo ʻofefiné. (2 Pita 2:9) ʻI heʻetau fakalaulauloto ki he fakatokanga ʻi he ongo fakatātā ko iá, ʻoku tau toe loto-toʻa ai ʻi he pōpoaki ʻo e fakahaofi ʻoku ʻi aí ki he kau ʻofa ki he māʻoniʻoní. ʻOkú ne fakafonu hotau lotó ʻaki ʻa e ʻamanaki tuipau ki he fakahoko ʻo e talaʻofa ʻa e ʻOtuá ʻo fekauʻaki mo ha “langi foʻou mo ha fonua foʻou,” ʻa ia “ʻoku nofoʻanga ai ʻa maʻoniʻoni.”—2 Pita 3:13.
‘Kuo Hokosia ʻa e Taimi ʻo e Fakamāú’!
14, 15. (a) Ko e hā ʻoku kau ki he “taimi” ʻo e fakamāú? (e) Ko e hā ʻoku kau ki he ‘manavahē ki he ʻOtuá pea tuku kolōlia kiate iá’?
14 ʻI heʻetau hanganaki leʻó, ko e hā ʻoku malava ke tau ʻamanekiná? ʻOku fakaeʻa mai ʻe he tohi Fakahaá ʻa e ngaahi sitepu hokohoko ʻi hono fakahoko ʻo e taumuʻa ʻa e ʻOtuá. Ko e ngāue ki he meʻa ʻoku leaʻaki aí ʻoku mātuʻaki mahuʻinga ia kapau ʻoku tau fie fakamoʻoniʻi ʻoku tau toka teuteu. ʻOku fakamatalaʻi maeʻeeʻa lelei ʻe he kikité ʻa e ngaahi meʻa ʻe hoko ʻi he “ʻaho ʻo e ʻEiki,” ʻa ia naʻe kamata ʻi he taimi naʻe fakanofo tuʻi ai ʻa Kalaisi ʻi hēvani ʻi he 1914. (Fakahā 1:10) ʻOku fakahanga ʻe he Fakahaá ʻa ʻetau tokangá ki ha ʻāngelo ʻa ia kuo tuku kiate ia ʻa e “Kōsipeli taʻengata ke malangaʻaki.” ʻOkú ne fanongonongo ʻi ha leʻo-lahi: “Mou manavahē ki he ʻOtua, pea tuku kololia kiate ia; he kuo hokosia ʻa e taimi oʻene fakamāu.” (Fakahā 14:6, 7) Ko e “taimi” ʻo e fakamaau ko iá ko ha vahaʻa taimi nounou; ʻoku kau fakatouʻosi ki ai ʻa e fanongonongó mo e fakahoko ʻo e fakamāú ʻa ē ʻoku fakamatalaʻi ʻi he kikite ko iá. ʻOku tau lolotonga moʻui ʻi he vahaʻa taimi ko iá.
15 ʻI he taimi ní, ki muʻa ke fakaʻosi ʻa e taimi ʻo e fakamāú, ʻoku ekinaki mai kiate kitautolu: “Mou manavahē ki he ʻOtua, pea tuku kololia kiate ia.” Ko e hā ʻoku kau ki hení? Ko e manavahē totonu ki he ʻOtuá ʻoku totonu ke ne fakatupunga kitautolu ke tau tafoki mei he koví. (Palovepi 8:13) Kapau ʻoku tau fakalāngilangiʻi ʻa e ʻOtuá, te tau fanongo kiate ia fakataha mo e ʻapasia loloto. ʻE ʻikai ke tau fuʻu femoʻuekina ʻo liʻaki ai ʻa hono lau tuʻumaʻu ʻa ʻene Folofolá, ʻa e Tohi Tapú. ʻE ʻikai ke tau fakasiʻisiʻi ʻa ʻene akonaki ke maʻu ʻa e ngaahi fakataha faka-Kalisitiané. (Hepelu 10:24, 25) Te tau koloaʻaki ʻa e monū ko hono fanongonongo ʻa e ongoongo lelei ʻo e Puleʻanga Faka-Mīsaia ʻo e ʻOtuá pea te tau fai ia ʻi he faivelenga. Te tau falala kia Sihova ʻi he taimi kotoa pea ʻaki hotau lotó kotoa. (Sāme 62:8) ʻI hono ʻiloʻi ko Sihova ʻa e Hau Fakalevelevá, ʻoku tau fakalāngilangiʻi ia ʻaki ʻa e fakamoʻulaloa loto-lelei kiate ia ʻi hono tuʻunga ko e Hau ʻi heʻetau moʻuí. ʻOkú ke manavahē moʻoni ki he ʻOtuá pea tuku kolōlia kiate ia ʻi he ngaahi founga ko iá kotoa?
16. Ko e hā ʻoku malava ai ke tau pehē kuo ʻosi fakahoko ʻa e fakamaau ʻoku fakahaaʻi ʻi he Fakahā 14:8 ki Pāpilone ko e Lahí?
16 ʻOku hoko atu ʻa e Fakahā vahe 14 ke fakamatala ki he toe ngaahi meʻa ʻe hoko ʻi he taimi ʻo e fakamāú. Ko Pāpilone ko e Lahi, ʻa e ʻemipaea ʻi māmani ʻo e lotu loí, ʻoku ʻuluaki lave ki aí: “Naʻe muimui mai ha angelo ʻe taha, ko hono ua ia, ʻo ne pehē, Kuo tokilalo, kuo tokilalo ʻa fuʻu Papilone.” (Fakahā 14:8) ʻIo, mei he vakai ʻa e ʻOtuá, kuo ʻosi tō ʻa Pāpilone ko e Lahi ia. ʻI he 1919, naʻe fakatauʻatāinaʻi ai ʻa e kau sevāniti pani ʻa Sihová mei he pōpula ki he ngaahi tokāteline mo e ngaahi tōʻonga faka-Pāpiloné, ʻa ia kuó ne puleʻi ʻa e kakaí mo e ngaahi puleʻangá ʻi he laui afeʻi taʻu. (Fakahā 17:1, 15) Naʻa nau malava ai ke līʻoa kinautolu ki hono pouaki ʻa e lotu moʻoní. Ko hono malangaʻi ʻi māmani lahi ʻa e ongoongo lelei ʻo e Puleʻanga ʻo e ʻOtuá kuo hoko ia talu mei he taimi ko iá.—Mātiu 24:14.
17. Ko e hā ʻoku kau ki he hiki mei Pāpilone ko e Lahí?
17 ʻOku ʻikai ko e fakakātoa ia ʻo e fakamaau ʻa e ʻOtuá ki Pāpilone ko e Lahí. Ko hono fakaʻauha fakaʻosí ʻoku vavé ni ke hoko. (Fakahā 18:21) ʻI he ʻuhinga lelei, ʻoku ekinaki ʻa e Tohi Tapú ki he kakai ʻi he feituʻu kotoa pē: “Hiki meiate ia, [Pāpilone ko e Lahi] . . . ke ʻoua naʻa mou kau ʻi heʻene hia.” (Fakahā 18:4, 5) ʻOku anga-fēfē ʻetau hiki mei Pāpilone ko e Lahí? ʻOku kau ki he meʻá ni ʻa e meʻa lahi ange ia ʻi hono tuʻusi pē ha faʻahinga fehokotaki mo e lotu loí. Ko e tākiekina faka-Pāpiloné ʻoku ʻi ai ia ʻi he ngaahi kātoanga mo e ngaahi tōʻonga manakoa lahi, ʻi he fakakaukau fakangofua tavale ʻa e māmaní ki he fehokotaki fakasinó, ʻi hono pouaki ʻo e fakafiefia ʻoku kau ai ʻa e fakahaʻele faʻahikehé, pea mo e toe ngaahi meʻa lahi ange. Ke hanganaki leʻó, ʻoku mātuʻaki mahuʻinga fakatouʻosi ʻi heʻetau ngaahi ngāué pea ʻi he ngaahi holi ʻo hotau lotó, ke tau ʻoatu ʻa e fakamoʻoni ʻoku tau mavahe moʻoni mei Pāpilone ko e Lahi ʻi he founga kotoa pē.
18. ʻI he vakai atu ki he meʻa ʻoku fakamatalaʻi ʻi he Fakahā 14:9, 10, ko e hā ʻa e meʻa ʻoku tokanga ʻa e kau Kalisitiane ʻiloʻiló ke fakaʻehiʻehi mei aí?
18 ʻI he Fakahā 14:9, 10, ʻoku fakamatalaʻi ai ha toe tafaʻaki ʻe taha ʻo e ‘taimi ʻo e fakamāú.’ Ko ha toe ʻāngelo ʻe taha ʻokú ne pehē: “ʻIlonga ʻa ia ʻoku lotu ki he manu fekai mo hono ʻimisi, pea ʻoku ne maʻu ʻa e fakaʻilonga ʻi hono laʻe, pē ʻi hono nima, te ne inu mo ia foki ʻi he uaine ko e tautea mei he ʻOtua.” Ko e hā hono ʻuhingá? Ko e “manu fekai mo hono ʻimisi” ko e ongo fakaʻilonga ia ʻo e tuʻunga-pule fakaetangatá, ʻa ia ʻoku ʻikai ke lāuʻilo ki he tuʻunga-hau ʻo Sihová. ʻOku tokanga ʻa e kau Kalisitiane ʻiloʻiló ke ʻoua naʻa nau fakaʻatā kinautolu ke tākiekina pe ke fakaʻilongaʻi, ʻi he fakakaukau pe ngāue, ʻo pōpula ki he faʻahinga ko ia ʻoku fakafisi ke lāuʻilo ki he tuʻunga-hau aoniu ʻo e ʻOtua moʻoní, ʻa Sihova. ʻOku ʻiloʻi ʻe he kau Kalisitiané kuo ʻosi fokotuʻu ʻa e Puleʻanga ʻo e ʻOtuá ia ʻi hēvani, ʻa ia te ne fakangata ʻa e ngaahi tuʻunga-pule fakaetangatá kotoa, pea ʻe tuʻu ia ʻo taʻengata.—Taniela 2:44.
ʻOua ʻE ʻAi ke Mole Hoʻo Ongoʻi ʻa e Fakavavevavé!
19, 20. (a) ʻI heʻetau fakaofiofi atu ki he ngataʻanga ʻo e ngaahi ʻaho fakaʻosí, ko e hā ʻoku lava ke tau ʻilo pau ʻe feinga ʻa Sētane ke faí? (e) Ko e hā ʻoku totonu ke tau fakapapauʻi ke faí?
19 ʻI heʻetau fakaofiofi atu ki he ngataʻanga ʻo e ngaahi ʻaho fakaʻosí, ʻe fakalalahi ai pē ʻa e ngaahi tengé mo e ngaahi fakatauelé. ʻI he lolotonga ʻetau moʻui ʻi he fokotuʻutuʻu motuʻa ko ʻení pea mo hono fakameleʻi ʻe heʻetau taʻehaohaoá tonu, ʻoku uesia ai kitautolu ʻe he ngaahi meʻa hangē ko e mahamahakí, taʻumotuʻá, ko e mole ʻa ha taha ʻofeina, ongoʻi loto-mamahi, tōnoa ʻa e ʻamanakí ʻi he fehangahangai mo e taʻemahuʻingaʻia ki heʻetau ngaahi feinga ke malangaʻi ʻa e Folofola ʻa e ʻOtuá, pea mo e ngaahi meʻa lahi ange. ʻOua ʻaupito ʻe ngalo ʻoku ʻikai mo ha toe meʻa ʻe saiʻia ange ai ʻa Sētane ka ko hono ngāueʻaongaʻaki ʻa e ngaahi tenge ʻoku tau fehangahangai mo iá ke fakalotoʻi kitautolu ke tau foʻi—ke taʻofi hono malangaʻi ʻa e ongoongo leleí pe ke tuku ʻa e moʻuiʻaki ʻa e ngaahi tuʻunga ʻa e ʻOtuá. (Efeso 6:11-13) ʻOku ʻikai ko e taimi ʻeni ke mole ai ʻetau ongoʻi ʻa e fakavavevavé ʻi he fekauʻaki mo e taimi ʻoku tau moʻui aí!
20 Naʻe ʻiloʻi ʻe Sīsū te tau tofanga ʻi he ngaahi tenge lahi ke tau foʻi ai, ko ia naʻá ne akonaki mai kiate kitautolu: “Mou [hanganaki] leʻo; he ʻoku ʻikai te mou ʻilo pe ko e ʻaho fē ʻe hoko mei ai ʻa homou ʻEiki.” (Mātiu 24:42) Ko ia ai, ʻai ke tau hanganaki tokanga ai pē ki he feituʻu ʻoku tau ʻi ai ʻi he fonongaʻanga ʻo taimí. Tau maluʻi kitautolu mei he ngaahi filioʻi ʻa Sētane ʻa ē ʻoku malava ke ne fakatupunga kitautolu ke tau fakamāmālie pe fakafisí. ʻAi ke tau fakapapauʻi ke malangaʻi ʻa e ongoongo lelei ʻo e Puleʻanga ʻo e ʻOtuá ʻaki ʻa e faivelenga mo e loto-fakapapau lahi ange. Ko hono moʻoní, tau tauhi maʻu ʻetau ongoʻi ʻa e fakavavevavé ʻi heʻetau talangofua ki he fakatokanga ʻa Sīsuú: ‘Mou hanganaki leʻo.’ ʻI hono fai iá, te tau ʻoatu ai ʻa e lāngilangi kia Sihova pea te tau ʻi he lotolotonga ʻo e faʻahinga ʻoku nau ʻamanaki atu ki heʻene ngaahi tāpuaki taʻengatá.
ʻE Anga-Fēfē Haʻo Tali?
• ʻOku tau ʻilo fēfē ko e fakatokanga ʻa Sīsū ke ‘hanganaki leʻó’ ʻoku kaunga ki he kau Kalisitiane moʻoní?
• Ko e hā ʻa e ongo fakatātā fakaefakatokanga ʻi he Tohi Tapú ʻoku malava ke ne tokoniʻi kitautolu ke tau ‘hanganaki leʻó’?
• Ko e hā ʻa e taimi ʻo e fakamāú, pea ko e hā ʻoku ekinaki mai kiate kitautolu ke tau fai ki muʻa ke ngata iá?
[Fakatātā ʻi he peesi 23]
Naʻe fakatatau ʻe Sīsū ʻene haʻú ki he aʻu mai ʻa ha tokotaha kaihaʻa
[Fakatātā ʻi he peesi 24]
Ko e fakaʻauha ʻo Pāpilone ko e Lahí ʻoku ofi
[Fakatātā ʻi he peesi 25]
ʻAi ke tau fakapapauʻi ke malangaʻaki ʻa e faivelenga mo e loto-fakapapau lahi ange