Ko e Fakalahi ʻo e Ngaahi Ngāue he Lolotonga ʻa e ʻI Ai ʻa Kalaisí
“Pea ʻe toki folofola ʻe he Tuʻi kiate kinautolu ʻi hono toʻomataʻu, Omi kimoutolu, ʻa e faʻahinga kuo fakamonuʻia ʻe heʻeku Tamai, ʻo mou hoko ki he puleʻanga kuo toka teuteu moʻomoutolu talu e tanu pou ʻo mamani.”—MĀTIU 25:34.
1. ʻI he founga fē kuo hoko ai ʻa e pa·rou·siʹa ʻa Kalaisí ʻo hangē tofu pē “ko e taimi ʻo Noa”?
KO E ʻi ai ʻa Kalaisí—ko e meʻa naʻe fakatatali fuoloa ki ai! Naʻe aʻu mai ʻi he taʻu 1914 ʻa e taimi hangē “ko e taimi ʻo Noa,” ʻa ia naʻe lave ki ai ʻa Sīsū ʻi he fekauʻaki mo e “fakaʻosiʻosi ʻo e ngaahi meʻa ʻoku tuʻú ni.” (Mātiu 24:3, 37, NW) Ka ko e hā ʻa e mahuʻinga ʻo e ʻi ai, pe pa·rou·siʹa ʻa Kalaisí ki he toenga ʻo e kau pani ʻo e “tamaioeiki agatonu mo boto”? (Mātiu 24:45, PM) Naʻe pau ke nau hoko ai ʻo ngāue lahi ange ko e kau tapua atu ʻo e maamá! Naʻe lahi ʻa e ngaahi meʻa fakaofo naʻe pau ke hoko! Naʻe teu ke kamata ai ha ngāue fakatahatahaʻi taʻe ala fakatataua.
2. Ko e hā ʻa e fakamaʻa kuo hoko ʻi hono fakahoko ʻo e Malakai 3:1-5?
2 Kae kehe, naʻe ʻuluaki fie maʻu ki he kau Kalisitiane pani ko ení ke fakamaʻa kinautolu. Hangē ko ia naʻe kikiteʻi ʻi he Malakai 3:1-5, (PM), ko Sihova ko e ʻOtuá pea mo ʻene “talafekau oe fuakava,” ko Sīsū Kalaisi, naʻá na haʻu ke vakaiʻi ʻa e temipale fakalaumālié ʻi he faʻahitaʻu fai lau ʻo e 1918. Naʻe pau ke kamata ʻa e fakamaaú “mei he ʻapi ʻo e ʻOtua.” (1 Pita 4:17) Naʻe kikiteʻi ʻi he Malakai 3:3: “Pea te ne [Sihova] nofo ko e sivi mo fakamaʻa siliva tofu pe, pea te ne fakamaʻa ʻa haʻa Livai, pea te ne toʻo mei ai ʻa e ʻuli, hange ko e koula mo e siliva.” Ko ha vahaʻa taimi ia ʻo e sivi mo e fakamaʻa.
3. Ko e hā naʻe ʻikai ala tuku ai ʻa hono fai ʻo e fakamaʻa fakalaumālié?
3 ʻI he hao atu mei he taimi ʻo e fakamaau ko ení, ʻa ia naʻe aʻu ki hono tumutumú ʻi he 1918, naʻe fakamaʻa mei he toenga ʻo e kalasi tamaioʻeikí ʻa e ʻuli fakaemāmaní mo fakalotú. Ko e hā naʻe fakamaʻa ai ʻe Sihova ʻa kinautolú? Koeʻuhi naʻe fekauʻaki mo hono temipale fakalaumālié. Ko e fokotuʻutuʻu eni hangē ha temipale ki hono fai ʻa e lotu kia Sihová ʻo makatuʻunga ʻi he feilaulau fakatupu-hōifua ʻa Sīsū Kalaisí. Naʻe fie maʻu ʻe Sihova ʻa hono temipalé ke ʻi ha tuʻunga maʻa koeʻuhi ʻi he taimi ʻe ʻomai ai ki ai ʻa e fuʻu tokolahi ʻo e kau lotu ʻoku nau maʻu ʻa e ʻamanaki ki he māmaní, te nau ʻilo ai ha feituʻu ʻa ia ʻoku tokaʻi ai ʻa hono tuʻunga-hau fakalevelevá, ko ha feituʻu ʻoku fakamāʻoniʻoniʻi ai hono huafa fakaeʻotuá, pea ko ha feituʻu ʻoku tauhi ai ʻa ʻene ngaahi lao māʻoniʻoní. Ko ia, te nau houngaʻia ai ʻia Sihova pea kau ʻi hono ʻai ke ʻilolahia ʻa ʻene ngaahi taumuʻa maʻongoʻongá.
Ngaahi Monū Ne Toe Tānaki Mai
4, 5. (a) ʻI he founga fē ʻoku poleʻi ai ʻa e toko taha taki taha ʻo e kalasi tamaioʻeiki he ʻaho ní ʻe ha fehuʻi naʻe fai ʻe Sīsū Kalaisi? (e) Ko e hā ʻa e mahino ʻoku maʻu ʻo fekauʻaki mo e ongo kupuʻi leá ni, “tamaioeiki agatonu mo boto” mo e “hono kau nofoʻanga”? (f) Ko e hā ʻa e ngāue kuo vaheʻi ʻe Sīsū ki he tamaioʻeikí ke ne fai?
4 ʻI he 1919, ʻi he tuʻunga ko ia kuo ʻosi maʻa ʻa e kalasi tamaioʻeikí, naʻe malava ai ke nau fakatuʻotuʻa atu ki hono fakalahi maʻu pē ʻo e ngaahi ngāue. ʻI he 1914, naʻe maʻu ai ʻe Sīsū Kalaisi, ko honau Pulé, ha Puleʻanga fakahēvani. ʻI heʻene foki mai ki he kau ngāue ʻi hono falé ke siviʻi ʻa ʻene “kau nofoʻanga” kotoá, naʻá ne hoko mai ʻi he tuʻunga ngeia fakatuʻi, ʻa ia naʻe ʻikai te ne maʻu ʻi heʻene ʻi māmaní. Ko e hā ʻa e meʻa naʻá ne ʻilo ki aí? Naʻe femoʻuekina ʻa e kalasi tamaioʻeikí ʻi hono tokangaʻi ʻa e ngaahi meʻa mahuʻinga ʻa e Pulé? Hangē ko ia ʻoku hiki ʻi he Mātiu 24:45-47, (PM), naʻe ʻeke ʻe Sīsū ha fehuʻi, ʻa ia naʻá ne poleʻi ʻa e toko taha taki taha ʻo e kau ākonga ko ení ke siviʻi ʻenau anga-līʻoa fakafoʻituitui ki he Mīsaia ʻa Sihová: “Bea kohai ae tamaioeiki agatonu mo boto, kuo fakanofo e he ene eiki ke bule ki hono kaugaabi [kau nofoʻanga], mo tufaki kiate kinautolu ae mea kai i hono taimi totonu? Oku monuia ae tamaioeiki koia, oka haʻu a ene eiki, o ilo ia oku ne fai behe. Ko eku tala mooni atu kiate kimoutolu, te ne fakanofo ia ke ne buleʻi ene mea kotoabe.”
5 ʻOku hā mahino, ʻoku ʻikai feʻunga mālie ki ha toko taha tāutaha ʻa e fakamatala ko eni ʻa Sīsū fekauʻaki mo e tamaioʻeiki anga-tonú. ʻIkai, ka ʻokú ne fakamatalaʻi ʻa e fakatahaʻanga pani mo anga-tonu fakakātoa ʻa Kalaisí, ʻi he tuʻunga ko ha kulupu. Ko e kau nofoʻangá ko e kau muimui pani tāutaha ko eni ʻo Kalaisí. Naʻe ʻilo ʻe Sīsū te ne fakatau ʻa ʻene kau pani ko ení ʻaki hono taʻataʻa ʻoʻoná, ko ia naʻe feʻunga mālie ai ʻa ʻene lave kiate kinautolu fakakātoa ko ʻene tamaioʻeiki. ʻOku pehē ʻi he 1 Kolinitō 7:23 ʻo fekauʻaki mo kinautolu: “Naʻe ai ha totongi naʻe fakatau ʻaki kimoutolu; ʻoua te mou hoko ko e popula ʻa e kakai.” Naʻe fekauʻi ʻe Sīsū ʻa ʻene kalasi tamaioʻeiki ko ení ke ʻai ʻenau maamá ke ulo atu ke tohoaki mo ngaohi ha kau ākonga kehe pea fafangaʻi hokohoko ʻene kau nofoʻangá ʻaki hono ʻoange kiate kinautolu ʻenau meʻakai fakalaumālie ʻi he taimi totonu.
6. Ko e hā ʻa e pale naʻe maʻu ʻe he tamaioʻeikí ko e ola ia ʻo e sivi naʻe fai ʻe Sīsuú?
6 Talu mei he kamata ʻa e ʻi ai ʻa Kalaisí ʻo faai mai ki he 1918, naʻe feinga ʻa e kalasi tamaioʻeikí ke ʻomi taimi totonu ʻa e meʻakaí ki he kau nofoʻangá, neongo hono taʻe manakoa mo fakatangaʻi ʻe he kakaí ʻa e kalasi tamaioʻeikí. Ko e meʻa ia naʻe ʻilo ʻe he Pulé ʻi he kamata ʻo ʻene siví. Naʻe fiefia ʻa e ʻEiki ko Sīsuú, pea ʻi he 1919 naʻá ne fakahā ʻoku fiefia ʻa e kalasi tamaioʻeiki anga-tonu ko iá. Ko e hā ʻa e pale fakafiefia naʻe maʻu ʻe he tamaioʻeikí koeʻuhi ko ʻene fai ʻa e meʻa naʻe vaheʻi ange kiate ia ʻe hono Pulé ke ne faí? Ko ha hiki hake ʻo e lakangá! ʻIo, ko e ngaahi fatongia lahi ange ki hono ʻai ke laka ki muʻa ʻa e ngaahi meʻa mahuʻinga ʻa hono Pulé. Koeʻuhi kuo hoko ʻa e Pulé ko ha Tuʻi fakahēvani, naʻe hoko ʻo mahuʻinga lahi ange ʻa ʻene ngaahi meʻa ʻi māmaní.
7, 8. (a) Ko e hā ʻa e ‘ngaahi meʻa kotoa pē’ ʻa e Pulé? (e) Ko e hā naʻe fie maʻu mei he tamaioʻeikí ki hono tokangaʻi ʻo e ngaahi meʻa kotoa pē ko ení?
7 Ko ia, ko e hā “ene mea kotoabe”? Ko e ngaahi meʻa fakalaumālie ʻaonga lahi kotoa eni ʻi māmani kuo hoko ko e meʻa ʻa Kalaisi ʻi he fekauʻaki mo hono mafai ko e Tuʻi fakahēvaní. ʻOku pau naʻe kau ki ai ʻa e ngāue kuo vaheʻi ko e ngaohi ākonga maʻa Kalaisí, pea mo e monū maʻongoʻonga ke hoko ko e kau fakafofonga ʻo e Puleʻanga ʻo e ʻOtuá kuo fokotuʻú ki he ngaahi puleʻanga kotoa ʻo e māmaní.
8 ʻI hono hiki hake ʻo e lakanga ʻo kinautolu ke nau tokangaʻi ʻa e ngaahi meʻa kotoa pē ʻa e Pulé naʻe fie maʻu ai ki he kalasi tamaioʻeikí ke ne vaheʻi ha taimi mo ha tokanga lahi ange ki hono fai ʻa e ngāue ʻo e Puleʻangá, pea ke maʻu ha ngaahi faiʻanga ngāue lahi ange ke fakahoko ʻa e ngāue ko iá. Kuo hoko ʻo lahi ange ʻa e malaʻe ʻo e ngāué—ko e māmani kotoa ʻoku nofoʻí.
Ko Hono Fakatahatahaʻi ʻa e Fanga Sipí
9. Ko e hā kuo hoko ʻi hono fakalahi ʻo e ngaahi ngāue ʻa e tamaioʻeikí?
9 Ko ia ai, naʻe talangofua ʻa e kalasi tamaioʻeiki anga-tonu mo poto ʻa Kalaisí ʻo nau fakalahi ʻenau ngāué. Ko e hā ʻa e olá? Naʻe tānaki mai ai ʻa e faʻahinga fakaʻosi ʻo e kau pani ʻe toko 144,000. Naʻe hoko leva ai ʻa e vīsone ʻa Sione ʻoku hiki ʻi he Fakahā 7:9-17 ko ha meʻa moʻoni fakatupu fiefia mo fakalotomāfana. Tautefito talu mei he 1935 ʻa e fiefia ʻa e kalasi tamaioʻeikí ʻi he sio tonu ki hono fakahā hokohoko ʻa e fakahoko ʻo e vīsone ko ení. ʻOku fonu ʻa e lotoʻā ʻo e temipale fakalaumālie ʻa Sihová ʻi he laui miliona ʻo e “fuʻu kakai lahi” ko ʻene kau lotu mei he māmaní kotoa. Naʻe tala ʻe he ʻangelo ʻa Sihová kia Sione ʻo pehē ʻe ʻikai lava ʻe ha taha hono lau ʻa e fuʻu kakai lahí ni. ʻOku ʻuhinga iá ʻoku ʻikai ke ʻi ai ha fakangatangata ki he tokolahi ʻo e kakai ʻe ʻomai ʻe he kalasi tamaioʻeikí ki he temipale fakalaumālie ʻa Sihová. ʻI he kei faingamālié, ʻe hokohoko atu pē ʻa e ngāue ko eni ko hono fakatahatahaʻi mai kinautolú.
10. Ko e hā ʻa e ngāue anga-ʻofa ʻoku kau ki ai ʻa e tamaioʻeikí he ʻahó ni?
10 Ko ha fatongia mamafa ʻoku maʻu ʻe he kalasi tamaioʻeikí ʻi hono tokangaʻi ʻo e “fanga sipi kehe” ʻoku fakautuutu maʻu pē hono tokolahí, heʻenau ʻilo ʻoku mātuʻaki ʻofeina ki he Pulé, ko Sīsū, ʻa e faʻahinga ko eni hangē ha sipi mei he ngaahi puleʻanga kotoa. Ko hono moʻoní ko ʻene takanga kinautolu. (Sione 10:16; Ngāue 20:28; 1 Pita 5:2-4) Ko ia koeʻuhi ko e ʻofa ki he Pulé pea mo e fanga sipí, ʻoku tokanga fiefia ai ʻa e kalasi tamaioʻeikí ki he ngaahi fie maʻu fakalaumālie ʻa e fuʻu kakai lahi.
11-13. Ko e hā ʻa e fakamatala feʻunga mālie naʻe fai ʻe he palesiteni ne toki mālōlō atu ʻo e Watch Tower Society ʻo fekauʻaki mo e ngāue ʻa e tamaioʻeikí?
11 ʻIo, ko e konga lahi ange ʻo e ngāue kuo vaheʻi ki he tamaioʻeikí ki hono tapua atu ʻa e maamá ko hono fakatahatahaʻi ʻo e faʻahinga ko eni ʻe pule hifo ki ai ʻa e Puleʻanga ʻo e ʻOtuá. ʻI he fakamatala ki he ngaahi ngāue fakautuutu ai pē ʻa e tamaioʻeiki anga-tonú, naʻe pehē ʻe F. W. Franz, ko e palesiteni ne toki mālōlō atu ʻo e Watch Tower Society, ki muʻa pē peá ne toki mate ʻi Tisema 1992:
12 “Kuo ngāueʻaki ʻe Sīsū Kalaisi ʻa e kautahá ʻo fakaʻau ke toe fakaofo ange, ʻo fakatatau ki he meʻa kuo u hokosia ʻi he taʻu ʻe 99 ko eni ʻo ʻeku moʻuí. ʻOku ʻikai pē ko ha tangata ʻokú ne tataki ʻa e kautahá, ka kuo pau ko e ʻEiki ko Sīsū Kalaisí. He kuo fakahoko ʻo lahi mo fakaofo ange ʻi he meʻa naʻa mau fakakaukau atu ki aí. ʻI he ʻahó ni ʻoku tau maʻu ha kautaha kuo fakalahi atu ʻi māmani lahi. ʻOku ngāue ia ʻi he Hemisefia Tokelaú mo e Hemisefia Tongá, ʻi he Hahaké mo e Hihifó. Ko e toko taha pē ʻoku malava ke ne fakahoko ʻa e fakalahi ʻilonga ko ení—ko e ʻAlo ʻo e ʻOtuá, ʻa ia ʻoku pule ki he kalasi tamaioʻeiki anga-tonu mo potó. Kuó ne fakahoko lelei ʻa hono ngaahi fatongiá, pea ko e ʻuhinga ia ʻo e fakalahi maʻongoʻonga kuo tau sio tonu ki aí.
13 “ʻOku ʻikai ke fakahoko ʻa e meʻá ni ʻe ha tangata pē ʻe taha. Kuo tau maʻu ha kautaha ʻoku fakateokalati, pea ʻoku ngāue ʻi ha founga fakateokalati, ʻi ha founga ʻoku tataki ʻe he ʻOtuá. ʻOku ʻikai ha tangata, naʻa mo e toko taha naʻá ne fokotuʻu ʻa e Watch Tower Bible and Tract Society, ʻoku ʻikai malava ke pehē ko ia naʻá ne fakahoko ʻa e meʻa kuo lava ʻi māmani kotoá. ʻOku mātuʻaki fakaofo ia.” ʻIkai ʻoku loto-tatau kakato ʻa e faʻahinga kotoa ʻo e fuʻu kakai lahí ki he ngaahi fakakaukau ʻa Tokoua Franz kuo ʻosi maté? ʻIo, ʻoku moʻoni, ʻoku nau houngaʻia lahi ʻi he fakalahi ʻo e ngaahi ngāue ʻa e tamaioʻeiki anga-tonú.
Faʻahinga ʻE Pule Hifo ki ai ʻa e Puleʻangá
14, 15. (a) Ko e hā naʻe fakahaaʻi ʻe Sīsū ʻi he talanoa fakatātā fekauʻaki mo e ngaahi talēnití (Mātiu 25:14-30)? (e) Ko e hā ʻa e meʻa feʻunga mālie hono hoko ʻi he Mātiu vahe 25?
14 ʻI he Mātiu vahe 25, ʻoku fakamatalaʻi ʻe he talanoa fakatātā ʻa Sīsū fekauʻaki mo e fanga sipí mo e fanga kosí ʻa e ngāue lahi ko eni ko hono fakatahatahaʻi ʻa e faʻahinga ʻi māmani ʻe pule hifo ki ai ʻa e Puleʻanga ʻo e ʻOtuá. ʻI he talanoa fakatātā ki muʻa aí, ko e talanoa fakatātā fekauʻaki mo e ngaahi talēnití, naʻe fakahā ai ʻe Sīsū ko e kau ākonga pani ʻoku nau ʻamanaki ke pule fakataha mo ia ʻi hono Puleʻanga fakahēvaní kuo pau ke nau ngāue ke fakalahi ʻa ʻene ngaahi meʻa kotoa pē ʻi māmaní. Ko ia, ʻoku feʻunga mālie leva ʻa hono fakahā ʻe Sīsū ʻi he talanoa fakatātā hono hokó ʻa e meʻa ʻoku fie maʻu mei he faʻahinga ʻoku nau fie hoko ko e faʻahinga ke pule hifo ki ai ʻa hono Puleʻanga fakahēvaní.
15 Fakatokangaʻi ʻene fakamatala ʻi he Mātiu 25:31-33: “Ka ʻo ka ʻiloange ʻe hoko mai ʻa e Fanautama ʻa Tangata, kuo ne ʻai hono nāunau, pea haʻofia ia ʻe he kau angelo kotoa pe, te ne toki nofo ʻi hono taloni langilangiʻia: pea ʻe fakatahataha ki hono ʻao ʻa e ngāhi kakai kotoa pe; pea te ne vaheʻi kinautolu, ʻo hange ʻoku vaheʻi ʻe ha tauhisipi ʻa e fanga sipi mei he fanga kosi: pea te ne fokotuʻu ʻa e fanga sipi mei hono toʻomataʻu, ka ko e fanga kosi mei hono toʻohema.”
16. ʻOku anga-fēfē ʻa hono fakatahatahaʻi ʻa e ngaahi puleʻangá pea mo hono vaheʻi ʻo e kakaí?
16 Naʻe hoko ʻa Sīsū ʻi hono lāngilangí ʻi he 1914. Ko ia, naʻe tomuʻa fai ʻe ia mo ʻene kau ʻangeló kotoa ʻa hono ʻohofi mo tuli hifo mei hēvani ʻa hono ngaahi fili fakatēmeniō kotoa pē. Ko e meʻa hono hoko ʻoku lave ki ai ʻa ʻene talanoa fakatātaá ʻoku tokoniʻi ai kitautolu ke tau ʻilo ko e nofo hifo ʻa Sīsū ʻi hono taloni lāngilangiʻiá ʻokú ne fakaʻilongaʻi ʻa e nofo ʻo fai ʻa e fakamaau he lolotonga ʻo ʻene ʻi aí. Ko hono fakatahatahaʻi ʻa e ngaahi puleʻanga kotoa kiate iá ʻoku ʻuhinga iá ʻoku maʻu ʻe Sīsū ʻa e ngaahi puleʻanga kotoa ke ngāue ki ai ko ʻene takanga, ʻi he lea fakaefakatātā pē. Ko e takanga ia ʻoku tuifio ai ʻa e fanga sipi mo e fanga kosi. Neongo ʻe fie maʻu nai ha konga ʻo ha ʻaho ke vaheʻi ai ʻa e fanga sipí mei he fanga kosí ʻi ha takanga moʻoni, ʻoku fie maʻu ha taimi lahi ange ki hono vaheʻi ʻi māmani lahi ʻa e kakai ʻoku tauʻatāina ke fili ki he totonú pe ko e halá. Ko hono ʻuhingá he ʻoku makatuʻunga ʻa e vaheʻi ko ení ʻi heʻenau ngaahi ʻalunga taki taha.
17. Ko e hā ʻoku mafatukituki ai ʻa e tuʻunga ʻi he ʻaho ní ki he kakai kotoa?
17 ʻI he talanoa fakatātaá, ʻoku ʻai ʻe he Tuʻi ko e Tauhi-Sipí ʻa e faʻahinga hangē ha fanga sipí ki hono toʻomataʻú pea ko e faʻahinga hangē ha fanga kosí ki hono toʻohemá. ʻE iku ʻa e faʻahinga ʻi he tafaʻaki toʻomataʻú ki ha fakamaau ʻo e hōifua—ko e moʻui taʻe ngata. Ko e tafaʻaki toʻohemá leva, ko e fakaʻilonga ia ki he fakamaau ʻo e taʻe hōifua—ko e fakaʻauha taʻe ngata. ʻOku hoko ha ola mafatukituki ʻi hono fakapapauʻi ʻe he Tuʻí ʻa e vahevahe ʻoku faí.
18. Ko e hā ʻoku ʻikai ai ko ha kalofanga ki ha taha ʻa e taʻe hā mai ʻa e Tuʻí?
18 ʻOku ʻikai ko ha kalofanga ia ki ha taha ʻa e taʻe hā mai lolotonga ʻo e ʻi ai, pe pa·rou·siʹa, ʻa e Fanautama ʻa tangatá. ʻOku fakaʻau ke toe tokolahi ange ʻa e faʻahinga hangē ha fanga sipí he ʻahó ni ʻoku nau kau fakataha mo e kalasi tamaioʻeikí ʻi hono malangaʻi ʻa e ongoongo lelei ʻo e Puleʻanga ʻo e ʻOtuá ʻi māmani lahi, ʻo nau ʻai ʻenau maamá ke ulo atu. Ko e moʻoni, kuo aʻu ʻenau ngāue fakamalangá ki he tapa kotoa pē ʻo e māmaní.—Mātiu 24:14.
19. Ko e hā ʻa e ngaahi ʻulungāanga ʻo e kalasi fanga sipí ʻoku fakahaaʻi ʻi he talanoa fakatātā fekauʻaki mo e fanga sipí pea mo e fanga kosí?
19 Ko e hā ʻoku fakapaleʻi ai ʻe he Tuʻi ko e Tauhi-Sipí ʻa e faʻahinga ko e kalasi fanga sipí ʻaki ha kahaʻu mohu tāpuaki? Koeʻuhi ko ʻenau poupou ʻaufuatō ki he ngāue fakamalanga fekauʻaki mo e Puleʻangá pea mo e anga-ʻofa ʻoku nau fakahāhā ki hono ngaahi tokoua paní, ʻa ia naʻe pehē ʻe Sīsū ʻoku hangē pē ko hano fai ange ia kiate ia tonu. Ko ia ai, ʻoku lea ʻa e Fanautama fakatuʻi ʻa tangatá kiate kinautolu: “Omi kimoutolu, ʻa e faʻahinga kuo fakamonuʻia ʻe heʻeku Tamai, ʻo mou hoko ki he puleʻanga kuo toka teuteu moʻomoutolu talu e tanu pou ʻo mamani.”—Mātiu 25:34; 28:19, 20.
Ko e Tokoni ki he Tuʻí
20, 21. Ko e hā ʻa e fakamoʻoni ʻoku fakahaaʻi ai ʻe he fanga sipí ʻoku nau kau ki he tafaʻaki ʻo e Puleʻangá?
20 Kae fakatokangaʻi, ʻi hono fakaafeʻi ʻe he Tuʻí ʻa e fanga sipí ni ke nau maʻu ʻa e nofoʻanga fakaemāmani ʻoku maʻu ʻa e mafai ki ai ʻe he Puleʻanga ʻo e ʻOtuá, ʻoku nau fakahā ʻenau ʻohovale. ʻOku nau ʻeke ange kiate ia: ‘ʻEiki, ʻanefē naʻa mau fai ai ʻa e ngaahi meʻá ni kotoa kiate koe?’ ʻOkú ne tali ange: “Ko au e, ʻoku ou talaatu, ʻI hoʻomou fai pehe ki ha taha ʻo hoku ngāhi tokoua mamaʻo ni, naʻa mou fai ia kiate au.” (Mātiu 25:40) ʻI he hā ʻa Sīsū kia Mele Makitaline ʻi he ʻaho naʻá ne toe tuʻu aí, naʻe lea ʻa Sīsū ʻo kau ki hono ngaahi tokoua fakalaumālié ʻi heʻene pehē kiate ia: “Ka ke ʻalu ki siʻoku ngaahi tokoua.” (Sione 20:17) ʻI he lolotonga ʻo e taimi ʻo e ʻi ai taʻe hā mai ʻa Sīsuú, ko e toenga tokosiʻi pē ʻo hono ngaahi tokoua fakalaumālie ʻe toko 144,000 ʻoku nau kei moʻui ʻi he māmaní.
21 Koeʻuhi ʻoku taʻe hā mai ʻa Sīsū ʻi hēvani, ʻoku fai taʻe fakahangatonu ʻe he kakai hangē ha fanga sipi ko ení ʻa e ngaahi meʻa anga-ʻofa ko ení kiate ia. ʻOku nau sio kiate ia ʻi hono taloní ʻaki pē honau mata ʻo e tuí. ʻOku houngaʻia ʻa Sīsū ʻi he ngaahi feinga kotoa ʻoku nau fai ke tokoniʻi ʻa hono ngaahi tokoua fakalaumālié, ʻa ia te nau hoko ko hono kaungāʻea ʻi hēvaní. Ko e meʻa ʻoku fai ki hono ngaahi tokouá ʻokú ne lau ʻoku fai ange ia kiate ia tonu. ʻOku fai fakakaukauʻi ʻe he faʻahinga hangē ha fanga sipí ha ngaahi meʻa lelei ki he ngaahi tokoua ʻo Kalaisí koeʻuhi ʻoku nau ʻilo ko e ngaahi tokoua kinautolu ʻo Kalaisi. ʻOku nau ʻiloʻi ko e ngaahi tokoua fakalaumālie ʻo Sīsuú ko e kau ʻamipasitoa kinautolu ʻo e Puleʻanga ʻo Sihová, pea ʻoku nau fie fakahā fakapatonu ʻoku nau kau fakataha mo kinautolu ki he tafaʻaki ʻo e Puleʻanga ko iá.
22. Ko e hā ʻa e pale ki he kalasi fanga sipí? (Fakafehoanaki mo Fakahā 7:14-17.)
22 Naʻe tomuʻa ʻiloʻi ʻe Sihova ʻe ʻasi ʻa e kalasi ko eni hangē ha fanga sipí he lolotonga ʻa e taimi ʻo e ʻi ai ʻa hono ʻAló, pea kuó ne tuku tauhi ha pale fakaofo maʻanautolu! ʻE maʻu ʻe he fuʻu kakai lahí ʻa e ngaahi tāpuaki ko e melino ʻi heni ʻi he māmaní he lolotonga ʻa e Pule fakafiefia Taʻu ʻe Taha Afe ʻa e Tuʻi ʻa Sihová, ko Sīsū Kalaisi.
23. ʻI he ngaahi founga fē ʻoku fai ʻilo pau ai ʻe he fanga sipí ʻenau tokoni ki he ngaahi tokoua ʻo e Tuʻí?
23 ʻI heʻetau fakakaukau atu ki he ngaahi kikite ʻa e Tohi Tapú ʻa ia ʻoku kaunga tonu ki he taimi ʻo e ʻi ai ʻa Kalaisí, fakataha mo e talanoa fakatātā ʻa Sīsū fekauʻaki mo e fanga sipí mo e fanga kosí, ko e hā ʻoku tau ʻilo mei aí? Ko e meʻá ni: ʻOku ʻikai ko ha fai ʻi he taʻe ʻilo pe noaʻia pē ʻa e fai lelei ki ha taha ʻo e ngaahi tokoua fakalaumālie ʻo e Tuʻí ʻa ia ʻoku ʻai ai ha taha ko ha sipi ʻo maʻu ʻa e tuʻunga māʻoniʻoni ʻi he ʻao ʻo e ʻOtuá mo ʻene Tuʻí. ʻOku ʻilo ʻe he faʻahinga ʻo e kalasi fanga sipí ʻa e meʻa ʻoku nau faí, neongo ʻoku ʻikai te nau sio ʻaki honau mata moʻoní ki he Tuʻi ʻoku lolotonga pulé. ʻOku nau feinga ke tokoni ki he ngaahi tokoua ʻo e Tuʻí ʻo ʻikai ʻi he founga fakamatelie pē kae pehē foki ʻi he founga fakalaumālie. ʻO anga-fēfē? ʻAki ʻenau tokoni kiate kinautolu ʻi hono malangaʻi ʻa e ongoongo lelei ʻo e Puleʻanga ʻo e ʻOtuá pea mo hono fai ʻa e ngaahi ako Tohi Tapu koeʻuhi ke ngaohi ai ʻa e kau ākonga maʻa Kalaisí. Ko ia, ʻi he ʻahó ni ʻoku laka hake ʻi he toko fā miliona ʻa e kau fanongonongo ʻo e Puleʻanga ʻo e ʻOtuá ʻoku nau tapua atu ʻa e maamá.
Fakalahi ʻo e Ngaahi Ngāue
24. Ko e hā ʻa e ngaahi ngāue anga-ʻofa kuo nau ʻai ʻa e kalasi tamaioʻeikí ʻo nau hoko ko e kakai fiefia lahi taha ia ʻi māmani he ʻahó ni?
24 Tau toe lave ki he niʻihi ʻo e ngaahi ngāue lelei mo lahi ʻa e kalasi tamaioʻeiki anga-tonú. ʻUluaki, kuo fakanofo ʻa e kalasi tamaioʻeikí ke ne tokangaʻi ʻa e ngaahi meʻa kotoa pē ʻa e Pulé—ʻa ʻene ngaahi meʻa mahuʻinga ʻi māmani fekauʻaki mo e Puleʻangá—pea ko e ngaahi meʻa kotoa pē ko ení ʻoku hokohoko atu ʻenau tupulakí. Ko hono uá, ʻoku fafangaʻi ʻaki ʻa e meʻakai fakalaumālie ʻe he kalasi ko ení ʻo ʻikai ngata pē ki he kau nofoʻanga paní ka ki he fuʻu kakai lahi ʻoku tupulaki ai pē. Ko hono tolú, ʻoku takimuʻa ʻa e kalasi tamaioʻeikí ʻi hono fakamafola atu ʻa e maama fekauʻaki mo e Puleʻangá. Ko hono fā, ko e ngāue fakalahi lahi taha ʻa e tamaioʻeikí ko hono fakatahatahaʻi ʻa e fuʻu kakai lahi ʻo e fanga sipi kehé, ʻo ʻomai kinautolu ki he temipale fakalaumālie ʻa Sihová. Ko hono nimá, ʻi he poupou ʻaufuatō ʻa e faʻahinga hangē ha fanga sipí, ʻoku tokonaki ai ʻe he tamaioʻeikí ʻa e ngaahi faiʻanga ngāue kuo fakalahi ki he ngaahi ʻōfisi vaʻa takatakai ʻi he māmaní, pea pehē ki he ʻuluʻi ʻōfisi ʻi he ʻIunaite Seteté. Kuo ʻai ʻe he ngaahi ngāue anga-ʻofa peheé ʻa e kalasi tamaioʻeikí ʻo nau hoko ko e kakai fiefia taha ia ʻi māmani he ʻahó ni, pea kuo nau ʻai ʻa e laui miliona kehe ʻo e kakaí ke nau fiefia foki. ʻOku fakamālō ʻa e faʻahinga kotoa ko ení kia Sihova ko e ʻOtuá pea mo Sīsū Kalaisi, ʻa ia kuó na tataki ʻa e fakalahi ʻo e ngaahi ngāue ʻa e tamaioʻeiki potó!
25. ʻE kei hokohoko atu nai ʻa e fanga sipí ke poupou ki he kalasi tamaioʻeikí ʻi he founga fē, pea ko e hā ʻa e ʻamanaki ʻoku nau fakatuʻotuʻa atu ki aí?
25 ʻOku ngāue mālohi ange ʻa e kalasi tamaioʻeikí he taimí ni ʻi ha toe taimi ki muʻa ʻi hono ngaahi fatongia kuo vaheʻi ange ʻe he ʻOtuá. Kuo mei ʻosi atu ʻa e taimi ʻoku toe ki muʻa pea kamata ʻa e “mamahi lahi”! (Mātiu 24:21) He toki meʻa mahuʻinga lahi ē ke nofo maʻu ʻa e faʻahinga ko eni ko e fanga sipi ʻa e ʻOtuá ʻi he tafaʻaki toʻomataʻu ʻo e hōifua ʻa e Tuʻi-Tauhisipí! Ko ia, ʻai ke tau hokohoko atu faivelenga kotoa ke poupou ki he tamaioʻeiki anga-tonu mo potó. He ʻi hono fai pē ʻa e meʻa ko ení ʻe ʻi ai ʻa e ʻaho vavé ni mai ʻe malava ai ʻa e faʻahinga hono kotoa hangē ha fanga sipí ke fanongo ki he ngaahi lea fakafiefiá ni: “Omi kimoutolu, ʻa e faʻahinga kuo fakamonuʻia ʻe heʻeku Tamai, ʻo mou hoko ki he puleʻanga kuo toka teuteu moʻomoutolu talu e tanu pou ʻo mamani.”
Te Ke Lava ʻo Tali?
◻ Ko e hā ʻa e ʻuluaki fakamaau ʻi he hili ʻa e ʻi he taloní ʻa e Tuʻí?
◻ Ko e hā hano fakahoko ʻi onopooni ʻo e Mātiu 24:45-47?
◻ ʻI he fekauʻaki mo e fakalahi ʻo e ngaahi ngāué, ko e hā ʻa e ngaahi ngāue ʻoku houngaʻia lahi ki ai ʻa e kalasi tamaioʻeikí mo e fuʻu kakai lahí?
◻ Ko e hā ʻa hono fakahoko ʻo e Mātiu 25:34-40 he lolotonga ʻo e pa·rou·siʹa?
[Fakatātā ʻi he peesi 54]
ʻOku tuku ʻe he pulé ʻene ngaahi meʻa kotoa pē ke tokangaʻi ʻe he tamaioʻeiki anga-tonú
[Fakatātā ʻi he peesi 55]
Kuo nofo ʻa Sīsū ki hono taloni lāngilangiʻiá ke fakamāuʻi ʻa e faʻahinga ʻo e tangatá