Naʻá Ke ʻIloʻi?

Ko e hā naʻe fakahalaiaʻi ai ʻe Sīsū ʻa hono fai ha ngaahi fuakavá?

NAʻE fakaʻatā ʻi he Lao ʻa Mōsesé ʻa e kakaí ke nau fai ha ngaahi fuakava ʻe niʻihi ʻaki hono leaʻaki ha meʻa hangē ko ení, “ʻOku ou fakapapau atu ʻi he ʻOtuá,” pe “ʻOku ou fakapapau atu ʻi he huafa ʻo Sihová.” Kae kehe, ʻi he taimi ʻo Sīsuú, naʻe hoko ai ʻo mātuʻaki failahia ʻa e fuakavá ʻo fai ai ʻe he kau Siú ha fakapapau ʻi he meimei meʻa kotoa pē naʻa nau leaʻaki. Naʻa nau fai ení ke fai ha tui lahi ange ki he meʻa naʻa nau leaʻakí, ka naʻe fakahalaiaʻi tuʻo ua ʻe Sīsū ʻa e tōʻonga taʻeʻaonga ko ení. Naʻá ne akoʻi: “ʻAi pē hoʻomou lea ‘ʻIó’ ke ʻuhingá ko e ʻio, mo hoʻomou ‘ʻIkaí’ ke ʻikai.”—Māt. 5:33-37; 23:16-22.

Fakatatau ki he Theological Dictionary of the New Testament, ʻoku tokoniʻi kitautolu ʻe he Talamatá ke sio ki hono failahia ʻe he kau Siú ʻa e fuakavá, pe fakapapau naʻe moʻoni ʻenau leá. Naʻe fai ení koeʻuhí ʻoku fakamatalaʻi fakaikiiki lahi ʻe he Talamatá ʻa e ngaahi fuakava naʻe pau ke fai ki ai mo e ngaahi fuakava naʻe lava ke maumauʻi.

Naʻe ʻikai ko Sīsū pē ʻa e toko taha naʻá ne fakahalaiaʻi ʻa e tōʻonga hala ko ení. Ko e fakatātaá, naʻe tohi ʻa e faihisitōlia Siu ko Feleviasi Siosifasi fekauʻaki mo ha lotu mavahe faka-Siu naʻa nau fakaʻehiʻehi mei he fai ha fuakavá. Ko e kau mēmipa ʻi he lotu mavahe ko iá naʻa nau tui ko hono fai ha fuakavá naʻe kovi ange ia ʻi he loí. Naʻa nau tui kapau naʻe pau ke fai ʻe ha tokotaha ha fuakava koeʻuhí ke tui ange kiate ia ʻa e niʻihi kehé, ko e tokotaha leva ko iá kuo pau pē ʻokú ne loi. Ko e tohi faka-ʻapokalifa faka-Siu ko e Wisdom of Sirach, pe ko e ʻEkelesiatikusi, (23:11) ʻoku leaʻaki meimei tatau ai: “Ko ha tangata ʻokú ne fai ha fakapapaú ʻokú ne mātuʻaki maumau-lao.” Naʻe fakahalaiaʻi ʻe Sīsū ʻa hono fai ha ngaahi fuakava fekauʻaki mo e ngaahi meʻa taʻemahuʻingá. Kapau ʻoku tau tala maʻu pē ʻa e moʻoní, ʻoku ʻikai totonu ke tau fai ha fakapapau ke fai ha tui lahi ange ai ki he meʻa ʻoku tau leaʻakí.